4
Dalil Lꞌppoꞌ Ahalgaꞌ Isina
1 Min kaꞌaseꞌ Tuhan, ya poꞌon kami pinasukuꞌan hinang itu magnasihat pasal kapagsulutan bahaꞌu. Angkanna kami mbal alamma maghinang. 2 Bay na bbahan kami ai-ai bay hinang kami ma kalimbungan, maka saga kahinaꞌan. Mbal kami angakkal, mbal kami amanduꞌ saddī min panduꞌ bꞌnnal. Gom paꞌin pinapastiꞌ toꞌongan pagnasihat kami ma panduꞌ bꞌnnal, supaya kinahāpan hinang kami eꞌ aꞌa kamemon ma halam aniyaꞌ sababan panowayan sigām ma kami. Maka inaꞌan asal Tuhan angꞌndaꞌ ma kahinangan kami. 3 Bang aniyaꞌ aꞌa mbal makahati ma lapal ahāp ya nasihat kami, saga aꞌa inān anudju nalkaꞌ. 4 Tuꞌud sigām mbal magkahagad ma lapal ahāp sabab akkal sigām waꞌi nilokoban eꞌ nakuraꞌ saitan ya pagtuhanan saga aꞌa ma alam dakayuꞌ itu. Nilokoban sigām eꞌ nakuraꞌ saitan inān boꞌ mbal makahati ma lapal ahāp pasal kamahaldikaꞌ Al-Masi, ya magsaliꞌ kajarihanna maka kajarihan Tuhan. 5 Sabab nggaꞌi ka baran kami ya pagnasihat kami ni kaꞌam sagōꞌ si Isa Al-Masi, in iya asal Panghūꞌ. Sosohoꞌanbi asal kami, sinōꞌ anabangan kaꞌam ma sabab si Isa ya kalasahan kami. 6 Bay angallam Tuhan ma awal tagnaꞌ, yukna, “Paniyaꞌun sawa min deyom kalendoman.” Jari pinasawa isab eꞌ Tuhan deyom pikilantam supaya makataꞌu ma sahayana maka kawasana, ya pinaꞌndaꞌan kitam eꞌ Al-Masi.
7 Sagōꞌ halam aniyaꞌ kosog kami bang ma baran kami, minsan bay pangandol eꞌ Tuhan amowa lapalna ahalgaꞌ. Saliꞌ kami dalil lꞌppoꞌ aguyaꞌ. Angkan buwattēꞌ supaya atampal ni aꞌa kamemon Tuhan ya poꞌonan kawasa, nggaꞌi ka kami. 8 Maumu kami katꞌkkahan kasusahan sagōꞌ mbal kami tabowa-bowa katūyan. Sumaꞌan asasaw pikilan kami sagōꞌ mbal alungay iman kami. 9 Araran kami pinalabay min kapinjalaꞌan sagōꞌ mbal kami asiya-siya eꞌ Tuhan. Maka minsan kami binonoꞌ, mbal du magmula toꞌongan. 10 Piꞌingga-piꞌingga palꞌngnganan kami sakahabaꞌ waktu, tananam eꞌ kami kamatay buwat bay kamatay si Isa. Malaingkan tinabangan kami eꞌ si Isa boꞌ supaya aniyaꞌ palsaksiꞌan ma ginhawa-baran kami in si Isa allum du. 11 Minsan kami masi allum, mbal kami magniyat allum patꞌggol apa aheka kaꞌaniban kalabayan kami ma sabab si Isa. Buwattēꞌ na paꞌin boꞌ supaya taꞌndaꞌ kallum si Isa ma deyom baran kami magkamatay itu. 12 Bang pinaꞌamu, in kami itu angananam kabinasahan sampay ni kamatay ma sabab pagnasihat kami, sagōꞌ ya kamattihanna kallum kakkal makani-kaꞌam.
13 Aniyaꞌ tasulat ma deyom Kitab, yuk-i, “Angandol aku ma Tuhan, ya angkan aku bay amissala.” Damikiyanna kami itu, pagka buwattēꞌ pangandol kami ma Tuhan, amissala isab ma saga aꞌa, 14 sabab tantu kami pasambeyaꞌ ma si Isa pinakallum min kamatay eꞌ Tuhan, buwat bay pamakallumna isab ma Panghūꞌ Isa. Jari pinapagdongan kami maka kaꞌam boꞌ pinatampal ni haddarat Tuhan. 15 Ma sababbi du, angkan kami anandalan saga kabinasahan itu kamemon, supaya paheka na paꞌin saga aꞌa kaniyaꞌan tatabangan min Tuhan, jari manglabi-labihan saga aꞌa magsukul ni Tuhan supaya iya minahaldikaꞌ toꞌongan.
16 Angkanna kami mbal toꞌongan angꞌbbahan katuyuꞌ kami magnasihat. Minsan kami angalamma, minsan isab apinda baran kami, pakosog gom paꞌin iman kami llaw ni llaw. 17 Pinjaman sadja saga kasusahan ya tananam kami itu, mbal bista kami sabab ya kamattihanna pahalaꞌ mbal tapulaꞌ-pulaꞌ, anatas ni kasaumulan, magbiddaꞌ toꞌongan maka bay kasusahan eꞌ. 18 Mbal anatas ai-ai taꞌndaꞌ mata ma dunya itu angkan mbal angut kami. Ya pagmatayan kami saga kahāpan ya mbal giꞌ taꞌndaꞌ, kahāpan anatas ni kasaumulan.