16
Pangentom si Paul ma saga Bagayna
1 Bilahi aku amakilā ni kaꞌam dakayuꞌ danakantam dꞌnda itu. Ōnna si Pebe, aꞌa anabang ma katipunan jamaꞌa si Isa ma lahat Kengkereya. 2 Aniyaꞌ gawina piꞌilu ni Rōm. Subay ahāp eꞌbi amaꞌidda iya bang makatꞌkka piꞌilu, pagka si Isa Al-Masi ya Panghūꞌbi saliꞌ-saliꞌ, maka sukuꞌ Tuhan du kam. Subay iya patuntulbi ma ai-ai kalagihanna, sabab aheka aꞌa bay tatabang eꞌna, sampay isab aku.
3 Amabeyaꞌ aku minsan laꞌa hal lapal kasi-lasaku ni disi Akila maka si Prisila ilu, aꞌa maglakibini bay seheꞌku maghinang ma si Isa Al-Masi. 4 Bay sigā arak amatay ma sababanku waktu aku bay ma deyom kapiligduhan, angkanna aheya pagsukulanku ma sigā. Nggaꞌi ka hal aku ya magsukul, sampay saga jamaꞌa si Isa kamemon ya nggaꞌi ka Yahudi, sasuku magpalhimpunan ma kalahat-lahatan ilu. 5 Pabeyaꞌku isab lapalku ma saga jamaꞌa si Isa ya magtipun ma lumaꞌ sigā.
Damikiyanna si Epeneto bagayku kalalasahan, pabeyaꞌanku minsan hal lapalku. Dahū asal iya min aꞌa kamemon ya magpangandol ma Al-Masi ma kaluhaꞌan lahat Asiya. 6 Maka si Mariyam, ya akosog hinangna ma pasalanbi. 7 Si Androniku maka si Juniyas, pagkahiku Yahudi bay seheꞌku ma deyom kalabusu. Abantug sigā bang takdil ni saga aꞌa kawakilan si Isa, dahū sigā min aku bay angandol ma Al-Masi.
8 Pabeyaꞌku isab lapalku ni disi Ampliyatu, bagayku kinalasahan ma deyoman Panghūꞌ Isa, 9 maka si Urbanu, seheꞌtam maghinang ma Al-Masi, maka si Istakis bagayku kinalasahan isab. 10 Si Apelles isab, apa bay na iya kasulayan in pameyaꞌna ma Al-Masi ahogot du. Sigām ma okoman si Aristobol, 11 maka si Herodiyun pagkahiku Yahudi, maka sigām angandol ma Panghūꞌ Isa min okoman si Narkissu.
12 Damikiyanna disi Tripena maka si Triposa, dꞌnda maghinang ma Panghūꞌ Isa, maka bagayku si Persis, dꞌnda kinalasahan, ya abasag paghinangna ni Panghūꞌtam. Amabeyaꞌ isab aku minsan laꞌa hal lapalku ni sigām. 13 Si Rupus isab, aꞌa tapeneꞌ eꞌ Panghūꞌta, maka inaꞌ si Rupus eꞌ. Sapantun iya inaꞌ angayura aku. 14 Disi Asingkrit, si Plegon, si Hermes, si Patrobas, si Hermas maka saga seheꞌ sigām angandol ma si Isa. 15 Disi Pilologo maka si Juliya isab, si Nereyo maka danakanna dꞌnda, si Olimpas isab maka aꞌa sukuꞌ Tuhan kamemon ya danseheꞌan maka sigām. Pabeyaꞌku lapalku ni sigām ilu kamemon.
16 Bang kam magsabu, subay kam magsiyum taꞌndaꞌ paglasabi. Kamemon saga jamaꞌa Al-Masi ya magtipun-tipun maitu amabowa tambuku ni kaꞌam, in kaꞌam nientom konoꞌ eꞌ sigām.
Bissala Katangbusan
17 Saga dauranakanku, aniyaꞌ junjungku ni kaꞌam. Halliꞌinbi saga aꞌa anaggaꞌ panduꞌ bay pamanduꞌ kaꞌam pasal si Isa Al-Masi. Saga aꞌa ilu bilahi amapagsaggaꞌ kaꞌam boꞌ kam aboklang duwa, maka bilahi isab amowa kaꞌam pasihaꞌ min pangandolbi ni si Isa. Tangkisinbi saga aꞌa inān. 18 Sabab bang aꞌa maghinang buwattēꞌ nggaꞌi ka Panghūꞌtam Al-Masi ya paghinangan sigām, saguwāꞌ baran sigām ya nirūlan. Binidjakan eꞌ sigām saga aꞌa kulang panahuꞌanna, nilanahan boꞌ supaya tabowa niakkalan. 19 In kaꞌam ilu abantug na ma sabab kahogot pameyaꞌbi ma Al-Masi, angkan aku kinōgan ma sababbi. Kabayaꞌanku ma kaꞌam subay alalom pamikilbi pasal ai-ai makahāp, ma halam aniyaꞌ laꞌat makani-pikilanbi. 20 Manjari Tuhan, ya poꞌonan kasannangan ataytam, pasaꞌut du amakaꞌat nakuraꞌ saitan ni deyoꞌ pād-tapeꞌtam.
Mura-murahan bang paꞌin kam pinaniyaꞌan tatabangan eꞌ Panghūꞌtam si Isa.
21 Si Timuti, ya seheꞌku maghinang ma Tuhan itu, amabeyaꞌ minsan laꞌa hal lapalna ni kaꞌam. Damikiyanna isab disi Lukiyus itu maka si Jason, maka kampungku si Sosepater.
22 (Palamud si Tertiyu, ya bay kawakilan anulat sulat itu, yuk-i, “Amabeyaꞌ aku lapalku ni kaꞌam pagka kitam Almasihin saliꞌ-saliꞌ.”)
23 Si Gayus, ya tag-lumaꞌ paokomanku itu, amabeyaꞌ isab minsan laꞌa hal lapalna ni kaꞌam. Ya du si Erastus, aꞌa angꞌntan altaꞌ parinta ma daꞌira itu, maka danakantam si Kuwartu. 24 Mura-murahan, bang paꞌin kam pinaniyaꞌan tatabangan eꞌ si Isa Al-Masi, ya Panghūꞌtam. Amin.
Pamudji si Paul ma Tuhan
25-26 Pudjitam Tuhan. Taga-kawasa iya amahogot pangandolbi, pagga beyaꞌbi lapal ahāp ya bay pagnasihatku pasal si Isa Al-Masi. In lapal ahāp itu halam bay kinataꞌuwan eꞌ manusiyaꞌ sangay min masa awal eꞌ, saguwāꞌ buwattinaꞌan pinamahalayak na ni aꞌa kamemon ma sabab panohoꞌan Tuhan, ya taptap allum. Bay pinasulat eꞌna lapalna ma kanabi-nabihan, pamataꞌu ma bangsa aꞌa kamemon ma deyom dunya boꞌ supaya sigām magkahagad sampay ameyaꞌ ma Tuhan.
27 Pudjitam Tuhan, ya tunggal tubus ma pangitaꞌu. Pudjitam iya sampay ni kasaumulan, pagka si Isa Al-Masi ya pamanyabutantam. Amin. Wassalam