11
Si Paul maka saga Aꞌa Magwakil-wakil di-Sigām
1 Daꞌa paꞌin aku kasumuhinbi, minsan saliꞌ ula-ula bissalaku itu. Dūlinbi aku daiꞌ-daiꞌ, 2 sabab aꞌllogan aku kaꞌam buwat kaꞌllog Tuhan. Kaꞌam ilu saliꞌ dalil budjang halam aniyaꞌ lumuꞌna, maka aku itu dalil mattoꞌa amatunangan kaꞌam ni lꞌlla dakayuꞌ-kayuꞌ, ya na Al-Masi. 3 Asusa aku ya aniyaꞌ kam binidjakan pataikut min Al-Masi ati angꞌbba min bay lasabi tuman ma iya. Kalu kam kaꞌakkalan buwat si Sitti Hawa ma awal jaman eꞌ. Bay iya kaꞌakkalan eꞌ sowa ma sabab min kapanday sowa inān magputing. 4 Sabab bang aniyaꞌ piꞌilu anganasihatan kaꞌam, kinōgan sadja kam. Mbal lāngbi minsan saddī pamanduꞌ saga aꞌa inān pasal si Isa min bay pamanduꞌ kami, minsan isab nggaꞌi ka Rū Sussi ya pinasambutan kaꞌam.
5 Bang ma bistahanku, mbal aku kalakbawan eꞌ saga gurubi ilu, ya pinagsambat “kawakilan Al-Masi umbul dakayuꞌ”. 6 Akulang araiꞌ kapandayanku bang takdil ni bissala, sagōꞌ ajukup pangitaꞌuku bang takdil ni kasabꞌnnalan. Pinapastiꞌ koꞌ itu ma kaꞌam kamemon sakahabaꞌ waktu.
7 Taga-dusa aku bahāꞌ amareyoꞌ baranku supaya kaꞌam ya pinalanga, pagka kam ninasihatan lapal ahāp ma halam pangamuꞌan tamba? 8 Bang pinaralil, bay langpasanku saga jamaꞌa ma palhimpunan kaseheꞌ supaya kaꞌam ya katabangan. 9 Halam aku bay mikibalanjaꞌ ma kaꞌam tꞌggolku bay mailu. Bay aku binowahan ai-ai kulang-kabusku eꞌ saga danakantam min Makidunya. Halam kam bay kabuhatan amalanjaꞌan aku, maka buwattēꞌ na paꞌin ma sinosōng! 10 Mbal kapaliluhan pagbantugku itu eꞌ sai-sai minsan ma kaluhaꞌan lahat Akaya, sabab halam aku bay angamuꞌ ai-ai ni kaꞌam. Bꞌnnal sadja pahꞌllingku itu sabab itiyaꞌ kasabꞌnnalan Al-Masi ma pangatayanku. 11 Angay aku subay anganggastuhan di-ku? Pangannalbi bahāꞌ in aku mbal alasa ma kaꞌam, ya poꞌon aku mbal mikitabang ma kaꞌam? Tuhan ya makataꞌu in aku alasa du.
12 Togolanku na paꞌin hinangku itu. Mbal aku mikitamba ma sai-sai boꞌ mbal makapagabbu saga aꞌa ya bilahi pasaliꞌ ni kami. 13 Halam sigām bay kawakilan eꞌ Al-Masi, hal magbauꞌ-bauꞌ in sigām bay kawakilanna. Pangangakkal isab ma ai-ai tahinang sigām. 14 Sagōꞌ mbal sakit makainu-inu, sabab minsan nakuraꞌ saitan ataꞌu isab magpasalupa ni luwa malaꞌikat asahaya. 15 Angkan kitam subay mbal anginu-nginu bang saga aꞌa sosohoꞌan nakuraꞌ saitan maghāp-hāp di-sigām, magbauꞌ-bauꞌ in sigām maghinang abontol. Sagōꞌ magtongod kadal saga aꞌa heꞌ maka bay kahinangan sigām alaꞌat.
Angahaka si Paul Pasal Bay Kalabayanna
16 Balikanku giꞌ bay yukku: daꞌa aku bistahunbi ula-ula ma sabab bissalaku. Sagōꞌ bang aku subay bistabi saliꞌ ula-ula, na tugutinbi aku magbantug-bantug, minsan laꞌa hal bantug ma karikiꞌan. 17 Nggaꞌi ka min panohoꞌan Panghūꞌ angkan aku magbantug sagōꞌ min baranku. Hatina min ula-ulaku angkan aku magbantug-bantug di-ku. 18 Malaingkan, pagka aheka aꞌa magbantug-bantug pasal kahinangan sigām, ameyaꞌ-meyaꞌ isab aku magbantug-bantug di-ku. 19 Alalom konoꞌ pamikilbi angkan kam mbal sinumu akale minsan ma bissala saga ula-ula itu! 20 Ya bꞌnnalna, sabalanbi saga aꞌa minsan sigām magmandahan kaꞌam, minsan isab angulliꞌ atawa angakkal ma kaꞌam. Minsan aꞌa amareyoꞌ kaꞌam atawa anampak kaꞌam, ahāp sadja ma kaꞌam. 21 Aiyaꞌ aku angahakaꞌan kaꞌam, kulang esog kami angkan kami mbal makasengod ni hinang sigām!
Min ula-ulaku angkan aku atawakkal magbantug ma buwat pagbantug aꞌa kaseheꞌ. 22 Bangsa Hibrani bahāꞌ sigām? Ya du aku. Bangsa Israꞌil bahāꞌ? Ya du aku. Panubuꞌ si Ibrahim bahāꞌ? Ya du aku, panubuꞌ si Ibrahim isab. 23 Sosohoꞌan Al-Masi bahāꞌ? Sosohoꞌan Al-Masi isab aku, sagōꞌ akalap lagiꞌ min sigām. (Ula-ula pahāp pamissalaku buwattitu.) Minsan painay kaluꞌugan sigām, palabi giꞌ kaluꞌuganku. Minsan sigām bay pinakalabusu, aheka lagiꞌ kapangalabusu ma aku. Min pila aku bay nilappet? Labi giꞌ min sigām. Min heka aku agon-agon amatay. 24 Min lima aku bay niraplosan eꞌ saga Yahudi, tꞌllumpūꞌ maka siyam pangandaplos min tꞌdda. 25 Min tꞌllu aku bay niraplosan eꞌ bangsa Rōm, maka min tꞌdda aku bay pinagbantung. Min tꞌllu aku bay alogdang ma dilaut, maka aniyaꞌ isab waktu hal pagūng ma sꞌllang, dangꞌllaw dambahangi tꞌggolna.
26 Maglatun-latun na paꞌin aku min lahat dakayuꞌ ni dakayuꞌ, maka aheka kaꞌaniban bay kalabayanku. Bay aku nirunukan, bay minunduhan. Bay aku nirogpaꞌan, sumaꞌan eꞌ saga pagkahiku Yahudi, sumaꞌan eꞌ bangsa saddī. Ai na ka kaꞌaniban ma deyom kalumaꞌan, ai na ka kaꞌaniban ma deya-dilaut, bay na kalabayanku kamemon. Kalabayanku isab kalaꞌatan min saga aꞌa magbauꞌ-bauꞌ in sigām pagkahiku bebeyaꞌan si Isa. 27 Bay aku makapagsangsāꞌ, bay aku abinasa. Araran aku halam bay atuli sangom. Bay aku pinunung maka patay boheꞌ. Maumu aku kulang-kabus ma kapamangan maka ma kapanꞌmmek, angkan kasandalanku haggut. 28 Ahunit koꞌ inān, sagōꞌ aniyaꞌ giꞌ kasusahanku paliyu minnēꞌ. Makananam aku kasukkalan kahabaꞌ llaw ma sabab saga palhimpunan jamaꞌa Al-Masi ma kalahat-lahatan. 29 Bang aniyaꞌ gantaꞌ alamma imanna tudju ni si Isa, tananamku kalammahanna. Bang aniyaꞌ tabowa-bowa angahinang dusa, tabowa isab aku magkarukkaꞌan.
30 Mbal aku bilahi magbantug, sagōꞌ bang aku subay magbantug, gom pagbantuganku ai-ai bay kalabayanku supaya manyatakan in aku halam aniyaꞌ kosogku. 31 Bꞌnnal sadja ya bay pahꞌllingku inān, kinataꞌuwan asal eꞌ Tuhan, ya Mmaꞌ Panghūꞌ Isa. Wajib iya sinanglitan sampay ni kasaumulan. 32-33 Waktu kamahēꞌku ma daꞌira Damaskus, saga lawang paluwasan min daꞌira bay pinajagahan ma sundalu eꞌ gubnul ya ma deyoꞌan sultan Aretas. Sinohoꞌ sigām anaggaw aku, mandaꞌ aku tinontonan pareyoꞌ ma deyom ambung labay min tandawan ma ād daꞌira. Jari makalꞌppa aku.