Zeezi bɩ́rɔ́ isi sʋʋ mɛ́
28
1 Zuwifiwa fɩɛlɛ́ tápʋl* há díé, ká tɔ́ɔ́ pʋl, jɩmáásɛ kal tɩ́tapʋlla, Magɩdala tɩ́náwa Maari arɩ́ Maari ná nɔ́ŋɔ ísó mʋ́, rɩ́wɔ́ ná lɛlbule ná.
2 Ɓa há mʋ́ɛ́ peri, ɓa ɔ́ɔ́ rɩ́wɔ́ cɩ́ naasɩ́ balá, rɩ tíé zíkló kɩ́ŋkáŋ; ká Wɩɩsɛ malɩ́ka* lɛ bána nyúú ko tuwi, a ka dɔ́wɩ́zeno ná billi wúri lɛlbule ná mɛ́, a kénú daha.
3 Malɩ́ka ná tʋlɛ́ dé nɛ duófɩ́llɔ nɛ́, ʋ gɛnnɛ má ɓɩpʋŋsɛ́ ɓɩ́lɓɩ́l anɛ gepúkʋ́l.
4 Héwíŋ ka sóójiwa ná, ɓa cel cel pɩ́ síkísíkí, anɛ ɓa há sʋ́sɛ́.
5 Ɛ́ nɛ́ malɩ́ka ná bʋl pá háála ná bʋlɛ́:
«Ɩ́ é, ɩ́ sɩ́ héwíŋ fá; ŋ ɩ́ɔ̃́ ɩ́ɩ́ ja Zeezi ná ɓa há kené ɓásɛ dagɛsɛ́* daha nɛ́.
6 Ʋ sɩɛ́ to rɛɛ́wa; ʋ ísó lɛ anɛ ɛ́ ʋ fa há bʋ́lɛ́ pɛ́ɩ́wa.
Ɩ́ ko bel ná ráŋ ná ɓa fa há bílú.
7 Ɩ́ sɩɛ́ mʋ́ kɩ́kɛ́lɛ́, a bʋl pɔ́ʋ́ karmɩbɛlɛ, rʋ́ʋ́ bɩ́rɔ́ lɛ sʋsɛ sɩɛrʋ, a lɛ́ɩ́wa sɩ́ɛ́ mʋ́ Galiile,* aá dɛ́llɩ́wa; ráŋ nɛ́ rɩ́ɩ́wa nóú.
Liŋó ná ŋ há kené aá pɛ́ɩ́wa nɛ́ ɛ́.»
8 Ɛ́ nɛ́ háála ná tuu lɛ lɛlbule ná laka ɓalaɓala.
Héwíŋ fa kéŋwó, ká satɔrɔ́ má súwó.
Ɓa sɩɛ́ fá aá mʋ́ rɩ́wɔ́ bʋl wɩ́ɛ́ ná pá Zeezi karmɩbɛlɛ ná.
9 Ɓa ɔ́ɔ́ rɩ́wɔ́ cɩ́ naasɩ́ balá, rɩ Zeezi níí céŋwó, a bʋ́lwɔ́ rɩ́ bʋlɛ́:
«Ŋŋ́ bɔ́llɩ́wa!»
Ɛ́ nɛ́ ɓa tuu pérú, a vɔ́wʋ́ naasɛ mɛ́, a cʋ́ɔ́lʋ́.
10 Ɛ́ nɛ́ Zeezi bʋl pɔ́wɔ́ bʋlɛ́:
«Ɩ́ sɩ́ ló rí héwíŋ kánɩ́wa!
Ɩ́ mʋ́ bʋl páŋ maábináŋa, rɩ́wɔ́ mʋ́ Galiile; ráŋ nɛ́ rɩ́wɔ́ náŋ.»
Sóójiwa ná há pɔ́ lɛlbule mí, nyɛ́ nyɩɛrʋ
11 Tɛ́ŋ ná mɛ́ háála ná há bɩ́rɛ aá col ɛ́, sóójiwa ná há pɔ́ lɛlbule ná mɛ́ náŋa zʋ́ tɔ́ɔ́ sɩɛrʋ, a mʋ́ ná Wɩɩsɛ vʋk'ɔɔsa* nɩhɩɛ̃́sɛ, a cesi wɩ́ɛ́ ná wuu há ɛ́ɛ́, a pɔ́wɔ́.
12 Ɛ́ nɛ́ Wɩɩsɛ vʋk'ɔɔsa nɩhɩɛ̃́sɛ ná yɩ́rɛ Zuwifiwa nɩhɩɛ̃́sɛ,* ɓa céŋ, a vʋʋrɛ tʋŋ nʋɔ mɛ́, a ja meéwíé ɓɩkana pá sóójiwa ná,
13 ká bʋl pɔ́wɔ́ bʋlɛ́:
«Ɩ́ bʋl pá nɩɛ bʋlɩ́wa fa pɩ́ dóŋ ní, ká Zeezi karmɩbɛlɛ ko ga a lɩ́sʋ́.
14 Rɩ wɩ́ɩ́ ná nɛ́ zʋ́ kʋ́máŋdá dɩllɛ má, á sɩ́ zɩ́ŋrá há sɩ́ bʋl ɛ́wa, rɩ́ wálmɛ sɩ́ɩ́wa pérú.»
15 Ɛ́ nɛ́ sóójiwa ná há pɔ́ lɛlbule ná mɛ́ la meéwí ná, ká ɓɩɛ́na tʋŋ ɛ́ ná ɓa há mákɛ́ pɔ́wɔ́; a tɩŋ ɛ́ wɩ́ɛ́, Zuwifiwa dɩhɩ̃́, ɓa haá bʋl ɛ́ wɩ́ɩ́ rɛ́ arɩ́ zaa wuu.
Zeezi kenú tɩɩ ko cáánʋ́ karmɩbɛlɛ
16 Zeezi karmɩbɛlɛ ná fí rí oro sɩɛ́ mʋ́ Galiile tíé, a zɩ́ paalɔ ná nyúú Zeezi fa há mákɛ́ pɔ́wɔ́.
17 Ɓa há ná Zeezi, ɓa cʋ́ɔ́lʋ́, amá ɓa sɩɛrʋ nɩɛ náŋa wɩ lɛ́ɛ́ dí rɩ Zeezi ní.
18 Ɛ́ nɛ́ Zeezi tuu pérwó a bʋl pɔ́wɔ́ bʋlɛ́:
«Wɩɩsɛ pí bána nyúú, rɩ́ tíé nyúú tíŋ wuu héŋ nɛ́sɛ mɛ́ nɛ́.
19 Ɩ́ sɩɛ́ cɛl dúníé wuu, a a rɩ́ nɩɛ bɩ́rmɩ́ŋ karmɩbɛlɛ; ɩ́ káŋwɔ́ muŋsi nyii mí, Ana Wɩɩsɛ, rɩ́ Bio, rɩ́ Sabɩɩna yɩr mɛ́,
20 ká kármɩ́wɔ́ rɩ́wɔ́ tɩŋ wɩ́ɛ́ ná wuu, ŋ há mákɛ́ pɛ́ɩ́wa.
Ɩ́ sɩɛ́ ná, ŋ mɩ́nɔ́ arɩ́rɩ́wa tápʋ́l wuu, a kaá ja dúníé isé.»(1.17) Woó woówa (Matie 1.17) Nɩɛ ná lʋlɛ́ há cɛ́rɛ náŋa, ɓa nɛ́ tʋ́ŋ woo mí.
Ɩzɩrayɛl dunɩɛ yomí há ténné Babɩlɔɔnɛ mɛ́, ká ɓa bɩrɛ kówó tíé ní ɓa lʋl Zeezi.(2.18) Rasɛl nɩ́ɩ́ wi Rama mɛ́ (Matie 2.18) Wɩɩsɛ wɩ́laabʋllɔ Zeremi ní lá Wɩɩsɛ nʋɔ mɛ́, a bʋl rɩ́ ɓa sɩ́ ɓʋ́ʋ́sɛ Zakɔbɛ bɛlɛ rʋ́ʋ́ háálɔ Rasɛl wi.
Ɛ́ wɩ́ɩ́ nʋɔ nɛ́ súé.
Ɩzɩrayɛl bɛlɛ ná kuóro há ɛ́ɛ́ ɓa ɓʋ́ʋ́sɛ, ɓa maáwa nɛ́ há lá Rasɛl mɛ́,ɓa wíó.
Rama má ká tɔ́ɔ́ rɛ́ a mɩŋ Zakɔbɛ bio Bɛŋzamɛ jɩmʋ́l nɩɛ tíé.
(Zeremi 31.15)(3.17) Ŋ sɩɛrʋ wuu ní tɔ́rʋ́ wɩ́ɛ́ (Matie 3.17) Zeezi balá nɛ́ ká nɛrɔ ná wɩ́'állɛ rɩ́rʋ́ wɩ́bʋlɛ́ wuu há wéró, a tɔrɛ Wɩɩsɛ sɩɛrʋ.
Zeezi dʋŋɔ vʋk'ɔsɔ́ nɛ́ dʋ́sɛ́ Wɩɩsɛ cɔwɩɩlɔ́.
Ɛ́ nɛ́ Wɩɩsɛ tɩɩ tɛ ɛ́ sɩɛ́da pɔ́ʋ́.(8.22) Sʋsɛ húwó sʋsɛ (Matie 8.22) Tɛŋ namɩɛ sʋsɛ wɩ́ɛ́ rá ɓaá bʋl rɛɛ́wa.
Nɩɛ ná há wómmó ká wɩ Zeezi lɛ́ɛ́ dí rʋʋ kɔ́wɔ́ Laataarɔ, ɛ́ nɩɛ nɛ́ ká sʋsɛ.
Ɓa sʋ́sɔ́, bee wɩ́ɛ́ ɓa wɩ Wɩɩsɛ mɩɩsɛ kené.
Ɛ́ sʋsɛ duo wɩ́ɛ́ nɛ́ Zeezi bʋ́bʋl rɛɛ́.(24.15) Wɩbɔmɔ (Matie 24.15) Wɩɩsɛ wɩ́laabʋllɔ Danɩɛl nɛ́ lá sɩ́ɛ́ bʋl wɩ́bɔmɔ né wɩ́ɛ́ (Danɩɛl 7.8) Ʋ púú máŋsɛ pʋná rɛ́, oŋbérmí dúó.
Zeezi sɛ́ ɛ́ wɩ́bɔmɔ sɩ́ ko cɩ́ Wɩɩsɛ dɩmɩnɩ́.
(Markɛ 13.14)(27.34) Oŋhaarʋ (Matie 27.34) Oŋhaarʋ ná nɩhɩ̃́ lɩ́ŋ nɛ́; rɩɩ nyɔ́wɔ́, ɩ wɩ wɩɩla mɩ́ɩ́ nɛ kɩ́ŋkáŋ.
Ɓa nɛ́ ɓa pii kuosi dɩvɛ́ŋ mɛ́ a pá Zeezi, ká rɩ́wɔ́ ɓásʋ́, ʋ vɛ a wɩ nyɔ́ɛ́.(27.60) Bɔfɛlɔ (Matie 27.60) Lɛlbule ná ɓa há lɛ́sɛ́ ká ha wɩ nɛ́ŋ ráŋ húé ní.
Zɔzɛfɛ ɔ́ɔ́ ɓa fa lɛ́sʋ́ tá, rʋʋ tɩɩ sʋ́wɔ́ rɩ́wɔ́ púú hú ráŋ nɛ́.
Ɛ́ bʋɔ sɩɛrʋ nɛ́ ʋ ka Zeezi lɛlɔ mʋ́ hu.