Ɓa kéŋ Zeezi mʋ́ Pɩlatɛ sɩ́ɛ́
23
1 Ɛ́ nɛ́ ká ɓa púl ná nɩɛ wuu isi, a a ɓa ka Zeezi mʋ́ kʋ́máŋdá Pɩlatɛ* sɩ́ɛ́.
2 Ráŋ nɛ́ ɓa máŋsɛ wɩ́ɛ́ ná ʋ há zɔ́kɛ́, a bʋlɛ́:
«Á kɩ́ɛ́lɛ báálɔ né, rʋʋ́ nyɩ́sɩ́rá dunɩɛ, aá yíkwó, rɩ́wɔ́ sɩ́ loŋpó túŋ pá Romi* kuózeno, ká bʋlʋ́ tɩɩ nɛ́ ká Kirisi,* rʋ́ʋ́ nɛ́ ká kuóro.»
3 Ɛ́ nɛ́ Pɩlatɛ bɔ́sʋ́ a bʋlɛ́:
«Ɩ nɛ́ ká Zuwifiwa* kuóro?»
Zeezi sɛ́:
«Óó, anɛ ɛ́ ɩ há bʋ́lɛ́.»
4 Ɛ́ nɛ́ Pɩlatɛ bʋl pá Wɩɩsɛ vʋk'ɔɔsa* nɩhɩɛ̃́sɛ ná, rɩ́ jamáŋ ná há cíkí ráŋ bʋlɛ́:
«Ŋ wɩ wɩ́ɩ́ néé, rɩ báálɔ né ɔ́ɔ́ zɔkɛ, a mɔ rɩ́wɔ́ ɓʋ́ʋ́.»
5 Amá nɩɛ ná ɔ́sɔ́ bʋl fɛ́l sɩ́ɩ́ a bʋlɛ́:
«Ʋ tɩ́ŋʋ́ karmɛ́ mɛ́ aá yiki nɩɛ, rɩ́wɔ́ vúkmi dɩhɩ̃́.
Ʋ púl Galiile* tíé mí ní, a ko zʋ Ziide dɩtɩ́llɛ wuu, a sɩɛ́ ko zʋ Zerizalɛmɛ má nyɛ.»
Ɓa kéŋ Zeezi mʋ́ kuóro Erodi dɩhɩ̃́
6 Pɩlatɛ há nɛ́ ɛ́ wɩ́ɛ́, ʋ bɔ́sɩ́ nɩɛ ná bʋlɛ́:
«Báálɔ né lɛ́ Galiile ní?»
7 Ɛ́ nɛ́ ɓa máŋsɛ pɔ́ʋ́, anɛ rɩ Erodi* nɩ́ɩ́ bel Zeezi há lɛ́ ráŋ ná dɩtɩ́llɛ.
Pɩlatɛ, há nɛ́ ɛ́, ʋ ɔ́ɔ́ ɓa ka Zeezi mʋ́ Erodi rí.
Ɛ́ tɛ́ŋ mɛ́, rʋʋ fa mɩŋ Zerizalɛmɛ mɛ́.
8 Erodi há ná Zeezi, ʋ sɩɛrʋ tɔ́rɔ́ kɩ́ŋkáŋ, bee wɩ́ɛ́ ɓa bʋ́l Zeezi wɩ́ɛ́ ʋ nɛ fól wuu, a fa jɩ́ja rʋ́ʋ́ nóú, rʋ́ʋ́ tʋŋ nyána rʋ́ʋ́ ná.
9 Ʋ pí wɩ́ɛ́ ɓɩkana bɔsɛ Zeezi, amá ʋ wɩ nʋɔ lɩ́sɛ́.
10 Wɩɩsɛ vʋk'ɔɔsa nɩhɩɛ̃́sɛ, rɩ́ Wɩɩsɛ kɛŋzɩnna ná fa mɩŋ ráŋ, a ɔsɛ aá bʋl Zeezi bɩbarɩ́.
11 Erodi rɩ́rʋ́ sóójiwa cermi Zeezi mí, a hɩ́ɩ̃́sʋ́, ká Erodi a ɓa pi gɛtʋlɩ́ súú, a a ɓa kánʋ́ bɩrmʋ́ Pɩlatɛ rɩ́.
12 Erodi rɩ́ Pɩlatɛ fa há ká dɩŋdɔ́má, ɛ́ kal, ɓa bɩ́rmɛ́ naŋnɔ́ŋsɛ.
Pɩlatɛ pá ŋmɛ́nɔ rɩ́wɔ́ ɓʋ́ Zeezi
13 Ɛ́ nɛ́ Pɩlatɛ yɩ́rɛ Wɩɩsɛ vʋk'ɔɔsa* nɩhɩɛ̃́sɛ, arɩ́ Zuwifiwa sɩ́dííre rɩ́ Zuwifiwa náŋa,
14 a bʋ́lwɔ́ rɩ́ bʋlɛ́:
«Ɩ́ kéŋ báálɔ né kóŋ rɩ́, a bʋl páŋ bʋlʋ́ yéŋŋi nɩɛ rɛ́.
Ɩ́ ná, ɩ́ tɩɩ sɩ́ɛ́ nɛ́ ŋ pi wɩ́ɛ́ ná ɩ́ há sʋ́ʋ́ zɔ́kɔ́ a bɔ́sʋ́, ká ŋ wɩ ɛ́ wɩ́ɛ́ sɩɛrʋ balá má néé, rʋʋ ɔ́ɔ́ zɔkɛ.
15 Erodi má wɩ wɩ́ɩ́ néé, rʋʋ ɔ́ɔ́ zɔkɛ, ɛ́ nɛ́ tɛ, ʋ a ɓa bɩrkánʋ́ kórá rɩ́.
Ɩ́ ná, báálɔ né wɩ wɩ́ɩ́ wuu ɛ́ɛ́ zɔkɛ a mɔ rɩ́wɔ́ ɓʋ́ʋ́.
16 Ɛ́ wɩ́ɛ́, ŋ sɩ́ a rɩ́wɔ́ bɛ́ŋsʋ́, ká rɩ́ŋ púú tá.»
17 [Bɩná wuu, rɩ Pakɛ* cana díí ní péré, Pɩlatɛ mɔhɔ̃́, bɩnajaa nɩɛ sɩɛrʋ, rʋ́ʋ́ lɩ́sɛ Zuwifiwa nɩjaalɩ́ tá.]
18 Ɛ́ nɛ́ nɩɛ ná wuu de kɔ kʋɔllɛ bʋlɛ́:
«Ɓʋ́ báálɔ né, áá já rɩ́ɩ́ tá Barabasɛ nɛ́.»
19 Ɛ́ Barabasɛ rɩ́rʋ́ náŋa fa ísó cɩ́ kuóre mí, a ɓʋ́ nɛrɔ má tɩɩ, ɛ́ nɛ́ tɛ ɓa kánʋ́ tɔ́ bɩnajaa.
20 Pɩlatɛ sɩɛ́ fa há có rʋʋ tá Zeezi, ɛ́ nɛ́ ʋ baa bɩrbʋl ɛ́ tɩɩ, nɩɛ ná rɩ́.
21 Amá ɓa ɔ́sɔ́ kɔ kʋɔllɛ a bʋlɛ́:
«A rɩ́wɔ́ ɓásʋ́ dagɛsɛ́* daha.»
22 Ɛ́ nɛ́ Pɩlatɛ baa ha bɔ́sɩ́wɔ́ naasɩ́ botoro nyúú mí bʋlɛ́:
«Ʋ zɔ́kɛ́ beé?
Ŋ wɩ wɩ́ɩ́ néé, rʋʋ zɔ́kɔ́ a mɔ ɓʋ́ɩ́.
Ɛ́ wɩ́ɛ́, ŋ sɩ́ a rɩ́wɔ́ bɛ́ŋsʋ́, ká rɩ́ŋ púú tá.»
23 Nɩɛ ná ha ɔsɛ kɩ́ɩ́lɛ, a kɔ kʋɔllɛ kɩ́ŋkáŋ bʋlɛ́:
«Ʋ mɔhɔ̃́ rɩ́wɔ́ ɓásɛ Zeezi dagɛsɛ́ nyúú.»
Ɓa kʋɔllɛ ná dí dóé Pɩlatɛ nyúú.
24 Ɛ́ nɛ́ Pɩlatɛ saŋ, a ɔ́wɔ́ há sʋ́l ɛ́.
25 Ʋ lɩ́sɩ́wɔ́ nɩjaalɩ́ ná tá; nɛrɔ ná rɩ́rʋ́ náŋa fa há cɩ́ kuóre mí, a ɓʋ́ nɛrɔ má tɩɩ, ɓa kánʋ́ tɔ́, ká pi Zeezi héwó nɛ́sɛ mɛ́, rɩ́wɔ́ ɔ́wɔ́ satɔrɔ́.
Ɓa ɓásɛ Zeezi dagɛsɛ́ daha
26 Ɛ́ nɛ́ ɓa ka Zeezi lɛ, aá mʋ́ rɩ́wɔ́ ɓásɛ dagɛsɛ́ daha.
Ɓaá mʋ́ ɛ́, a céŋ báálɔ oro, ɓaá yɩ́rɛ Sɩmɔŋ,* a lɛ Sɩɩrɛnɛ,* rʋʋ fa lɛ́ baka aá ko.
Ɓa kánʋ́, a pi dagɛsɛ́ ná báásʋ́, ʋ kaa tɩŋ Zeezi mí.
27 Nɩɛ ɓɩkana tɩ́ŋʋ́ har; ɛ́ nɩɛ sɩɛrʋ háála káŋ aá wi, aá hiĩni Zeezi wɩ́ɛ́.
28 Ɛ́ nɛ́ Zeezi bɩ́rɛ́, a bʋ́lwɔ́ rɩ́ bʋlɛ́:
«Zerizalɛmɛ háála, ɩ́ sɩ́ŋ wɩ́ɛ́ wí; amá ɩ́ wííwa tɩɩ wɩ́ɛ́ arɩ́rɩ́wa bɛlɛ wɩ́ɛ́.
29 Tɛ́ŋ nɔ́ŋɔ sɩ́ ko rɩ́ nɩɛ bʋlɛ́:
‹Ɩ́ ná wér, hápɩrɛ rɩ́ háála ná há wɩ lʋ́lɛ́, arɩ́ háála ná há wɩ bɛlɛ kené ɓa ɔsɛ!›
30 Ɛ́ mɛ́ nɛ́, rɩ́ nɩɛ bʋl pallɛ rɩ́ bʋlɛ́:
‹Ɩ́ ɓallɛ nyáŋrá mɛ́!›
Káá bʋl dúŋdúóme rí:
‹Ɩ́ tɔ́rá mɛ́!›
31 Ɓa háá a tulɔɔ nyɛ, tuhɩlɛ wɩ́ɛ́ ra wɩ bɔŋ?»
32 Ɓa há kéŋ Zeezi aá mʋ́ ɛ́, ɓa pɔ́ɔ́ kɛsɛ wɩ́bɔŋ'aara má bɛllɛ rɛ́, a kaá mʋ́ rɩ́wɔ́ ɓʋ́ʋ́sɛ súúrú mí.
33 Ɓa há mʋ́ɛ́ peri dɩhɩ̃́ ná ɓa háá yɩ́rɛ «Nyugbaŋa*», ráŋ nɛ́ ɓa ɓásɛ Zeezi dagɛsɛ́ daha, a ɓásɛ wɩ́bɔŋ'aara ná má bɛllɛ dagɛsɛ́ náŋa daha, nɔ́ŋɔ mɩŋ Zeezi néduu rí, ká nɔ́ŋɔ má mɩ́nʋ́ nágʋɔ rɩ́.
34 Ɛ́ nɛ́ Zeezi sɛ́:
«Ŋ Ana, wɩ́ɩ́ né ɓa há ɛ́ɛ́, héwó suúri, bee wɩ́ɛ́ ɓa wʋ́ʋ́ mʋ́l ɛ̃.»
Ká ɓa yo bíé* Zeezi gɛnnɛ wɩ́ɛ́, a zɩŋ nɛrɔ wuu háá púú ná, a paa ɓa náŋá.
35 Nɩɛ cɩ́ ráŋ aá bel.
Zuwifiwa sɩ́dííre cícérmú mí a bʋlɛ́:
«Ʋ lá nɩɛ náŋa tá; ʋ́ʋ́ sɩɛ́ lɔ́ʋ́ tɩɩ tá, rʋʋ nɛ́ ɓɩɛ́na ká Kirisi,* Wɩɩsɛ Nɩlɩsɛ.»
36 Sóójiwa ná má cícérmú mí, a tuu pérú, a a vɩ́nɛ́gɩr* a pɔ́ʋ́ rʋ́ʋ́ nyɔ,
37 ká bʋlɛ́:
«Rɩɩ nɛ́ ká Zuwifiwa kuóro, ɩ lɛ́ɩ́ tɩɩ tá.»
38 Ɓa pʋ́ŋsʋ́ dagɛsɛ́ ná nyúú rí bʋlɛ́: «|sc|bZUWIFIWA KUÓRO NÍ NYƐ.|d»
39 Wɩ́bɔŋ'aara ná nɔ́ŋɔ má máánʋ́ dagɛsɛ́ daha, káá tʋksɛ Zeezi bʋlɛ́:
«Ɩ rá to Kirisi ɓó?
Lɛ́ɩ́ tɩɩ tá, ká lárá má tá.»
40 Ɛ́ nɛ́ wɩ́bɔŋ'aarɔ ná nɔ́ŋɔ bɛ́sʋ́ nɔ́ŋɔ ná mɛ́, ká bʋlɛ́:
«Ɩ wɩ Wɩɩsɛ héwíŋ fá, ɩ rɩ́rʋ́ wɩ́ɩ́ há ká balá?
41 Ŋ é rɩ́rɩ́, ʋ mɔhɔ̃́ rɩ́wɔ́ bɛ́ŋsɩ́rá nyɛ, á wɩ́'állɛ nɛ́ hérá ɛ́ mɛ́; amá ʋ é wɩ wɩ́bɔ́ŋ wuu ɛ́ɛ́.»
42 Ká bʋl Zeezi rí bʋlɛ́:
«Zeezi, rɩɩ kúó díí kuorí, ɩ bɩ́ɩ́nɩ́ŋ wɩ́ɛ́.»
43 Ɛ́ nɛ́ Zeezi bʋl pɔ́ʋ́ bʋlɛ́:
«Taŋá nɛ́ ŋ bʋl aá pɛ́ɩ́, ŋ rɩ́rɩ́ wuu zaa sɩ́ zʋ arzána*.»
Zeezi sʋʋ
44,45 Wɩɩsɛ há kúé cɩ́ nyúú, dɩhɩ̃́ wuu dé a bíno ní, a kaá ja gbaanɛ bɩ́ŋbɩlɩ́ botoro.
Patɩ́ɩ́sazeno* ná ɓa há píé kɛ́rɛ Wɩcʋɔlɩjɩzeno* sɩɛrʋ, de lɩɩsɛ sɩ́sɩ́ɛ́nnʋ́wa mɛ́.
46 Ɛ́ nɛ́ ká Zeezi cáási kɩ́ŋkáŋ bʋlɛ́:
«Ana, ŋ píŋ hiẽsó héí nɛ́sɛ mɛ́.»
Ʋ há bʋ́l ɛ́ ko tenni, ʋ sʋ́wɔ́.
47 Sóójiwa nɔhɔ̃́ fa cɩ́ ráŋ; ʋ há ná wɩ́ɛ́ ná wuu há ɛ́ɛ́, ʋ bɩ́ Wɩɩsɛ mɛ́ bʋlɛ́:
«Taŋá, báálɔ né ɓɩɛ́na fa ká nɩtékétéké rí, ʋ wɩ wɩ́ɩ́ zɔ́kɛ́.»
48 Nɩkana ná wuu fa há kúé ciki ráŋ, rɩ́wɔ́ bel tʋtʋmɩ́ ná háá á rʋ́ʋ́ tʋŋ, ɓa ná ɛ́ tʋtʋmɩ́ rʋʋ tʋ́mɔ́.
Ɛ́ nɛ́ ɓa hiĩni a bɩrɛ aá mʋ́ jaá.
49 Zeezi nɩzɩmɛ́ wuu, arɩ́ háála ná fa há tɩ́ŋʋ́ mɛ́ a lɛ Galiile ko, ɓa fa cɩ́ dɩbólí, ká tɩ́ɛ́nɛ aá bel tʋtʋmɛ́ ná wuu háá tʋmɛ́.
Ɓa hú Zeezi
50,51 Báálɔ oro fa mɩŋ ráŋ, ʋ yɩr nɛ́ Zɔzɛfɛ,* a lɛ Zuwifiwa tɔ́ɔ́ oro ɓa háá yɩ́rɛ Arimate.
Ʋ fa ká nɩwérí rí a a tékétéké, a má fa dɩ́dɛllɛ Wɩɩsɛ kuótɔ́ɔ́ ná koe.
Ʋ má fa ká Zuwifiwa sɩ́dííre ná nɔ́ŋɔ nɛ́, amá ʋ náŋa ná há vʋ́ʋ́rɛ́ tʋŋ tʋtʋmɩ́ ná, ʋ fa tówó har; ʋ wɩ ɛ́ có.
52 Ɛ́ nɛ́ ʋ isi mʋ́ Pɩlatɛ* rɩ́, a sʋl Zeezi lɛlɔ.
53 Pɩlatɛ pɔ́ʋ́ ŋmɛ́nɔ, ʋ kóri Zeezi lɛlɔ ná dagɛsɛ́ ná daha, a ja pɛ́ŋpʋmmɔ bɔ́ʋ́, a kaa mʋ́ hu.
Bʋɔ ná mɛ́ ʋ há húú, ɓa lɛ́sʋ́ bʋ́ɩ́ daha nɛ́; ɓa ha wɩ nɛ́ŋ wuu ráŋ héé ná.
54 Ɛ́ tápʋl fa ká cana* ɓɩdííle ɛɛ nɛ́.
Ʋ nɩ́ɩ́ dí ká fɩɛlɛ́ tápʋl* pʋl; ɛ́ wɩ́ɛ́, nɩɛ fa púló aá káŋwɔ́ tɩɩ.
55 Háála ná fa há tɩ́ŋ Zeezi har lɛ Galiile ko, ɓa tɩ́ŋ Zɔzɛfɛ mɛ́ a mʋ́ bel lɛlbule ná, a ná ɛ́ ʋ há hú Zeezi.
56 Ɛ́ nɛ́ ká ɓa bɩrmʋ́ tɔ́ɔ́ sɩɛrʋ, a ja nʋnnɛ ná há kéŋ sɔ́ŋwero arɩ́ tulaaléwa, rɩ́wɔ́ kaa mʋ́ mɩ́sɛ Zeezi lɛlɔ ná.
Tápʋl fɩɛlɩ́ pʋl, ɓa isi fɩɛlɛ, anɛ ɛ́ kíŋse kɛnɔ há máŋsɛ́.