Kàkpaanya siin wori dè
10
1 A Yewe 'ki juu Misa mɛ́ nɛ́ jo: 2 «-Kàkpaanya siin kpíʔile nɛ́ walifiiwe ní ŋàa pe 'kpúɔn wè; yire ní muɔ béri Isirayɛli tògo siɛnnɛ yeri bèle de gbunʔuni, bèri kári lɛ̀lɛ tìí lè bùguro tiɛyɛ nī yèa.3 «A pe kɛ́nì kàkpaanya siin pínɛ yè nɛ́ wíi yè nɛ̀ mɔgɔ yè, Isirayɛli tògo siɛnnɛ pe mìɛni yɛli pe- pìye gbuʔulo muɔ táanni, Kpàlidiʔɛ Kpátaʔa wìile nɛ̄ lè.
4 «A ki sí nyaa kàkpanʔa nigbe pe 'wíi gè, Isirayɛli siɛnnɛ sirakogunɔ kàfɔlilɔ peli bīɛlɛ pe 'yɛli pe- pa gbuʔulo muɔ táanni. 5 A pe kɛ́nì kàkpanʔa wíi gè kpuʔɔ nɛ̀ taʔala gè, tògo gáà gī tɛ́nigɛ cɛngɛnyɛnifoligɔli mɛ́ gè, peli pe bé yɛ̀ bèri waa. 6 A pe ń'nɛ̀ kàkpanʔa wíi gè kpuʔɔ nɛ̀ taʔala gè taziinwuʔu nɛ̄ gè, tògo gáà gī kàliige kɔli mɛ́ gè, peli míɛni bé yɛ̀ bè taʔa bìli nɛ̄ bèle. Bà ki bé puu kàkpanʔa gáà pe wíi nɛ̀ taʔala gè, kire bé puu fìɛ bè ki tìɛ kári lɛ̀gɛlɛ ke 'nɔ̀. 7 A ki sí nyaa pe je Isirayɛli tògo siɛnnɛ yeri bèle bè gbuʔulo bèle, yeli bé ki wíi bè mɔgɔ; kiì yɛli ki wíi kpuʔɔ bè taʔalaʔ.
8 «Arawɔn jaala, bàli bīɛlɛ kacuɔnrilɔ bèle, peli yákuɔlɔ pe bé kàkpaanya wíi yè. Kire bé puu fànʔa kaala kɛ̀ngɛlɛ ke mìɛni mɛ́.
9 «A yeli yē yeli kùlo nī lè, a ki pɛ́nì nyaa yeli 'kɛ́ bàa kapiɛnnɛ kpúɔn lè nɛ́ yeli leguulo ní bèle bàli pe 'tuu yeli nɛ̄ bèle, yeli bé kàkpaanya wíi yè kpuʔɔ bè taʔala. Bà ki bé kpíʔile Yewe yeli Kulocɛliɛ wi bé sɔ̀ngi bè taa nɛ́ yeli wuʔu ní gè, bè yeli suɔ yeli leguulo mɛ́ bèle.
10 «Yeli fundaanra cɛnyɛ ní yè, nɛ́ Yewe kpàli lɛ̀gɛlɛ ní gèle nɛ́ yeye yi sélimɛ nɛ̄ bè, yeli béri kàkpaanya wíi yè bèri kakuɔrɔ kaasuʔuro nɛ́ yanyige kaara kanʔa dè Yewe mɛ́ wè. Tire bé kò sɔ̀ngidaa lɛ̀gɛlɛ yeli mɛ́ Yewe yiʔɛ mɛ́ gè. Mi wī Yewe yeli Kulocɛliɛ wè.»
FURƆGƆ LƐLƐ LE WAAMA KULO NƐ MOWABI KULO NI LE
(10.11–25.18)
Isirayɛliyé pe 'kɛ́ Mowabi kùlo mɛ́ lè
(10.11–21.35)
Isirayɛli siɛnnɛ pe 'yiri Sinayii waama kùlo tiʔɛ nī gè
11 Yiɛziinwoli nɛ̄ lè, bà pe 'yiri Ezipiti kùlo nī lè, yeziinwuʔu ki cɛnyɛ togowuʔu nɛ̄ gè, a kàsadibagɛ ki 'yɛ̀ Kòridiʔɛ nɛ̄ gè baa nyakungɛngɛ siɛnrɛ kàdɛnitɛnyɛ yi 'puu yè. 12 A Isirayɛli siɛnnɛ pe 'yɛ̀ nɛ̀ yiri Sinayii waama kùlo tiʔɛ nī gè nɛ sìʔɛrɛ nɛ waa cɛ̀cɛ. A kàsadibagɛ ki sɛ́nì yéri Paran waama kùlo tiʔɛ nī gè.
13 Tabelige nɛ̄ gè bà pe 'tɛ́ni nɛ̀ mɔgɔ Sinayii waama kùlo nī lè, a Isirayɛli siɛnnɛ pe 'yɛ̀ nɛ waa nɛ̀ yɛli nɛ́ dàa ní Yewe yé tóri Misa mɛ́ wè nɛ́ ti juu nɛ̀ gbɛ̀ngɛ dè.
14 Zuda gboli wuulo bèle, kapiɛngbuɔn tòyo taanri yi 'puu nɛ waa wi káfali láara wè. Nasɔn, Aminadabi jaa wè, wire wi 'puu Zudayé kapiɛngbuɔn tògo ki kàfɔli wèb. 15 Nɛtanɛyɛli, Zuwari jaa wè, wire wi 'puu Izakariyé kapiɛngbuɔn tògo ki kàfɔli wè. 16 Ɛliyabi, Elɔn jaa wè, wire wi 'puu Zabulɔnyé kapiɛngbuɔn tògo ki kàfɔli wè.
17 Kire kàduʔumɛ gè a pe 'fali nɛ Kòridiʔɛ warigi gè, a Gerisɔnyé nɛ́ Mɛrariiyé pe pɛ́nì Kòridiʔɛ tugo gè nɛ waa.
18 Wurubɛni gboli wuulo bèle, kapiɛngbuɔn tòyo taanri yi 'puu nɛ waa wi káfali láara wè. Elizuri, Sedewuri jaa wè, wire wi 'puu Wurubɛniyé kapiɛngbuɔn tògo ki kàfɔli wè. 19 Selumiyɛli, Zurisadayi jaa wè, wire wi 'puu Simɛyɔyé kapiɛngbuɔn tògo ki kàfɔli wè. 20 Eliyasafi, Dewuyɛli jaa wè, wire wi 'puu Gadiyé kapiɛngbuɔn tògo ki kàfɔli wè.
21 Kire kàduʔumɛ a Keyatiyé pe 'yɛ̀ nɛ̀ yawalidɛngɛrɛ tugo dè nɛ̀ taʔa pe nɛ̄; bìli pe yé kíni bèle a pe sɛ́nì Kòridiʔɛ yérige gè sɛ́ni Keyatiyé pe 'nɔ̀ baa wè.
22 Ɛfirayimi gboli wuulo bèle, kapiɛngbuɔn tòyo taanri yi 'puu nɛ waa wi káfali láara wè. Elisama, Amikudi jaa wè, wire wi 'puu Ɛfirayimiyé kapiɛngbuɔn tògo ki kàfɔli wè. 23 Gamaliyɛli, Pedazuri jaa wè, wire wi 'puu Manaseyé kapiɛngbuɔn tògo ki kàfɔli wè. 24 Abidan, Gidewɔni jaa wè, wire wi 'puu Bɛnzamɛyé kapiɛngbuɔn tògo ki kàfɔli wè.
25 Dan gboli wuulo bèle, kapiɛngbuɔn tòyo taanri yi 'puu nɛ waa wi káfali láara wè, nɛ̀ pe mìɛni kàduʔu tɔ́n gè pe kapiɛngbuɔn tòyo nī yè. Akiyɛzɛri, Amisadayi jaa wè, wire wi 'puu Danyé kapiɛngbuɔn tògo ki kàfɔli. 26 Pagiyɛli, Wokiran jaa wè, wire wi 'puu Azɛriyé kapiɛngbuɔn tògo ki kàfɔli wè. 27 Akira, Ɛnan jaa wè, wire wi 'puu Nafitaliyé kapiɛngbuɔn tògo ki kàfɔli wè.
28 Kɛnmɛ báà pire nɛ̄ Isirayɛli siɛnnɛ pe 'puu nɛ waa, kapiɛngbuɔn tòyo nyáà yi gbuʔulo nī gèle. Bà pe 'puu nɛ ki kpínʔini a pe 'yɛ̀ nɛ waa wè.
29 Nàguɔ wáà 'puu baa, ŋàa pe 'ye Wobabi wè, Erewuyɛlic jaa wè, wire ŋàa wi 'puu Madiyanyé kùlo wuu wè nɛ́ ní Misa cuɔ tuu wè.
A Misa 'ki juu Wobabi mɛ́ nɛ́ jo: «Weli nɛ waa tiʔɛ gáà nī Yewe 'jo wi bé kɛn weli mɛ́ gè. Te báan nɛ́ weli ní. Weli bé kacɛ̀ngɛ kpíʔile muɔ mɛ́ a Yewe kɛ́nì kacɛ̀ngɛ kpíʔile weli mɛ́ bèle gàa wi 'juu gè.»
30 A Wobabi 'ki juu nɛ́ jo: «ʔéʔe, miǐ kɛ́ baaʔ. Mi kùlo lire mɛ́ mi nɛ caa bè kɛ́, mi wuulo sunʔɔmɔ nī bè.»
31 A Misa sí jo: «Mi nɛ muɔ náari wī, fǎga láʔa weli nɛ̄ʔ ! Muɔ nyɛ́nì waama kùlo tiɛyɛ cɛ́n yè, tiɛyɛ yíì nī weli nɛ waa bàa bùguro kpúɔn dè. Muɔ bé puu weli yiɛginiwɛ. 32 A muɔ 'fɔ̀li nɛ̀ pínɛ nɛ́ weli ní wè, ki bé puu a Yewe pɛ́nì kacɛ̀ngɛlɛ gílì kpíʔile weli mɛ́ gèle, weli bé muɔ kɛn míɛni.»
33 A pe 'yɛ̀ Yewe nyagurugod tiʔɛ nī gè nɛ tári nɛ waa cɛ̀cɛ nɛ̀ cɛnyɛ taanri tánʔana tánʔa, a Yewe nyakungɛngɛ finʔɛgɛ ki 'kíni pe yiʔɛ mɛ́ gè cɛnyɛ taanri nyáà yi tánʔana nɛ̄ lè, bè tiɛŋɔdaʔa taa pe mɛ́. 34 Lɛ̀lɛ líì nī pe bùguro yɛ̀gɛ dè nɛ waa dè, Yewe kàsadibagɛ ki nɛ̂ cé pe tɔ́n cɛngɛ lɛ̀lɛ nī lè. 35 A nyakungɛngɛ finʔɛgɛ ki gbɛ̀ni waa pe yiʔɛ mɛ́ gè, Misa nɛ̂ cé náarigɛ gáà kpíʔile gè níɛ jo:
«Yewe yo ! Yɛ̀ mari waa,
kire ga buu muɔ leguulo
pe- fɛ̀ pe cɛrigɛ !
Bàli bīɛlɛ 'muɔ biɛn bèle,
pe mìɛni de fé
muɔ yiʔɛ mɛ́ gèe !»
36 A pe gbɛ̀ni finʔɛgɛ tìrige gè nɛ̀ tɛ́ngɛ gè, Misa nɛ̂ ń'nɛ̀ jo:
«Yewe yo ! Koli mari báan
Isirayɛli siɛnniʔɛmɛ sunʔɔmɔ
nī bè,
bàa piǐ gbɛ̀ tɔ́ri bèʔ !»