6
1 Na, pagka kami dauyunan maka Tuhan maghinang hinangna, ya itu pangamuꞌ kami ni kaꞌam: daꞌa haman-hamanunbi aseꞌ maka lasa Tuhan ya tasambutbi ilu. 2 Sabab aniyaꞌ bissalana tasulat ma deyom Kitab, ya yuk-i,
“Bay ka kaleku ma waktu kagalakanku,
bay ka tabangku ma llaw pangalappasku kaꞌa.”
Angkan yukku ma kaꞌam, ya na koꞌ llaw bay panganggantaꞌ eꞌ Tuhan pamaꞌndaꞌ lasana, llaw pangalappas kaꞌam min hukuman dusa.
Kasigpitan si Paul
3 Pahalliꞌ kami boꞌ supaya halam aniyaꞌ minsan sai pinatꞌnnaꞌan bimbang ma ai-ai tahinang kami. Ya kabayaꞌan kami subay mbal tasoway hinang kami magpasaplag lapal ahāp. 4 Gom du bang magmanyatakan ma ai-ai tahinang kami in kami bꞌnnal sosohoꞌan Tuhan, ma sabab katuyuꞌ kami angimanan ai-ai tumꞌkka, ai na ka kabinasahan, atawa kasigpitan atawa kasusahan. 5 Magmalulus sadja kami minsan pinagdaplosan, pinakalabusu, pinagjabu. Araran kami maghulas-sangsāꞌ, animpus llaw-sangom ma halam pagtuli atawa pagkakan. 6 Manyatakan isab kasaltun maka panghati kami, kapangiman maka kaꞌaseꞌ kami ma pagkahi manusiyaꞌ. Atampal in kami kaniyaꞌan Rū Tuhan maka alasa magatay poteꞌ. 7 Panduꞌ kasabꞌnnalan ya pangalapal kami ma sabab barakat bay min Tuhan. Ya pamanyap kami kaul-piꞌil abontol, ya sapantun kapanyapan sundalu pangatuna maka panampanna. 8 Sosohoꞌan Tuhan kami, sumaꞌan pinagaddatan eꞌ aꞌa kaseheꞌ, sumaꞌan pinaggunyak-gunyak, sumaꞌan kami sinanglitan, sumaꞌan isab pinagtunggīngan. Pinahiputing kami, minsan bꞌnnal sadja ya pahꞌlling kami. 9 Halam kami taga-ōn, boꞌ paꞌin kinataꞌuwan eꞌ aꞌa kamemon. Saꞌagon-agon kami amatay, boꞌ paꞌin masi allum. Pinagdaplosan kami, sagōꞌ halam giꞌ pinapatay. 10 Pinasukkal, sagōꞌ kinōgan sakahabaꞌ waktu. Kamiskinan kami, sagōꞌ aheka aꞌa kaseheꞌ taga-karaya ma sabab kami. Halam aniyaꞌ palsukuꞌan kami ma dunya itu, malaingkan sukuꞌ ma kami kahāpan kamemon.
11 Atampal na pamissala kami ma kaꞌam saga aꞌa Kurintu, halam aniyaꞌ nilimbungan. Tantu aheya lasa kami ma kaꞌam. 12 Bang aniyaꞌ laꞌat-laꞌat ma deyom ataybi, nggaꞌi ka min kami. Halam kami pahondong alasa. 13 Bissalahanta kam buwat pamissalaku ma anakku lahasiyaꞌ: kalasahinbi kami, buwat kami alasahan kaꞌam!
Pasal Paglamud maka Aꞌa Mbal Angisbat Tuhan
14 Daꞌa kam magdakayuꞌ maka saga aꞌa mbal angisbat Tuhan. Sabab mbal manjari pinapaglamud ahāp maka alaꞌat, sapantun sawa mbal tapaglamud maka kalendoman. 15 Mbal makapaguyun Al-Masi maka nakuraꞌ saitan, jari mbal makapagdaꞌatay saga bebeyaꞌan Al-Masi maka saga aꞌa ya mbal magkahagad. 16 In langgal pagtataꞌatan ni Tuhan mbal manjari panumbahan saga taꞌu-taꞌu. In kitam bebeyaꞌan Al-Masi isab saliꞌ dalil langgal pagtataꞌatan lumaꞌ Tuhan ya kakkal salama-lama, buwat bay pangallam Tuhan, ya yuk-i, “Palahat aku ma sigām boꞌ patꞌnnaꞌ ma deyoman sigām. Jari aku ya pagtuhanan sigām, maka sigām aꞌa sukuꞌku.” Buwattitu isāb sugpatna,
17 “Alaꞌan kam min saga aꞌa mbal magkahagad ma aku,
paokat kam min sigām.
Daꞌa kam palamud maghinang ai-ai makatamak atay,
ati taimaꞌta du kam.
18 Pagꞌmmaꞌanbi aku,
maka kaꞌam ya panganakku lꞌlla-dꞌnda.
Pangallam Panghūꞌ Sangat Kawasa koꞌ itu.”