Wɩɩsɛ malɩ́ka bʋ́l háála rɩ́ bʋlɛ́ Zeezi bɩ́rɔ́ isi sʋʋ mɛ́
16
1 Zuwifiwa fɩɛlɛ́ tápʋl* kal daarɛ, ká Maari* ná há lɛ́ Magɩdala rɩ́ Zakɛ* maá Maari, arɩ́ Salome isi mʋ́ yɔwɛ tulaalényii ná sɔ́ŋ há wéró a kaa mʋ́, rɩ́wɔ́ mɩ́sɛ Zeezi lɛlɔ.
2 Fɩɛlɛ́ tápʋl há díé ká tɔ́ɔ́ pʋl jɩmáásɛ, ɓa cɔŋ kaa isi mʋ́ lɛlbule ná dɩhɩ̃́, rɩ wɩɩsɛ sɩɛ́ nɛ́ dé púpoŋ.
3 Ɓa sɩɛ́ vaá bɔsɛ náŋá:
«Áŋ rɩ́ á rʋ́ʋ́ ka dɔ́wɩ́zeno ná há súkí lɛlbule nʋɔ billi tá párá?»
4 Ɓa tɩ́ɛ́nɔ́ bel, rɩ ɓa ná dɔ́wɩ́zeno ná rɩ ɓa kenó billi tá dɩhuó.
5 Ɛ́ nɛ́ ɓa mʋ́ zʋ lɛlbule ná sɩɛrʋ, a ná bápʋɔsɩ́wie oro rʋʋ sú gɛpʋmmɔ, a ké bʋɔ néduu rɩ́ cɔɔ.
Héwíŋ de káŋwɔ́.
6 Bápʋɔsɩ́wie ná bʋl pɔ́wɔ́ bʋlɛ́:
«Ɩ́ sɩ́ héwíŋ fá; ɩ́ɩ́ ja Nazarɛtɛ Zeezi ná ɓa há kené ɓásɛ dagɛsɛ́* daha, ʋ sʋwɛ nɛ́?
Ʋ ísí sʋʋ mɛ́; ʋ to rɛɛ́wa; ɩ́ bel ná, rɛɛ́ nɛ́ ɓa fa bílú.
7 Ɩ́ taŋa mʋ́ bʋl pá Pɩɛrɛ rɩ́ náŋa ná wuu há kɔ́ʋ́ karmɩbɛlɛ, rʋ́ʋ́ lɔ́wɔ́ sɩ́ɛ́ a mʋ́ Galiile*; rɩ́wɔ́ mʋ́ ráŋ, ɓa sɩ́ nóú, anɛ ɛ́ ʋ há bʋ́lɛ́ pɔ́wɔ́.»
8 Ɓa lɛ lɛlbule ná mɛ́ a fá col.
Héwíŋ rɩ́ tɛŋyʋɔrɔ́ há zʋ́wɔ́, ɓa wɩ wɩ́ɩ́ wuu wuo bʋl aá pá nɛ́ŋ.
Zeezi mákʋ́ tɩɩ cáánɛ Magɩdala Maari
9 Zeezi isi sʋʋ mɛ́ jɩmáásɛ kal cɩ́cʋɔ nɛ́, a la sɩ́ɛ́ mákʋ́ tɩɩ cáánɛ Magɩdala Maari ná, ʋ fa há kírí kaŋtɔmɔ balpɛ ʋ mɛ́.
10 Ɛ́ nɛ́ Maari mʋ́ ŋmɔwɛ dáwúre pá Zeezi har nɩɛ ná wuu sɩɛnnɛ há zɔ́kɛ́, ɓa wíwi.
11 Ɓa há nɩ́ɛ́ rɩ háálɔ ná sɛ́ rʋ́ʋ́ sɩ́ɩ́ ná Zeezi, rʋʋ ísí sʋʋ mɛ́ a a nɩwómmí, ɓa wɩ lɛ́ɛ́ dí rʋʋ ká taŋá.
Zeezi mákʋ́ tɩɩ cáánʋ́ karmɩbɛlɛ bɛllɛ
12 Ɛ́ har rɩ́ mɛ́ nɛ́, ɓa nɩɛ bɛllɛ baa pi ŋmɛ́nɔ a va aá zɩ́ baka rɩ́; Zeezi bɩ́rsʋ́ tɩɩ anɛ nɩhuó, a ko nyɩ́ɩ́sɩ́wɔ́ mɛ́.
13 Ɓa bɩrko bʋl pɔ́wɔ́ náŋa ná, ká ɓa ha wɩ lɛ́ɛ́ dí rɩ wɩ́tɩɩ.
Zeezi mákʋ́ tɩɩ cáánʋ́ karmɩbɛlɛ fí rí oro
14 Ɛ́ nɛ́ ɓa fí rí oro ná sɩɛ́ ké aá dí ɓɩɛ, Zeezi kánʋ́ tɩɩ ko makɛ cáánɩ́wɔ́, ká gáásɛ wɩ́ɛ́ ɓa rɩ́, bee wɩ́ɛ́ ɓa dɩlla háákɔ́, ká ɓa baa ka kéké má.
Nɩɛ ná Zeezi, a ko bʋl rʋ́ʋ́ ísí sʋʋ mɛ́, ká ɓa wɩ ɛ́ lɛ́ɛ́ dí rɩ taŋá.
15 Ɛ́ nɛ́ ká ʋ bʋ́lwɔ́ rɩ́ bʋlɛ́:
«Ɩ́ isi cɛl dúníé wuu, a bʋl Wɩɩsɛ Labaarɩwero ná pá nɩɛ wuu.
16 Nɛrɔ ná wuu há lá ɛ́ Labaarɩwero dí, ká ɓa kánʋ́ muŋsi nyii mí, Wɩɩsɛ sɩ́ hé tɩ́na suúri; amá nɛrɔ ná má wuu há wɩ lɛ́ɛ́ dí, Wɩɩsɛ sɩ́ zɔkɛ tɩ́na.
17 Nɩɛ ná wuu há sɩ́ saŋ la Labaarɩwero ná dí, Wɩɩsɛ sɩ́ pɔ́wɔ́ dóé.
Ɓa sɩ́ a wɩ́nyáŋsɛ; ŋ yɩr mɛ́:
Ɓa sɩ́ kiri kaŋtɔmɔ nɩɛ mɛ́, ɓa sɩ́ bʋl líŋhuonni* ná ɓa há wʋ́ɔ́ ɛ̃;
18 ɓa sɩ́ kɛsɛ dʋma, rɩ ɓa nyɔ́ bɛrɔ́ má, wɩ́bɔ́ŋ wuu wʋ́ɔ́ a; ɓa sɩ́ píwó nɛ́ŋsa tɩkɛ* pʋɔllɛ mɛ́, rɩ́wɔ́ dúóri.»
Zeezi bɩ́rɔ́ zɩ́ Wɩɩsɛ rɩ́
(Liki 24.49-53; Nɩtʋmɛ Wɩ'allɛ 1.9-11)
19 Nyuutɩna Zeezi bʋ́l ɛ́ nɛ́ ko tenni, ká Wɩɩsɛ púú zɩ́ bána, ʋ mʋ́ ké bɩbar dɩkéni, Wɩɩsɛ néduu.
20 Ká ʋ karmɩbɛlɛ ná má isi mʋ́ gʋɔrɛ bʋl Labaarɩwero ná a pá dɩhɩ̃́ wuu.
Nyuutɩna fa pɛ́wɔ́ mɛ́, ɓa a wɩ́nyáŋsɛ a súúri Wɩɩsɛ wɩ́bʋlɛ ná mɛ́, a makɛ rɩ́ nɩɛ zɩŋ rɛ́ ɛ́ wɩ́ɩ́ ká taŋá rɛ́.