15
Panabang ma Danakantam
1 Sasuku kitam akosog pangandoltam ma Tuhan subay anabang ma aꞌa kaseheꞌan ya mbal angandol toꞌongan. Subay tanggungtam kalammahan sigām. Nggaꞌi ka baranta ya subay sinulut, 2 sagōꞌ danakantam bebeyaꞌan si Isa Al-Masi, pamahāp kahālanna boꞌ supaya pasōng pahogot pangandolna. 3 Panunurantam Al-Masi sabab halam iya bay angandūlan di-na. Atumlang ya tasulat ma deyom Kitab, yuk-i, “Kaꞌa, Tuhan, pinamūng-mūngan alaꞌat, boꞌ aku ya tꞌkkahan himumungan sigām.” 4 Ai-ai ma deyom Kitab bay pinasulat eꞌ Tuhan ma awal jaman pangāꞌantam kapamintāngan, boꞌ supaya ahogot imantam maka kasandal ma katiksaꞌan. Minnēꞌ kitam angaholat lappasan.
5 Tuhan ya amasandal maka amahogot imantam. Mura-murahan, bang paꞌin kam tinabang eꞌna boꞌ kam magdakayuꞌ pikilan hinabubi anunud ma si Isa Al-Masi. 6 Jari maguyun kam amudji ma Tuhan, ya Mmaꞌ sin Panghūꞌ Isa Al-Masi.
7 Taimaꞌunbi kaseheꞌanbi angandol ma Al-Masi, buwat kapanaimaꞌ kaꞌam eꞌ Al-Masi. Tapudji Tuhan bang buwattēꞌ panaimaꞌbi. 8 Hakaꞌanta kam pasal Al-Masi, bay iya piꞌitu ni dunya anabang bangsa Yahudi boꞌ sigām makatantu in Tuhan kapangandolan du, ati boꞌ atuman bay janjiꞌna ma pangkat kami. 9 Ya minaksud eꞌna saga aꞌa nggaꞌi ka Yahudi boꞌ supaya sigām amudji Tuhan ma sabab kaꞌaseꞌna. Buwat bay tasulat ma deyom Kitab, ya yuk-i,
“Magsukul aku ni kaꞌa, Tuhan, ma deyoman saga aꞌa nggaꞌi ka Yahudi.
Magkalang aku kalangan pamudji ōnnu.”
10 Aniyaꞌ giꞌ ayat Kitab dakayuꞌ, yuk-i,
“Kaꞌam kabangsa-bangsahan ya nggaꞌi ka Yahudi,
daiꞌ kam magkōg-koyag sama-sama
maka bangsa ya tapeneꞌ eꞌ Tuhan.”
11 Maka ayat itu giꞌ:
“Sanglitinbi Tuhan, kaꞌam kamemon ya nggaꞌi ka Yahudi.
Pudjihunbi iya, kaꞌam sabarang bangsa.”
12 Aniyaꞌ isab bay sinulat eꞌ si Isaya pasal Al-Masi, yuk-i,
“Aniyaꞌ tubuꞌ si Jesse palahil ni dunya ma sinōng.
Magbayaꞌ du iya ma bangsa nggaꞌi ka Yahudi,
ati iya ya pangasahan sigām.”
13 Mura-murahan, bang paꞌin kam kaniyaꞌan kakōgan maka kasannangan deyom atay min Tuhan, ya poꞌonan holatanbi, pagka kam angandol na paꞌin ma iya. Ati manglabi-labihan kaholatanbi ma sabab kawasa min Rū Sussi.
Ya Poꞌon si Paul Atawakkal Anulat
14 Saga dauranakanku, halam aniyaꞌ hawal-hawalku ma sababanbi. Tatantuku in kaꞌam ahāp kasuddahanbi, aheya isab pangitaꞌubi, patut kam magpanduꞌ-panduꞌan di-bi. 15 Saguwāꞌ aniyaꞌ giꞌ pamaentomku kaꞌam, ya poꞌon aku atawakkal amabeyaꞌ sulat itu. Halam aniyaꞌ pagduwa-duwaku anulatan kaꞌam sabab taga-wakil aku min Tuhan. 16 Maghinang aku ma si Isa Al-Masi ma pasalan saga bangsa saddī min Yahudi. Ibarat aku imam magnasihat lapal ahāp min Tuhan, boꞌ supaya angandol saga bangsa kaseheꞌan. Ungsuranku sigām ni Tuhan dalil tutukbalan. Kasulutan iya ma sigām, sabab tasussi na pangatayan sigām eꞌ Rū Sussi.
17 Na, mbal aku aiyaꞌ magpataꞌu pasal paghinangku ma Tuhan, sabab si Isa Al-Masi ya pagkōganku. 18 Halam aniyaꞌ pagbissalahanku haliyu min bay pamahinang aku eꞌ Al-Masi. Maka Al-Masi ya sababna angkan tabowa saga bangsa saddī ameyaꞌ ma Tuhan. Takale eꞌ sigām pagnasihatku, taꞌndaꞌ eꞌ sigām saga hinang bay hinanganku 19 min kawasa Rū Sussi, hatina saga paltandaꞌan maka hinang kainu-inuhan aꞌa. Bay pasaplagku toꞌongan lapal ahāp pasal si Isa Al-Masi, tinagnaꞌan min Awrusalam sampay taꞌabut lahat Ilirikum. 20 Sangay min tagnaꞌ kapagnasihatku, ya pagmatayanku subay pinasaplag lapal ahāp itu ma lahat halam bay kapakalehan pasal Al-Masi, sabab mbal aku bilahi anugpat ni bay tahinang eꞌ aꞌa bay dumahū min aku. 21 Kabayaꞌanku subay atuman sulat Kitab itu, ya yuk-i,
“Saga aꞌa halam bay pinataꞌu ma pasalanna,
makataꞌu du ma sinosōng,
maka aꞌa halam bay makakale, makahati na.”
Agaraꞌ si Paul Palanjal ni Daꞌira Rōm
22 Ya koꞌ inaꞌan sababna angkan aku bay makatꞌggol piꞌilu ni kaꞌam, sabab hinangku angalatag kalahatan ītu subay apuwas dahū. 23 Sagōꞌ atammat na hinangku ma jadjahan ītu. Bilahi na aku sidda patibaw ni kaꞌam, 24 manjari agaraꞌ na aku amusay ni lahat Kastilaꞌ, sagōꞌ bilahi aku pahapit ni kaꞌam dahū boꞌ supaya kitam makapagꞌndaꞌ. Bilahi isab aku patuntulbi, bang aku song pauntas ni papehēꞌanku heꞌ. Subay na ahāp katibawku ma kaꞌam boꞌ yampa aku alaꞌan. 25 Saguwāꞌ aniyaꞌ giꞌ gawiku dahū. Itiyaꞌ aku ni Awrusalam angꞌndeꞌan tutulungan ni saga aꞌa sukuꞌ si Isa mahēꞌ. 26 Sabab bay animuk sīn saga jamaꞌa si Isa ya maglahat ma sakalibut lahat Makidunya maka Akaya itu, panulung saga miskin ma kajamaꞌahan sukuꞌ Tuhan ma Awrusalam. 27 Hilas isab min deyom atay sigām, maka patut isab sabab Yahudi ya poꞌonna angkan sigām nggaꞌi ka Yahudi bay pinakalehan lapal min Tuhan. Tauwaꞌ bang bangsa Yahudi ya pinahampitan ai-ai bay pangalidjikiꞌ saga aꞌa nggaꞌi ka Yahudi. 28 Manjari bang atangbus gawiku angꞌndeꞌan kamemon bay pinabowa ma aku, pauntas aku tudju ni lahat Kastilaꞌ ati pahapit du ni kaꞌam. 29 Kataꞌuwanku isab, bang aku gantaꞌ makatꞌkka ni kaꞌam, tantu kam bowahanku kahāpan aheya min Al-Masi, kahāpan halam kulangna.
30 Saga dauranakanku, kataꞌuwanku aheya pangisbatbi ma si Isa Al-Masi Panghūꞌtam maka aniyaꞌ lasabi luwas min Rū Tuhan, angkan aku angamuꞌ junjung itu. Gapiꞌunbi aku, amuꞌinbi aku tabang ni Tuhan. 31 Amuꞌ-amuꞌinbi isab aku boꞌ aku mbal ainay eꞌ saga aꞌa ma lahat Yahudi ya mbal magkahagad ma si Isa. Amuꞌinbi isab aku kahāpan pasal tutulungan ya bowaku pinaꞌan, bang paꞌin tinaimaꞌ sangkahāpan eꞌ saga aꞌa sukuꞌ Tuhan heꞌ. 32 Jari bang kabayaꞌan Tuhan, pasampay du aku ni kaꞌam maka kalasiganku aheya, ati ahāp palasahanku bang kita makapagꞌndaꞌ. 33 Na, mura-murahan, bang paꞌin kam ginapiꞌ kamemon eꞌ Tuhan, ya poꞌonan kasannangan. Amin.