2
1 Bay aku anganiyat mbal anibaw kaꞌam pabalik, bang hal pamasusa ataybi. 2 Sabab bang aku gantaꞌ amasusa kaꞌam, sai amakōg aku? Luwal kaꞌam, ya bay pasusaku! 3 Kataꞌuwanku du, bang aku kinōgan, ya du kaꞌam tabowa kinōgan. Mbal aku bilahi piꞌilu bang aku tabowa asusa ma sabab aniyaꞌ kahinanganbi mbal taluwaꞌ. Arapun kaꞌam ilu amuwanan aku kakōgan. Ya na koꞌ heꞌ sababna angkan aku bay amabeyaꞌ sulat tagnaꞌ inān ni kaꞌam. 4 Landuꞌ aheya bay kasusahanku ma waktu kapanulatku kaꞌam, sampay amꞌttak boheꞌ mataku. Sagōꞌ ya maksudku ma masa inaꞌan nggaꞌi ka amasukkal kaꞌam. Ya kabayaꞌanku subay tananambi lasaku ma kaꞌam kamemon.
Kaꞌampunan Aꞌa Bay Makarusa
5 Na, in pasal aꞌa bay makarusa ilu, nggaꞌi ka hal aku ya bay pinasusa eꞌna sagōꞌ kaꞌam kamemon, sabab palabi lagiꞌ kasusahanbi min kasusahanku. 6 Sarang na hukuman ya bay pamatꞌnnaꞌ iya eꞌ kahekaꞌanbi ilu. 7 Ampununbi na iya, pataptapunbi atayna boꞌ mbal lumanduꞌan sukkalna, ya aniyaꞌ papinda min imanna. 8 Angkan aku angamuꞌ junjung ni kaꞌam, hāpunbi iya pabalik boꞌ kataꞌuwanna in kaꞌam masi alasa ma iya. 9 Ya na koꞌ itu mohotku ya angkan kam bay pabeyaꞌanku sulat eꞌ, panulayanku kaꞌam bang kam ahutu ameyaꞌ ma panohoꞌanku sakahabaꞌ waktu. 10 Bang aniyaꞌ aꞌa mailu taga-dusa boꞌ ampunbi dusana, ya du aku angampun iya. Bang aniyaꞌ isab aꞌa subay ampunku, ampunku iya ma pangꞌndaꞌ Al-Masi supaya kam makabāk kahāpan. 11 Sabab bang kita mbal magampun, tantu kita kaꞌakkalan eꞌ nakuraꞌ saitan, maka kataꞌuwanta asal bang ai mohotna.
Kasusahan si Paul ma Daꞌira Trowas
12 Manjari itu, makatꞌkka paꞌin aku ni daꞌira Trowas magnasihat lapal ahāp pasal Al-Masi, aniyaꞌ tahinang eꞌ Panghūꞌ mainaꞌan angkan aku pinaluhaya magnasihat. 13 Sagōꞌ minsan buwattēꞌ, aheya kasusahanku sabab halam tabākku mainaꞌan danakantam si Titus. Angkan aku bay angꞌbba magtūy min saga aꞌa Trowas boꞌ palanjal tudju ni Makidunya.
Saga Aꞌa Magpatanyag Pahati Pasal Al-Masi
14 Sagōꞌ aheya pagsukulan kami ni Tuhan! Sababna Al-Masi ya parakayuꞌan kami, maka tahinang kami paltandaꞌan eꞌ Tuhan sakahabaꞌ waktu, taꞌndaꞌ Al-Masi angandaꞌug sadja. Maka kami itu saliꞌ hantang pilisuna paturul min buliꞌanna. Ginuna kami eꞌ Tuhan boꞌ pasaplag kataꞌu pasal Al-Masi ni kalahat-lahatan kamemon, saliꞌ dalil hamut kamanyan anꞌbbud ni kamemon. 15 Sabab kami itu dalil kamanyan ahāp hamutna tinugtugan eꞌ Al-Masi tudju ni Tuhan. Maka lapal ahāp itu saliꞌ dalil hamutna pinahamut ma aꞌa kamemon, ai na ka aꞌa lappasan min hukuman atawa aꞌa mbal lappasan. 16 Bang mbal lappasan, in pagnasihat kami saliꞌ dalil bau makapatay. Sagōꞌ bang ma saga aꞌa lappasan, saliꞌ hamut ahāp, hamut makabuwan kallum. Hinang ahunit ya pagnasihat itu, mbal agon taꞌanggap eꞌ manusiyaꞌ. 17 Saddī kam min aꞌa kaseheꞌan, ya anganasihat lapal Tuhan pagpilak, jari in lapal Tuhan tahinang saliꞌ dagangan. Sagōꞌ kami itu, pagka Tuhan bay anohoꞌ kami magnasihat, amissala magatay poteꞌ ma pangꞌndaꞌ Tuhan. Patut asal subay buwattēꞌ pagka sosohoꞌan kami Al-Masi.