12
Pasal Bay Magpasalupa ni si Paul
1 Magbantug giꞌ aku. Minsan halam aniyaꞌ pūsna, magsuli-suli aku pasal ai-ai bay magpasalupa ni aku min Panghūꞌ Isa, sampay bay pamataꞌuna ma aku. 2 Aniyaꞌ kataꞌuwanku dakayuꞌ lꞌlla bebeyaꞌan si Isa Al-Masi bay tabowa paꞌangkat ni sulgaꞌ. Aniyaꞌ na sangpūꞌ maka mpat tahun palabay. Mbal kataꞌuwanku bang iya bay paꞌangkat magbaran, atawa hal pinasalupahan. Tuhan sadja makataꞌu. 3 Saguwāꞌ kataꞌuwanku in lꞌlla itu bay tabowa paꞌangkat ni lahat paliyama. Balikanku, mbal kataꞌuwanku bang baranna toꞌongan atawa hal umagadna bay pinapehēꞌ, atawa bang iya bay pinasalupahan. Luwal Tuhan ya makataꞌu. 4 Mahēꞌ paꞌin, pinakalehan iya kabtangan mbal wajib binissala eꞌ manusiyaꞌ. 5 Patut du aku magbantug ma sabab aꞌa itu sagōꞌ mbal aku magbantug-bantug ma baranku, luwal ma pasal kalammahanku. 6 Bang aku gantaꞌ bilahi magbantug, nggaꞌi ka ula-ula sabab bꞌnnal sadja kamemon pahꞌllingku. Sagōꞌ pahondong na aku magbantug-bantug, sabab mbal aku bilahi sinanglitan labi min kasabꞌnnalanna. Kabayaꞌanku sinanglitan ma pasal kahinanganku maka pamissalaku.
7 Bay aku pinatꞌkkahan pꞌddiꞌ, ya pinagbahasa ‘tugsuk ma isiku’, saliꞌ hantang sosohoꞌan saitan pinabeyaꞌ anasat aku boꞌ supaya aku mbal makapagabbu ma bay pinaꞌndaꞌan aku ma deyom sulgaꞌ. 8 Min tꞌllu aku bay angamuꞌ junjung ni Panghūꞌ pasal saki itu, bang paꞌin nilaꞌanan. 9 Sagōꞌ anambung iya, yukna, “Sarang ma kaꞌa bang ka tabangku na paꞌin. Minnēꞌ asampulnaꞌ kawasaku, pagka kaꞌa mbal makakoleꞌan di-nu.” Angkanna aku kinōgan magbantug ma pasal kalammahanku, sabab bang aku alamma, tananamku toꞌongan kawasa Al-Masi. 10 Ya inaꞌan sababanna angkan aku kasulutan ma ai-ai atꞌkka ni aku, alamma ka baranku atawa pinagudjuꞌ-udjuꞌ aku, magtiksaꞌ aku atawa pininjalaꞌ, atawa pinalabayan min kasusahan indaginis. Sandalanku inaꞌan kamemon ma sabab Al-Masi ya pameyaꞌanku, sabab akosog aku ma waktu kalammaku.
Susa si Paul ma Pasal saga Aꞌa Kurintu
11 Saliꞌ aku dupang magpaheya-heya di-ku buwattitu. Sagōꞌ min kaꞌam du, sabab bang aku bay paheyabi mbal aku bay amaheya di-ku. Minsan halam aniyaꞌ pūsku, mbal aku kalakbawan eꞌ saga aꞌa ya magnahuꞌ-nahuꞌ in sigām muna-muna kawakilan eꞌ Al-Masi. 12 Bay na tahinang ma deyomanbi saga kahinangan ya pamandogahan aꞌa kawakilan Al-Masi. Bay na taꞌndaꞌbi saga paltandaꞌan, saga hinang kawasahan maka hinang makainu-inu ya tahinangku hinabuku angimanan kasigpitan. 13 Ya sadja dusaku ma kaꞌam, halam aku bay mikibalanjaꞌ ma kaꞌam. Saddī minnēꞌ, saliꞌ du bowahanku ma kaꞌam maka bowahanku ma saga palhimpunan jamaꞌa si Isa kaseheꞌ. Bang ya du heꞌ kasāꞌanku, ampununbi paꞌin aku.
14 Agaraꞌ aku piꞌilu anibaw kaꞌam, kamintꞌlluku na. Mbal kam pabuhatanku sabab nggaꞌi ka altaꞌbi ya anguttku, luwal lasabi. Patut isab, sabab nggaꞌi ka mattoꞌa ya niayuput eꞌ anak, sagōꞌ anak ya niayuput eꞌ mattoꞌa sigām. Maka kaꞌam ya saliꞌ hantang panganakku. 15 Kinōgan aku amuwanan kaꞌam kaniyaꞌku kamemon. Ahoꞌ, paglillaꞌku sampay baranku bang paꞌin kam tatabangku. Bang pasōng lasaku ma kaꞌam, pakōꞌ bahāꞌ lasabi ma aku? 16 Tantu kam amꞌnnal in kaꞌam halam bay pabuhatanku. Sagōꞌ aniyaꞌ mailu ahꞌlling, in aku atahaꞌ akkalku angulliꞌan sīnbi. 17 Buwattingga pangulliꞌku kaꞌam? Bay bahāꞌ kam niakkalan eꞌ saga aꞌa sohoꞌku piꞌilu? 18 Bay amuꞌku si Titus anibaw kaꞌam waktu palabay inān, maka aniyaꞌ isab danakantam dakayuꞌ sinōꞌ aneheꞌan iya. Bay kam kinulliꞌan bahāꞌ eꞌ disi Titus? Tantu mbal. Jari saliꞌ du kami ma maksud maka ma palantara.
19 Kalu isab pangannalbi in kami hal angandaꞌawahan di-kami, ya angkan kami amissala buwattēꞌ. Sagōꞌ amissala kami ma pangꞌndaꞌ Tuhan, maka pamissala eꞌ kami ai-ai ya patut pamissala saga aꞌa palsukuꞌan Al-Masi. Ai-ai nihinang eꞌ kami, saga bagay, nihinangan kaꞌam supaya akosog pangandolbi. 20 Agawa aku piꞌiluku, ya aniyaꞌ taꞌabutku pasaddī kaul-piꞌilna min kabayaꞌanku. Maka aku isab, kalu saddī kaul-piꞌilku min kabayaꞌanbi. Kagawahanku isab ya aniyaꞌ taꞌabutku magsaggaꞌ, magihid, alꞌkkas angastol. Kalu aniyaꞌ magokat-okat, maglimut-limutan, angalituhan suli-suli, magmalangkahi, maka magkasasawan. 21 Lāgi, ya kagawahanku pagbalikku, kalu aku pinareyoꞌ-deyoꞌ eꞌ Tuhanku ma kamailuhanbi, ati taluwaꞌ aku kasusahan ma sabab saga aꞌa bay makarusa ma waktu tagnaꞌ, boꞌ paꞌin halam giꞌ makapangꞌbba min kalumuꞌan bay tahinang sigām, buwat saga pagbaꞌis maka paglango.