5
Pasal Aꞌa Angaliyu Lakad min Pagholaꞌna
1 Takaleku suli-suli, aniyaꞌ konoꞌ ma deyomanbi ilu aꞌa maghinang kalaꞌatan dꞌnda maka lꞌlla. Minsan saga aꞌa mbal angisbat Tuhan, mbal makaharus maghinang buwattēꞌ. Kahakaꞌan aku aniyaꞌ ma kaꞌam lꞌlla maghulid maka inaꞌna tapeꞌ! 2 Boꞌ ilu kam magmalangkahian di-bi. Arapun kam magkarukkaꞌan ma sabab aniyaꞌ aꞌa ma pagtipunanbi magkasumbang. Aꞌa inān subay pinaluwas min kaꞌam saga jamaꞌa si Isa. 3 Minsan aku halam mailu magbaran, mailu du aku ma deyom pamikil sabab mbal kam alungay min pangannalku. Taga-kapatut aku min Panghūꞌ Isa amatꞌnnaꞌan hukuman ma aꞌa maghinang kalaꞌatan ilu, buwat eꞌku mailu ma kaꞌam. 4 Bang kam gantaꞌ magtipun min ōn Panghūꞌ Isa, bistahunbi aku saliꞌ mailu ma tꞌngngaꞌbi, maka ilu isāb ma kaꞌam kapatut min Panghūꞌtam Isa. 5 Tukbalinbi aꞌa magdusa ilu ni pangꞌntanan nakuraꞌ saitan boꞌ bininasa baranna, ati kalappasan nyawana bang taꞌabut llaw kapangahukum Panghūꞌtam ma bangsa manusiyaꞌ.
6 Mbal taluwaꞌ bang kam maglanga-langa di-bi. Kataꞌuwanbi bissala, ya yuk-i, “Dangkuriꞌ du pasulig ati pabuskag katibuꞌukan addunan.” In pasulig itu pamaralil aꞌa angandusa. Minsan iya dakayuꞌ du, palemed laꞌatna ni kamemon. 7 Laꞌaninbi pasulig ndang boꞌ supaya kam sapantun addunan bahaꞌu ya halam aniyaꞌ pasuligna. Kataꞌuwanku in kaꞌam asussi asal ma sabab Al-Masi bay amatay, sapantun bili-bili sinumbaliꞌ ma waktu kapaghinang Hinang Paglakad. 8 Angkan kitam subay maghinang ni Tuhan ma halam aniyaꞌ kalaꞌatantam atawa kalumuꞌan. Subay tuyuꞌantam addat-tabiꞌat ahāp toꞌongan, min atay sussi maka min kasabꞌnnalan.
9 Na, ma lapal sulat bay pabeyaꞌanku kaꞌam tagnaꞌ, bay kam sohoꞌku paokat min aꞌa magdꞌnda atawa maglꞌlla. 10 Nggaꞌi ka saga aꞌa ya mbal amꞌnnal ma si Isa ya sibahatku, buwat saga aꞌa maghinang kalaꞌatan dꞌnda maka lꞌlla, magnapsu karalaman, magpanangkaw, magsumba ni taꞌu-taꞌu. Subay kam halam na maitu ma dunya boꞌ paokat katūyan min kamemon saga aꞌa dusahan. 11 Sagōꞌ ya yukku heꞌ, daꞌa kam palamud ma aꞌa ya amūng-mūng in iya pagkahibi bebeyaꞌan si Isa, boꞌ paꞌin masi magdꞌnda, atawa anganapsuhan altaꞌ seheꞌna, atawa anumba ni taꞌu-taꞌu, atawa angalimut, atawa maglalango atawa panangkaw. Daꞌa kam minsan pasalu ma saga aꞌa buwattēꞌ.
12-13 Halam aniyaꞌ kapatutku analassay palkalaꞌ ma saga aꞌa ma luwasan palhimpunan jamaꞌa Al-Masi. Tuhan sadja ya angahukum sigām. Sagōꞌ kitam saga jamaꞌa si Isa Al-Masi wajib amatꞌnnaꞌ hukuman saga seheꞌtam dapalhimpunan. Tasulat asal ma deyom Kitab, yuk-i, “Palaꞌanunbi aꞌa alaꞌat min deyomanbi.”