We- kàa juu Kulocɛliɛ Siɛnrɛ sɛbɛ wi wori nɛ̄ dè
Kulocɛliɛ Siɛnrɛ ti n'dɛ, nyaʔafolido nī ! Sɛbɛpelile bálì we 'yiʔɛ nɛ̀ taa bèle, peli 'nyaa Kulocɛliɛ Nyakungɛngɛ Fɔngɔ siɛnrɛ sɛbɛlɛ togo nɛ́ kɔlisiin bèle, nɛ́ Nyakungɛngɛ Liʔɛ sɛbɛlɛ kogunɔ pélile ní bèle, nɛ̀ fàri Ŋúnuyɔ sɛbɛ nɛ̄ wè. Biibile wi mìɛni sɛbɛlɛ bèle, pe nɛ̂ nyaa sɛbɛlɛ togotaanri nɛ́ kɔlini (Nyakungɛngɛ Liʔɛ tiʔɛ nī gè: sɛbɛlɛ togo nɛ́ kpɔrigɔ nɛ́ kacɛri, Nyakungɛngɛ Fɔngɔ wuulo bèle: togo nɛ́ kɔlisiin).
Sɛbɛ ŋáà nī wè, we 'Nyakungɛngɛ Liʔɛ sɛbɛlɛ pe mìɛni míɛyɛ le yè baa, pe mìɛni siɛnrɛ tiì sí fíɛ yiʔɛ weli siɛnrɛ nī dèʔ. Kire nɛ̄, a muɔ 'ki nyaa a we 'sɛbɛlɛ pálì míɛyɛ sɛbɛ ti ní fɛ́nidɛ dè, kire sɛbɛlɛ pe siɛnrɛ tiì fìɛ yiʔɛ nyaʔafolido nī dèʔ.
Nyakungɛngɛ Fɔngɔ siɛnrɛ ti 'kíni nɛ̀ puu kùlo láà siɛnrɛ nī, pe ti ye girɛki; Liʔɛ wori ní dè eburu siɛnrɛ nī. We 'ti yiʔɛ nyaʔafolido nī dè nɛ̀ ti tɔ́nminɔ nɛ́ tuɔbuuro wori táà ní, a girɛki siɛnrɛ nɛ́ eburu siɛnrɛ ti cɛ́nfɔlilɔ pe 'ti sɔ́migɔ nɛ̀ ti siʔɛ nɛ̀ wéli nɛ̀ ti líɛ siɛnkanʔana siɛnkanʔana nɛ̀ ti yori tìi nī.
Sɛbɛ ŋáà wiī tiɛyɛ siin: Pélige gè, Nyakungɛngɛ Liʔɛ Sɛbɛpelile kogunɔ bèle (tire dī we nɛ̂ jo Fànʔa Siɛnrɛ dè), nɛ́ Ŋúnuyɔ sɛbɛ ní wè. Siinwuʔu gè, Nyakungɛngɛ Fɔngɔ wori dè.
Kulocɛliɛ- we saʔa, wi siɛnrɛ ti- we tɛnmɛ we- wi koligo líɛ gè !