Zuwifiwa sɩ́dííre bɩ́ɩ́nʋ́ rɩ́wɔ́ ɓʋ́ Zeezi
14
1 Ʋ kúó káánɛ tápʋlɛ bɛllɛ ká rɩ́wɔ́ dí Pakɛ* cana, arɩ́ sɩbʋ́r toó dɩpɛ́ŋ* cana.
Wɩɩsɛ vʋk'ɔɔsa* nɩhɩɛ̃́sɛ rɩ́ Wɩɩsɛ kɛŋzɩnna sɩɛ́ isi pi lɩ́ŋ mɛ́, aá ja Zeezi rɩ́wɔ́ kaa ɓʋ́.
2 Ɓa sɛ́:
«Á wʋ́ʋ́ wuo ka aá ɓʋ́ cana kal.
Raá kenú cana kal, ʋ sɩ́ a loó.»
Háálɔ oro zíl Zeezi
3 Zeezi há zʋ́ Betani, a mɩŋ dayalmɩdúóri Sɩmɔŋ* jaa mɛ́ aá dí ɓɩɛ, háálɔ oro má kúó zʋ ráŋ a ka loŋŋo ʋ nɛ́sɛ mɛ́.
Tulaalé ná ɓa háá yɩ́rɛ náárɛ,* óŋ wuu há wɩ ráŋ kúósé, ɓa nɛ́ mɩŋ ɛ́ loŋŋo sɩɛrʋ.
Ʋ kéŋ sɔ́ŋwero, ʋ yɛlɩ́ má zéŋ.
Ɛ́ nɛ́ háálɔ ná lúri loŋŋo ná, ká bɩ́sɛ tulaalé ná hé Zeezi nyúú mí.
4 Nɩɛ ná há mɩŋ ráŋ náŋa fa wɩ ɛ́ có.
Ɛ́ nɛ́ ɓa sɛ́:
«Tulaalé nyɛ ná zɔkɛ́ mʋ́l nɛ́ beé rí?
5 Rɩ ɓa fa púú yɛ́llɛ rɛ́, ʋ yɛlɩ́ kéŋ déníé* zɔɔtoro, rɩ́wɔ́ pii pá nɩyaara.»
Ká isi aá dí cɔwɩɩlɔ́ háálɔ ná nyúú mí.
6 Ɛ́ nɛ́ Zeezi sɛ́:
«Ɩ́ lóú cɩ́m.
Beé rí ɩ́ wɩ́wálmʋ́ nyɛ.
Ʋ tʋ́ŋ tʋtʋ́ŋwérí rí a páŋ.
7 Ɩ́ ná wɩ́ɩ́ ná há tɛ ŋ bʋl nyɛ; ɩ́ rɩ́ nɩyaara ná nɛ́ mɩŋ náŋá mɛ́ tápʋ́l wuu; ɩ́ wo wérí a aá pɔ́wɔ́, kál ná wuu ɩ́ há có ní, ká ɩ́ wɩ́ŋ é wuó ná kal wuu ɩ́ laka.
8 Ʋ há wo wɩ́ɩ́ ná nɛ́ ʋ a.
Ʋ lá sɩ́ɛ́ pi tulaalé héŋ mí, anɛ ŋ bʋɔ kal zʋ́ɩ́, káŋ ha wɩ sʋ́wɛ́.
9 Taŋá nɛ́ ŋ bʋl aá pɛ́ɩ́wa.
Háálɔ né yɩr waá yʋ́ksɛ.
Ɓa háá bʋl Labaarɩwero ná rɩ́ɩ́ mʋ́ʋ́ ɓiiri ráŋ ná, dúníé né wuu mí, ɓa sɩ́ bʋl háálɔ né má wɩ́'aalɩ́ né wɩ́ɛ́, a mʋ́ peri ráŋ.»
Zɩdaasɛ hóú síri rʋ́ʋ́ yɛ́llɛ Zeezi
10 Ɛ́ nɛ́ Zeezi karmɩbɛlɛ fí rí bɛllɛ ná sɩɛrʋ nɔ́ŋɔ, ʋ ná ɓa háá yɩ́rɛ Zɩdaasɛ* a lɛ Isikariyo, ʋ isi mʋ́ ná Wɩɩsɛ vʋk'ɔɔsa nɩhɩɛ̃́sɛ, a bʋlʋ́ é wo Zeezi kaá pɔ́wɔ́.
11 Ɓa nʋ́ʋ́ liŋó tenni, rʋʋ ká satɔrɔ́ pɔ́wɔ́ wuu.
Ɛ́ nɛ́ ɓa sɛ́ rɩ́ ɓa sɩ́ pɔ́ʋ́ meéwíé.
Ɛ́ nɛ́ Zɩdaasɛ lɛ, aá ja gbel rʋ́ʋ́ tɩŋ ráŋ mɛ́, a ka Zeezi pá.
Zeezi hatɩ́ŋnɛ́ Pakɛ cana
12 Sɩbʋ́r toó dɩpɛ́ŋ* cana tápʋlɛ kal púli, Zuwifiwa ɓʋ́ pieŋso ní.
Ɛ́ kal nɛ́ péré, Zeezi karmɩbɛlɛ bɔ́sʋ́ bʋlɛ́:
«Ɩ có ráá mʋ́ nɛɛ́ rɛ́ a a Pakɛ* ɓɩdííle bílí mí?»
13 Ɛ́ nɛ́ ʋ tʋ́mʋ́ karmɩbɛlɛ bɛllɛ a bʋ́lwɔ́ rɩ́ bʋlɛ́:
«Ɩ́ zʋ Zerizalɛmɛ* sɩɛrʋ, ɩ́ sɩ́ céŋ báálɔ oro rʋʋ cɩ́ɩ́nɛ nyii rí búlli; ɩ́ tɩ́ŋʋ́ mɛ́.
14 Ʋ há mʋ́ɛ́ zʋ jaa ná, ɩ́ bʋl ɛ́ jaa tɩ́na rɩ́ bʋlɛ́:
‹Á Karmɩ'ana sɩ́rá ko bɔ́sɩ́, rɩ́ɩ́ makɛ jaa rʋ́ʋ́ rɩ́rʋ́ karmɩbɛlɛ zʋ ráŋ, a dí Pakɛ cana ɓɩdííle.›
15 Ʋ sɩ́ makɛ jɩtúkzeno oro ɓa há bɩ́rmɛ́ tá, a pɛ́ɩ́wa; ɩ́ zʋ ráŋ, a a Pakɛ cana ɓɩdííle bil.»
16 Ʋ karmɩbɛlɛ ná zʋ tɔ́ɔ́ sɩɛrʋ.
Zeezi há mákɛ́ wɩ́ɛ́ ná tɩɩ tɩɩ nɛ́ ɓa mʋ́ ná.
Ɛ́ nɛ́ ɓa bɩ́rmɩ́wɔ́ Pakɛ cana ɓɩɛ wuu ráŋ.
17 Gbaŋ gbaanɛ, Zeezi rɩ́rʋ́ karmɩbɛlɛ fí rí bɛllɛ ná mʋ́ zʋ ɛ́ túko.
18 Ɓa kénó aá dí ɓɩdííle, ɛ́ nɛ́ Zeezi sɛ́:
«Ɩ́ zesi wérí, ɩ́ sɩɛrʋ oro ríí á rʋ́ʋ́ kánɩ́ŋ yɛ́llɛ dí; ʋ waá giri.»
19 Ɓa sɩɛnnɛ púl a zɔkɛ, ɓa sɩɛ́ bɔ́sʋ́ balá baláwa; oro má:
«Ŋ nɛ́?»
Oro má:
«Ŋ nɛ́?»
20 Ɛ́ nɛ́ ʋ bʋl pɔ́wɔ́:
«Ɩ́ fí rí bɛllɛ nyáŋ sɩɛrʋ, ʋ ná ŋ rɩ́rʋ́ háá cɛ́rɛ́ rɩ́ɩ́ tʋ gbaŋa mɛ́, ʋ tɩ́na nɛ́.
21 Nɩbiino Bio* á rʋ́ʋ́ sʋwɛ ɛ́ ná ɓa há pʋ́ŋsɛ́ bʋ́lʋ́ sʋʋ wɩ́ɛ́ nɛ́.
Amá ʋ sɩ́ lɔrɛ, a pá nɛrɔ ná há sɩ́ ka Nɩbiino Bio pɔ́ʋ́ ɓʋ́ɓʋ́ʋ́ra.
Rɩ ɓa fa wʋ́ʋ́ tɩ́na lʋ́lɛ́ nɛ́ weré.»
22 Ɓa há kéné aá dí, Zeezi pí dɩpɛ́ŋ, a bɔ́llɛ Wɩɩsɛ, ká kaa conni pɔ́wɔ́ ká bʋlɛ́:
«Ɩ́ la; ŋ tɛŋ nɛ́ ɛ́.»
23 Ʋ baa pi dɩvɛ́ŋ* má rɩ́ nyíŋgbaŋa, a bɔ́llɛ Wɩɩsɛ, ká pii pɔ́wɔ́, ɓa wuu laa nyɔ.
24 Ká ʋ bʋl pɔ́wɔ́ bʋlɛ́:
«Ŋ cɛ́l nɛ́ ɛ́.
Ŋ háá á rɩ́ŋ sʋwɛ rɩ́ŋ cɛ́l ná bɩ́sɛ nɩkana yɩr mɛ́, rɩ́wɔ́ tɩŋ ɛ́ mɛ́, rɩ́wɔ́ rɩ́ Wɩɩsɛ ka nʋtʋmɛ* nɛ́ ɛ́.
25 Taŋá nɛ́ ŋ bʋl aá pɛ́ɩ́wa; ŋ báá waá a rɩ́ŋ bɩrnyɔ dɩvɛ́ŋ ná, a kaá ja kal ná ŋ rɩ́rɩ́wa háá á ráá nyɔ ɓɩhúónní, Wɩɩsɛ kuótɔ́ɔ́ sɩɛrʋ.»
26 Ɓa yɩ yɩɩla bɩ Wɩɩsɛ mɛ́, ká isi lɩɩ mʋ́ zɩ́ ólívi* tuuni paalɔ daha.
Zeezi lá sɩ́ɛ́ bʋl rɩ́ Pɩɛrɛ sɩ́ báásʋ́
27 Zeezi bʋl pɔ́wɔ́ bʋlɛ́:
«Ɩ́ wuu sɩ́ fá ká táŋ.
Ɛ́ nɛ́ ɓa pʋ́ŋsɛ Wɩɩsɛ Kɛnɔ sɩɛrʋ a bʋlɛ́ Wɩɩsɛ sɛ́:
‹Ŋ sɩ́ ŋmɔwɛ penʋɔlɔ,* ká rɩ́ pieŋse* fá pɩsɛ.›
28 Amá rɩŋ nɛ́ bɩ́rɛ́ isi sʋʋ mɛ́, ŋ sɩ́ lɛ́ɩ́wa sɩ́ɛ́ mʋ́ Galiile* tíé.»
29 Pɩɛrɛ bʋl pɔ́ʋ́ bʋlɛ́:
«Rɩ nɩɛ wuu níí fɛ́ɛ́ káá tɛ́ɩ́ má, ŋ é waá fá káá tɛ́ɩ́.»
30 Ɛ́ nɛ́ Zeezi sɛ́:
«Lo rɩ́ŋ bʋl taŋá pɛ́ɩ́:
ɩ nɛ́, zaa wuu, tɩ́taŋ né tɩɩ, rɩ zíɓelo ha wɩ kúólé peri naasɩ́ bɛllɛ, ɩ́ sɩ́ báásɩ́ŋ naasɩ́ botoro.»
31 Ɛ́ nɛ́ Pɩɛrɛ ɔsɛ bʋl nʋdóé a bʋlɛ́:
«Rɩ ɓaá dé ɓʋ́ŋ ɩ har má, ŋ wɩ́ɩ́ báásɛ.»
Ʋ karmɩbɛlɛ ná wuu bʋl ɛ́ tɩɩ tɩɩ.
Zeezi cʋ́ɔ́lɛ́ Wɩɩsɛ Zesemane záádɛ́ mɛ́
32 Ɛ́ nɛ́ ɓa mʋ́ dɩhɩ̃́ oro ɓaá yɩ́rɛ ráŋ Zesemane*; Zeezi bʋ́lʋ́ karmɩbɛlɛ rɩ́ a bʋlɛ́:
«Ɩ́ ké rɛɛ́wa ká rɩ́ŋ mʋ́ cʋɔlɛ Wɩɩsɛ ká ko.»
33 Ʋ pɛ́ ka Pɩɛrɛ, rɩ́ Zakɛ, rɩ́ Zaŋ a tɩ́ŋʋ́ tɩɩ mɛ́.
Héwíŋ rɩ́ sazɔkɔ́ sɩɛ́ púló a kánʋ́.
34 Ɛ́ nɛ́ ʋ bʋ́lwɔ́ rɩ́ bʋlɛ́:
«Sazɔkɔ́ fúklíŋ dʋma, aá ja rʋ́ʋ́ ɓʋ́ŋ; ɩ́ cɩ́ rɛɛ́wa a barɛ dóŋ.»
35 Ká ʋ dáárɩ́wɔ́ a mʋ́ sɩ́ɛ́ mʋɔ́, a tuwi ɓírmi tíé a sʋl Wɩɩsɛ bʋlɛ́, rɩ ɛ́ wúóló, rɩ́ Wɩɩsɛ sɩ́ ló rí wɩhála né pérú.
36 Ʋ sʋ́lʋ́ bʋlɛ́:
«Ŋ Ana Wɩɩsɛ, ɩ wo wɩ́ɩ́ wuu ní aá a; sɩɛ́ a rɩ́ wɩɩla né sɩ́ŋ pérú.
Amá taŋa, tʋ́mɩ́ cólle, ká lóŋ é cólle.»
37 Ʋ bɩ́rɔ́ kóú karmɩbɛlɛ ná botoro rɩ́, rɩ ɓa pɩ́ dóŋ.
Ɛ́ nɛ́ ʋ bɔsɛ Pɩɛrɛ* bʋlɛ́:
«Sɩmɔŋ,* ɩ pɩ́ dóŋ rɩ́ yáá?
Ɩ wɩ wóllé barɛ dóŋ lɛ́ɛ́rɛ má tɩɩ?
38 Ɩ́ barɛ dóŋ a cʋɔlɛ Wɩɩsɛ, a makɛ rɩ́ɩ́wa sɩ́ yéŋŋú.
Nɩbííno sabɩɩna é có wérí ɛɛ, ká ʋ tɛŋnamɩɛ nɛ́ wɩ wo.»
39 Ɛ́ nɛ́ ʋ baa kɛ́kwɔ́ mɛ́, a baa sʋ́lʋ́ dʋ́ŋdʋ́ʋ̃́ wɩsʋlɔ́ ná tɩɩ tɩɩ.
40 Ʋ bɩ́rɔ́ ko, rɩ ɓa báá pɩ́ dóŋ.
Dóŋ wówó wérí.
Ɓa wʋ́ɔ́ háá bʋ́lʋ́ ná rɩ́ pɔ́ʋ́ ɛ̃.
41 Ʋ bɩ́rɔ́ kówó rí naasɩ́ botoro nyúú mí, a sɩɛ́ bʋlɛ́:
«Ɩ́ ha dé pɩ́ dóŋ ní aá fɩɛlɛ nyɛ?
Ʋ mɔhɔ̃́.
Tɛ́ŋ péró.
Ná, ɓa kéŋ Nɩbiino Bio* hé wɩ́tɛ'aara nɛ́sɛ mɛ́.
42 Ɩ́ isi ráá col; ná nɛ́ŋ ná háá á rʋ́ʋ́ yɛ́llɩ́ŋ dí, ʋ péró.»
43 Zeezi ha mɩŋ bʋlɛ́ mɛ́, rɩ Zɩdaasɛ há lɛ́ Isikariyo, ʋ karmɩbɛlɛ fí rí bɛllɛ ná sɩɛrʋ nɔ́ŋɔ, péró arɩ́rʋ́ har nɩkana.
Wɩɩsɛ vʋk'ɔɔsa nɩhɩɛ̃́sɛ, rɩ́ Wɩɩsɛ kɛŋzɩnna, rɩ́ Zuwifiwa sɩ́dííre, nɛ́ tʋ́ŋwɔ́, ɓa pa tókowíé rɩ́ naɓókówa tɩŋ Zɩdaasɛ mɛ́ ko.
44 Zeezi kaapáárɔ Zɩdaasɛ lá sɩ́ɛ́ bʋl nɩkana ná rɩ́ bʋlɛ́:
«Á háá mʋ́ɛ́ rɩ́ŋ bɔ́llɛ nɛ́ŋ ná ká kaa kormi, ɩ́ nɩjaalɩ́ ná nɛ́ ɛ́.
Ɩ́ de kánʋ́, a pɔ́ʋ́ mɛ́ wérí kaa col.»
45 Ɓa mʋ́, ʋ tuu peri Zeezi, a bʋlɛ́:
«Karmɩ'ana.»
Ká kánʋ́ kormi.
46 Ɛ́ nɛ́ nɩkana ná de gburki Zeezi, a ka.
47 Ɛ́ nɛ́ Zeezi karmɩbɛlɛ ná fa há cɩ́ ráŋ, nɔ́ŋɔ kánʋ́ tókowí pɔŋ foki sikuo mí, a ɓá Wɩɩsɛ vʋk'ɔɔsa ná nɔ́ŋɔ tʋtʋnnɔ dɩllɛ coki.
48 Ɛ́ nɛ́ Zeezi wúrú nʋɔ mɛ́ a bɔ́sɩ́wɔ́:
«Ɩ́ kúó rɩ́ɩ́wa kánɩ́ŋ arɩ́ tókowíé rɩ́ naɓókówa, ŋ ká gabɩbár rɛ́?
49 Ŋ rɩ́rɩ́wa wuu ní hé náŋá aá zʋ Wɩcʋɔlɩjɩzeno* kál wuu, ká ɩ́ wɩ́ŋ kené ráŋ.
Amá ɛ́ há pʋ́ŋsɛ Wɩɩsɛ Kɛnɔ sɩɛrʋ rɩ́wɔ́ áŋ, ɛ́ nɛ́ zaa kúé.»
50 Ɛ́ nɛ́ ʋ karmɩbɛlɛ ná wuu fá ká tɔ́ʋ́.
51 Heŋbólwíé oro má fa báákɛ gɛbasa a tɩ́ŋwɔ́ mɛ́.
Ɓa cɔ́ʋ́ gɛbasa mɛ́ a kánʋ́ má.
52 Ʋ púrú gɛbasa tá ká fá yʋ́ksɛ rɩ́ tɛŋɓɩla.
Ɓa kéŋ Zeezi mʋ́ Zuwifiwa sɩ́dííre sɩ́ɛ́
53 Ɛ́ nɛ́ ɓa ka Zeezi mʋ́ Wɩɩsɛ vʋk'ɔɔsa nɔhɔ̃́ jaa.
Wɩɩsɛ vʋk'ɔɔsa wuu, rɩ́ nɩhɩɛ̃́sɛ* rɩ́ Wɩɩsɛ kɛŋzɩnna wuu ko hé náŋá mɛ́ ráŋ.
54 Pɩɛrɛ fa lʋ́ɔ́rɔ́ tɩ́ŋwɔ́ mɛ́ har rɩ́ wuu, a ko zʋ Wɩɩsɛ vʋk'ɔɔsa nɔhɔ̃́ ná wuolo, a ko ké tʋtʋnna sɩɛrʋ aá wieni níŋ.
55 Wɩɩsɛ vʋk'ɔɔsa nɩhɩɛ̃́sɛ rɩ́ Zuwifiwa sɩ́dííre ná wuu ciki, a sɩɛ́ bɔsɛ aá ja nɛ́ŋ ná há sɩ́ bʋlʋ́ ká dáŋsɩ́ɛ́, rɩ Zeezi á wɩ́bɔmɔ, a makɛ rɩ́wɔ́ tɩŋ ɛ́ mɛ́ ɓʋ́ Zeezi, amá ɓa gúló, ɓa wɩ nɛ́ŋ né.
56 Nɩɛ ɓɩkana é kúó a nyɛ nyɩɛrʋ hóú nʋɔ mɛ́, amá ɓa wɩ́bʋlɛ́ wuu ká bámmá bámmáwa.
57 Náŋa isi nyɛ nyɩɛnnɛ hóú mí a bʋlɛ́:
58 «Á nɩ́ɔ́ rʋʋ sɛ́:
‹Ŋ sɩ́ céŋŋi Wɩcʋɔlɩjɩzeno né nɩbííne nɛ́sɛ há sɔ́ɛ́, ká bɩrsɔ́ʋ́ ná há to nɩbííne nɛ́sɛ ɓɩsɔɔlɩ́, tápʋlɛ botoro pɛ́kɛ.› »
59 Ʋ má mɛ́, ɓa sɩɛ́da ha to balá.
60 Ɛ́ nɛ́ sɩɛ́ Wɩɩsɛ vʋk'ɔɔsa nɔhɔ̃́ isi cɩ́ dahá ɓa sɩ́sɩ́ɛ́nnʋ́wa, a bɔsɛ Zeezi bʋlɛ́:
«Ɩ wɩ wɩ́ɩ́ kené aá bʋl?
Ná nɩɛ nyáŋ há bʋ́l ɛ́ héí mí.»
61 Zeezi táŋŋʋ́ nʋɔ a wɩ wɩ́ɩ́ wuu bʋ́lɛ́.
Ɛ́ nɛ́ Wɩɩsɛ vʋk'ɔɔsa nɔhɔ̃́ ná bɔ́sʋ́ a bʋlɛ́:
«Ɩ nɛ́ ká Kirisi,* Wɩɩsɛ Bio ná?»
62 Ɛ́ nɛ́ Zeezi sɛ́:
«Óó!
Ŋ kɔ́ʋ́ nɛ́.
Ɩ́ sɩ́ ná Nɩbiino Bio kal oro rʋʋ ísí dóé tɩ́na Wɩɩsɛ néduu rí, a mɩŋ duóbásɛ sɩɛrʋ aá tuwi tíé.»
63 Ɛ́ nɛ́ Wɩɩsɛ vʋk'ɔɔsa nɔhɔ̃́ ná cɔ́ɛ́ wɛ, ʋ kánʋ́ gɛnnɛ kɩɩsɛ ká bʋlɛ́:
«Á báá ja dáŋsɩ́ɛ́ ráá a beé?
64 Ɩ́ wuu ní nɩ́ɛ́ ʋ há tʋ́ksɛ́ Wɩɩsɛ ɛ́.
Ɩ́ sɩɛ́ ná beé rí?»
Ɓa wuu vʋʋrɛ vɔ́mʋ́ ká bʋlɛ́:
«Ʋ ká ɓɩɓʋ́ʋ́lɛ́ rɛ́.»
65 Ɛ́ nɛ́ náŋa ko pʋ́sɛ mɩŋtʋɔrʋ aá hóú mí, a pi pɛ́nɛ vɔ́wʋ́ sɩ́ɛ́ mɛ́, a gúŋsi nɛ́ŋsa ko aá ŋmɔ́wʋ́ ká bʋlɛ́:
«Zɩŋ zɩŋ dí, áŋ rɩ́ ŋmɔ́wɩ́?»
Tʋtʋnna lɔ́ʋ́, a ŋmɔ́wʋ́ tɛ́ŋgbɛ́llɛ mɛ́ wérí.
Pɩɛrɛ báásɔ́ bʋlʋ́ wɩ Zeezi ɛ̃
66 Pɩɛrɛ há mɩŋ wuolo ná mɛ́ ké, Wɩɩsɛ vʋk'ɔɔsa nɔhɔ̃́ toltʋtʋnnɔ kúó zʋ ráŋ.
67 Ʋ ná Pɩɛrɛ rʋʋ kénó aá wieni níŋ, ɛ́ nɛ́ ʋ bélú wérí, ká bʋlɛ́:
«Ɩ nɛ́, ɩ má ká Nazarɛtɛ Zeezi ná karmɩbíí rí.»
68 Ʋ báásɛ ká bʋlɛ́:
«Ŋ wɩ ɛ̃, ŋ wɩ́ɩ́ háá já rɩ́ɩ́ bʋ́lʋ́ ná nɩ́ɛ́.»
Ká isi lɛ a cɩ́ pʋmmɔ.
[Ká zíɓelo kúóli.]
69 Toltʋtʋnnɔ ná baa nóú, a bʋl pá nɩɛ ná há mɩŋ ráŋ bʋlɛ́:
«Báálɔ né ká ɛ́ nɩɛ oro rí.»
Ʋ baa báásɛ, rʋ́ʋ́ wɩ Zeezi ɛ̃.
70 Mʋɔ́sʋ́ɔ́, nɩɛ ná há cɩ́ ráŋ bʋl Pɩɛrɛ rɩ́ bʋlɛ́:
«Taŋá wuu, ɩ ká ɛ́ nɩɛ oro rí, bee wɩ́ɛ́ ɩ lɛ́ Galiile ní.»
71 Ɛ́ nɛ́ Pɩɛrɛ púl aá bʋrɛ, a ŋmɩ́ɛ́sɛ Wɩɩsɛ bʋlɛ́:
«Báálɔ né ɩ́ háá bʋ́lʋ́ wɩ́ɛ́, ŋ wʋ́ʋ́ ɛ̃ mʋɔ́ má.»
72 Mʋ́l ná mɛ́ rɩ zíɓelo báá kúóló, bʋllɛ mɛ́.
Pɩɛrɛ sɩɛ́ bɩɩnɛ mʋ́ ná Zeezi wɩ́bʋlɩ́ ná, ʋ há bʋ́lʋ́ rɩ́ bʋlɛ́:
«Rɩ zíɓelo ha wɩ kúólé peri bʋllɛ, ɩ sɩ́ báásɛ naasɩ́ botoro, a bʋlɩ́ wɩ́ŋ ɛ̃.»
Ɛ́ nɛ́ ʋ de wíwi.