14
Saga Kapandayan Pamuwan eꞌ Rū Tuhan
1 Pagmatayinbi lasa, tuyuꞌinbi isab saga kapandayan min Rū Tuhan, lubaꞌ-lagiꞌna kapandayan magpaluwas lapal bay min Tuhan. 2 Bang aꞌa kabuwanan kapandayan amissala saga bahasa mbal tahati eꞌ kahekaꞌan, Tuhan du ya pamissalahanna, nggaꞌi ka pagkahina manusiyaꞌ, sabab halam aniyaꞌ manusiyaꞌ makahati iya. Pinabissala iya eꞌ Rū Tuhan sagōꞌ kalimbungan hatina pagga halam aniyaꞌ makahatian iya. 3 Sagōꞌ bang aꞌa amaluwas lapal bay min Tuhan, pamissalahanna saga pagkahina manusiyaꞌ, angkan sigām kaniyaꞌan tatabangan maka kakosogan iman, maka kahantap pangatayan. 4 Bang aꞌa gantaꞌ amissala ma saga bahasa mbal tahati, luwal baranna ya tatabangna, sagōꞌ bang aꞌa amaluwas lapal bay min Tuhan tatabangna saga jamaꞌa si Isa dapalhimpunan.
5 Kaꞌamuhan aku bang kaꞌam kamemon ilu makabissala ma saga bahasa mbal tahati eꞌ kahekaꞌan, sagōꞌ labi giꞌ ahāp bang kam kabuwanan kapandayan pamaluwas lapal bay min Tuhan. Sabab bang aꞌa ataꞌu amaluwas lapal bay min Tuhan, aheya lagiꞌ kagunahanna min aꞌa amissala bahasa saddī. Taga-kagunahan isab saga bahasa mbal tahati bang paꞌin aniyaꞌ amahati supaya tatabang saga jamaꞌa kamemon. 6 Saga dauranakanku, bang aku gantaꞌ piꞌilu ni kaꞌam, boꞌ aku amissalahan kaꞌam ma bahasa saddī ya mbal tahatibi, ai kagunahanna? Halam aniyaꞌ. Ya sadja makahāp kaꞌam bang kam bowahanku lapal bay pamataꞌu aku eꞌ Tuhan, atawa pangitaꞌu, atawa pituwa bay min Tuhan, atawa bang kam panduꞌanku.
7 Dalilunbi soleng atawa biyula bang pinahꞌlling. Mbal kahangpatan batbatanna bang mbal ahapal llingna. 8 Ya du isab bang aꞌa amahꞌlling tiyup-tiyup pamasakap saga sundalu, bang mbal ahapal llingna halam aniyaꞌ sundalu magsakap. 9 Damikiyanna ma kaꞌam, bang mbal ahangpat bissalabi mbal tataꞌu bang ai hatulanna. Ai-ai pamissalabi tabowa paleyang eꞌ baliyu. 10 Magginis bahasa ma kaluhaꞌan dunya itu, ati taga-maꞌana kamemon. 11 Sagōꞌ bang aniyaꞌ aꞌa gantaꞌ ahꞌlling ni aku boꞌ mbal tahatiku bahasana, in aku maka aꞌa inān saliꞌ bangsa magsaddī mbal maghati. 12 Na pagka kam atuyuꞌ binuwanan kapandayan eꞌ Rū Tuhan, angutunbi kapandayan aheya kagunahanna, pamahogot pangandol saga jamaꞌa dapalhimpunan kamemon.
13 Angkan koꞌ, bang aꞌa makapamissala ma saga bahasa saddī ya mbal tahati eꞌ kahekaꞌan, subay iya angamuꞌ-ngamuꞌ ni Tuhan boꞌ pinaniyaꞌan kapandayan magpahati ai-ai bay bissalana. 14 Sabab bang aku angamuꞌ duwaꞌa ma bahasa mbal tahatiku, angamuꞌ aku min deyom atayku sagōꞌ mbal talamud akkal-pikilanku. 15 Jari, ai subay hinangku? Angamuꞌ duwaꞌa aku min deyom pangatayanku, maka min akkal-pikilanku. Angalang aku pamudji Tuhan, min deyom pangatayanku maka min akkal-pikilanku. 16 Bang kam gantaꞌ magsukul ni Tuhan min deyom pangatayanbi sadja, boꞌ mbal kahangpatan eꞌ saga jamaꞌa kaseheꞌan ma pagtipunanbi, buwattingga eꞌ sigām makapangahoꞌ ma pagsukulbi ilu? 17 Minsan ahāp bowahan pagsukulbi mbal makahāp pangandol kaseheꞌanbi sabab mbal tahati.
18 Magsukul aku ni Tuhan, in aku kabuwanan kapandayan amissala saga bahasa mbal tahati eꞌ aꞌa kaseheꞌan, labi aheka min kaꞌam kamemon. 19 Sagōꞌ bang aku ma palhimpunan saga jamaꞌa si Isa bilahi giꞌ aku amahꞌlling saga lima kabtang sadja, bang paꞌin tahati eꞌ kaseheꞌan. Daꞌa laksaꞌan kabtang ma bahasa mbal tahati.
20 Saga dauranakanku, pasangpotunbi pikilanbi. Pasaliꞌ kam ni ondeꞌ-ondeꞌ bang takdil ni kalaꞌatan, sagōꞌ daꞌa sengorinbi ondeꞌ-ondeꞌ ma akkal-pikilanbi. 21 Tasulat ma deyom Kitab ya bay pamissala Tuhan ma bangsa Israꞌil, yuk-i.
“Kaꞌam saga aꞌaku itu, yuk Tuhan,
aniyaꞌ sohoꞌku bangsa liyu amissala ni kaꞌam,
aꞌa amissala saga bahasa saddī.
Minsan sigām amalatun lapalku ni kaꞌam,
mbal aku kalebi.”
22 Jari kataꞌuwanta na pasal kapandayan amissala bahasa saddī. Paltandaꞌan koꞌ itu ma saga aꞌa ya mbal magkahagad, nggaꞌi ka ma aꞌa ya magkahagad na. Ya kapandayan amaluwas lapal bay min Tuhan, paltandaꞌan koꞌ inān ma saga aꞌa magkahagad, nggaꞌi ka ma aꞌa ya mbal giꞌ magkahagad. 23 Angkanna, bang kam magtipun, boꞌ aniyaꞌ pasōd aꞌa mbal ataꞌu atawa mbal amꞌnnal, boꞌ takale kam magbissala lullun ma saga bahasa mbal tahati, tantu sigām ahꞌlling in kaꞌam binelaw. 24 Malaingkan bang aniyaꞌ pasōd ni palhimpunanbi hinabu kam amaluwas lapal bay min Tuhan, tantu iya kamattanan eꞌbi kamemon ma sabab dusana maka katōngan dusa isab. 25 Paluwas saga pikilanna bay limbunganna ati tabowa iya pasujud amanyabut ni Tuhan. Magpasabꞌnnal iya, yukna, “Magsabꞌnnal aku, ilu Tuhan ma deyomanbi.”
Paghinang ni Tuhan Subay Auntul
26 Na ai lagiꞌ, saga dauranakanku? Buwattitu pamituwaku: bang kam magtipun dapalhimpunan, ahāp bang kam taga-kalangan pamudji ma Tuhan, atawa pamanduꞌ ma kaseheꞌan, atawa lapal bay pamataꞌu eꞌ Tuhan, atawa bissala ma bahasa saddī. Ahāp isab bang aniyaꞌ aꞌa taga-kapandayan magpahati bissala inān. Ai-ai hinangbi subay patut pamahogot pangandolbi. 27 Bang aniyaꞌ aꞌa bilahi amissala ma bahasa mbal tahati eꞌ kahekaꞌan, sarang bang duwangan atawa tꞌllungan magsꞌlleꞌ-sꞌlleꞌ amissala. Subay aniyaꞌ magpahati isab. 28 Bang halam aniyaꞌ, in aꞌa taga-kapandayan ma bahasa inān subay mbal ahꞌlling ma palhimpunan, luwal ni baranna maka ni Tuhan.
29 Damikiyanna bang aniyaꞌ amaluwas lapal deyoꞌ bay min Tuhan, sarang isab bang duwangan atawa tꞌllungan ya magsꞌlleꞌ-sꞌlleꞌ. Subay nirongdongan isab lapal sigām eꞌ aꞌa kaseheꞌan ma palhimpunan inān bang bꞌnnal bay min Tuhan. 30 Sagōꞌ bang aniyaꞌ aꞌa pinaniyaꞌan lapal min Tuhan sabuna akale-kale, subay pahondong aꞌa ya amissala tagnaꞌ. 31 Bang buwattēꞌ makapagsꞌlleꞌ-sꞌlleꞌ kam kamemon amaluwas lapal min Tuhan, boꞌ supaya kapanduꞌan kamemon sampay pinahantap atay sigām. 32 Saga aꞌa taga-barakat amaluwas lapal bay min Tuhan, subay ataꞌu amaggat bayaꞌ sigām amissala, 33 sabab kabayaꞌan Tuhan subay auntul maka ahantap kapagtipunbi. Mbal iya bilahi ma kasasawan.
Bang bineyaꞌ kabiyaksahan saga palhimpunan Al-Masi kamemon, 34 saga dꞌnda subay pahantap sabu sigām ma palhimpunan. Mbal sigām pinalamud magsambung himumūngan sabab bang ma dakayuꞌ saraꞌ Yahudi, “karꞌndahan subay magmaluluy sadja.” 35 Bang aniyaꞌ panilaw sigām subay hꞌlla sigām ya patilawan pagtꞌkka ni lumaꞌ, sabab makaiyaꞌ-iyaꞌ bang dꞌnda anuli-nuli ma deyom palhimpunanbi.
36 Pangannalbi bahāꞌ in kaꞌam poꞌonan lapal Tuhan? Hal kaꞌam ya pinakalehan lapalna? 37 Bang aniyaꞌ aꞌa mailu amikilan di-na in iya taga-barakat amaluwas lapal min Tuhan, atawa aniyaꞌ saddī bay pamatulun iya eꞌ Rū Tuhan, subay akuhanna sulat itu bay min panohoꞌan Panghūꞌ. 38 Sagōꞌ bang aꞌa ilu mbal akale ma bay yukku heꞌ, daꞌa iya ikutunbi.