1 KURINTU
Pahati pasal sulat itu
Sulat itu bay pinabeyaꞌ eꞌ si Paul ni saga Almasihin maglahat ma daꞌira Kurintu, daꞌira aheya toꞌongan ma lahat Akaya, beyaꞌ ni lahat Girīk ma buwattinaꞌan. Abantug daꞌira Kurintu ma masa inaꞌan, kaissana ma sabab inaꞌan poꞌonan pagparinta ma kaluhaꞌan lahat Akaya, karuwana ma sabab heka ai-ai ya pinaglituhan mainaꞌan. Magginis saga bangsa maglahat mainaꞌan, magginis isab saga agama sigām, angkan aheka saga tuhan-tuhan indaginis sinumba eꞌ sigām. Aheka aꞌa ma Kurintu alanga pangadjiꞌna, jari ya heꞌ pagmalangkahian sigām. Kabiyaksahan isab sigām maghinang kalumuꞌan dꞌnda-lꞌlla.
Aniyaꞌ saga bangsa Yahudi bay patꞌnnaꞌ mainaꞌan amogbogan agama sigām. Si Paul isab bay mainaꞌan saga dantahun maka tongaꞌ, maghinang lumaꞌ tolda pagusahana. Bay iya magnasihat ma pasal si Isa Al-Masi ma deyom saga langgal Yahudi. Bay panduꞌanna saga bangsa Yahudi maka saga bangsa Girīk, ati aheka sigām amꞌnnal ma si Isa.
Makalikut paꞌin si Paul minnēꞌ, paganap na paꞌin saga aꞌa angandol ma si Isa, sagōꞌ aniyaꞌ kahinangan maka kapamꞌnnalan sigām mbal taluwaꞌ. Angkan aniyaꞌ ma sigām bay amabeyaꞌ sulat ni si Paul, waktu lagiꞌ iya patꞌnnaꞌ ma daꞌira Epesos. Tinilaw iya eꞌ sigām pasal pagsaggaꞌan maka pagsasawan sigām. Itiyaꞌ panambung si Paul ma sulat kaissana itu.