3
Saga Sosohoꞌan Tuhan
1 Saga dauranakanku, waktu kamailuku ma kaꞌam, mbal aku makabissala ni kaꞌam buwat aꞌa kaniyaꞌan Rū Tuhan sabab mbal giꞌ ahogot pangandolbi ma Al-Masi. Masi kam abowa-bowa eꞌ napsu baranbi, saliꞌ hantang anak duruꞌan. 2 Ya pamanduꞌ ma kaꞌam sapantun gatas ya pamainum ondeꞌ arikiꞌ, sabab mbal giꞌ makakakan pagkakan atuwas. Sampay isab ni kabuwattinaꞌanan, mbal giꞌ kam makahati panduꞌ ahunit, 3 sabab masi kam ameyaꞌ-meyaꞌ ma addat-tabiꞌat ya kabiyaksahan kahekaꞌan manusiyaꞌ ma dunya itu. Aniyaꞌ ma deyomanbi ilu saga aꞌa magihid maka maglugat. Minnēꞌ kinataꞌuwan in kaꞌam masi ameyaꞌ ma kajarihan dunya itu. 4 Bang aniyaꞌ aꞌa ahꞌlling in iya ma si Paul, boꞌ ahꞌlling aꞌa dangan in iya ameyaꞌ ma si Apollos, halam du aniyaꞌ pagbiddaꞌanbi maka aꞌa kaseheꞌan ma dunya itu, sabab masi kam maglugat.
5 Pikilunbi, sai bahāꞌ si Apollos, maka sai aku itu? Sosohoꞌan Tuhan du kami saliꞌ-saliꞌ, tapaglagi eꞌna supaya kam tabowa amꞌnnal ma si Isa Al-Masi. Ya sadja hinang kami ai-ai bay pamahinang kami pakaniya-pakaniya eꞌ Panghūꞌ. 6 Saliꞌ kami dalil aꞌa maghuma. Aku itu saliꞌ dalil magtatanom binhiꞌ, maka si Apollos saliꞌ aꞌa magbusug tinanom eꞌ. Sagōꞌ Tuhan ya amasulig kamemon. 7 Angkan koꞌ, ya magtatanom maka magbubusug mbal patut paheyata. Tuhan sadja ya patut pinaheya, sabab iya ya amasulig saga tinanom. 8 In aꞌa magtanom maka aꞌa magbusug halam aniyaꞌ pagbiddaꞌanna. Saliꞌ-saliꞌ du sigā tinungbasan eꞌ Tuhan ma sinosōng, pinapagtongod maka bay hinang sigā dangan maka dangan. 9 Kami maka si Apollos dakahinangan du maghinang ni Tuhan, ati kaꞌam ilu saliꞌ dalil huma Tuhan paghinangan kami.
Maka kaꞌam isab sapantun lumaꞌ nihinang eꞌ Tuhan. 10 Aku itu aꞌa kabuwanan kapandayan eꞌ Tuhan amatꞌnnaꞌ papaganna, boꞌ aniyaꞌ aꞌa dakayuꞌ angahinang baran lumaꞌ ma diyataꞌ papagan bay hinangku heꞌ. Malaingkan sai-sai maghinang lumaꞌ subay kamayaꞌ-mayaꞌ boꞌ ahāp lullun kahinanganna. 11 Bang niralil, si Isa Al-Masi ya dī papagan lumaꞌ, ya asal pinatꞌnnaꞌ eꞌ Tuhan. Halam aniyaꞌ pasangdolantam saddī min si Isa. 12 Magginis pagdayaw ya pinagguna eꞌ aꞌa maghinang lumaꞌ. Aniyaꞌ pagdayaw apagon, landuꞌ ahalgaꞌ buwat saga bulawan, pilak atawa palmata intan. Aniyaꞌ isab pagdayaw aguyaꞌ, buwat saga kayu maka parang maka sairap. 13 Ma sinosōng, bang taꞌabut llaw pamabukis eꞌ Al-Masi kahinangan aꞌa kamemon, taꞌndaꞌ du bang pagdayaw ai bay ginuna eꞌ aꞌa maghinang dangan maka dangan, ahāp ka atawa alaꞌat. Taꞌndaꞌ isab kahinangan kamemon ma llaw heꞌ-i, pagka pinalabay min api boꞌ taꞌndaꞌ bang buwattingga kapūsanna. 14 Bang mbal atunuꞌ ya bay nihinang eꞌ aꞌa ma diyataꞌ papagan inān, tinungbasan iya ni kahāpan. 15 Sagōꞌ bang atunuꞌ ya bay nihinang eꞌna, alugiꞌ iya. Boꞌ arapun in iya baranna lappasan du, saliꞌ hantang aꞌa bay makalꞌppa min deyom tunuꞌ.
16 Halam bahāꞌ kataꞌuwanbi? In kaꞌam angandol ma si Isa Al-Masi patꞌnnaꞌan Tuhan na, maka ilu Rū Tuhan patꞌnnaꞌ ma deyom pangatayanbi. 17 Angkan bang aniyaꞌ aꞌa amakaꞌat patꞌnnaꞌan Tuhan ilu, tantu du aꞌa inān magkaꞌat eꞌ Tuhan. Sabab mahasussi asal patꞌnnaꞌan Tuhan, maka kaꞌam ya patꞌnnaꞌanna.
18 Na, in pasal pangitaꞌu itu, daꞌa kam angakkalan di-bi. Bang aniyaꞌ aꞌa ma deyomanbi amikilan di-na in pangitaꞌuna alalom, buwat pinikil eꞌ saga aꞌa mbal angisbat Tuhan, ahāp lagiꞌ bang aꞌa inān angakuhan karupangna boꞌ supaya pinaniyaꞌan kataꞌu min Tuhan. 19 Sabab ya niōnan pangitaꞌu eꞌ kahekaꞌan manusiyaꞌ, halam aniyaꞌ gunana bang ma bistahan Tuhan, buwat tasulat ma deyom Kitab, ya yuk-i, “Tajallat eꞌ Tuhan saga aꞌa bal-akkal, kapellengan sigām eꞌ akkal sigām.” 20 Maka ayat itu lagiꞌ, “Kasakupan asal eꞌ Panghūꞌ ai-ai pamikilan eꞌ aꞌa alalom pangitaꞌuna, halam aniyaꞌ kapūsanna.” 21 Angkan kam subay mbal magmalangkahi ma kahinangan manusiyaꞌ. Palsukuꞌanbi ai-ai ahāp kamemon. 22 Kami maka si Apollos maka si Petros, tahinang sosohoꞌanbi boꞌ kam kaniyaꞌan kahāpan. Sampay dunya itu maka ai-ai paniyaꞌ ma buwattinaꞌan atawa ma sinosōng, minsan isab kallum maka kamatay, ma kaꞌam isab boꞌ supaya kam kaniyaꞌan kahāpan. 23 Sagōꞌ entomunbi, in kaꞌam ilu sukuꞌ Al-Masi, maka Al-Masi ya sukuꞌ Tuhan asal.