13
Pasal Lasa
1 Bang aku saupama taga-kapandayan amissala bahasa manusiyaꞌ kamemon sampay bahasa malaꞌikat, halam du aniyaꞌ pūsna bang aku mbal alasa. Kapandayanku heꞌ saliꞌ lling agung hal angulenseng, atawa mital hal tinitik pehēꞌ-piꞌitu. 2 Minsan aku taga-kapandayan amaluwas lapal deyoꞌ bay min Tuhan, maka minsan tahatiku ai-ai bay tatauꞌ eꞌ Tuhan, minsan isab aku bal-iman boꞌ makapahigin būd min baina, bang halam aniyaꞌ lasaku ma pagkahiku halam du aniyaꞌ kapūsanku. 3 Minsan pamuwanku altaꞌku kamemon ma miskin, maka minsan paglillaꞌku baranku tinunuꞌ ma sabab si Isa, bang halam aniyaꞌ lasaku ma pagkahiku halam du aniyaꞌ pahalaꞌku.
4 Bang kita gantaꞌ alasa ma pagkahita, tantu sigām imananta. Maꞌaseꞌ sadja kita. Mbal kitam angihid, mbal alanga pagatayta, mbal kita magmalangkahi. 5 Bang kita alasa ma kaseheꞌanta aꞌaddat du kita ma sigām. Mbal kita angannal ma baranta sadja, mbal kita abꞌnsi, mbal isab anauꞌ kalaꞌatan ma deyom atayta. 6 Bang kita alasa mbal kita kaꞌamuhan ma aꞌa maghinang alaꞌat, sagōꞌ kaꞌamuhan kita ma kasabꞌnnalan. 7 Bang kita alasa mbal kita sinumu angahampanan seheꞌta. Taptap du kita angandol, maka aholat, maka angimanan ai-ai.
8 Lasa itu anatas ni kasaumulan, sagōꞌ palabay sadja saga kapandayan, minsan kapandayan amaluwas lapal bay min Tuhan, atawa kapandayan amissala saga bahasa mbal tahati. Ya du isab bang kita kabuwanan pangitaꞌu alalom, palabay du isab. 9 Sabab minsan buwattingga pangitaꞌuta, minsan buwattingga kapandayanta amaluwas lapal min Tuhan, taga-kulang du. 10 Sagōꞌ bang tatuman na saga maksud Tuhan, palabay du saga kapandayan taga-kulang inān.
11 Aku itu, ma waktu kaondeꞌ-ondeꞌku, palkuli-kulihan ondeꞌ asal llingku maka pamikilku maka akkalku. Sagōꞌ buwattinaꞌan, pagka aku asangpot na, kaꞌbbahanku kapagondeꞌ-ondeꞌku. 12 Ya taꞌuta buwattinaꞌan saliꞌ dalil aꞌa angꞌndaꞌ ni deyom samin gabul. Sagōꞌ ma llaw sinōng inān magalop du kita maka iya. Kulang lagiꞌ taꞌuku pasal Tuhan buwattinaꞌan, sagōꞌ ajukup du kataꞌuku ma iya ma sinosōng, dasaliꞌ maka kataꞌu Tuhan ma aku.
13 Manjari tꞌllu du anatas ni kasaumulan: pangandolta maka pangaholatanta maka lasata. Sagōꞌ ma deyom tꞌllu itu lasa ya katobtoban ahāp.