10
Angandaꞌawa si Paul Pasal Kahinanganna
1 Aniyaꞌ ilu amahꞌllingan aku, yuk-i, “Atꞌmmun si Paul inān bang maitu ma atag kami, sagōꞌ aesog amabukag labay min deyom sulat bang makalikut.” Sagōꞌ panunuranku Al-Masi ma kareyoꞌ atayna maka ma kahanunut bissalana, jari angamuꞌ aku junjung ni kaꞌam. 2 Pahāpunbi kaul-piꞌilbi supaya halam aniyaꞌ pamabukaganku kaꞌam bang aku mailu ma kaꞌam. Sabab atawakkal aku amabukag saga aꞌa ya angalimut kami, in kami konoꞌ hal ameyaꞌ ma kahinangan dunya itu. 3 Manusiyaꞌ kami patꞌnnaꞌ ma dunya itu, sagōꞌ nggaꞌi ka kapandayan manusiyaꞌ ya ginuna eꞌ kami pamaggat kalaꞌatan. 4 Nggaꞌi ka patakos manusiyaꞌ ya pangatu kami sagōꞌ patakos taga-kawasa deyoꞌ bay min Tuhan, angkan kami makapakaꞌat kutaꞌ (hatina ai-ai makasaggaꞌ.) 5 Taraꞌug eꞌ kami pasuꞌalan maka pagabbu saga aꞌa ya anulak panduꞌ kasabꞌnnalan pasal Tuhan. Jari tabowa paghonaꞌ-honaꞌ manusiyaꞌ magmalulus ma Al-Masi. 6 Na, sakap na kami amatꞌnnaꞌ kabinasahan ma sasuku mbal angikut panohoꞌanna, bang hatiꞌ aniyaꞌ ma deyomanbi mbal giꞌ angikut.
7 Hal pangluwahan aꞌa ya tandingbi, nggaꞌi ka deyom atay. Aniyaꞌ bahaꞌ mailu magabbu-abbu in iya palsukuꞌan Al-Masi? Subay iya amikil pahāp sabab ya du kami palsukuꞌan Al-Masi. 8 Mbal aku aiyaꞌ minsan lumanduꞌan kapagbantugku pasal kapatut bay pamuwan kami eꞌ Panghūꞌ. Nggaꞌi ka kapatut pamakaꞌat pangandolbi, sagōꞌ kapatut pamahogot. 9 Mbal aku bilahi amakitāw kaꞌam labay min kasulatanku. 10 Sabab kataꞌuwanku aniyaꞌ ilu angupama, yukna, “Atumlang bissala si Paul bang anulat, apaslod panganjawabna. Sagōꞌ bang iya maitu magbaran saliꞌ halam aniyaꞌ kosogna, maka mbal iya ataꞌu amissala.” 11 Subay pahati saga aꞌa angupama buwattilu: ai-ai pamissala kami ma deyom sulat ma kalikut kami, hinang kami du bang mailu ma kaꞌam.
12 Mbal kami makatawakkal amasaliꞌ di-kami ni saga aꞌa magheya-heya di-sigām inān. Dupang saga aꞌa inān! Pangannal sigām in sigām ataꞌu anilang ahāp maka alaꞌat, boꞌ paꞌin hal baran sigām ya pamandogahan. Angkan ai-ai nihinang eꞌ sigām ahāp-alaꞌat, ahāp lullun konoꞌ. 13 Saguwāꞌ mbal kami magbantug ma baran kami haliyu min hinang bay pamasukuꞌ kami eꞌ Tuhan. Damikiyanna isab kahinangan kami ma deyomanbi, bay pamasukuꞌ isab eꞌ Tuhan. 14 Mbal paliyu pagbantug kami, sabab kami ya bay makarahū amowahan kaꞌam lapal ahāp pasal Al-Masi. 15 Mbal kami magbantug-bantug ma pasal hinang saga aꞌa kaseheꞌ. Ya kabayaꞌan kami subay pasōng hogot pangandolbi supaya tapasōng isab hinang kami mailu ma deyomanbi. 16 Jari bang ahogot na pangandolbi, makajari na kami palanjal ni saga kalahat-lahatan ma liyuhanbi. Sabab hatina mbal kami bilahi angāꞌ kabantugan min kahinangan saga aꞌa kaseheꞌ, ya pamasukuꞌ asal ma sigām. 17 Tasulat asal ma Kitab, “Sai-sai bilahi magbantug, Panghūꞌ ya subay pagbantuganna.” 18 Sabab mbal kita tinaimaꞌ ma saukat na kita ananglitan di-ta, luwal bang kita binuwanan sanglit eꞌ Panghūꞌ.