Fànʔa Siɛnrɛ dè
Siɛnrɛ ti tìɛdiʔɛ gè
Sɛbɛpelile kogunɔ bèle Nyakungɛngɛ Liʔɛ Siɛnrɛ nī dè, Zuufulo pe pe ye Fànʔa Siɛnrɛ:
Duniya Sélimɛ Sɛbɛ
Yirile nɛ́ Suɔlɔ Sɛbɛ
Leviiyé Kacuɔnrilɔ Sɛbɛ
Tɔ́rilɔ Sɛbɛ
Fànʔa Kajuʔulo Sɛbɛ
Tire Fànʔa Siɛnrɛ tiī nɛ weli tɛnmɛ mɛni siɛn 'yɛli bèri tári Kulocɛliɛ yiʔɛ mɛ́ gè bèri ki kpínʔini gàa wi 'juu gè. Kele gálì kiyē nɛ nyu Isirayɛliyé sélimɛ wuʔu nɛ̄ gè, Fànʔa Siɛnrɛ tiī nɛ tɛnmɛnɛ kanʔa kire wuʔu nɛ̄ gè.
Sélimɛ Sɛbɛ wi nyùbeliye nī yè (nyùyɔ 1.11), yiī nɛ nyu duniya wi sélimɛ wuʔu nɛ̄ gè, kɛnmɛ bíì nɛ̄ Kulocɛliɛ 'wi siɛnnɛ nɛ́ duniya wi mìɛni faan wè, nɛ́ kɛnmɛ bíì nɛ̄ siɛnnɛ pe 'kapiile kpíʔile Kulocɛliɛ nɛ̄ wè á kùu wi 'jíin duniya nī wè.
Sélimɛ Sɛbɛ wi siɛnrɛ sɛnrɛ dè (nyùyɔ 12.50), tiī nɛ nyu Isirayɛliyé tobilo wuʔu nɛ̄ gè, Birayima nɛ́ Siaga nɛ́ Yakuba ní wè, nɛ́ nyakungɛnyɛ péliye ní yè nyàa Kulocɛliɛ yé kpíʔile nɛ́ pe ní wè.
Yirile nɛ́ Suɔlɔ Sɛbɛ wè fúɔ nɛ̀ sɛ́nì nɔ̀ Fànʔa Kajuʔulo Sɛbɛ nɛ̄ wè, kire siɛnrɛ tiī nɛ nyu Yakuba pìile wuʔu nɛ̄ gè. Yakuba wè, Kulocɛliɛ yé wi míʔɛ yiʔɛ gè nɛ̀ wi yeri Isirayɛli. Tiī nɛ nyu kɛnmɛ bíì nɛ̄ pe pɛ́nì kò sùkulolo Ezipiti kùlo nī lè, nɛ́ mɛni Kulocɛliɛ wi 'pe yige sùkulomɔ nī bè nɛ̀ sɛ́nì pe nyɔ́gɔ Kanaa kùlo nī lè, nàa nyuɔ wi yé kún nɛ̀ kɛn pe mɛ́ lè. Kire tánʔana nɛ̀ lè pe yé wuʔɔyɔ sáamɛ taa waama kùlo nī lè, a Yewe wi 'wìi tìɛ pe nɛ̄ kakpoliyo nī yè nɛ̀ pe suɔ.
Tiɛsɛnyɛ yiī nɛ nyu Misa wuʔu nɛ̄ gè, nɛ́ kele gálì ke 'tóri Yewe Kulocɛliɛ nɛ́ Isirayɛliyé sunʔɔmɔ nī bè. Yewe yé Misa nyíɛnɛ wè nɛ̀ kɔ̀n wi- Isirayɛliyé yige bèle Ezipiti kùlo nī lè. Wire wi 'puu siɛnjuuwo wè nɛ́ ní kàsuluwo Kulocɛliɛ nɛ́ wi siɛnnɛ sunʔɔmɔ nī bè.
Yirile nɛ́ Suɔlɔ Sɛbɛ wi sélimɛ nɛ̄ bè, kiī nɛ nyu Misa siile wuʔu nɛ̄ gè. Fànʔa Kajuʔulo Sɛbɛ wi kúɔmɔ mɛ́ bè kire nɛ nyu wi kùu wuʔu nɛ̄ gè; kire 'kpíʔile náʔanɛ Isirayɛliyé pe 'jíin Kanaa kùlo nī lè.
Pe tánʔana lɛ̀lɛ nī lè, baa Sinayii nyagurugo nɛ̄ gè, Kulocɛliɛ wi 'wi cɛ̀nmɛ nɛ́ wi kpuɔmɔ tìɛ bè Isirayɛli tògo nɛ̄ gè, nɛ́ wi fànʔa siɛnrɛ kɛn dè Misa mɛ́ wè. Fànʔa kajuʔulo gàli Kulocɛliɛ yé tóri Misa mɛ́ wè nɛ̀ ke juu Isirayɛliyé mɛ́ bèle, kiyē gbuʔulo gbuʔulo sɛbɛlɛ nī bèle. Gboli láà nɛ nyu kele gálì nɛ̄ pe 'yɛli bèri kpínʔini gèle bé nyakungɛngɛ cò gè (wéli baa Yir 21–23). Gboli láà nɛ nyu kɛnmɛ bíì nɛ̄ pe cé yɛli bè pìye puɔ Yewe nɛ̄ wè (wéli baa Lev 17–27). Gboli láà nɛ nyu pe tánʔagɛnmɛ nɛ̄ bè Kanaa kùlo nī lè (wéli baa Fàn 12–26).
Sɛbɛlɛ pe nyùgboliyo yè
Kulocɛliɛ wi duniya nɛ́ siɛnnɛ faan (Sél 1–11)
Isirayɛliyé tobilo siɛnrɛ dè (Sél 12–15)
Yirile wuʔu gè Ezipiti kùlo nī lè, a Misa 'pe yiʔɛ kíni gè (Yir 1–15)