Padííre sɩ́ŋsʋ́ɔ́lɔ
12
1 Ʋ har rɩ́ mɛ́ nɛ́, Zeezi pi sɩ́ŋsʋ́ɔ́la sʋ́ɔ́lɛ aá pá jamáŋ ná há kílú a bʋlɛ́:
«Báálɔ oro rí cókí tíé a cɔ́ŋsɛ víínyi* tuuni, a sɔ zekúme kɛ́rɛ.
Ká zʋ́ʋ́ sɩɛrʋ a sɔ pʋ́pɔ́ɔ́rɔ káŋpílmí, a lú bʋɔ a bɩrmɛ wérí, a makɛ rɩ́wɔ́ hɩ́haasɛ víínyi nɔnɔ.
Ʋ há ɔ́wɔ́ wuu ko tenni, ɛ́ nɛ́ ʋ ja parɛ ráá ɓa nɩɛ hé, ká de lɩɩ mʋ́ tɔ́bólí, a ké ráŋ.
2 Báálɔ ná sɩɛ́ há kúé zɩŋ rʋ́ʋ́ víínyi nɔnɔ ná bɩɩ tɛ́ŋ péró, ɛ́ nɛ́ ʋ tʋ́mʋ́ tʋtʋnnɔ nɔ́ŋɔ, rʋ́ʋ́ mʋ́ʋ́ tubelle ná dɩhɩ̃́, a lɔ́ʋ́ tunɔnɔ ker kaa ko.
Ʋ rɩ́wɔ́ fa bʋ́lɔ́ hé parɛ ráá ɓa mɛ́ nɛ́.
Padííre ná túme má nɛ́ ɛ́.
3 Amá báálɔ ná tʋtʋnnɔ ná há kúé peri, padííre ná ísó kánʋ́ ŋmasɛ kiri tá, ʋ col arɩ́ nácáára fí.
4 Ɛ́ nɛ́ baka ná tɩ́na baa lɩ́sʋ́ tʋtʋnnɔ nɔ́ŋɔ a hé ʋ mʋ́.
Ʋ padííre ná baa isi kánʋ́ má, a ŋmɔwɛ wérí a kɩ́llɛ sɩ́laarɔ, a lúnnú nyúú má tɩɩ, ká sáákʋ́ wérí, a kiri tá ʋ col arɩ́ nácáára fí.
5 Baka tɩ́na baa ha hóú tʋtʋnnɔ nɔ́ŋɔ, botoro nyúú tɩ́na mɛ́; ʋ é, ɓa dé ŋmɔwɛ ɓʋ́ nɛ́, ʋ wɩ bɩ́rɛ́ col.
Ʋ tʋ́ŋ nɩɛ ɛ́, a mʋ́ aá lɛ naasɩ́ ɛrɛ́, ɓa ɓʋ́ʋ́sɛ náŋa, ká ŋmasɛ náŋa kiri.
6 «Ká sɩɛ́ ko káánʋ́ rɩ́rʋ́ bicólli balá.
Ʋ sɩɛ́ sɛ́:
‹Ŋ sɩ́ tʋ́mɩ́ŋ bicólli rʋ́ʋ́ mʋ́, ʋ é há káŋ tɩɩ bíí nyɛ, ɓa sɩ́ zílú.›
7 «Amá ʋ tɩɩ bio ná há mʋ́ɛ́ peri, padííre ná nóú, ɛ́ nɛ́ ɓa bʋl náŋá rɩ́ bʋlɛ́:
‹Baka tɩ́na bio tɩɩ nɛ́ nyɛ; á ɓʋ́ʋ́, bee wɩ́ɛ́ rɩ áná sʋ́wɔ́, ʋ nɩ́ɩ́ tɩ́llɛ baka ná, ká raá nɛ́ ɓʋ́ʋ́ ká rʋ́ʋ́ áná ko sʋwɛ, á nɩ́ɩ́ tɩ́llɛ liwe.›
8 Ká ɓɩɛ́na de isi kaa ŋmɔwɛ ɓʋ́, a kaa lɩɩ tá baka ná nʋɔ ráŋ.
9 «Ʋ há kúé cɩ́ nyɛ, baka tɩ́ná a ɛrɛ́ rɛ́?
Ʋ tɩɩ sɩ́ isi ko, a kɛsɛ ɛ́ padííre wuu ɓʋ́ʋ́sɛ, ká baa ja bamma hóú baka ná mɛ́.»
10 Zeezi sɩɛ́ bʋ́l ɛ́, ká bɔsɛ Zuwifiwa sɩ́dííre ná há mɩŋ jamáŋ ná sɩ́sɩ́ɛ́nnʋ́wa bʋlɛ́:
«Ɩ́ kármɛ́ Wɩɩsɛ Kɛnɔ sɩɛrʋ a ná dɩhɩ̃́ ná ɓa há pʋ́ŋsɛ́ bʋlɛ́:
‹Dɔ́wɩ́ ná jɩsɔɔra há vɛ́ɛ́ tá,
ɛ́ dɔ́wɩ́ nɛ́ bɩ́rmɛ́ dɔ́wɩ́wero,
ɓa pii sɔ nagbáŋjɛ́; ʋ nɛ́ bɩ́rɛ́ ka jaa ná cɛ́.
11 Nyuutɩna nɛ́ tʋ́ŋ ɛ́, ʋ cólle ní,
ká ʋ árá wɩ́bɛ́llɛ́.› »
12 Zuwifiwa sɩ́dííre ná kɩ́ɛ́lɔ́ wuu, rɩ ɓa nɛ́ Zeezi bʋ́bʋl, a pi sɩ́ŋsʋ́ɔ́lɔ ná aá máŋsɛ ɛ́.
Ɓa sɩɛ́ wɩ́wálmɛ rʋʋ ká mɔlɛ́ rɩ́wɔ́ kánʋ́, ká fɩ́fá jamáŋ ná má héwíŋ.
Ɛ́ nɛ́ ɓa bɔl, ká col ká tɔ́ʋ́ ráŋ.
Loŋpó wɩ́ɛ́ arɩ́ Wɩɩsɛ ker wɩ́ɛ́
13 Zuwifiwa sɩ́dííre ná sɩɛ́ mʋ́, ká hé Farɩzɩɛ̃wa* rɩ́ Erodi* naanɩɛ, rɩ́wɔ́ mʋ́ rɩ́wɔ́ rɩ́ Zeezi tɔ tɩ́ŋtɔ́ɛ́, a makɛ rɩ́ Zeezi bʋl wɩ́ɛ́ kánʋ́ tɩɩ, rɩ́wɔ́ tɩŋ ɛ́ mɛ́, a fa kánʋ́.
14 Ɓa sɩɛ́ mʋ́ bʋl Zeezi rɩ́ bʋlɛ́:
«Karmɩ'ana, á ɩ́ɔ̃́ zɩŋ rɩ́ɩ́ bʋl wɩ́táŋsɛ nɛ́, ɩ wɩ nɩbííne sabɩŋsɛ héwíŋ máá fá, bee wɩ́ɛ́ ɩ wɩ nɩbííno píŋ níí bel; amá ɩɩ́ makɛ nɩɛ rɩ́wɔ́ pi ŋmɛ́nɔ ná Wɩɩsɛ háá jɛɛ́ nɛ́, a tʋ́mʋ́ cólle.
Ɛ́ wɩ́ɛ́, á kúó ráá bɔ́sɩ́ ná:
Loŋpó ná Zuwifiwa há túmé aá pá Romi* tɩ́náwa, ɩ bélú rʋʋ ɛ́ cɛ́rɔ́ rɩ́ yáá, ʋ wɩ cɛ́rɛ́?»
15 Amá Zeezi há kɩ́ɛ́lɛ́ zɩŋ, rɩ́ ɓa sánɔ́ rɛ́ ko aá bɔ́sʋ́ nʋŋmɔ́ŋyɔ́ɔ́ bɔsɛ́, ɛ́ nɛ́ ʋ sɛ́:
«Beé rí tɛ ɩ́ dídíŋíŋ?
Ɩ́ ka meéwí kaa ko rɩ́ŋ bel ná.»
16 Ɓa ka meéwí balá ko; ʋ laa hóú nɛ́sɛ mɛ́ ká bɔ́sɩ́wɔ́:
«Ɩ́ karmɛ ná, áŋ yɩ́r rɛ́ ɓa pʋ́ŋsɛ meéwí ná nyúú?
Ká nɩbííno nyúú né má há mɩŋ ráŋ, áŋ rɛ́?»
Ɛ́ nɛ́ ɓa sɛ́:
«Romi kuózeno nyúú rɩ́rʋ́ yɩr nɛ́ ráŋ.»
17 Zeezi sɛ́:
«Ɛ́ wɩ́ɛ́, omo ná há mɔhɛ̃́ rɩ́ɩ́wa túŋ pá Sɩzaarɛ,* ɩ́ túŋ pɔ́ʋ́; ká omo ná há ká Wɩɩsɛ kér, ɩ́ pii pá Wɩɩsɛ.»
Ʋ wɩ́bʋlɩ́ ná ɔ́ɔ́ ɓa de faakɛ.
Zeezi bʋ́l sʋsɛ bɩr'isé wɩ́ɛ́ pá Sadɩsɩɛ̃wa
18 Nɩɛ ná ɓa háá yɩ́rɛ Sadɩsɩɛ̃wa* má baa tuu peri Zeezi.
Ɛ́ Sadɩsɩɛ̃wa é sɛ́ sʋsɛ wɩ bɩ́rɛ́ aá isi; rɩ nɩbííno sʋ́wɔ́, ʋ ténnó ní.
Ɓa sɩɛ́ bɔsɛ Zeezi bʋlɛ́:
19 «Karmɩ'ana, Moyizi* pʋ́ŋsɛ Wɩɩsɛ wɩ́máŋsɛ kɛnɔ mɛ́ bʋlɛ́:
‹Rɩ báálɔ nɛ́ já háálɔ, rʋʋ rɩ́ háálɔ ná nɛ́ wɩ bíí lʋ́lɛ́, ká rɩ́ báálɔ ná sʋwɛ ká tá háálɔ ná, rʋ́ʋ́ maábio píí ja nɛ́, rɩ́ɩ́ lʋl bɛlɛ rɩ́ɩ́ tá, ʋ maalɩtoó ná yɩr mɛ́.›
20 Báála balpɛ rɩ́ fa tʋ́ŋ jaa mɛ́, ɓa sɩɛrʋ nɔhɔ̃́ sɩɛ́ ja háálɔ, ʋ rɩ́rʋ́ wɩ bíí lʋ́lɛ́, ká ʋ sʋwɛ ká tá;
21 ʋ tʋkɛ́ pi yúháálɔ ná, ʋ má rɩ́rʋ́ wɩ bíí lʋ́lɛ́ ká ʋ má sʋwɛ ká tá; ʋ má tʋkɛ́ baa pi yúháálɔ ná ja, ʋ má rɩ́rʋ́ ha wɩ bíí lʋ́lɛ́ ká ʋ má baa sʋwɛ ká tá.
22 Báála ná balpɛ wuu ja háálɔ ná la náŋá mɛ́, ɓa oro wuu rɩ́ ɛ́ háálɔ wɩ bíí lʋ́lɛ́, ká ɓa wuu sʋsɛ, háálɔ ná má sʋwɛ.
23 Á sɩɛ́ có ráá bɔ́sɩ́ ná, rɩ sʋsɛ nɛ́ bɩ́rɛ́ isi, báála nyáŋ balpɛ sɩɛrʋ, ɓa wuu ní já háálɔ ná la náŋá mɛ́:
Orí ríí tɩ́llʋ́?»
24 Ɛ́ nɛ́ Zeezi bʋ́lwɔ́ rɩ́:
«Ɩ́ɩ́ yéŋŋíwa tɩɩ rɛ́, ká wɩ ɛ̃.
Ɩ́ wɩ Wɩɩsɛ Kɛnɔ ɛ̃, ɩ́ báá wɩ Wɩɩsɛ dóé má mʋɔsɔ ɛ̃.
25 Ɩ́ taŋa zɩŋ rɩ́ sʋsɛ bɩr'isé mí, báála rɩ́ háála báá wɩ náŋá ja, amá ɓa sɩ́ nɛ Wɩɩsɛ malɩ́kawa há nɩhɩ̃́ ɛ́ bána nyúú.
26 Ŋ má sɩ́ɩ́wa kármɛ́ Moyizi há pʋ́ŋsɛ Wɩɩsɛ Kɛnɔ sɩɛrʋ, a ná ráŋ ná háá bʋl Moyizi rɩ́ sɔrʋ túí há kéŋ níŋ, ká waá dí wɩ́ɛ́ rɛ́?
Ráŋ nɛ́ fa rɩ́ɩ́wa zɩŋ nɩsʋsɛ bɩr'isé wɩ́ɛ́; ɓa pʋ́ŋsɛ ráŋ bʋlɛ́, Wɩɩsɛ bʋ́l Moyizi rɩ́ bʋlɛ́:
‹Ŋ nɛ́ ká Abɩrahaŋ* rɩ́ Ɩzakɛ* rɩ́ Zakɔbɛ* Wɩɩsɛ.›
27 Wɩɩsɛ to nɩsʋsɛ́ Wɩɩsɛ, amá nɩwómme Wɩɩsɛ nɛ́.
Ɩ́ zɩŋ rɩ́ɩ́wa dé caasɛ yéŋŋi rí.»
Wɩɩsɛ wɩ́máŋsɛ sɩɛrʋ wɩ́bíí
28 Wɩɩsɛ kɛŋzɩnna* ná nɔ́ŋɔ fa kénó, káá zesi Zeezi rɩ́ nɩɛ ná wɩ́bʋlɛ́.
Ʋ sɩɛ́ há zésé rɩ Zeezi bʋ́l taŋá pɔ́wɔ́, ɛ́ nɛ́ ʋ má baa tuu peri a bɔsɛ bʋlɛ́:
«Wɩɩsɛ wɩ́máŋsɛ ná wuu sɩɛrʋ wɩ́bíí ní ká orí rí?»
29 Ɛ́ nɛ́ Zeezi sɛ́:
«Wɩ́makɩ́ ná há sɛ́:
‹Ɩzɩrayɛl duo* nɩɛ, ɩ́ zesi wérí!
Á Nyuutɩna Wɩɩsɛ dʋŋɔ léŋ ní ká Wɩɩsɛ.
30 Ʋ sɩɛ́ mɔhɔ̃́ rɩ́ɩ́ cóllú arɩ́rɩ́ sɩɛrʋ wuu,
arɩ́rɩ́ dʋma wuu, arɩ́rɩ́ sabɩɩna wuu,
arɩ́rɩ́ taŋá wuu.›
31 Ɛ́ wɩ́makɩ́ tʋkɛ́ nɛ́ ká:
‹Cóllí nɩbínɔ́ŋɔ, anɛ ɩ há cóí tɩɩ ɛ́.›
Wɩ́makɩ́ oro wuu píŋ báá wɩ nyáŋ bɛllɛ mɔhɛ̃́.»
32 Ɛ́ nɛ́ Wɩɩsɛ kɛŋzɩnnɔ ná sɛ́:
«Karmɩ'ana, ɩ á wérí, ɩ bʋ́l taŋá, ɩ há sɛ́ rɩ́ Wɩɩsɛ dʋŋɔ léŋ ní mɩnɛ́, oro báá toó a súúrú mí.
33 Nɛrɔ wuu sɩɛ́ mɔhɔ̃́ rɩ́ɩ́ cólli Wɩɩsɛ arɩ́rɩ́ sɩɛrʋ wuu, arɩ́rɩ́ sabɩɩna wuu, arɩ́rɩ́ taŋá wuu, ká cóllí nɔ́ŋɔ má anɩ́ tɩɩ.
Ʋ nɛ́ ká wɩ́piŋo, a kɩ́llɛ pʋsɛ kɛsɛ kaa mʋ́ ɔsɛ vʋk pá Wɩɩsɛ.»
34 Zeezi sɩɛ́ há kɩ́ɛ́lɛ́ rɩ báálɔ ná nʋlɩ́sɔ wéró, ɛ́ nɛ́ ʋ bʋ́lʋ́ rɩ́ bʋlɛ́:
«Ʋ káánɛ mʋɔ́ ká rɩ́ɩ́ zʋ Wɩɩsɛ kuótɔ́ɔ́ ná sɩɛrʋ.»
A de mɔ ɛ́ mɛ́, nɛ́ŋ wuu báá wɩ sáŋɛ́ aá bɔsɛ Zeezi rɩ́ wɩ́ɛ́.
Kirisi to kuóro Davidi Bio dʋŋɔ nɛ́, ʋ kɔ́ʋ́ Nyuutɩna má nɛ́
35 Ʋ ɛ́ har rɩ́ mɛ́, Zeezi háá karmɛ nɩɛ Wɩcʋɔlɩjɩzeno* mí, ʋ bɔ́sɩ́wɔ́ bʋlɛ́:
«Ɩ́ ɛ̃ omo ná há tɛ Wɩɩsɛ kɛŋzɩnna ná kɩ́kármɩ́wa bʋlɛ́ Kirisi* ná mɔhɔ̃́ rʋ́ʋ́ tɩŋ kuóro Davidi* duo nɩɛ mɛ́ nɛ́ rɛ́?
36 Ká kuóro Davidi tɩɩ tɩŋ Wɩɩsɛ Sabɩɩna* mɛ́ a bʋlɛ́:
‹Nyuutɩna Wɩɩsɛ bʋ́lɩ́ŋ Nyuutɩna rɩ́ bʋlɛ́:
Kéníŋ néduu a kaá jɛ́ɩ́ dɩŋdɔmɔ wuu tápʋl kɛsɩ́,
ŋ há sɩ́ kɛsɛ héí nɛ́sɛ mɛ́.›
37 Rɩ kuóro Davidi tɩɩ nɛ́ kéŋ Kirisi aá yɩ́rɛ Nyuutɩna, ʋ sɩɛ́ báá cɩ́ ɛrɛ́wa rɛ́ a ɔ́ʋ́ Bio?»
Jamáŋ ná há kílú faá zesi ɛ́ wɩ́ɛ́ arɩ́ satɔrɔ́.
Zeezi cáánɛ nɩɛ rɩ́wɔ́ pɔ́ Wɩɩsɛ kɛŋzɩnna mɛ́
38 Zeezi baa ha ɔsɛ máŋsɛ wɩ́ɛ́ náŋa súúri bʋlɛ́:
«Ɩ́ kánɩ́wa tɩɩ arɩ́ Wɩɩsɛ kɛŋzɩnna ná!
Ɓa có gɛluŋe suu gʋɔrɛ́, aá ja rɩ́wɔ́ bʋ́bɔ́llɩ́wɔ́ nɩkana sɩ́ɛ́.
39 Rɩ ɓa nɛ́ zʋ́ Zuwifiwa cémejaa* má, ɓaá bɛ́llɛ tʋɔsɛ dɩkéŋwere ní, a makɛ rɩ́ nɩɛ wuu nówó.
Rɩ cana má dɩdíí ní rɩ́wɔ́ mʋ́, ɓaá ja dɩkéŋsi ná há mɩŋ sɩ́ɛ́ nɛ́, nɩpiŋe dɩkéŋsi.
40 Ɓa wɩ yúháála má omo laa díí fá.
Nɩkana sɩ́ɛ́ nɛ́ ɓa cɩ́ aá cʋɔlɛ Wɩɩsɛ, a makɛ rɩ́wɔ́ sɩ́ zɩ́mʋ́ rɩ́ ɓa mála bɔ́mɔ́.
Ɓa sɩɛ́ sɩ́ dí wɩhála ɓɩzeno.»
Yúháálɔ oro satɔ́ɔ́rpálɔ wɩ́ɛ́
41 Zeezi sɩɛ́ bʋ́l ɛ́ nɛ́ tenni, ká sɩɛ́ zʋʋ ké Wɩcʋɔlɩjɩzeno sɩɛrʋ, satɔ́ɔ́rpálɔ dɩhéé laka, aá bel nɩɛ ná há kéŋ meéwíé ko aá hé.
Ʋ belé ná mɛ́, ʋ ná ɓɩɛ tɩ́náwa rɩ ɓa tɔ́rɛ meéwíé kaa ko aá hé.
42 Yúháyaarɔ oro má kánʋ́ meéwíwɩɛla bɛllɛ, kaa ko yoo hé.