2 KURINTU
1
Sulat si Paul Karuwana ni saga Aꞌa ma Daꞌira
KURINTU
1 Sulat itu min aku, si Paul, maka si Timuti dakayuꞌ danakantam. Kahandak min Tuhan asal, ya angkan aku kawakilan eꞌ si Isa Al-Masi magnasihat lapalna. Kaꞌam saga jamaꞌa Tuhan magtipun ma daꞌira Kurintu ya pamasampayan kami sulat itu, sampay saga aꞌa sukuꞌ Tuhan ma kaluhaꞌan lahat Akaya.
2 Mura-murahan, bang paꞌin kam pinaniyaꞌan tatabangan maka kasannangan atay eꞌ Mmaꞌtam Tuhan maka eꞌ si Isa Al-Masi, Panghūꞌtam.
Magsukul si Paul ni Tuhan
3 Pudjitam Tuhan, ya Mmaꞌ si Isa Al-Masi Panghūꞌtam. Landuꞌ maꞌaseꞌ Mmaꞌtam, maka poꞌonan tatabangan kamemon. 4 Pinatꞌttogan kami atay eꞌna ma deyom kasusahan indaginis supaya kami isab makapatꞌttog atay aꞌa kaseheꞌan bang sigām isab tꞌkkahan kasusahan. Makatabang kami ma sigām ma sabab panabang Tuhan bay kalabayan kami. 5 Talapay kami angananam saga kabinasahan ya bay kalabayan Al-Masi, maka talapay kami angananam kaheya tabang Tuhan. 6 Bang kami makananam kasusahan sumiyan-sumiyan, kaꞌam ya pinatꞌttogan atay maka pinaniyaꞌan kasalamatan. Bang kami gantaꞌ tinabang, ya du kaꞌam tinabang. Pinakosog pangandolbi boꞌ kaimananbi saga kabinasahan buwat kaimanan kami itu. 7 Manjari bang kaꞌam makananam kabinasahan buwat kami, taptap kami angaholat ma pasalanbi sabab kataꞌuwan kami in kaꞌam tinabang du eꞌ Tuhan buwat panabangna ma kami.
8 Saga dauranakanku, bilahi kami amataꞌuwan kaꞌam pasal kasigpitan bay kalabayan kami mahēꞌ ma lahat Asiya. Bay kami tꞌkkahan kasigpitan alaꞌat makalanduꞌ, angkan kami halam na magniyat allum. 9 Pangannal kami taꞌabut na gantaꞌan, sagōꞌ pinananaman kasukkalan buwattēꞌ boꞌ supaya kami mbal pasangdol ma baran kami. Tuhan sadja ya pasangdolan kami, in iya amakallum saga aꞌa magpatayan. 10 Jari pinuwasan kami min kapiligduhan ya arāk makamula kami, maka tantu kami pinuwasan eꞌna isab ma sinosōng. Ahoꞌ, Tuhan sadja ya pangandolan kami, in kami puwasanna du bang aniyaꞌ kapiligduhan sumiyan-sumiyan. 11 Maka kaꞌam ya anabang isab pagka kam angamuꞌan kami kahāpan ni Tuhan. Ya kaluwasanna, aheka saga aꞌa magsarang-sukul ni Tuhan ma sabab baꞌanan pangamuꞌ-ngamuꞌ ya karūlan eꞌ Tuhan ma pasalan kami.
Apinda Garaꞌ si Paul
12 Na, aniyaꞌ pagbantugan kami. Kataꞌuwan kami min deyom itikad, ahāp sadja bowahan kami tudju ni aꞌa kamemon lubaꞌ-lagiꞌna na ni kaꞌam. Min Tuhan asal, angkan halam aniyaꞌ buliꞌan lling kami tudju ni kaꞌam. Nggaꞌi ka min akkal-pamikil ya kabiyaksahan manusiyaꞌ sagōꞌ min kaheya tabang Tuhan. 13-14 Ai-ai tasulat kami ma kaꞌam tabassabi du maka tahatibi. Ma buwattinaꞌan aniyaꞌ giꞌ halam tataꞌubi ma pasal niyat maka maksud kami, sagōꞌ aholat kami in kaꞌam makataꞌu toꞌongan ma sinosōng, boꞌ supaya kam makapagbantug isab ma pasal kami, bang taꞌabut llaw kabalik Panghūꞌ Isa. Ya du kami amantug ma pasalbi ma llaw du inaꞌan.
15-16 Angkan koꞌ, pagka halam aniyaꞌ hawal-hawalku ma pasal inaꞌan, bay aku agaraꞌ patibaw ni kaꞌam min duwa, supaya kam makasambut kahāpan nilipat duwa. Agaraꞌ aku pahapit ni kaꞌam ma labayanku tudju pehēꞌ ni lahat Makidunya, maka ma labayanku tudju amoleꞌ. Jari makapatuntul kam aku ma palꞌngngananku pehēꞌ ni lahat Yahudiya. 17 Kabāꞌbi bahāꞌ in aku itu magduwa-baihuꞌ, pagka buwattēꞌ garaꞌku boꞌ paꞌin halam bay kalanjalan? Atawa pangannalbi bahāꞌ in maksudku hal pangandūl napsuku, angkan aku angahoꞌ maka maginꞌmbal ma halam pūsna?
18 Sagōꞌ bꞌnnal sadja Tuhan, angkan bꞌnnal isab bissalaku ma kaꞌam. Mbal paglamuranku pangahoꞌku maka paginꞌmbalku. 19 Hatiunbi si Isa Al-Masi, Anak Tuhan, ya bay pinagnasihat ma kaꞌam eꞌ kami maka si Silas maka si Timuti. Halam aniyaꞌ pagkalu-kaluna. Si Isa Al-Masi ya poꞌonna angkan niahoꞌan eꞌ Tuhan saga janjiꞌna, 20 sabab Al-Masi ya panumanan janjiꞌ Tuhan kamemon. Min Al-Masi asal ya angkan kami makapahꞌlling “amin”, boꞌ supaya pinaheya kasanglitan Tuhan. 21 Baran Tuhan ya amahogot ataytam kamemon, angkan kitam makatantu in kitam magdakayuꞌ pahāp maka Al-Masi. Tapeneꞌ kitam eꞌ Tuhan boꞌ tahinang sukuꞌna. 22 Pinatꞌnnaꞌan kitam gindan in kitam ma iya na, maka kabuwanan kitam Rū-na patꞌnnaꞌ ma deyom ataytam. Sabab Rū Sussi ya pamatuman in kitam pinasambutan kamemon ya panagama kitam eꞌ Tuhan.
23 Sabbutku Tuhan, in iya makasaksiꞌ bang ai ma deyom atayku. Bꞌnnal sadja ya yukku itu: ya poꞌon aku halam bay pahapit ni Kurintu sabab mbal aku bilahi amabukagan kaꞌam. 24 Mbal kami bilahi magmandahan kaꞌam bang ai subay kahagadbi, sabab kataꞌuwan kami in pangandolbi ahogot asal. Ya sadja kabayaꞌan kami subay anabangan kaꞌam supaya pasōng kakōganbi bang harap ni Al-Masi.