7
1 Na, saga bagay kalasahanku, pagka kitam ya pinagtuꞌuran saga janjiꞌ Tuhan itu, gom bbahantam ai-ai makalumuꞌ baran maka pikilan supaya kitam asussi lullun ma sabab pagmatāwtam ma Tuhan.
Kakoyagan si Paul
2 Kalasahinbi kami. Halam aniyaꞌ dusa kami minsan ma sai-na, halam aniyaꞌ bay tabowa kami maghinang alaꞌat, maka halam aniyaꞌ bay kulliꞌan kami supaya taꞌāꞌ kaniyaꞌna. 3 Mbal pahꞌllingku buwattitu boꞌ kam pabukaganku. Bay na sa yukku ma kaꞌam tagnaꞌ, landuꞌ kam aheya ma atay kami, angkan kami maglillaꞌ magunung maka kaꞌam kallum-kamatay. 4 Aheya pangandolku ma kaꞌam, maka aheya isab pagbantugku ma pasalanbi. Minsan kami ma deyom katiksaꞌan, ahogot na paꞌin pangatayanku maka kumarukan isab kakoyaganku.
5 Waktu paꞌin katꞌkka kami ni lahat Makidunya, halam aniyaꞌ halian kami sabab aniyaꞌ na paꞌin pagsasawan maka paglugat. Magabut-abut isab kasusahan deyom atay. 6 Mandaꞌ kami pinahantapan atay eꞌ Tuhan, ya ataꞌu anabang sasuku taluwaꞌ kasukkalan. Pinatꞌkka si Titus, 7 lāgi aniyaꞌ lapal tabowana pasal pamatuntulbi ma iya. Yukna isab in kaꞌam bilahi magꞌndaꞌ maka aku. Aheya konoꞌ pagsusunbi pasal bay tahinang ma deyomanbi ilu, maka aheya pagkaꞌinagonbi ma aku. Gom paꞌin pasōng kakōganku.
8 Sabab minsan kam bay pinatꞌkkahan sukkal waktu kapanambutbi sulatku, halam aniyaꞌ susunku. Bꞌnnal aniyaꞌ susun pagtaꞌuku pasal kasukkalbi, minsan sukkal mbal anatas. 9 Sagōꞌ kinōgan aku buwattinaꞌan, nggaꞌi ka ma sabab pamasukkalku kaꞌam, sagōꞌ ma sabab kapangꞌbbabi dusa inān. Sukkalbi inān bay ginuna eꞌ Tuhan boꞌ kam tabowa magsusun. Angkan yukku in sulatku inān bay pamowahan kaꞌam ni kahāpan. 10 Ahāp isāb bang kita pinatꞌkkahan sukkal eꞌ Tuhan, sabab kallum taptap ya kamattihanna. Sagōꞌ aniyaꞌ ginis sukkal kalabayan manusiyaꞌ nggaꞌi ka sukkal min Tuhan, ati kamatay ya kamattihanna. 11 Ndaꞌunbi kahāpan ya pamuwan kaꞌam eꞌ Tuhan luwas min sukkalbi inān. Ahutu na kam. Ya katuyuꞌanbi subay halam aniyaꞌ sababan panāꞌan kaꞌam. Abꞌnsi kam ma hinang alaꞌat! Ilu kam pahalliꞌ boꞌ mbal tabowa-bowa magdusa! Landuꞌ kam angentom ma aku! Bilahi kam anulut aku, maka asaꞌut na kam amatꞌnnaꞌ kasāꞌan ma aꞌa bay makarusa. Manyatakan halam aniyaꞌ lamudbi ma dusa aꞌa inān. 12 Jari itu, minsan kam bay pabeyaꞌanku sulat, nggaꞌi ka aꞌa makarusa atawa aꞌa nirusahan ya mohotku. Luwal kaꞌam, bang paꞌin tahimangkanbi aheya asal lasabi ma kami. 13 Angkan ahantap na atay kami.
Maka nggaꞌi ka isab hal eꞌ-i. Tabowa kami kinōgan isab, pagꞌndaꞌ kami kakōgan si Titus. Kaꞌam konoꞌ bay makabuwanan iya kahayangan atay, angkan iya kinōgan. 14 Bay kam sanglitanku waktu kapagsuli-suli kami maka si Titus, dahū lagiꞌ min kapiꞌiluna ni kaꞌam. Kinōgan aku sabab halam aku bay karapatanbi. Pagꞌndaꞌ paꞌin si Titus ma kaꞌam, kinataꞌuwan magtūy eꞌna in bay pananglitku kaꞌam bꞌnnal sadja. Buwat kamemon bay pahꞌllingku ma kaꞌam. 15 Angkan pasōng lasana ma kaꞌam pagka taentom eꞌna ya bay kalunuk ataybi ameyaꞌ ma panohoꞌanna. Nientom isab bay panaimaꞌbi ma iya. Nihanggaw kam, kalu iya mbal kasulutan ma kaꞌam. 16 Angkan aheya na kakōganku sabab kataꞌuwanku na in kaꞌam kapangandolan toꞌongan.