3
Pasal Kapagsulutan Bahaꞌu
1 Na, kalu tapikilbi in kami magbantug-bantug di-kami supaya kami taimaꞌbi. Sagōꞌ nggaꞌi ka. Mbal sengoran kami saga aꞌa kaseheꞌan, mbal kami magkagunahan sulat pamakilā kami ni kaꞌam. Mbal isab angamuꞌ sulat pamakilā min kaꞌam bang gantaꞌ pehēꞌ ni lahat saddī. 2 Kaꞌam baranbi ya hantang sulat sinulat maitu ma deyom atay kami. Angkan talhakit in kami itu taga-kapatut, ma sabab kahāp kaul-piꞌilbi. 3 Atampal du, Al-Masi ya bay anulat sulat itu, ati pangandolna na ma kami boꞌ pinatuntul pahāp. Ya panulat sulat itu nggaꞌi ka dawat, sagōꞌ Rū min Tuhan kakkal salama-lama. Maka ya panulatan sulat itu nggaꞌi ka papan batu buwat bay panulatan saraꞌ eꞌ si Musa, sagōꞌ deyom atay manusiyaꞌ.
4 Ya angkan kami makatawakkal amissala buwattitu sabab angandol kami ma Tuhan, min Al-Masi. 5 Mbal isab kami magbauꞌ-bauꞌ in kami itu taga-kapandayan angkan kami tōp makahinang saga hinang itu. Sagōꞌ aniyaꞌ barakat bay pamuwan kami eꞌ Tuhan. 6 Iya ya bay amuwanan kami kapandayan boꞌ supaya kami amalꞌngngan kapagsulutan bahaꞌu. Nggaꞌi ka saraꞌ sinulat ma deyom Kitab ya pamuwan eꞌ Tuhan ma buwattinaꞌan, sagōꞌ Rū-na ma deyom atay. Ya saraꞌ bay tasulat ma batu ma masa awal eꞌ hal amowa ni kamatay, sagōꞌ Rū Tuhan itu amowa ni kallum taptap.
Kasahayaꞌan Paljanjiꞌan Bahaꞌu
7 Bay niukilan ma papan batu in saraꞌ bay pamowahan janjiꞌ Tuhan waktu tagnaꞌ, beyaꞌ isab maka sahaya Tuhan landuꞌ asawa. Taluwaꞌ sahaya isab baihuꞌ si Musa, angkan mbal tapandang eꞌ aꞌa Israꞌil minsan anginut-nginut pabaluba. Na, bang saraꞌ amowa ni kamatay ya pinabeyaꞌan sahaya buwattēꞌ, 8 lubaꞌ-lagiꞌna na janjiꞌ ya pinalꞌngngan eꞌ Rū Tuhan buwattitu, akalap giꞌ sahaya-barakatna. 9 Bang abarakat saraꞌ awal, ya pamatꞌkkahan manusiyaꞌ hukuman ni kamatay, labi-labi giꞌ abarakat ya kapagsulutan bahaꞌu itu, sabab minnitu kitam binista abontol eꞌ Tuhan. 10 Ya bꞌnnalna, pagka kapagsulutan bahaꞌu itu atā biddaꞌ barakatna, kalimbuhan na bay kalꞌngnganan saraꞌ tagnaꞌ, minsan painay barakatna. 11 Hatina in kapagsulutan bahaꞌu itu alanga giꞌ barakatna min saraꞌ tagnaꞌ ya palabay heꞌ, sabab anatas kapagsulutan bahaꞌu itu ni kasaumulan.
12 Angkan kami aesog magnasihat, sabab aniyaꞌ holatan kami mbal pabaluba. 13 Saddī kami min si Musa, ya bay anambunan baihuꞌna boꞌ mbal taꞌndaꞌ eꞌ bangsa Israꞌil, sabab in sahaya Tuhan bay ma baihuꞌna heꞌ pabaluba du sampay alanyap. 14 Kakulangan panghati saga bangsa Israꞌil ma masa heꞌ-i. Maka sampay isab ma waktu itu, sakahabaꞌ waktu bang sigām binassahan Kitab si Musa, aniyaꞌ saliꞌ dalil tambun ma pikilan sigām boꞌ mbal makahati. Subay sigām parakayuꞌ ni Al-Masi boꞌ yampa nilaꞌanan tambun inān min pikilan sigām. 15 Sampay isab ma waktu itu, mbal makahati bangsa Israꞌil bang aniyaꞌ binassa min deyom Kitab si Musa, sabab masi giꞌ aniyaꞌ patambun ma pikilan sigām. 16 Sagōꞌ kalaꞌanan du tambun eꞌ, buwat bay tasulat ma deyom Kitab, ya yuk-i, “Kalaꞌanan tambun min baihuꞌna ma waktu kabīngna ameyaꞌ ma Panghūꞌ.” 17 Na, ya Panghūꞌ sibahatku itu ya na Rū Tuhan, maka sai-sai kaniyaꞌan Rū itu aluhaya na. 18 Manjari kitam kamemon ya halam aniyaꞌ tambun ma baihuꞌtam, saliꞌ kitam dalil samin pamaꞌndaꞌan sahaya maka barakat Panghūꞌtam. Pinindahan kitam eꞌna painut-inut, pakꞌnnop na paꞌin kasahayatam sampay kitam makasaliꞌ na ni iya. Ya Panghūꞌ amindahan kitam itu, ya na Rū Tuhan.