13
Bissala Katangbusan
1 Na, kamintꞌlluku na piꞌilu anibaw kaꞌam. Bang aniyaꞌ aꞌa mailu anuntutan seheꞌna bay maghinang alaꞌat, subay beyaꞌbi kalꞌngnganan saraꞌ ya tasulat ma deyom Kitab. Yuk-i, “Subay aniyaꞌ duwangan atawa tꞌllungan amuwan saksiꞌ pasal panuntut boꞌ aniyaꞌ kabꞌnnalanna.” 2 Bay kam bandaꞌanku ma lꞌngnganku kaminduwa piꞌilu, sagōꞌ balikanku buwattinaꞌan ma kalikutku. Sasuku kam bay makarusa ma waktu tagnaꞌ sampay kaꞌam kaseheꞌ, mbal kaꞌaseꞌanku bang aku makapiꞌilu pabīng. 3 Bang kam hatulku, tantu du kam angahalap ma aku in aku taga-kapatut deyoꞌ bay min Al-Masi. Mbal alamma Al-Masi bang takdil ni kaꞌam, tananambi du kawasana. 4 Sabab minsan halam aniyaꞌ kawasa Al-Masi ma waktu kapangalansang iya ni hāg, allum na iya pabalik eꞌ kawasa Tuhan. Damikiyanna kami saga kawakilan Al-Masi, saliꞌ kami alamma isab pagka kami sōd ma iya. Saguwāꞌ allum kami sambeyaꞌ maka iya ma sabab kawasa Tuhan, ya angkan akawasa pangahatul kami ma kaꞌam.
5 Ananding kam di-bi, anumariya kam di-bi, boꞌ kataꞌuwanbi bang bꞌnnal ajatu pangandolbi ma Al-Masi. Halam bahāꞌ kataꞌuwanbi? Ilu si Isa Al-Masi patꞌnnaꞌ ma deyom ataybi. Bang hatiꞌ halam, halam aniyaꞌ kajatuhan pangandolbi. 6 Mura-murahan, bang paꞌin tataꞌubi in pameyaꞌ kami ma Al-Masi ajatu toꞌongan. 7 Angamuꞌ-ngamuꞌ kami ni Tuhan bang paꞌin halam aniyaꞌ sāꞌ ma ai-ai hinangbi. Nggaꞌi ka hinang kami ya angut kami subay binantug, ya sadja angut kami bang paꞌin taꞌndaꞌ kajatu pangandolbi. Minsan pangannal eꞌ saga aꞌa in hinang kami kulang ajatu, mbal pamagay kami. 8 Mbal kami makaꞌatu ma kasabꞌnnalan, gom paꞌin kami angisbat. 9 Kinōgan kami minsan tabista alamma, bang paꞌin akosog pameyaꞌbi ma si Isa. Ya pangamuꞌ kami ni Tuhan, bang paꞌin kam asampulnaꞌ ma kaul maka piꞌil. 10 Ya ilu poꞌonna angkan aku anulatan kaꞌam pasal ai-ai itu hinabu aku makalikut, supaya kam angawal amahāp addatbi. Jari mbal aku anangguna kapatut ya pamuwan Panghūꞌ Isa ma aku hal pamabukag. Gom paꞌin gunaku pamakosog pangandolbi maka pangahatul kaul-piꞌilbi.
Pagaddat Katapusan
11 Na, saga dauranakanku, tammat na. Angꞌbba na aku min kaꞌam. Pagmatayinbi kasampulnaꞌan ma kaul-piꞌilbi, ikutunbi panganjunjungku ma kaꞌam, magdaꞌatay kam, maka tuyuꞌinbi kasannangan ma deyomanbi. Jari mailu Tuhan ma kaꞌam, ya poꞌonan lasa maka kasannangan.
12 Bang kam maglanggal sumiyan-sumiyan subay kam magsiyum tandaꞌ paglasabi.
13 Saga pagkahibi sukuꞌ Tuhan maitu amabeyaꞌ minsan laꞌa hal lapal sigām.
14 Mura-murahan, bang paꞌin kaꞌam kamemon pinaniyaꞌan tatabangan min Panghūꞌ Isa Al-Masi, maka lasa min Tuhan, maka kapagdakayuꞌ atay min Rū Sussi.
Wassalam