8
Pasal Pagmura
1 Na, saga dauranakanku, bilahi kami angahakaꞌan kaꞌam pasal kaheya tabang Tuhan ma saga palhimpunan jamaꞌa si Isa Al-Masi ma kalahat-lahatan Makidunya. 2 Minsan sigām ma deyom kasusahan, mbal kaliyuhan kakōgan sigām. Minsan sigām landuꞌ kamiskinan, magmura sigām amuwan tutulungan ma saga pagkahi sigām kakulangan. 3 Aku ya saksiꞌ, bay sigām amuwan pila-pila ya tagaꞌos sigām, maka palabi lagiꞌ minnēꞌ. Min kahilasan sigām du, 4 sabab niamuꞌan kami junjung eꞌ sigām bang paꞌin sigām pinalamud anulung saga pagkahi sigām sukuꞌ Tuhan, ya patꞌnnaꞌ ma lahat Yahudiya. 5 Pamuwan eꞌ sigām palabi giꞌ toꞌongan min bay taholat kami, sabab nggaꞌi ka hal pilak ya pamuwan eꞌ sigām. Bay pinaglillaꞌ eꞌ sigām baran sigām, dahū ni Panghūꞌ, puwas eꞌ ni kami. Sabab ya na koꞌ heꞌ kahandak Tuhan ma sigām. 6 Ahāp hinang sigām, maka ahāp isab bang atalus panimukbi sīn panulungbi. Angkan kami bay anohoꞌ si Titus piꞌilu anabangan kaꞌam pabalik sabab iya ya bay makatagnaꞌ animuk mailu. 7 Mbal kam taramuli bang takdil ni kahāpan indaginis. Akosog pangandolbi, apanday kam amissala lapal Tuhan, maka alalom pangitaꞌubi. Atuyuꞌ kam anabangan saga seheꞌbi, maka aheya lasabi ma kami. Angkan kam pogosku supaya kam mbal taramuli bang takdil ni panulung ma pagkahibi.
8 Nggaꞌi ka koꞌ itu panohoꞌan. Bilahi sadja aku ataꞌu bang aniyaꞌ lasabi sabꞌnnal-bꞌnnal ma kaseheꞌanbi, angkan bay sibahatku lasa saga aꞌa Makidunya heꞌ, bang kalu panunuranbi. 9 Kataꞌuwanbi ya kaheya lasa maka aseꞌ Panghūꞌtam si Isa Al-Masi. Minsan iya dayahan asal ma sulgaꞌ, bay iya magpamiskin di-na ma sababbi, boꞌ supaya kam taga-karaya bꞌnnal min kahilasanna.
10 Na, bang ma garaꞌku, ahāp talusbi ya bay tagnaꞌanbi tahun palabay inān. Bay kaꞌam galakan dahū lagiꞌ min palhimpunan jamaꞌa kaseheꞌ, maka kaꞌam ya bay makarahū amuwan. 11 Jari lanjalinbi na panimukbi boꞌ atalus. Bay kam kinōgan anagnaꞌ, subay kam kinōgan analus, pila-pila ya tagaꞌosbi dangan maka dangan. 12 Sabab bang kam lillaꞌ amuwan boꞌ pamuwanbi pila-pila ya tagaꞌosbi minsan mbal aheka, tantu tinaimaꞌ eꞌ Tuhan.
13 Nggaꞌi ka mohotku amasigpit kaꞌam boꞌ supaya magkasannangan saga aꞌa kaseheꞌ. Ya mohotku in kaꞌam subay taga-kaniyaꞌ saliꞌ-saliꞌ. 14 Saguwāꞌ ma buwattinaꞌan kaꞌam ya taga-labi, angkan patut du bang kam amuwan tutulungan ma pagkahibi kulang-kabus. Jari bang gantaꞌ aniyaꞌ waktu kakulang-kabusbi, boꞌ sigām kaseheꞌ ya taga-labi, na kaꞌam ya tinabang isab eꞌ sigām. 15 Buwat bay tasulat ma deyom Kitab, ya yuk-i, “Aꞌa bay makatimuk pagkakan aheka halam aniyaꞌ labina. Maka aꞌa bay makatimuk arikiꞌ, halam aniyaꞌ kulangna.”
Disi Titus maka saga Seheꞌna
16 Aheya pagsukulan kami ni Tuhan ma sabab pikilan ya pamahōpna ma si Titus, angkan iya atuyuꞌ anabangan kaꞌam, buwat katuyuꞌ kami. 17 Magmalulus iya maghinang ai-ai bay pangamuꞌ kami, maka nggaꞌi ka hal eꞌ-i. Min kaheya bayaꞌna angkan iya agaraꞌan di-na piꞌilu anabangan kaꞌam. 18 Pabeyaꞌ kami isab ma iya danakantam dakayuꞌ, ya pinagaddatan toꞌongan eꞌ jamaꞌa Al-Masi ma baꞌanan palhimpunan itu, ma sabab hinangna amasaplag lapal ahāp. 19 Lāgi, tapeneꞌ iya eꞌ saga aꞌa ma saga palhimpunan itu, sinōꞌ aneheꞌan kami bang kami palanjal ni lahat Yahudiya angꞌndeꞌan tutulungan itu. Angkan buwattitu kagaraꞌan kami, sabab bilahi kami amaheya ōn Panghūꞌ Isa. Ahāp isab bang taꞌndaꞌ kahutu kami anabang.
20 Kinamayaꞌ-mayaꞌan asal eꞌ kami heka sīn tutulungan itu boꞌ halam aniyaꞌ sababan panāꞌan kami. 21 Sabab ya katuyuꞌan kami subay abontol sadja kahinangan kami, nggaꞌi ka hal ma pangꞌndaꞌ Panghūꞌ, sampay isab ma pangꞌndaꞌ manusiyaꞌ.
22 Aniyaꞌ giꞌ isab danakantam dakayuꞌ pinaseheꞌ ma disi Titus, aꞌa bay kasulayan kami min heka, in iya ahutu anabang. Pasōng isab bayaꞌna buwattinaꞌan ma sabab kaheya pangandolna ma kaꞌam. 23 Na in pasal si Titus, seheꞌku iya maghinang ma pasalanbi. Maka saga danakantam kaseheꞌ, kawakilan asal sigām eꞌ palhimpunan jamaꞌa Al-Masi maka sinanglitan Al-Masi ma sabab kahinangan sigām. 24 Angkan buwattitu pangamuꞌkuꞌ ni kaꞌam: paꞌndaꞌinbi lasabi ma saga aꞌa itu supaya talhakit ni saga palhimpunan jamaꞌa si Isa in pagsanglit kami ma pasalbi bꞌnnal taga-pūs.