1 KURINTU
1
Sulat si Paul Kaissana ni Saga Aꞌa ma Daꞌira
KURINTU
1 Sulat itu min aku, si Paul, maka min si Sostenes dakayuꞌ danakantam. Tapeneꞌ aku sabab min kahandak Tuhan, kawakilan aku eꞌ si Isa Al-Masi magnasihat lapalna.
2 Kaꞌam saga jamaꞌa sukuꞌ Tuhan magtipun ma daꞌira Kurintu ya pamasampayan kami sulat itu. Bay kam tapeneꞌ asal eꞌ Tuhan boꞌ kam tahinang aꞌana sussi, palsukuꞌanna ma sabab si Isa Al-Masi ya parakayuꞌanbi. Pinasampay isab sulat itu ni saga aꞌa kamemon ma sabarang lahat, sasuku amudji Panghūꞌ Isa Al-Masi, ya Panghūꞌ sigām maka Panghūꞌtam.
3 Mura-murahan, bang paꞌin kam pinaniyaꞌan tatabangan maka kasannangan atay min Mmaꞌtam Tuhan maka min si Isa Al-Masi Panghūꞌtam.
Magsukul si Paul
4 Magsukul aku ni Tuhan sakahabaꞌ waktu ma pasalanbi, ma sabab aseꞌna maka lasana, ya pamuwanna ma kaꞌam bay min si Isa Al-Masi. 5 Mamarahi heka kahāpanbi indaginis ma sabab Al-Masi ya parakayuꞌanbi, lubaꞌ-lagiꞌna ma bissalabi maka ma pangitaꞌubi kamemon. 6 Ahogot na panduꞌ pasal Al-Masi ma deyom pangatayanbi, 7 angkan tubus na kam ma kapandayan indaginis, hinabubi angalagaran waktu pamatuwaꞌ si Isa Al-Masi Panghūꞌtam. 8 Pinahogot eꞌna imanbi sampay ni llaw kahinapusan boꞌ supaya halam aniyaꞌ tamak ataybi bang taꞌabut llaw pangahukum manusiyaꞌ eꞌ Panghūꞌtam si Isa Al-Masi. 9 Kapangandolan asal Tuhan, ya bay ameneꞌ kaꞌam boꞌ supaya kam makapagdaꞌatay maka Anakna si Isa Al-Masi ya Panghūꞌtam.
Abahagiꞌ saga Jamaꞌa si Isa ma Kurintu
10 Saga dauranakanku, kabuwanan aku kapatut eꞌ si Isa Al-Masi Panghūꞌtam, angkan aku angamuꞌ junjung itu ni kaꞌam kamemon: magsulut-siyuluti kam. Daꞌa kam magkaniya-kaniya. Subay kam dauyunan toꞌongan ma maksudbi maka ma niyatbi. 11 Angkan tasambatku palkalaꞌ itu, saga dauranakanku, sabab aniyaꞌ min lumaꞌ si Kaluya bay angahakaꞌan aku aniyaꞌ palsaggaꞌan ma kaꞌam danseheꞌan. 12 Hatina mbal maguyun pamikilbi, sabab aniyaꞌ ilu magpinaꞌin: “Aku itu ameyaꞌ ma si Paul.” Aniyaꞌ isab ahꞌlling: “Aku itu ameyaꞌ ma si Apollos.” Aniyaꞌ ahꞌlling: “Aku itu ameyaꞌ ma si Petros.” Maka aniyaꞌ giꞌ isab magpinaꞌin, yuk-i,“Aku itu ameyaꞌ ma Al-Masi.” 13 Pagka buwattēꞌ, bāꞌnu Al-Masi bay pinagsalik-salik! Sai bahāꞌ bay amatay ma hāg ma sababbi? Aku bahāꞌ? Bay bahāꞌ kam pinandi tandaꞌ in kaꞌam sukuꞌku?
14 Magsukul toꞌongan aku ni Tuhan sabab halam aniyaꞌ sai-sai bay pandiku, haliyu min si Krispus maka si Gayus. 15 Angkan halam aniyaꞌ makapahꞌlling in iya bay pinandi boꞌ beyaꞌ ma aku. 16 Ā, yambohoꞌ taentomku si Estepanos magtaiꞌanak inān. Bay sigām tapandiku, sagōꞌ halam aniyaꞌ taentomku saddī min sigām. 17 Sabab halam aku bay sinohoꞌ eꞌ Al-Masi magpandi. Sinōꞌ sadja aku magpasaplag lapalna ahāp. Maka subay mbal paggunaku bissala alalom luwas bay min pangitaꞌuku. Halam aniyaꞌ kawasa ma pagnasihatku liyu min kamatay Al-Masi ma hāg.
Al-Masi ya Pangꞌndaꞌan Kawasa maka Pangitaꞌu Tuhan
18 Ya lapal pasal kamatay Al-Masi ma hāg, niōnan lapal karupangan eꞌ saga aꞌa ya anudju nalkaꞌ. Sagōꞌ bang ma kitam ya anudju sulgaꞌ, in lapal itu pamatuwaꞌan kawasa Tuhan. 19 Aniyaꞌ tasulat ma deyom Kitab, yukna,
“Pakaꞌatku pangitaꞌu saga aꞌa alalom pangitaꞌuna.
Laꞌananku akkal sigām, sasuku alanga pangadjiꞌna.”
20 Manjari ai kamattihan saga aꞌa alalom pangitaꞌuna, maka saga aꞌa alanga pangadjiꞌna? Ai isab kamattihan saga aꞌa apanday magjawab ma dunya pinjaman itu? Ai dapat sigām? Sabab pinahati kitam eꞌ Tuhan in akkal manusiyaꞌ itu halam aniyaꞌ kapūsanna.
21 Alalom toꞌongan asal panahuꞌan Tuhan angkan halam aniyaꞌ makataꞌuwan iya bang luwas sadja min taꞌu manusiyaꞌ. Ya kagaraꞌan Tuhan in manusiyaꞌ subay lappasan min mulkaꞌ bang paꞌin pagsabꞌnnalanna lapal ya pagnasihat kami itu, minsan niōnan lapal karupangan eꞌ saga aꞌa kaseheꞌan. 22 Saga bangsa Yahudi bilahi toꞌongan angꞌndaꞌ saga hinang kawasahan boꞌ supaya sigām amꞌnnal, maka saga bangsa Girīk bilahi pinakalehan pangitaꞌu alalom. 23 Sagōꞌ ya pagnasihat kami Al-Masi nilansang ni hāg pinapatay pamapuwas dusa manusiyaꞌ. Alaꞌat atay saga bangsa Yahudi ma lapal itu, maka binista karupangan eꞌ saga bangsa nggaꞌi ka Yahudi. 24 Sagōꞌ saga aꞌa bay tapeneꞌ eꞌ Tuhan tahinang sukuꞌna, bangsa Yahudi maka bangsa saddī, magkahagad ma Al-Masi in iya kawasa maka pangitaꞌu Tuhan. 25 Sabab kagaraꞌan Tuhan itu, minsan binista saliꞌ karupangan eꞌ saga aꞌa, alalom giꞌ pangitaꞌuna min pangitaꞌu manusiyaꞌ kamemon. Maka minsan yuk saga aꞌa in Tuhan mbal makagaꞌos pagka si Isa Al-Masi bay pasagaranna amatay, agaꞌos du toꞌongan iya labi min gaꞌosan manusiyaꞌ.
26 Na, saga dauranakanku, entomunbi bay kahālanbi tagnaꞌ ma halam giꞌ kam tapeneꞌ eꞌ Tuhan. Kulang pangadjiꞌbi, kulang gaꞌosbi, maka kulang isab kabangsabi. 27 Sagōꞌ minsan na, tuꞌud pinagtuꞌuran eꞌ Tuhan subay peneꞌna sasuku binista eꞌ manusiyaꞌ halam taga-pangitaꞌu, boꞌ supaya magkaiyaꞌan saga aꞌa taga-pangitaꞌu. Pineneꞌ eꞌna saga aꞌa ya binista eꞌ manusiyaꞌ halam aniyaꞌ gaꞌosanna, boꞌ supaya magkaiyaꞌan saga aꞌa gaꞌosan. 28 Pineneꞌ eꞌ Tuhan saga aꞌa pinaggunyak-gunyak eꞌ kaseheꞌan, saga aꞌa binista halam taga-pūs, supaya kinataꞌuwan ai-ai ahalgaꞌ ma bistahan manusiyaꞌ, halam aniyaꞌ halgaꞌna ma Tuhan. 29 Manjari halam aniyaꞌ makapagmalangkahi bang paharap ma Tuhan. 30 Kaꞌam ilu tabowa eꞌ Tuhan parakayuꞌ ni Al-Masi, maka Al-Masi ya tahinang poꞌonan pangitaꞌu eꞌ Tuhan. Min Al-Masi isab ya angkan kitam taitung abontol eꞌ Tuhan, tahinang aꞌana sussi. Jari apuwas na kitam min pangꞌntanan dusa. 31 Angkan taluwaꞌ ya bay binissala ma deyom Kitab, ya yuk-i, “Sai-sai bilahi magmalangkahi, subay pagmalangkahianna ya bay tahinang eꞌ Panghūꞌ.”