6
Palkalaꞌ ma Deyoman saga Jamaꞌa Al-Masi
1 Na, bang aniyaꞌ palsaggaꞌanbi maka pagkahibi bebeyaꞌan si Isa, angay tꞌkkahanbi ni saraꞌ luwasan, ni nggaꞌi ka bebeyaꞌan si Isa? Arapun pasaraꞌbi ma saga aꞌa sukuꞌ Tuhan. 2 Araiꞌ mbal kataꞌuwanbi in kitam saga sukuꞌ Tuhan angahukum bangsa manusiyaꞌ kamemon ma llaw damuli. Jari bang kitam angahukum saga aꞌa ma sinosōng ma palkalaꞌ aheya, lubaꞌ-lagiꞌna na kam makapangahukum saga palkalaꞌ arikiꞌ. 3 Maraiꞌ mbal kataꞌuwanbi, in kitam angahukum isab bangsa malaꞌikat ma waktu sinōng. Jari bang tahukumtam saga malaꞌikat, lubaꞌ-lagiꞌna na saga palkalaꞌ ya kalabayanbi ma dunya itu. 4 Angkan bang aniyaꞌ palkalaꞌbi, subay pasaraꞌbi ma saga aꞌa areyoꞌ kapagaꞌa sigām ma deyomanbi saga jamaꞌa Al-Masi. 5 Buwattitu pahꞌllingku supaya kam aiyaꞌ. Angay bahāꞌ, halam aniyaꞌ aꞌa ma deyomanbi minsan dakayuꞌ taga-pangitaꞌu angahukum kaꞌam bebeyaꞌan Al-Masi bang aniyaꞌ palsaggaꞌanbi? 6 Sagōꞌ biyaksa kam anꞌkkahan palkalaꞌbi ni saraꞌ luwasan, ati mikisaraꞌ kam ma sigām ya mbal angandol ma si Isa.
7 Saliꞌ halam aniyaꞌ dapatbi sabab aniyaꞌ na paꞌin palkalaꞌbi ma deyomanbi. Bang kam saupama nilaꞌat atawa kinulliꞌan eꞌ pagkahibi bebeyaꞌan si Isa, ahāp lagiꞌ imananbi. 8 Sagōꞌ ilu kam angulliꞌ maka angalaꞌat boꞌ paꞌin danakanbi ya nilaꞌat.
9 Halam bahāꞌ kataꞌuwanbi? Bang aꞌa alaꞌat kajarihanna mbal pinahampitan pusakaꞌ ma pamarintahan Tuhan. Pahalliꞌ kam boꞌ mbal niakkalan. Sasuku maghinang kalaꞌatan dꞌnda maka lꞌlla, atawa pasumba ni taꞌu-taꞌu, atawa angaliyu-lakad min pagholaꞌna, sasuku isab lꞌlla atawa dꞌnda maghinang kahinaꞌan maka pagkahina lꞌlla-dꞌnda, tantu halam aniyaꞌ palsukuꞌan sigām ma okoman pagparinta Tuhan. 10 Damikiyanna saga aꞌa anangkaw, aꞌa anganapsuhan altaꞌ seheꞌna, aꞌa paglalango, aꞌa pangalimut, maka aꞌa pangalangpas. 11 Ma waktu tagnaꞌ aniyaꞌ min kaꞌam bay buwattēꞌ, sagōꞌ buwattinaꞌan sinussi na kam min dusabi. Pinasukuꞌ na kam ma Tuhan sadja maka taitung kam abontol ma sabab Panghūꞌ Isa Al-Masi maka Rū Tuhantam.
Hinang Kalumuꞌan Dꞌnda maka Lꞌlla
12 Aniyaꞌ ahꞌlling yukna, “Makajari aku angahinang ai-ai kabayaꞌanku bang paꞌin nggaꞌi ka langgal saraꞌ.” Bꞌnnal koꞌ inān, sagōꞌ aniyaꞌ bayaꞌbi mbal makahāp. Aniyaꞌ isab aminaꞌin, yukna, “Makajari aku magdūl-bayaꞌ ma baranku.” Bꞌnnal isab, sagōꞌ mbal aku bilahi binanyagaꞌ eꞌ napsuku. 13 Yuk dakayuꞌ isab, “Pagkakan itu bay pinaniyaꞌ boꞌ niꞌisi ni bꞌttong, maka bꞌttongta itu bay pinaniyaꞌ pangisihan pagkakan.” Bꞌnnal koꞌ inān, sagōꞌ in pagkakan maka bꞌttong pinatobtob saliꞌ-saliꞌ eꞌ Tuhan. In ginhawa-barantam itu mbal patut pinagguna maghinang kahinaꞌan dꞌnda maka lꞌlla. Ya angkan aniyaꞌ ginhawa-barantam sabab si Isa ya pagpanghūꞌantam, maka Panghūꞌ Isa ya tag-kapatut ma ginhawa-barantam. 14 Bay iya pinakallum eꞌ Tuhan pabīng min kamatayna, maka ya du kitam pinakallum ma sinosōng sabab min kosogna.
15 Kataꞌuwanbi na in kitam angandol ma Al-Masi, saga barantam itu saliꞌ dalil pagdayaw pamaranan Al-Masi. Angkanna, bang aꞌa binista saliꞌ pagdayaw baran Al-Masi, mbal patut bang iya pahulid ni dꞌnda alaꞌat hinangna. 16 Kataꞌuwanbi du, sai-sai pahulid ni dꞌnda alaꞌat, magdakayuꞌ iya maka baran dꞌnda heꞌ, buwat bay tasulat ma deyom Kitab, ya yuk-i, “Lꞌlla maka dꞌnda bay duwa baran tahinang dabaran na.” 17 Sagōꞌ bang kitam parakayuꞌ ni Panghūꞌ Isa, magdakayuꞌ atay kitam maka iya.
18 Amay-amay. Daꞌa kam maghinang kalaꞌatan dꞌnda maka lꞌlla. Dusa saddī minnēꞌ mbal makainay baranta, sagōꞌ bang kita pabihing ni nggaꞌi ka pagholaꞌta, makabuwan kita dusa ni baranta. 19 Halam bahāꞌ kataꞌuwanbi? In ginhawa-baranbi saliꞌ sapantun lumaꞌ patꞌnnaꞌan Rū Sussi ya pamuwan kaꞌam eꞌ Tuhan boꞌ patꞌnnaꞌ ma deyom baranbi. Tuhan ya tag-dapu baranbi, nggaꞌi ka kaꞌam. 20 Bay kam nilꞌkkat eꞌna boꞌ kam makapuwas min karusahanbi, maka ahalgaꞌ pangalꞌkkatna. Angkan subay gunabi ginhawa-baranbi pamaheyabi ōn Tuhan.