16
Panulung ma saga Aꞌa Sukuꞌ Tuhan
1 Na, in pasal sīn sinakap eꞌbi panulung saga pagkahibi sukuꞌ Tuhan ma lahat Yahudiya: beyaꞌunbi bay panganggaraꞌku ma saga palhimpunan jamaꞌa si Isa mahēꞌ ma lahat Galatiya. 2 Kaꞌam ilu dangan maka dangan, subay kam amasaddī na sīn ma sakahabaꞌ Ahad. Tongorinbi sīn bay tausahabi ma deyom dapituꞌ palabay inān. Bang aheka, aheka isab ya pamuwanbi, bang kulang, na arikiꞌ du isab pamuwanbi. Pagdakayuꞌunbi sīn bay pagsaddī-saddībi kamemon, supaya bang aku atꞌkka piꞌilu, aniyaꞌ na asal sīnbi sakap panulung. 3 Jari makapiꞌilu paꞌin aku, sōꞌku saga aꞌa tapeneꞌbi amowa sīn inān ni Awrusalam. Pabowahanku sigām sulat pamakilā ma sigām ni saga aꞌa Awrusalam eꞌ. 4 Bang ma kira-kiraku subay du isab aku pehēꞌ ni Awrusalam, na, magbeyaꞌ du aku maka sigām.
Kagaraꞌan si Paul
5 Agaraꞌ aku piꞌilu ni kaꞌam ni lahat Kurintu, sagōꞌ palabay aku min lahat Makidunya dahū sabab aniyaꞌ gawiku pehēꞌ. 6 Atꞌggol-tꞌggol araiꞌ kamailuku ma kaꞌam, kalu pinalabay lagiꞌ timpu pamaliyu boꞌ yampa aku palanjal minnilu, ati kaꞌam du iya amatuntul aku piꞌingga-piꞌingga ya palanjalanku. 7 Mbal aku bilahi patꞌnnaꞌ mailu ma kaꞌam bang daiꞌ-daiꞌ sadja. Kabayaꞌanku subay atꞌggol-tꞌggol kamailuku ma kaꞌam, bang kabayaꞌan Tuhan isab. 8 Sagōꞌ maitu giꞌ aku ma Epesos sampay puwas hinang Pentekosta. 9 Sabab aheya hinang pamahinang aku maitu, hinang aheya kalagihanna, boꞌ paꞌin aheka saga aꞌa anaggaꞌ aku.
10 Bang si Timuti atꞌkka piꞌilu ni kaꞌam, paiddahunbi iya pahāp sabab hinang Tuhan ya nihinang eꞌna, buwat du aku. 11 Daꞌa iya siya-siyahunbi. Bang iya palanjal na minnilu subay iya patuntulbi supaya ahāp kalꞌngngananna ati boꞌ iya makabīng ni aku, sabab lagaranku iya maka saga danakantam kaseheꞌan.
12 Na, in pasal danakantam si Apollos, min heka na iya bay pogosku aneheꞌan saga danakantam kaseheꞌ itu anibaw kaꞌam. Sagōꞌ halam konoꞌ aniyaꞌ galakna piꞌilu buwattinaꞌan. Bang aniyaꞌ waktuna ahāp ma sinosōng piꞌilu du iya.
Bissala Katangbusan
13 Pajaga kam. Patotogunbi pangandolbi ni si Isa. Daꞌa kam agawa. Paluwasunbi kosogbi. 14 Ma ai-ai hinangbi, subay lasabi ni pagkahibi ya pamanuyuꞌanbi.
15 Na, saga dauranakanku, makataꞌu du kam pasal si Estepanas magtaiꞌanak ilu. Dahū sigām bay amꞌnnal ma si Isa min kamemon ma lahat Akaya ilu, maka atogol sigām anabangan saga pagkahi sigām sukuꞌ Tuhan. Amuꞌku junjung ni kaꞌam, 16 beyaꞌunbi ai-ai pamatꞌnnaꞌ kaꞌam eꞌ saga aꞌa buwat si Estepanas inān maka saga seheꞌ sigām maghinang pakosog ni Tuhan.
17 Akōd aku pagka atꞌkka na piꞌitu disi Estepanas maka si Portunatus maka si Akaikus. Minsan kam mbal makapiꞌitu kamemon, aniyaꞌ na panandalanku entomku sabab min saga aꞌa tꞌllungan itu. 18 Taga-kasannangan atayku min sigām, buwat kasannangan ataybi isab min sigām. Patut du subay pagaddatanbi saga aꞌa buwat sigām itu.
19 Na, saga pagkahibi jamaꞌa si Isa magtipun ma kalahat-lahatan Asiya itu, amabeyaꞌ minsan laꞌa hal lapal sigām. Ya du si Akila maka hꞌndana si Prisila, maka saga jamaꞌa ya biyaksa magtipun ma lumaꞌ sigām, amabeyaꞌ minsan laꞌa hal lapal sigām pagka Almasihin kam saliꞌ-saliꞌ. 20 Kamemon isab saga dauranakantam maitu, amabeyaꞌ isab pagaddat sigām ma kaꞌam. Maka kaꞌam isab mailu, bang kam magsabu subay kam magsiyum tandaꞌ paglasabi.
21 Aku na pasꞌlleꞌ anulat maka sulatan tanganku, boꞌ kam pabeyaꞌanku minsan laꞌa hal lapalku.
22 Bang aniyaꞌ mailu mbal alasa ma Panghūꞌ Isa, subay iya pinatꞌkkahan mulkaꞌ Tuhan.
Sagōꞌ “marana tā”, hatina, “O Panghūꞌ kami, piꞌitu na ka!”
23 Mura-murahan, bang paꞌin kam pinaniyaꞌan tatabangan min si Isa Al-Masi, Panghūꞌtam.
24 Alasa aku ma kaꞌam kamemon ma sabab si Isa Al-Masi ya pagdakayuꞌantam. Amin.
Wassalam