8
Pasal Kinakan Paglamas ni Taꞌu-taꞌu
1 Na in pasal susumbaliꞌan bay paglamas ni taꞌu-taꞌu: taga-pangitaꞌu asal kitam kamemon, sagōꞌ aniyaꞌ pangitaꞌu hal pagmalangkahian. Bang kam alasa ma pagkahibi tapahogot pangandol sigām. 2 Bang aꞌa amikilan di-na in iya taga-kataꞌu, kulang asal taꞌuna. 3 Sagōꞌ bang aꞌa alasa ma Tuhan, takilā iya eꞌ Tuhan.
4 Manjari itu, ya pasal kapamangan susumbaliꞌan bay paglamas ni taꞌu-taꞌu: kataꞌuwanta asal in niōnan taꞌu-taꞌu itu nggaꞌi ka tuhan toꞌongan. Maka kataꞌuwanta isab in Tuhan dakayuꞌ-kayuꞌ du. 5 (Bꞌnnal, aheka pagtuhanan maka pagpanghūꞌan, ai na ka ma sulgaꞌ atawa ma dunya.) Sagōꞌ minsan aniyaꞌ pinagbahasa ‘tuhan’, 6 tunggal du Tuhan pagtuhanantam, ya na Mmaꞌtam ma sulgaꞌ. In iya poꞌonan kamemon ai-ai, maka iya isab pagtuyuꞌantam tꞌggoltam allum. Tunggal isab Panghūꞌtam, ya na si Isa Al-Masi. Bay pinapanjari eꞌna kamemon deyoꞌ bay min Tuhan, maka allum na paꞌin kitam labay min iya.
7 Saguwāꞌ aniyaꞌ saga seheꞌta bebeyaꞌan si Isa halam giꞌ makataꞌu toꞌongan ma pasal taꞌu-taꞌu halam aniyaꞌ kawasana, sabab masi amikit ni pikilan sigām bay kabiyaksahan sigām tagnaꞌ, waktu kasumba sigām ni taꞌu-taꞌu. Angkan bang sigām amangan ai-ai bay paglamas ni taꞌu-taꞌu, pangannal sigām in sigām palamud anumba taꞌu-taꞌu inān. Manjari asasaw itikad sigām minsan halam taga-dusa. 8 Sagōꞌ nggaꞌi ka kinakanta ya amowa kita pasekot ni Tuhan. Mbal kinulangan kahāpta ma sabab aniyaꞌ mbal kakanta. Mbal isab kinꞌnnopan kahāpta ma sabab aniyaꞌ kakanta.
9 Sagōꞌ minsan kam wajib angahalal ma pagkakan indaginis, subay kannalbi pahāp pagkahibi, ya mbal giꞌ ahogot pangandolna ma si Isa, boꞌ supaya iya mbal tabowa magdusa ma sabab pagkakanbi. 10 Bang saupama aniyaꞌ pagkahibi mbal katiyuꞌ-tiyuꞌan itikadna makaꞌndaꞌ kam amangan lalamasan ma deyom lumaꞌ panumbahan taꞌu-taꞌu. Asal kataꞌuwanbi in taꞌu-taꞌu mbal makainay, sagōꞌ aꞌawam pagkahibi inān ati tabowa iya amangan susumbaliꞌan bay pangalamas ni taꞌu-taꞌu. 11 Manjari pagkahibi inān, aꞌa bay pinuwas min dusana ma sabab kamatay Al-Masi, tabowa ni kalaꞌatan ma sabab pangitaꞌubi, pagka alamma pangandolna. 12 Jari makarusa kam ma danakanbi ya alamma pangandolna heꞌ, maka amakay dusa kam ni Al-Masi. 13 Angkan aku magniyat, bang pagkakan ya sababanna angkan magdusa dakayuꞌ danakanku bebeyaꞌan si Isa, mbal na aku amangan susumbaliꞌan satꞌggolku allum, boꞌ supaya iya mbal tabowa magdusa.