1 Kurintu 15

Pasal Kallum Al-Masi Pabalik

¹ Na, saga dauranakanku, bilahi aku amaentoman kaꞌam pabīng pasal lapal ahāp bay pagnasihatku ma kaꞌam. Bay na tataimaꞌbi lapal inān pasangdolan imanbi. ² Sabab lapal itu ya sababanna angkan kam lappasan min hukuman dusa, bang paꞌin kam patꞌttog ma panduꞌ bay pamataꞌuku kaꞌam. Bang kam gantaꞌ mbal patꞌttog, kaliman bay kapamꞌnnalbi.

³ Bay pasampayku ni kaꞌam lapal panduꞌ bay pamataꞌu aku, panduꞌ labi ahalgaꞌ min kamemon bay pagnasihatku ni kaꞌam. Hatina Al-Masi bay amatay pamapuwas dusatam, buwat bay tasulat ma deyom Kitab. ⁴ Amatay paꞌin, bay iya kinubul, maka taꞌabut paꞌin katꞌllumbahangina ma deyom kubul, pinakallum iya pabīng buwat bay tasulat ma deyom Kitab. ⁵ Allum paꞌin iya, patuwaꞌ iya ni si Petros, boꞌ patuwaꞌ isab iya ni saga aꞌa kasangpūꞌ maka duwa bay kawakilanna. ⁶ Puwas eꞌ patuwaꞌ iya ni saga aꞌa bay pamulid ma iya, aniyaꞌ sigām labi lima hatus bay magtimuk. Kahekaꞌan sigām masi allum sampay ni kabuwattinaꞌanan sagōꞌ aniyaꞌ kaseheꞌan waꞌi na amatay. ⁷ Puwas eꞌ isab patuwaꞌ iya ni si Yakub, boꞌ patuwaꞌ pabalik ni saga aꞌa bay kawakilanna kamemon. ⁸ Katapusanna, patuwaꞌ iya ni aku, boꞌ paꞌin aku itu sapantun ondeꞌ-ondeꞌ nianakan ma nggaꞌi ka giꞌ bulananna.

⁹ Aku itu areyoꞌ min aꞌa kawakilan kamemon. Arapun aku daꞌa niōnan wakil si Isa, ma sabab kapaminjalaꞌku ma saga bebeyaꞌanna. ¹⁰ Sagōꞌ aheya lasa maka aseꞌ Tuhan ma aku, ya angkan buwattitu na kahālanku. Aniyaꞌ isab kamaujuran lasana maka aseꞌna ma aku, sabab ai-ai pamahinangna aku subay sangsāꞌanku toꞌongan labi giꞌ min saga pagkahiku ya kawakilan si Isa. Sagōꞌ nggaꞌi ka min kosogku ya angkan aku makahinang buwattēꞌ, sagōꞌ min tabang Tuhan ma aku. ¹¹ Malaingkan dakayuꞌ du lapal ya pinasaplag eꞌ kami kamemon, ai na ka aku atawa saga aꞌa kawakilan kaseheꞌan. Ya koꞌ inaꞌan lapal ya pagkahagadbi na.

Pasal Kitam Pinakallum Pabīng

¹² Na, pagka Al-Masi ya pagnasihat kami, in iya bay pinakallum eꞌ Tuhan min kamatayna, angay kaꞌam kaseheꞌ ilu ahꞌlling in aꞌa magpatayan mbal pinakallum pabīng? ¹³ Bang bꞌnnal ya yukbi, hatina Al-Masi halam du bay pinakallum min kamatayna. ¹⁴ Maka bang bꞌnnal ya yukbi in Al-Masi halam bay pinakallum pabīng, halam aniyaꞌ kapūsan bay pagnasihat kami ma kaꞌam, maka pagkahagadbi halam aniyaꞌ kagunahanna. ^15-16 Nggaꞌi ka hal eꞌ-i. Bang bꞌnnal ya yukbi in saga aꞌa magpatayan mbal pinakallum pabalik eꞌ Tuhan, hatina in Al-Masi halam bay pinakallum pabalik. Maka putingan isab kami itu pasal Tuhan, pagka yuk kami in iya bay makapakallum Al-Masi, boꞌ paꞌin halam. ¹⁷ Maka bang Al-Masi halam bay pinakallum pabīng, hatina pangandolbi ma iya halam du aniyaꞌ kapūsanna, maka dusabi masi angakkot ma kaꞌam. ¹⁸ Saga bebeyaꞌan si Isa isab ya magpatayan inān, waꞌi amutawan min Tuhan. ¹⁹ Maka halam aniyaꞌ kahāpan lagaranta ma liyu ahirat bang bꞌnnal halam aniyaꞌ kaholatantam min Al-Masi puwas min dunya ītu. Jari kapaganduꞌ-anduꞌan kitam labi min aꞌa kamemon.

²⁰ Sagōꞌ ya bꞌnnalna, tantu Al-Masi tapakallum min kamatayna. Pinakallum iya dahū min kamemon, pamatuman in aꞌa magpatayan pasunuꞌ pinakallum. ²¹ Magkamatay binangsa manusiyaꞌ kamemon sabab dusa ya bay tahinang eꞌ dangan aꞌa, damikiyanna isab tapakallum manusiyaꞌ kamemon ma sabab tahinang eꞌ aꞌa dangan. ²² Magkamatay manusiyaꞌ kamemon sabab dambeyaꞌan maka si Adam, sagōꞌ pinakallum kitam kamemon pagka dambeyaꞌan maka Al-Masi. ²³ Pinakallum kitam dangan maka dangan ma untulanna. Dahū Al-Masi, boꞌ kitam palsukuꞌanna ma waktu kapiꞌituna pabalik. ²⁴ Puwas eꞌ, taꞌabut gantaꞌan dunya ati taraꞌug eꞌ Al-Masi kamemon bay palbantahan Tuhan, ai na ka saga nakuraꞌ, ai na ka saga kawasa, ai na ka saga gagaꞌosan. Manjari niꞌndeꞌan eꞌ Al-Masi kapagparintana ni Mmaꞌna Tuhan. ²⁵ Sabab maksud Tuhan asal in Al-Masi subay angꞌntan pagparinta sampay taꞌabut waktu karaꞌugna saga palbantahanna kamemon. ²⁶ Bang aubus niraꞌug saga palbantahan kamemon, taraꞌug na banta katapusan, ya na kamatay ma manusiyaꞌ. ²⁷ Sabab tasulat asal ma deyom Kitab, ya yuk-i, “Pinatꞌnnaꞌ eꞌ Tuhan ai-ai kamemon ma deyoꞌ pād-tapeꞌna.” Tantu mbal beyaꞌ Tuhan ma ‘ai-ai kamemon’ ya pinagsambat itu. Atampal koꞌ itu sabab Tuhan ya amatꞌnnaꞌ ai-ai kamemon ma pagbayaꞌan Al-Masi. ²⁸ Bang itu atammat na, pareyoꞌ isab Anak ni iya, ya bay amatꞌnnaꞌ ai-ai kamemon ma deyoꞌanna. Jari Tuhan ya makapagtuhan ma kamemon.

²⁹ Na, bang saupama bꞌnnal ya yuk kaseheꞌan, in aꞌa magpatayan mbal pinakallum pabalik, buwattingga saga aꞌa ya pinandi gantiꞌ saga pagkahi sigām bay amatay? Angay sigām ameyaꞌ ma addat buwattēꞌ, bang hati mbal pinakallum saga pagkahi sigām? ³⁰ Maka kami itu, angay kami magmalillaꞌ palabay min kaꞌaniban sararan-daran, bang kami mbal pinakallum du ma llaw damuli? ³¹ Hakaꞌanta kam, saga dauranakan, in aku itu saꞌagon-agon amatay kahabaꞌ llaw. Malaingkan kaꞌam ya kakōganku ma sabab kapameyaꞌbi ma si Isa Al-Masi ya Panghūꞌtam.

³² Bang hal palkuli-kulihan dunya itu ya holatanku, angay aku angatu ma saga bantaku ma Epesos itu, ya sapantun halimaw angalꞌkkob? Bang aku bꞌnnal mbal pinakallum pabalik ma llaw damuli, ahāp lagiꞌ aku maghāp palasahan ma dunya itu, buwat yuk bissala heꞌ,

“Magkakan kita maka maginum,

sabab amatay du kita ma salung-simuddai.”

³³ Daꞌa pasāꞌunbi pamikilbi. Bang kita danseheꞌan maka aꞌa alaꞌat addatna, tantu kita tabowa maghinang kalaꞌatan. ³⁴ Jari pahantapun pamikilbi! Pahali kam magdusa, sabab aniyaꞌ min kaꞌam ilu masi giꞌ aꞌawam pasal Tuhan, angkan kam subay aiyaꞌ.

Pasal Baran Bahaꞌu

³⁵ Kalu aniyaꞌ atilaw, yukna, “Buwattingga pamakallum aꞌa amatay? Buwattingga baranna bang iya allum pabīng?” ³⁶ Saliꞌ halam aniyaꞌ akkalbi atilaw buwattēꞌ. Pandogahinbi binhiꞌ tinanom. Bang tanombi ni tanaꞌ, subay angahansul dahū boꞌ yampa pauplut ugbusna. ³⁷ Bang kam gantaꞌ ananom binhiꞌ pai atawa binhiꞌ saddī, nggaꞌi ka katibuꞌukan tinanom ya tanombi ni tanaꞌ, luwal binhiꞌna. ³⁸ Manjari binhiꞌ inān pinajukupan eꞌ Tuhan ma buwat kahandakna. Saga binhiꞌ indaginis, magsaddī-saddī pangluwahanna kaniya-kaniya. ³⁹ Sampay ai-ai binangsa taga-napas ma dunya itu, maggintil isab isina kaniya-kaniya. Saddī isi manusiyaꞌ, saddī isi hayop, saddī isab isi kamanuk-manukan maka isi daing.

⁴⁰ Aniyaꞌ baran magindaginis ma sulgaꞌ, aniyaꞌ baran magindaginis ma dunya itu. Saddī manis kabaranan ma sulgaꞌ, saddī isab manis kabaranan ma dunya. ⁴¹ Ahāp sawa mata llaw, ahāp sawa bulan, maka ahāp isab sawa bituꞌun, sagōꞌ magsaddī-saddī ya kahāp sawa sigām. Minsan saga bituꞌun, magsaddī-saddī du isab kahāp luwana.

⁴² Na, buwattēꞌ ya dalil manusiyaꞌ magpatayan bang pinakallum pabīng min kamatay. Ya baran kinubul ma deyom tanaꞌ angahansul du, saguwāꞌ bang pinakallum na mbal magkamatay ni kasaumulan. ⁴³ Pagkubul ma baranta, alaꞌat nindaꞌ maka halam aniyaꞌ kosogna. Sagōꞌ bang pinakallum na pabīng, aheya manisna maka akosog toꞌongan. ⁴⁴ Ya baran manusiyaꞌ kinubul itu papanjarihan asal bay min dunya itu, sagōꞌ bang talbangun na min kamatay, baran bahaꞌu na, papanjarihan sulgaꞌ na! Bang aniyaꞌ baran papanjarihan min dunya itu, aniyaꞌ du isab baran papanjarihan ma sulgaꞌ, ⁴⁵ buwat tasulat ma deyom Kitab, ya yuk-i, “Si Adam tagnaꞌ bay kabuwanan kallum eꞌ Tuhan.” Sagōꞌ aniyaꞌ giꞌ Adam damuli, hatina Al-Masi ya poꞌonan kallum pamakallum ma manusiyaꞌ. ⁴⁶ Subay dahū baranta papanjarihan min dunya, boꞌ yampa baran papanjarihan ma sulgaꞌ. ⁴⁷ Si Adam tagnaꞌ inān bay kinompol min tanaꞌ, sagōꞌ si Adam damuli itu min sulgaꞌ asal. ⁴⁸ Saga aꞌa sukuꞌ ma dunya itu dasaliꞌ asal maka si Adam ya bay kinompol min tanaꞌ. Sagōꞌ aꞌa sukuꞌ ma sulgaꞌ pasaliꞌ ni aꞌa dakayuꞌ ya min sulgaꞌ, hatina si Isa. ⁴⁹ Ya luwa baranta ma buwattitu anꞌppu baran si Adam ya bay kinompol min tanaꞌ, sagōꞌ bang kita mahēꞌ ma sulgaꞌ anꞌppu kita baran si Isa, aꞌa min sulgaꞌ.

⁵⁰ Hakaꞌanta kam, saga dauranakanku, in baranta ma dunya itu mbal du kaniyaꞌan palsukuꞌan ma pagparinta Tuhan. Baranta magkahaluꞌ itu mbal kaniyaꞌan kallum taptap ni kasaumulan. ⁵¹ Pakale kam boꞌ kam pataꞌuku pasal bay nilimbungan eꞌ Tuhan waktu tagnaꞌ, sagōꞌ pinabukis na ma buwattinaꞌan. Kitam bebeyaꞌan si Isa Al-Masi mbal magkamatay kamemon, sagōꞌ pinindahan du barantam kamemon ⁵² ma deyom dasasaꞌat, ma dapillawan mata. Saruꞌun-duꞌun sadja du bang pinahꞌlling na tiyup-tiyup pamatapus alam. Saruꞌun-duꞌun pinakallum du saga pagkahitam bay magpatayan, ati mbal na magkamatay sampay ni kasaumulan. Maka kitam ya masi allum ma waktu kapiꞌituna, kapindahan du barantam kamemon. ⁵³ Subay pinindahan barantam magkahaluꞌ itu ni baran taptap allum. Subay pinindahan baran magkahaluꞌ itu ni baran mbal magkamatay. ⁵⁴ Na, bang kapindahan na baranta magkahaluꞌ ni baran taptap allum, maka bang baranta magkamatay itu pinindahan ni baran mbal magkamatay sampay ni kasaumulan, manjari tatuman na ya bay kinallam ma deyom Kitab, ya yuk-i,

“Halam na aniyaꞌ kamatay ma manusiyaꞌ,

sabab taraꞌug na eꞌ Tuhan.

⁵⁵ Mbal na kitam magmula eꞌ kamatay,

mbal kitam tināw pinananaman bisana.”

⁵⁶ Ya angkan manusiyaꞌ tināw amatay sabab aniyaꞌ dusa sigām song pinatꞌnnaꞌan kabinasahan. Ya poꞌon dusa sigām subay bininasa, sabab saraꞌ Tuhan ya bay talanggal eꞌ sigām. ⁵⁷ Saguwāꞌ aheya pagsukulantam ni Tuhan, ya amuwanan kitam daꞌugan. Mbal na kitam tināw amatay sabab kapuwasan na dusatam eꞌ si Isa Al-Masi Panghūꞌtam.

⁵⁸ Angkanna, saga dauranakan kinalasahan, patotogunbi pangandolbi ma si Isa, daꞌa kam apinda min pameyaꞌbi ma iya. Puspusinbi hinang Panghūꞌ sabab kataꞌuwanbi asal, ai-ai hinangbi ma iya ajatu sadja du.