Ɓa kéŋ Zeezi mʋ́ hé kʋ́máŋdá Pɩlatɛ nɛ́sɛ mɛ́
15
1 Tɔ́ɔ́ há pʋ́lɛ́ cɩ́cʋɔ fól, Wɩɩsɛ vʋk'ɔɔsa* nɩhɩɛ̃́sɛ, arɩ́ Wɩɩsɛ kɛŋzɩnna,* rɩ́ Zuwifiwa nɩhɩɛ̃́sɛ,* a sɩɛ́ píwó tɔ́ɔ́ sɩ́dííre, ɓa wuu mʋ́ɔ́ ciki, rɩ́wɔ́ ná ɓa háá púú ná rɩ́ tʋŋ Zeezi mí.
Ɓa sɩɛ́ vʋ́ʋ́rɛ́ ɛ́ nɛ́, ká sɩɛ́ hé sóójiwa ɓa ka Zeezi vɔwɛ, a kaa mʋ́ kʋ́máŋdá Pɩlatɛ* dɩhɩ̃́.
2 Ɛ́ nɛ́ Pɩlatɛ bɔsɛ Zeezi:
«Ɩ nɛ́ ká Zuwifiwa* kuóro?»
Zeezi sɛ́:
«Anɛ ɛ́ ɩ há sɛ́.»
3 Ká Wɩɩsɛ vʋk'ɔɔsa nɩhɩɛ̃́sɛ ná sɩɛ́ cɛ́, a nyɛ nyɩɛnnɛ aá hé Zeezi mí.
4 Ɛ́ nɛ́ Pɩlatɛ bɔ́sʋ́:
«Beé rí tɛ ɩ wɩ wɩ́ɩ́ wuú bʋl?
Wɩ́ɛ́ ná ɓa há bʋ́lɛ́ aá tɛ́ɩ́ mɛ́, ɩ wʋ́ɔ́ nɛ ɓó?»
5 Ká Zeezi de táŋŋʋ́ nʋɔ tokoko.
Ʋ ɛ́ gɩrɛ Pɩlatɛ.
Pɩlatɛ pá ŋmɛ́nɔ rɩ́wɔ́ ɓʋ́ Zeezi
6 Bɩná wuu, rɩ Pakɛ* cana nɛ́ péré, jamáŋ sʋl kʋ́máŋdá Pɩlatɛ, ʋ lɩ́sɛ nɩɛ ná há á wɩ́tɩɛnnɛ ɓa kɛ́sɩ́wɔ́ tɔ́ bɩnajaa mɛ́, balá a tá.
7 Báálɔ oro sɩɛ́ fa mɩŋ ráŋ ɓaá yɩ́rɛ Barabasɛ, ʋ rɩ́rʋ́ náŋa fa ísó cɩ́ kuóre mí, a ɓʋ́ nɛrɔ má tɩɩ, ɓa kɛ́sɩ́wɔ́ tɔ́ bɩnajaa mɛ́.
8 Ɛ́ nɛ́ sɩɛ́ jamáŋ ná tɩŋ mʋ́ Pɩlatɛ dɩhɩ̃́, rɩ́wɔ́ ná nɛrɔ ná ʋ háá já rʋ́ʋ́ lɩ́sɛ bɩnajaa mɛ́ tá; anɛ ɛ́ ʋ há valɛ́ aá a bɩná wuu.
9 Pɩlatɛ sɩɛ́ bɔ́sɩ́wɔ́:
«Ɩ́ có rɩ́ŋ pí Zuwifiwa kuóro ní tá?»
10 Ʋ fa ɩ́ɔ̃́ zɩŋ rɩ́, Wɩɩsɛ vʋk'ɔɔsa ná há kéŋ báhaksɩ́ rɩ́ Zeezi ní tɛ, ɓa kánʋ́ ko hóú nɛ́sɛ mɛ́.
11 Ká Wɩɩsɛ vʋk'ɔɔsa nɩhɩɛ̃́sɛ ná yíyiki jamáŋ ná, a makɛ rɩ́wɔ́ sʋl Pɩlatɛ rʋ́ʋ́ sɩ́ Zeezi tá, ká tá Barabasɛ nɛ́.
12 Pɩlatɛ baa ha bɔsɛ jamáŋ a bʋlɛ́:
«Ká nɛrɔ ná ɩ́ háá yɩ́rɛ Zuwifiwa kuóro, ɩ́ sɛ́ rɩ́ŋ ɔ́ʋ́ wɩ́ɛ́ ɛrɛ́ rɛ́?»
13 Ɛ́ nɛ́ nɩɛ ná wuu de ŋmaarɛ bʋlɛ́:
«Kánʋ́ é ɓásɛ dagɛsɛ́* daha.»
14 Pɩlatɛ baa bɔ́sɩ́wɔ́:
«Beé rí tɛ ɩ́ sɛ́ rɩ́ŋ kánʋ́ é ɓásɛ dagɛsɛ́ daha?
Ʋ zɔ́kɛ́ beé?»
Ɓa baa de ɔsɛ bʋl ɛ́ tɩɩ tɩɩ nʋ́ʋ́ bʋlɛ́:
«Kánʋ́ é ɓásɛ dagɛsɛ́ daha.»
15 Pɩlatɛ sɩɛ́ háá jɛɛ́ rɩ́ jamáŋ ná sɩɛrʋ tɔ́rʋ́ nyúú, ɛ́ nɛ́ ʋ ɓɩɛ́na a ɓa lɩ́sɛ Barabasɛ ná nɛ́ tá.
Ká sɩɛ́ a ɓa fɩ́rɛ Zeezi wérí, ká bʋlɛ́ rɩ́wɔ́ kaa mʋ́ ɓásɛ dagɛsɛ́ daha.
Sóójiwa sáákɛ́ Zeezi
16 Sóójiwa sɩɛ́ kánʋ́ zʋ kʋ́máŋdá Pɩlatɛ wuolo* sɩɛrʋ, a yɩ́rɛ náŋá zʋʋ kílú.
17 Ɓa wúrkú gɛnnɛ, ká pi gɛmʋɔlɩ́ súú, a ja sɔrʋ a sɔ kuónéŋcúú, a pii cúú nyúú mí.
18 Ká sɩɛ́ tuu peri aá bɔ́llʋ́ bʋlɛ́:
«Cʋɔlɛ yáá!
Zuwifiwa kuóro!»
19 Ɓa pi deŋtuke a ŋmʋ́ŋmɔ́wʋ́ nyúú mí, a pʋ́sɛ mɩŋtʋɔrʋ waasɛ sɩ́ɛ́ mɛ́, ká ɓírmi tíé aá bɔ́llʋ́.
20 Sóójiwa ná sɩɛ́ sáákɛ́ Zeezi ɛ́ nɛ́, ká sɩɛ́ ka gɛmʋɔlɩ́ ná wurki, ká bɩrpú tɩɩ gɛnnɛ súú, a sɩɛ́ kánʋ́ lɛ aá mʋ́ʋ́ dɩɓásɛ.
Ɓa ɓásɛ Zeezi dagɛsɛ́ daha
21 Ɓa sɩɛ́ há kenú lɛ aá mʋ́ʋ́ dɩɓásɛ ná, ɓa céŋ báálɔ oro rʋʋ fa lɛ́ baka aá ko.
Ɛ́ báálɔ yɩr nɛ́ Sɩmɔŋ,* a lɛ Sɩɩrɛnɛ*; Alɛkzaŋdɛ rɩ́rʋ́ maábio Rifisi áná nɛ́.
Ʋ nɛ́ ɓa kɛ́rɛ́ ká bɩbarɩ́, ʋ la Zeezi dagɛsɛ́ ná baasɛ tɩ́ŋwɔ́ mɛ́.
22 Ɓa ka Zeezi va ɛ́ wuu, a mʋ́ dɩhɩ̃́ ná ɓa háá yɩ́rɛ́ Golgota.
* Ɛ́ dɩhɩ̃́ dé ká dúŋdúóŋ rí, ká ʋ mála de nɛ nɩbííno nyúgbaŋa há nɩhɩ̃́ ɛ́.
23 A sɩɛ́ pi dɩvɛ́ŋ,* a ja luri oro ɓaá yɩ́rɛ «mííri*» a kuosi, a pii pá Zeezi rʋ́ʋ́ nyɔ, amá ʋ vɔ́ɔ́.
24 Ká ɓa sɩɛ́ kánʋ́, a ɓásɛ nɛ́ŋsa rɩ́ naasɛ ɓarɛ dagɛsɛ́ ná, a pɔ́ʋ́ gɛnnɛ má yo bíé* a ɓa náŋá.
25 Cɩ́cʋɔ bɩ́ŋbɩlɩ́ nɛ́mɛ́ cɛ́rɛ́ nɛ́ ɓa ɓásʋ́ ɛ́.
26 Ɓa sɩɛ́ pʋ́ŋsɛ óŋ rí, a pii maanɛ Zeezi nyúú rí, dagɛsɛ́ daha, a makɛ rɩ́ nɩɛ karmɛ, a zɩ́mʋ́ sʋʋ mʋ́l.
Ɓa sɩɛ́ pʋ́ŋsɔ́ bʋlɛ́: «|sc|bZUWIFIWA KUÓRO NÍ NYƐ.|d»
27 Ɛ́ kal wuu, ɛ́ dɩhɩ̃́ tɩɩ tɩɩ, ɓa kɛ́sɛ́ gabɩbara bɛllɛ má ɓásɛ dagɛsɛ́ bɛllɛ daha, nɔ́ŋɔ Zeezi néduu, ká nɔ́ŋɔ má mɩ́nʋ́ nágʋɔ.
28 Ɛ́ ná ɓa há pʋ́ŋsɛ́ hé Wɩɩsɛ Kɛnɔ mɛ́ bʋlɛ́:
«Ɓa dɩ́ɩ́sʋ́ hé wɩ́bɔŋ'aara sɩɛrʋ.»
Ɛ́ nʋɔ nɛ́ súé.
29 Nɩɛ ná há válɛ́ aá daarɛ Zeezi mí, ɓaá yo nyúú, ká tʋ́ksʋ́ bʋlɛ́:
«Háya!
Ɩ nɛ́ há wo Wɩcʋɔlɩjɩzeno* céŋŋi ká bɩrɛ aá sɔ́ʋ́ tápʋlɛ botoro pɛ́kɛ.
30 Rɩɩ wóí tɩɩ aá la, ɩ lɛ dagɛsɛ́ nyáŋ daha tuwi ráá ná!»
31 Wɩɩsɛ vʋk'ɔɔsa nɩhɩɛ̃́sɛ, arɩ́ Wɩɩsɛ kɛŋzɩnna má cícérmú mí bʋlɛ́:
«Ʋ há wo nɩɛ la aá tá kɩ́ŋkáŋ, ʋ́ʋ́ lɔ́ʋ́ tɩɩ má tá yéé!
32 Ʋ há sʋ́ʋ́ nɛ́ ká Kirisi,* Ɩzɩrayɛl kuóro, ʋ́ʋ́ lɛ dagɛsɛ́ nyáŋ daha a tuwi ráá ná, a a yardá, a lɔ́ʋ́ wɩ́ɛ́ dí.»
Gabɩbara ná má bɛllɛ ɓa há ɓásɛ lɛ́lʋ́, ɓa má tʋ́tʋ́ksʋ́.
Zeezi sʋʋ
33 Wɩɩsɛ há kúé cɩ́ nyúú tóŋtóŋ, dúníé wuu dé a bíno ní, a mʋ́ peri anɛ gbaanɛ bɩ́ŋbɩlɩ́ botoro cɛ́rɛ, ká pʋmmɔ baa ko.
34 Ɛ́ cɛ́rɛ mɛ́ nɛ́, Zeezi cáási Zuwifiwa* liŋó mí, a yɩ́rɛ́ bʋlɛ́:
|i«Eloyi, Eloyi, lámá sábásɩ́tánɩ́?»|d Ʋ mʋ́l nɛ́ ká: «Ŋ Wɩɩsɛ, ŋ Wɩɩsɛ, beé rí tɛ ɩ vɛ́ŋ tá?»35 Nɩɛ ná fa há mɩŋ ráŋ a nɛ ɛ́, náŋa sɛ́:
«Héí!
Ɩ́ zesi, ʋʋ́ yɩ́rɛ Wɩɩsɛ wɩ́laabʋllɔ* Eli* ní.»
36 Ká ɓa ɛ́ nɩɛ sɩɛrʋ, nɔ́ŋɔ isi fá mʋ́ pi gɛkɔsɔ liwi vɩ́nɛ́gɩr* mɛ́, a pii tʋ daa mɛ́, a pii tɛrɛ Zeezi rʋ́ʋ́ nyɔ; ká ɓa sɛ́:
«Á dɛllɛ ná, Eli sɩ́ ko kánʋ́ kórí dagɛsɛ́ ná nyúú?»
37 Zeezi baa cáási kɩ́ŋkáŋ, ká sʋwɛ.
38 Patɩ́ɩ́sazeno* fa mɩŋ Wɩcʋɔlɩjɩzeno mí, ɓa pii ka jaa ná conni bɛllɛ; Zeezi há dé ko mɩŋ sʋwɛ́ mɛ́, rɩ ɛ́ patɩ́ɩ́sazeno dé pɔ́ nyúú rí, ká de lɩɩsɛ bɛllɛ ko tuwi yakɛ tíé.
39 Ɛ́ nɛ́ sóójiwa nɔhɔ̃́ oro fa há cɩ́ Zeezi sɩ́ɛ́ a pɔ́ʋ́ mɛ́, ʋ há bélú há á ɛ́ ná ká sʋwɛ, ʋ sɛ́:
«Taŋá, báálɔ né ɓɩɛ́na ká Wɩɩsɛ Bio ní!»
40 Háála bamma má fa cɩ́ sɩ́ɛ́rɩ́, ká tɩ́ɛ́nɛ aá bel tʋtʋmɩ́ ná há tʋ́mɛ́.
Ɛ́ háála sɩɛrʋ, Magɩdala tɩ́náwa Maari,* arɩ́ Salome, a sɩɛ́ pi bápʋɔsɩ́wie Zakɛ,* rɩ́ Zoozi maá Maari* fa mɩŋ ráŋ.
41 Zeezi fa há mɩŋ Galiile* tíé mí, ɓa nɛ́ fa tɩ́ŋʋ́ mɛ́ aá sáŋʋ́ rɩ́ ɓɩdííle wɩ́ɛ́.
Ɓa rɩ́wɔ́ hánáŋa nɛ́ fa tɩ́ŋ Zeezi mí aá mʋ́ Zerizalɛmɛ.
Ɓa hú Zeezi
42 Ɛ́ tápʋl fa ká cana* ɓɩdííle ɛɛ nɛ́.
Tɔ́ɔ́ ná háá pʋlɛ́ káá pá fɩɛlɛ́ tápʋl* nɛ́.
43 Ʋ gbaŋ lɛrɛɛ, báálɔ oro há lɛ́ Arimate, ɓaá yɩ́rʋ́ Zɔzɛfɛ,* ʋ ká nɩpíŋí rí, a a tɔ́ɔ́ sɩ́dííre ná nɔ́ŋɔ, a má fa dɩ́dɛllɛ Wɩɩsɛ kuótɔ́ɔ́ ná koe.
Ʋ nɛ́ sɩɛ́ ísé, a nyáŋʋ́ baŋcɩla mɛ́, ká mʋ́ sʋl Zeezi lɛlɔ Pɩlatɛ* dɩhɩ̃́, rʋ́ʋ́ kóri kaa mʋ́ hu.
44 Zɔzɛfɛ há mʋ́ɛ́ bʋl ɛ́, ʋ dé uri Pɩlatɛ mɛ́ nɛ́; bee wɩ́ɛ́ ʋ wɩ ɛ̃ rɩ́ Zeezi sʋ́wɔ́ nɛ́ ɛ́ wáárɛ.
Ɛ́ nɛ́ ʋ tʋŋ yɩ́rɛ sóójiwa nɔhɔ̃́ ná; ʋ ko, ʋ bɔ́sʋ́:
«Taŋá, Zeezi sʋ́wɔ́ rɛ́?»
45 Ʋ sɛ́:
«Óó, ʋ sʋ́wɔ́ rɛ́.»
Ɛ́ nɛ́ Pɩlatɛ sɩɛ́ pá Zɔzɛfɛ ŋmɛ́nɔ, rʋ́ʋ́ mʋ́ kóri Zeezi lɛlɔ ná kaa mʋ́ hu.
46 Zɔzɛfɛ sɩɛ́ mʋ́ a yɔwɛ pɛ́ŋpʋmmɔ a kaa ko, a kóri Zeezi lɛlɔ ná dagɛsɛ́ ná daha, a pi pɛ́ŋpʋmmɔ ná bɔ́ʋ́, a kaa mʋ́ lɛlbule oro, ɓa fa há lú bʋ́ɩ́ daha tá, a púú hu ráŋ.
Ká sɩɛ́ billi dɔ́wɩ́zeno mʋ́ suki bʋɔ ná nʋɔ.
47 Magɩdala tɩ́náwa Maari, arɩ́ Zoozi maá Maari fa cɩ́nɔ́, a ná ráŋ ná ɓa há húú, ká zɩŋ mʋ́ jaá.