4
Saga Aꞌa Kawakilan eꞌ Al-Masi
1 In kami maka si Apollos subay itungbi sosohoꞌan Al-Masi. Bay pangandol ma kami eꞌ Tuhan saga panduꞌ bꞌnnal ya halam bay pinataꞌu ma bangsa manusiyaꞌ dahū. 2 Bang saupama aniyaꞌ pamahinang aꞌa eꞌ nakuraꞌna, patut bang aꞌa inān kapangandolan ma ai-ai bay pamahinang iya. 3 Mbal pamagayku bang kaꞌam atawa saraꞌ manusiyaꞌ anallaꞌ aku. Mbal na aku anallaꞌ atawa angandapit di-ku. 4 Halam aniyaꞌ kasāꞌan tananamku ma deyom pangatayanku, sagōꞌ minsan buwattēꞌ, kalu aniyaꞌ kasāꞌan tuꞌud halam bay tananamku. Panghūꞌ Isa ya taga-kapatut anallaꞌ aku. 5 Angkan kam subay daꞌa magdaiꞌ-daiꞌ amatꞌnnaꞌ kasāꞌan ma kaseheꞌanbi ma halam giꞌ waktu pangahukum. Subay na pabīng Panghūꞌ Isa boꞌ yampa aniyaꞌ hukuman. Pinatampal du eꞌna ai-ai bay tatauꞌ ma deyom kalendoman. Pinaluwas eꞌna saga maksud maka niyat bay tinapukan eꞌ manusiyaꞌ ma deyom panahuꞌan. Manjari sinanglitan saga manusiyaꞌ eꞌ Tuhan, pinapagtongod maka bay kahinangan sigām.
6 Saga dauranakanku, bay sambatku si Apollos maka aku baranku supaya aniyaꞌ kapamintānganbi, ati boꞌ taꞌanadbi bang ai hatina bissala itu, ya yuk-i, “Daꞌa kam palabi min bay pamatꞌnnaꞌ eꞌ Tuhan ma kaꞌam.” Mbal ahāp bang bantugbi aꞌa dakayuꞌ, boꞌ pareyoꞌbi isab aꞌa dakayuꞌ. 7 Angay yukbi in kaꞌam alanga min kaseheꞌanbi? Tuhan ya bay amuwanan kaꞌam ai-ai kaniyaꞌbi. Angay kam magbantug in kaꞌam taga-kaniyaꞌ, boꞌ paꞌin hal pamuwan ma kaꞌam?
8 Ajukup kam bahāꞌ ma pikilanbi? Dayahan bahāꞌ kam? Tahinang kam sultan bahāꞌ, boꞌ paꞌin kami itu halam? Ahāp du isab ma aku bang kam sabꞌnnal-bꞌnnal tahinang sultan boꞌ supaya kitam makapagnakuraꞌ sama-sama. 9 Angkan buwattēꞌ bay pahꞌllingku ma kaꞌam, sabab bang ma bistahanku in kami saga aꞌa kawakilan pinareyoꞌ toꞌongan eꞌ Tuhan, min deyoꞌan aꞌa kamemon. Saliꞌ kami aꞌa sapantun nihukum subay pinapatay ma mairan. Tahinang kami pangꞌndaꞌ-ndaꞌan eꞌ bangsa malaꞌikat maka bangsa manusiyaꞌ. 10 In kami saga kawakilan itu kinabāꞌ dupang ma sabab Al-Masi ya pameyaꞌan kami, boꞌ kaꞌam ilu, ahāp konoꞌ kōkbi pagka sōd kam ma si Isa. Angay bahāꞌ? Kami itu binista alamma, boꞌ kaꞌam ilu abasag. Kami itu pinagudjuꞌ, boꞌ kaꞌam ya pinagmahaltabatan. 11 Sampay ni kabuwattituhan magsandal kami ma lingantu maka ma patay boheꞌ. Ya pasꞌmmek kami basak sꞌmmek. Araran isab kami pinaglaꞌugan, maka halam aniyaꞌ patꞌttogan kami. 12 Magsangsāꞌ kami maghinang boꞌ aniyaꞌ napaka kami. Bang kami sinuknaꞌan eꞌ aꞌa, gom paꞌin sigām amuꞌan kami lidjikiꞌ ni Tuhan. Bang kami pininjalaꞌ, hal imanan kami. 13 Bang kami nihinaꞌ eꞌ sai-sai, bissala sangkahāpan ya panambung kami ma sigām. Sampay ni kabuwattinaꞌanan binista kami eꞌ sigām saliꞌ halam aniyaꞌ kagunahan ma babaw dunya itu, saliꞌ sꞌggit ma deyoꞌ tapeꞌ sigām.
14 Sulat itu nggaꞌi ka pamaiyaꞌ-iyaꞌ sagōꞌ pamanduꞌku, sabab kaꞌam ilu saliꞌ saga anakku ya kalasahanku toꞌongan. 15 Sabab minsan ibu-ibuhan aꞌa magpanduꞌan kaꞌam ma pasal Al-Masi, dakayuꞌ du pagꞌmmaꞌanbi. Luwal aku ya pagꞌmmaꞌanbi sangay min waktu kasōdbi ma Al-Masi, sabab aku ya bay makatagnaꞌ amowahan kaꞌam lapal ahāp. 16 Angkan koꞌ, pagka aku mmaꞌbi, ya na itu junjungku ni kaꞌam: panunurinbi addat-tabiꞌatku. 17 Ya ilu poꞌonna angkan pabeyaꞌku si Timuti itu ni kaꞌam, supaya kam ataꞌu anunud. Kalasahanku iya saliꞌ anakku lissi, sabab aku ya bay amowa iya angandol ma Panghūꞌ Isa. Kapangandolan du si Timuti, maka iya ya amaentoman kaꞌam bang buwattingga ya kalꞌngngananku pagka si Isa Al-Masi ya parakayuꞌanku. Ya na koꞌ inān pamanduꞌku ma saga jamaꞌa si Isa Al-Masi, sasuku magpalhimpunan ma sabarang lahat bay papehēꞌanku.
18 Na, aniyaꞌ ma deyomanbi ilu saga aꞌa alanga atay sigām, sabab pangannal sigām in aku mbal du piꞌilu anibaw kaꞌam. 19 Sagōꞌ pasaꞌut du aku piꞌilu bang min kabayaꞌan Tuhan, ati ndaꞌku bang kawasa ai ya ma saga aꞌa ilu, kawasa bꞌnnal ka atawa hal min bowaꞌ sigām. 20 Sabab nggaꞌi ka pagsuli-suli aꞌa ya makapoꞌonan pagparinta Tuhan, sagōꞌ kawasa Tuhan. 21 Na, ai kabayaꞌanbi? Bilahi kam subay pahꞌllinganku boꞌ kam bininasa? Bang hati mbal, bang kam bilahi pinananaman lasaku, maka bang kam bilahi pinakalehan kahanunut bissalaku, pindahinbi hinangbi.