2
1 Tagnaꞌ kapiꞌiluku ni kaꞌam, saga dauranakan, waktu bay kapamanduꞌku ma kaꞌam pasal lapal min Tuhan, halam bay gunaku saga bissala ahunit nihati atawa pangadjiꞌ alanga. 2 Satꞌggol bay kamailuku ma kaꞌam, ya niyatku subay halam aniyaꞌ saddī min si Isa Al-Masi pagnasihatku ma kaꞌam, ya lagiꞌna kamatayna ma hāg. 3 Angkanna, pagtꞌkkaku paꞌin piꞌilu, bay saliꞌ angalongkoy baranku, magkꞌbba-kꞌbba atayku, kalu mbal taluwaꞌ pagnasihatku. 4 Sasangku anganasihat lapalku ma kaꞌam, halam bay beyaꞌanku addat saga aꞌa apaul amissala, ya atahaꞌ akkalna. Sagōꞌ tinapilan llingku eꞌ kawasa min Rū Sussi, ya angkan kam bay tabowa magkahagad. 5 Nggaꞌi ka pangitaꞌu manusiyaꞌ ya pasangdolan pangandolbi, sagōꞌ kawasa Tuhan.
Pangitaꞌu min Tuhan
6 Malaingkan bang aꞌa asangpot pangandol sigām, alalom isab pamanduꞌku ma sigām. Sagōꞌ nggaꞌi ka pangitaꞌu min babaw dunya itu ya pamanduꞌku, nggaꞌi ka isab taꞌu min saga aꞌa ya makapagbayaꞌ ma dunya itu. Sabab tantu patobtob du kapagbayaꞌ sigām. 7 Ya pamanduꞌku itu pangitaꞌu Tuhan, hatina kagaraꞌanna ya bay nilimbungan min manusiyaꞌ kamemon. Ma halam giꞌ aniyaꞌ dunya bay pinapanjari ginantaꞌ asal eꞌna bang buwattingga kitam pinaniyaꞌan sahayana ma sinosōng. 8 Halam tahati pangitaꞌu Tuhan itu eꞌ saga aꞌa makapagbayaꞌ maitu ma dunya. Bang bay tahati eꞌ sigām, halam sigām bay magpanohoꞌan pinalansang ni hāg si Isa, ya Panghūꞌ Balbangsahan. 9 Sagōꞌ aꞌawam sigām buwat bay tasulat ma deyom Kitab, ya yuk-i,
“Halam giꞌ taꞌndaꞌ mata, halam giꞌ takale tainga,
halam giꞌ minsan tapikil eꞌ manusiyaꞌ,
bang ai tinagama eꞌ Tuhan ma sasuku alasahan iya.”
10 Sagōꞌ kitam ya bay pinataꞌu eꞌ Tuhan, deyoꞌ bay min Rū-na.
Sabab Rū Tuhan ya ataꞌu angaliling kamemon sampay ni niyat maka maksud ya ma deyom palkuli-kulihan Tuhan. 11 Minsan kitam manusiyaꞌ, luwal nyawata ya makataꞌu bang ai toꞌongan ma deyom itikadta. Damikiyanna ma Tuhan, Rū-na ya makataꞌu bang ai ma deyom itikadna. 12 Ya pamikil bay pinaniyaꞌan kitam nggaꞌi ka hal pamikil manusiyaꞌ min dunya itu. Sagōꞌ pinaniyaꞌan kitam Rū Tuhan ya pinabeyaꞌ eꞌ Tuhan supaya kitam makataꞌuwan kamemon pamuwan eꞌ Tuhan.
13 Manjari bang kami magnasihat, nggaꞌi ka min pangadjiꞌ manusiyaꞌ ya pangāꞌan kami bissala, sagōꞌ min bay pamanduꞌ kami eꞌ Rū Tuhan. Ati panduꞌ bꞌnnal min iya ya pamahati kami ni sasuku kaniyaꞌan Rū Tuhan. 14 Bang aꞌa halam bay kaniyaꞌan Rū itu, mbal tataimaꞌna ya pamuwan eꞌ Rū Tuhan. Mbal toꞌongan tahatina, halam saliꞌ aniyaꞌ kapūsanna bang ma bistahanna. Aꞌa inān subay pinaniyaꞌan Rū Tuhan dahū boꞌ yampa tahatina. 15 Bang aꞌa gantaꞌ kaniyaꞌan Rū Tuhan, tasilangna kamemon bang ai katongoranna ahāp-alaꞌat, sagōꞌ in iya baranna mbal tasallaꞌ eꞌ aꞌa kaseheꞌan. 16 Sagōꞌ kataꞌuwantam na, sabab saliꞌ du pamikiltam maka pamikil Al-Masi, buwat tasulat ma deyom Kitab, ya yuk-i,
“Halam aniyaꞌ makataꞌu bang ai ma deyom pikilan Panghūꞌ,
halam aniyaꞌ makapituwahan iya!”