7
Pasal Paghꞌnda maka Paghꞌlla
1 Na, in pasal bay tilawbi aku ma lapal sulatbi, buwattitu panambungku. Bang ma aku, ahāp bang lꞌlla mbal maghꞌnda. 2 Sagōꞌ aheka tabowa-bowa maghinang kalaꞌatan dꞌnda maka lꞌlla, angkan kam dꞌnda maka lꞌlla subay pinaholaꞌan kamemon. 3 In aꞌa maglakibini subay magdūl-bayaꞌ dꞌnda maka lꞌlla, subay sigā mbal magkahukaw. 4 Sabab in dꞌnda mbal makapagbayaꞌ ma baranna, subay hꞌllana. Damikiyanna du in lꞌlla isab mbal makapagbayaꞌ ma baranna, subay isab hꞌndana. 5 Kaꞌam maglakibini, daꞌa kahukawinbi batin. Makajari bang asal bay pagsulutanbi subay daꞌa magbihing daka pilambahangi boꞌ supaya aniyaꞌ waktu pangarapbi ni Tuhan. Sagōꞌ daꞌa tangguhinbi pagbihing pabalik, boꞌ supaya kam mbal tabowa eꞌ sasat saitan bang gantaꞌ mbal kasandalan napsu baranbi. 6 Patut isab kam maghꞌnda atawa maghꞌlla, sagōꞌ nggaꞌi ka panohoꞌanku. 7 Ya kabayaꞌanku in kaꞌam subay buwat aku mbal maghꞌnda. Sagōꞌ magsaddī ya panganggantaꞌ Tuhan ma dangan maka ma dangan, mbal magsaliꞌ-saliꞌ kamemon.
8 Na, kaꞌam saga subul maka budjang, maka kaꞌam saga balu, ya na itu pahꞌllingku ma kaꞌam: ahāp bang kam mbal pinaholaꞌan, buwat aku. 9 Sagōꞌ bang mbal tapaggatbi napsubi, maghꞌnda kam atawa maghꞌlla. Ahāp lagiꞌ kam pinaholaꞌan min atiksaꞌ anandalan napsu baranbi.
10 Kaꞌam maglaulakibini, ya na itu panohoꞌanku ma kaꞌam, panohoꞌan deyoꞌ bay min Panghūꞌ Isa Al-Masi, nggaꞌi ka min baranku. Yukna in dꞌnda mbal manjari patiman min hꞌllana. 11 Sagōꞌ bang aniyaꞌ dꞌnda gantaꞌ pabutas min hꞌllana, subay iya mbal magholaꞌ pabalik, luwal bang pabīng ni bay hꞌllana tagnaꞌ. Ya du lꞌlla subay daꞌa animanan hꞌndana.
12 Ya itu pahꞌllingku ma kaꞌam kaseheꞌan, lling min baranku sadja, nggaꞌi ka min Panghūꞌ Isa. Saupamaku aꞌa maglakibini: bang lꞌlla iya bebeyaꞌan si Isa, boꞌ hꞌndana nggaꞌi ka, subay mbal tinimanan eꞌna hꞌndana satꞌggol bilahi magdakayuꞌ maka iya. 13 Damikiyanna bang dꞌnda ya bebeyaꞌan si Isa, boꞌ hꞌllana nggaꞌi ka. Subay mbal tinimanan eꞌna hꞌllana satꞌggol hꞌllana bilahi magdakayuꞌ maka iya. 14 Bang ka angandol ma si Isa, boꞌ pagholaꞌnu mbal, tahalal iya eꞌ Tuhan ma sabab pangandolnu. Tahalal isab eꞌ Tuhan saga anakbi, jari mbal kaōnan ondeꞌ-ondeꞌ halam tuhanna. 15 Malaingkan bang aniyaꞌ bebeyaꞌan si Isa taga-hꞌnda atawa hꞌlla mbal angandol ma si Isa, boꞌ bilahi tuꞌud patiman min iya, makajari sadja. Halam aniyaꞌ dusabi, aluhaya kam magtiman bang buwattēꞌ. Ya kabayaꞌan Tuhan subay kam pasulut sadja. 16 Mbal isab kataꞌuwanbi bang ai kasōnganna, kalu tabowa pagholaꞌbi angandol ma si Isa ma sabab kahāp kaul-piꞌilbi, ati lappasan na.
Akuhinbi Bay Pamatꞌnnaꞌ Kaꞌam eꞌ Tuhan
17 Ya itu pamituwaku ma saga jamaꞌa si Isa kamemon ma lahat dakayuꞌ maka dakayuꞌ: ai-ai pamatꞌnnaꞌ Panghūꞌ ma kaꞌam pakaniya-pakaniya, akuhinbi. Ai-ai bay katanamanbi tagnaꞌ kam pineneꞌ eꞌ Tuhan, daꞌa kam angangut papinda ni saddī. 18 Bang aniyaꞌ aꞌa asal magislam dahū giꞌ min kapangahoꞌna ma Tuhan, mbal subay laꞌananna bainatna pagislam. Damikiyanna isab bang aꞌa halam bay taislam, boꞌ angahoꞌ na ma pangabbit Tuhan, daꞌa ya subay magpaꞌislam. 19 Sabab mbal aheya ma atay Tuhan magislam kitam atawa mbal. Ya sadja aheya ma atayna bang beyaꞌtam saga panohoꞌanna. 20 Daꞌa kam apinda min bay kahālanbi tagnaꞌ kapangahoꞌbi ma Tuhan. 21 Bang ka bay banyagaꞌ waktu kapameneꞌ Tuhan ma kaꞌa, imaninbi. Sagōꞌ bang aniyaꞌ waktu kaluwasnu min pagbanyagaꞌan, na, paluwas ka. 22 Sabab bang banyagaꞌ makaꞌahoꞌ ameyaꞌ ma Panghūꞌ Isa, alimaya iya ma bistahan Panghūꞌ. Damikiyanna bang aꞌa nggaꞌi ka banyagaꞌ makaꞌahoꞌ ameyaꞌ ma Al-Masi, tabista iya banyagaꞌ Panghūꞌna. 23 Ahalgaꞌ ya bay pangalꞌkkat kaꞌam min pangꞌntanan dusa, angkan kam subay daꞌa pabanyagaꞌ ni sai-sai, subay Tuhan sadja ya pabanyagaꞌanbi. 24 Saga dauranakanku, subay kam patꞌttog ma bay katanamanbi tagnaꞌ kam pineneꞌ eꞌ Tuhan. Pataptapunbi ataybi ni Tuhan.
Pasal Budjang, Subul maka saga Balu
25 Na, in bay tilawbi pasal aꞌa halam taga-pagholaꞌ, halam aniyaꞌ panohoꞌanku deyoꞌ bay min Panghūꞌ Isa, sagōꞌ paluwasku bang ai ma pamikilanku. Sagōꞌ kapangandol aku ma sabab kaꞌaseꞌ Panghūꞌ ma aku. 26 Bang ma aku, ahāp lagiꞌ mbal apinda min kabuwattilubi, sabab aheka kasusahan tumꞌkka ma patahunan ītu. 27 Sasuku kam taga-hꞌnda, daꞌa timaninbi. Sasuku kam halam taga-hꞌnda, daꞌa kam atuyuꞌ maghꞌnda. 28 Sagōꞌ bang kam gantaꞌ maghꞌnda nggaꞌi ka dusa. Saga budjang isab bang maghꞌlla, mbal magdusa. Ya poꞌon kam garaꞌanku daꞌa maghꞌnda atawa maghꞌlla, sabab kabayaꞌanku ma kaꞌam subay mbal pinananaman kasusahan ya maumu kalabayan eꞌ aꞌa maglaulakibini.
29 Saga dauranakan, mbal kitam atꞌggol maitu ma dunya. Puwas minnitu aꞌa taga-anak-hꞌnda subay mbal sakit abimbang ma sigām boꞌ supaya alimaya maghinang ni Tuhan. 30 Bang aꞌa magdukka, subay niꞌbbahan karukkaꞌanna. Bang aꞌa magkalasigan, subay pasengod ni aꞌa halam aniyaꞌ kalasiganna. Bang aꞌa amꞌlli ai-ai subay mbal parulina bay bꞌllina heꞌ, saliꞌ nggaꞌi ka dapuna. 31 Maka bang aꞌa angangguna kapanyapan dunya itu, subay mbal paheyana ma atay, sabab in dunya itu maka kajarihanna palabay sadja.
32 Kabayaꞌanku subay halam aniyaꞌ makabimbang kaꞌam. Bang lꞌlla halam taga-pagholaꞌ, ya sadja tapikilna hinangna ma Panghūꞌ Isa bang buwattingga eꞌna makasulut atay Panghūꞌna. 33 Sagōꞌ bang aꞌa taga-hꞌnda, abimbang iya eꞌ kalluman anak-hꞌndana. Ya tapikilna na paꞌin bang buwattingga eꞌna makasulut atay hꞌndana heꞌ. 34 Saliꞌ abahagiꞌ duwa pamikilna. Damikiyanna isab bang dꞌnda halam taga-hꞌlla, ya sadja tapikilna hinangna ma Panghūꞌ Isa sabab kabayaꞌanna subay pinama-Tuhan ginhawa-baranna sampay pangatayanna. Sagōꞌ bang dꞌnda taga-hꞌlla na, ya na paꞌin tapikilna saga kahinanganna ma anak-hꞌllana, sabab kabayaꞌanna subay makasulut atay hꞌllana. 35 Amissala aku buwattitu sabab aheya bayaꞌku anabangan kaꞌam, nggaꞌi ka ma sabab aniyaꞌ bayaꞌku amahunitan kaꞌam. Ya kabayaꞌanku toꞌongan subay tahinangbi ai-ai ya apatut nihinang, boꞌ supaya ahantap palantarabi boꞌ supaya magmalillaꞌ maghinang ma Panghūꞌ Isa ma halam aniyaꞌ duwa-ruwabi.
36 Na, in pasal pagtunang. Bang aniyaꞌ atꞌggol kapagtunang sigā, boꞌ alaꞌun-laꞌun na dꞌnda, ati makapikil lꞌlla in hinangna ma tunangna heꞌ kulang asaltun, bang kabayaꞌanna magpūn, patut sigā magkawin. Nggaꞌi ka dusa. 37 Sagōꞌ bang aꞌa magniyat subay mbal magpūn maka tunangna, ati mbal abowa-bowa eꞌ napsu baranna sabab tahatul eꞌna, taluwaꞌ isab hinangna. 38 Ya hatulanna, ahāp du bang aꞌa bilahi magkawin maka budjang ya tunangna, sagōꞌ labi giꞌ ahāp bang iya mbal pakawin
39 Na, balikanta lagiꞌ pasal pagtiman. Bang dꞌnda taga-hꞌlla, mbal iya makaluhaya pakawin ni lꞌlla saddī satꞌggol allum bay hꞌllana tagnaꞌ. Sagōꞌ bang amatay na hꞌllana, puwas na iya, aluhaya iya maghꞌlla pabīng ni lꞌlla kabayaꞌanna, bang paꞌin pagkahina angandol ma Panghūꞌ Isa. 40 Bang aku anganggaraꞌ, labi ahāp palasahan dꞌnda inān bang iya mbal pinaholaꞌan pabīng. Bang aku mbal asāꞌ anguyun isab Rū Tuhan.