5
Lumaꞌ Kakkal ma Sulgaꞌ
1 Mbal kita pahondong maghinang ni Tuhan sabab kataꞌuwanta, minsan alubu panggung ya pahantiꞌanta itu (hatina baranta pinjaman), aniyaꞌ lumaꞌ kakkal tinagamahan kita eꞌ Tuhan ma deyom sulgaꞌ. Nihinangan kita eꞌna baran bahaꞌu anatas ni kasaumulan. 2 Buwattinaꞌan, angandahing kita ma sabab bayaꞌta itu mbal agon kasandalan satꞌggol kita mbal giꞌ pinabatuk ni deyom baran papanjarihan sulgaꞌ. 3 Bilahi kita ma baran buwattēꞌ boꞌ mbal saliꞌ anantang palnyawahanta bang amoleꞌ ni sulgaꞌ. 4 Satꞌggol kita pahantiꞌ ma baran pinjaman itu, angandahing sadja kita maka landuꞌ isab kabuhatan. Halam aniyaꞌ kabayaꞌanta pasaꞌut amutawan min baranta itu, sagōꞌ bilahi kita pinabatukan baran bahaꞌu ya min sulgaꞌ. Manjari pinindahan baranta pinjaman ni baran allum ni kasaumulan. 5 Tuhan ya amasakap kita boꞌ supaya kapindahan baranta, ati pamuwanna Rū-na Sussi patꞌnnaꞌ ma deyom atayta, pamatantu in kita makasambut ai-ai kamemon bay panagama kita eꞌ Tuhan.
6 Angkan atꞌttog na paꞌin imanta. Kataꞌuwanta asal, satꞌggol kita allum masi ma baran pinjaman itu, halam giꞌ kita mainaꞌan ma atag Panghūꞌta. 7 Niulinan kita eꞌ pangandolta minsan mbal giꞌ taꞌndaꞌta bang ai tumꞌkka ma sinosōng. 8 Ahogot imanta, mbal kita tināw. Ya angutta toꞌongan subay pabutawan min baranta pinjaman itu boꞌ makapoleꞌ ni Panghūꞌta. 9 Sagōꞌ ai na ka maitu ma dunya, ai na ka mainaꞌan ma sulgaꞌ, ya na paꞌin angutku toꞌongan labi min kamemon, bang paꞌin sulutku iya. 10 Sabab in kitam kamemon wajib patampal ni paghuhukuman Al-Masi boꞌ pinasambutan ai-ai tōp panungbas kitam pakaniya-pakaniya. Pinapagtongod maka bay kahinangantam ahāp-alaꞌat maitu ma dunya.
Maghāp na Tuhan maka Manusiyaꞌ
11 Na, magmatāw kami ma Panghūꞌ angkan kami angegot-ngegot amowa saga aꞌa angandol ma Al-Masi. Atampal kajarihan kami ma pangꞌndaꞌ Tuhan, maka kabayaꞌanku subay atampal isab ma pangꞌndaꞌbi. 12 Pangannalbi bahaꞌ in kami bilahi angāꞌ kabantugan ma baran kami? Nggaꞌi ka isab. Angkan buwattitu pamissala kami, boꞌ kam mbal aiyaꞌ ma pasalan kami, boꞌ aniyaꞌ isab panambungbi ma saga aꞌa ya magabbu-abbu ma kahāp pangluwahan sigām. Mbal pamagay eꞌ sigām deyom pangatayan. 13 Bang kami kalungayan pangannal, Tuhan ya pagmohotan. Ya balikna, bang ahantap akkal kami, kaꞌam iya kabuwanan kahāpan. 14 Kapagbayaꞌan kami eꞌ lasa Al-Masi sabab kabꞌnnalan kami, dakayuꞌ du aꞌa bay amatay gantiꞌ saga aꞌa kamemon angkan aꞌa kamemon taga-palsukuꞌan ma kamatayna. 15 Al-Masi ya bay amatay gantiꞌ saga aꞌa kamemon, jari sasuku kitam allum ma sabab kamatayna subay amuspus angahinang kabayaꞌanna, nggaꞌi ka kabayaꞌan barantam. Amatay iya ma sababtam ati tapakallum na pabalik.
16 Manjari saddī na pamikil kami bang takbil ni pagkahi kami manusiyaꞌ. Mbal bista kami kapagāꞌana, aniyaꞌ kaniyaꞌna atawa halam. Minsan Al-Masi ma waktu palabay heꞌ, tabista iya saliꞌ halam aniyaꞌ kasuddahanna, sagōꞌ apinda na pamikil kami. 17 Bang aꞌa gantaꞌ parakayuꞌ na ni Al-Masi, papanjarihan bahaꞌu na iya. In bay kajarihanna tagnaꞌ patobtob na, jari aꞌa bahaꞌu na. 18 Min Tuhan asal kahāpan itu kamemon. Bay kitam banta Tuhan sagōꞌ nihāp na kitam eꞌna ma sabab tahinang eꞌ Al-Masi. Bagay Tuhan na kitam, ati sinōꞌ kami amataꞌuwan kaseheꞌan bang buwattingga kapaghāp sigām maka Tuhan. 19 Hatina in aꞌa kamemon makajari na maghāp maka Tuhan ma sabab kamatay Al-Masi, ati mbal taitung eꞌ Tuhan saga paldusahan sigām. Jari pangandol eꞌ Tuhan ma kami in lapal pasal kapaghāp Tuhan maka manusiyaꞌ. 20 Kawakilan kami eꞌ Al-Masi, sinōꞌ amissala lapalna, saliꞌ hantang baran Tuhan ya amissalahan kaꞌam labay min kami. Gantiꞌ kami Al-Masi angamuꞌan kam junjung: maghāp kam maka Tuhan! 21 Halam toꞌongan aniyaꞌ dusa Al-Masi, saguwāꞌ pinatanggungan iya paldusahantam, supaya kitam kaniyaꞌan kabontol Tuhan ma sabab kasōdta ma Al-Masi.