12
Saga Kapandayan Pamuwan eꞌ Rū Tuhan
1 Na, saga dauranakanku, bilahi aku amahatian kaꞌam pasal kapandayan pamuwan eꞌ Rū Tuhan supaya kam mbal aꞌawam. 2 Taentombi bay kahālanbi tagnaꞌ, waktubi halam giꞌ beyaꞌ ma si Isa, tabowa-bowa sadja kam eꞌ saga hibilis boꞌ maghinang ni saga pagtuhanan ya mbal makabissala. 3 Angkan yukku ma kaꞌam, bang aꞌa kapagbayaꞌan eꞌ Rū Tuhan mbal iya makapahꞌlling pangkal ma si Isa. Halam aniyaꞌ makapasabꞌnnal in si Isa pagpanghūꞌanna bang nggaꞌi ka min Rū Tuhan.
4 Na, ginisan asal kapandayan ya min Rū Tuhan, boꞌ paꞌin dakayuꞌ du Rū ya amuwan. 5 Magginis isab saga hinang pananabang, sagōꞌ tunggal du Panghūꞌ Isa ya paghinangan. 6 Magginis bowahan hinangta dangan maka dangan, sagōꞌ dakayuꞌ du Tuhan ya amuwan taꞌu boꞌ supaya tahinangta ai-ai bay pamahinang kitam kamemon.
7 Kitam saga bebeyaꞌan si Isa Al-Masi kamemon, pinagtopod-toporan paltandaꞌan in Rū Tuhan patꞌnnaꞌ asal ma deyom ataytam, boꞌ supaya kitam kaniyaꞌan kahāpan sama-sama. 8 Aniyaꞌ aꞌa kabuwanan kapandayan eꞌ Rū Sussi amahati panduꞌ alalom, aniyaꞌ isab kabuwanan kapandayan amaluwas pangitaꞌu. 9 Tunggal du Rū Tuhan ya amuwan saga kapandayan itu, halam aniyaꞌ saddī. Aniyaꞌ kabuwanan pangandol akosog toꞌongan, maka aniyaꞌ kabuwanan kapandayan amauliꞌ saga saki. 10 Aniyaꞌ aꞌa kabuwanan barakat boꞌ tahinangna saga hinang barakatan, aniyaꞌ isab kabuwanan kapandayan eꞌ Rū Tuhan amaluwas lapal Tuhan, maka aniyaꞌ aꞌa kaseheꞌ kabuwanan pangitaꞌu anilang kapandayan aꞌa bang bꞌnnal min Rū Tuhan. Aniyaꞌ aꞌa kabuwanan kapandayan makabissala saga bissala saddī ya mbal tahatina, maka aniyaꞌ isab kabuwanan pangitaꞌu magpahati bang ai binissala inān. 11 Sagōꞌ tunggal du Rū Tuhan ya magkabayaꞌan amuwan saga kapandayan itu, maka pinagsaddī-saddī isab pamuwanna ma manusiyaꞌ dangan maka dangan.
Pamaralilan Pasal Baran Aꞌa
12 Kitam saga bebeyaꞌan Al-Masi saliꞌ dalil dakayuꞌ ginhawa-baran du, boꞌ aheka pagdayawna indaginis. Sagōꞌ minsan aheka pagdayawna, dakayuꞌ du baran atibuꞌuk. 13 Sabab kitam itu, bangsa Yahudi maka nggaꞌi ka Yahudi, banyagaꞌ maka nggaꞌi ka banyagaꞌ, bay pinandi eꞌ Rū Tuhan dakayuꞌ-kayuꞌ, pinapagdakayuꞌ saliꞌ dalil baran atibuꞌuk. Pinahōpan kitam Rū Tuhan saliꞌ-saliꞌ.
14 Na, bang niralil ginhawa baran itu, nggaꞌi ka daginis kamemon pagdayawna. Magginis asal. 15 Bang saupama ahꞌlling tapeꞌ pasal kahālanna, yukna, “Aku itu nggaꞌi ka sukuꞌ ma baran itu, sabab nggaꞌi ka aku tangan.” Sagōꞌ sukuꞌ baran asal, minsan asāꞌ pangannalna. 16 Ya du isab bang tainga ya ahꞌlling, yukna, “Nggaꞌi ka aku sukuꞌ baran itu sabab nggaꞌi ka aku mata,” tantu iya sukuꞌ ma baran. 17 Bang bay mata lungbus katibuꞌukan baran aꞌa, buwattingga pakakalena? Bang bay tainga lungbus, buwattingga pangahamutna? 18 Sagōꞌ ya bꞌnnalna, pinapanjari eꞌ Tuhan ginisan pagdayaw baranta kamemon, nihatul eꞌna ma buwat kabayaꞌanna. 19 Mbal kaōnan baran bang mata lungbus atawa tainga lungbus. 20 Bang pinaꞌamu, aheka ginisan pagdayaw boꞌ paꞌin baran dakayuꞌ du.
21 Mbal manjari bang mata ahꞌlling ni tangan, yukna, “Halam aniyaꞌ kagunahanku ma kaꞌa.” Damikiyanna bang kōk ahꞌlling ni tapeꞌ, yukna, “Halam du aniyaꞌ kagunahanku ma kaꞌam.” 22 Sabab ya bꞌnnalna, saga pagdayaw ya pangannalta aguyaꞌ, aheya asal kagunahanna. 23 Saga pagdayaw baranta ya yukta arikiꞌ kagunahanna, ya na heꞌ subay ayaranta pahāp. Saga pagdayaw ya mbal ahāp nindaꞌ, subay pasꞌmmekanta pahāp. 24 Maka saga pagdayawta ahāp luwana, minsan mbal pinahāp. Bay pinapagsugpat pagdayaw baran itu eꞌ Tuhan ati pinalabi eꞌna kahāpan ma saga pagdayaw ya mbal pinagaddatan, 25 supaya halam aniyaꞌ palsaggaꞌan ma deyom ginhawa-baranta itu. Gom paꞌin magtabang-tiyabangi saga pagdayawna kamemon. 26 Bang kapꞌddiꞌan pagdayaw baranta dakayuꞌ, magtūy pananam ni saga pagdayaw kamemon. Damikiyanna isab bang aniyaꞌ pagdayawta dakayuꞌ sinanglitan, kinōgan baranta kamemon.
27 Ya na itu hatian bay pamaralilku heꞌ: kaꞌam saga jamaꞌa Al-Masi saliꞌ dalil ginhawa-baranna, maka kaꞌam dangan maka dangan saliꞌ pagdayawna indaginis. 28 Jari Tuhan ya amatꞌnnaꞌ kamemon pagdayaw ma deyoman kajamaꞌahan si Isa Al-Masi. Kaissa, aniyaꞌ saga aꞌa kawakilan eꞌna magnasihat lapal ahāp pasal si Isa Al-Masi, karuwana, aniyaꞌ aꞌa kabuwanan kapandayan amaluwas lapal Tuhan ni manusiyaꞌ, katꞌlluna, aniyaꞌ saga aꞌa kabuwanan kapandayan magpanduꞌ. Puwas eꞌ aniyaꞌ kabuwanan kapandayan angahinang saga hinang kawasahan, boꞌ pasunuꞌ aꞌa kabuwanan barakat pamauliꞌna saga saki, maka aniyaꞌ kabuwanan kapandayan anabang ma saga seheꞌna. Aniyaꞌ kabuwanan kapandayan amalꞌngngan hinang aꞌa kaseheꞌan, maka aniyaꞌ isab kabuwanan kapandayan amissala ma bahasa mbal tahati sigām. 29 Mbal kawakilan saga bebeyaꞌan Al-Masi kamemon, mbal sinōꞌ magnasihat kamemon. Mbal kabuwanan kapandayan saga aꞌa kamemon maghinang hinang kawasahan, 30 atawa magpauliꞌ saki, atawa magbissala ma bahasa mbal tahati sigām, atawa amahati bang ai binissala inān. 31 Tuyuꞌinbi kapandayan ya kagunahan toꞌongan.
Saguwāꞌ aniyaꞌ giꞌ palabi toꞌongan min kapandayan itu kamemon, hatina lasata ma kaseheꞌanta.