9
Tulung ma saga Pagkahi Almasihin
1 Na, in pasal tutulungan ya pabeyaꞌbi ni pagkahitam sukuꞌ Tuhan ma lahat Yahudiya, minsan kam mbal sulatanku 2 sabab asal kataꞌuwanku, aheya bayaꞌbi anabang. Ya na koꞌ heꞌ pagbantugku ni saga aꞌa Makidunya itu. Yukku ma sigām, “Sangay min tahun palabay in dauranakantam mahēꞌ ma lahat Akaya, sakap asal animuk sīn tutulungan.” Jari, makakale paꞌin sigām ma bay llingku, magtūy palamud anabang kahekaꞌan sigām. 3 Jari sohoꞌku piꞌilu saga danakan itu boꞌ kam sakap animuk tutulungan buwat bay pagbantug ma pasalanbi, ati mbal aku taluwaꞌ pinahiputing. 4 Bang aniyaꞌ aꞌa min Makidunya itu aneheꞌan aku, boꞌ kam taꞌabut halam giꞌ asakap, aiyaꞌ kami. Lubaꞌ-lagiꞌna isab kaꞌam, sabab kaꞌam ya pagbantugan kami. 5 Angkan aku agaraꞌ amapiꞌilu saga danakan itu parahū min aku angahatul tutulungan ya bay janjiꞌbi. Jari asakap na sabab pagmurabi, nggaꞌi ka ma sabab kam pinogos.
Pagtanom Paheka
6 Entomunbi toꞌongan paralilan itu pasal aꞌa ananom. Bang salat ya tanomna, salat isab anihanna. Bang aheka tanomna, aheka isab anihanna. 7 Angkan kam dangan maka dangan subay anganggantaꞌ bang pila ya pamuwanna. Minsan pila pamuwanna, subay hilas min deyom atay ma halam aniyaꞌ bay amogos iya. Sabab alasa Tuhan ma aꞌa bang hilas pagmurana. 8 Ataꞌu du Tuhan amuwanan kaꞌam ai-ai manglabi-labihan supaya halam aniyaꞌ kakulanganbi sakahabaꞌ waktu, ati boꞌ aniyaꞌ labina isab panabangbi sasuku taga-kulang. 9 Buwat tasulat ma deyom Kitab, ya yuk-i,
“Aheka pamuwanna ma saga aꞌa miskin.
Mbal apinda kahāp addatna ni kasaumulan.”
10 Tuhan ya amuwan binhiꞌ ma aꞌa magtanom, maka amuwan pagkakan boꞌ aniyaꞌ kinakan manusiyaꞌ. Buwattēꞌ isab ma kaꞌam, buwat ibarat aꞌa maghuma. Tuhan ya amuwanan kaꞌam binhiꞌ pila-pila kagunahanbi, maka Tuhan ya amaheka buwaꞌna, hatina kahinangan abontol ya tahinangbi. 11 Binuwanan kam eꞌ Tuhan kaniyaꞌ ballabi-labihan boꞌ supaya kam makapagmura minsan sumiyan waktu. Manjari pagtꞌkka kami piꞌilu, aheka saga aꞌa magsukul toꞌongan ni Tuhan ma sabab tutulungan ya tahampit sigām min kaꞌam.
12 Pagka buwattēꞌ hinangbi, tatabang saga aꞌa sukuꞌ Tuhan ya kasukkalan, sagōꞌ aniyaꞌ giꞌ sugpatna. Minnēꞌ isab aniyaꞌ pagsukulan lumanduꞌan aheya tinukbalan ni Tuhan. 13 Manjari hinangbi ahāp inān tandaꞌ saksiꞌ in kaꞌam bꞌnnal angandol ma Tuhan, maka aheka aꞌa tabowa ananglitan Tuhan ma sabab pangisbatbi ma lapal ahāp pasal Al-Masi, ya lapal pagsabꞌnnalanbi. Amuwan sigām sanglit ni Tuhan isab ma sabab pagmurabi amahagiꞌan sigām sampay saga aꞌa kamemon. 14 Hinabu paꞌin sigām angamuꞌ duwaꞌa ni Tuhan ma pasalbi, paheya lasa sigām ma kaꞌam ma sabab tatabangan Tuhan ya mbal tapulaꞌ-pulaꞌ. 15 Magsukul kitam ni Tuhan ma sabab kahāpna mbal tasipat.