Mataayo 21

Bhahumʼmwambɨɨlɨla ʉYeesu hu luseshelo hwi‑ibooma ɨlyɨ Yelusaleemu

(Maalʉko 11:1-11; Luuka 19:28-40; Yoohani 12:12-19)

ɄYeesu na bhasundwe bhaakwe lwa bhapalamila afishe hwi‑ibooma ɨlyɨ Yelusaleemu, bhahafiha hu shipanga ɨshɨ Besifaage sha shahali pa pɨɨpɨ ni‑igamba ɨlyɨ Mizeyituuni. Ɨpo ʉYeesu ahabhasonteelezya abhasundwe bhaakwe bhabhɨɨlɨ, ahabhabhʉʉzya ahaga, 2 “Bhalaji mu shipanga sha shili pilongolela lyenyu. Lwa mutʉʉha lwene, munza huyaaje ɨndogobhi nɨ nyaana yaakwe zikʉngwɨlwe. Ɨpo muzyawule na huzileete huliinɨ. 3 Nkashele ʉmuntu wowonti ahubhabhʉzɨɨlɨzya hohonti, mugaje, ‘ɄMwɨnɨ ahuzyanza,’ wope anza hubhɨtɨshɨle ahwɨnze nazyo.” 4 Ɨga gonti gahabhombɨɨshe ɨsho huje izwi liila lya lyahayangwilwe nʉ nʼkuwi wa Ngʉlʉbhɨ libhombeshe huje,

5 “Bhabhʉʉzye abhantu abha hwi‑ibooma ɨlyɨ Sayuuni huje,

‘Enya, ʉMwɨnɨ weenyu ahwɨnza huliimwɨ, mwoloolo,

ahwɨnza lwa‑ali pa mwanya pa ndogobhi,

ɨndogobhi ɨyo nɨ nyaana yaakwe.’ ”

6 Ɨshi abhasundwe bhaala bhahabhala, bhahabhomba nanshi ʉYeesu sha‑ahabhalajiziizye. 7 Bhahanʼtwalila ʉYeesu ɨndogobhi ɨla peeka nɨ nyaana yaakwe, bhahaala amenda gaabho pa mwanya yaabho. Ɨpo ʉYeesu ahazʉbha, ahakhala pa mwanya, ahanda ashʉʉle. 8 Ɨmpʉga ɨngoosi tee ɨya bhantu yahaala amenda gaabho mwi‑idala, bhamo bhahatema ɨnsamba zyɨ makwi na hwale mwi‑idala alolesye ɨnshɨnshɨ hwa mwene. 9 Abhantu bha bhahali hwitagaalila na bhaala bha bhahabhɨnjɨlɨlaga hwisinda lya Yeesu, bhonti bhahabwagaga ibwago bhahagaga,

“Amwamihwaje ʉMwana wa mwɨnɨ ʉDaudi!

Asayiiwe wa‑ahwɨnza hwi‑ikhone lya Mwɨnɨ ʉNgʉlʉbhɨ!

Amwamihwaje ʉNgʉlʉbhɨ ʉyo ali hu mwanya!”

10 ɄYeesu lwa‑atʉʉha mwi‑ibooma ɨlyɨ Yelusaleemu, abhantu abha mwi‑ibooma bhahavwalangana tee. Ɨpo bhahanda abhʉzɨlɨzanye huje, “Ʉnʉ yʉ naanu?” 11 Ɨmpʉga ɨya bhantu ɨla yahaga, “Ʉnʉ yʉ Yeesu, ʉnʼkuwi wa Ngʉlʉbhɨ wa‑afuma hwi‑ibooma ɨlyɨ Nazaleeti, hu mukowa ʉgwɨ Galilaaya.”

ɄYeesu ahubhashɨmbɨzya abhachuluuzi mu nyumba ɨmfinjile ɨya Ngʉlʉbhɨ

(Maalʉko 11:15-19; Luuka 19:45-48; Yoohani 2:13-22)

12 Ɨpo ʉYeesu ahatʉʉha mu lubhaga lwɨ nyumba ɨmfinjile ɨya Ngʉlʉbhɨ. Ahanda hubhashɨmbɨzye hwʉnzɨ abhantu bhonti bha bhahakazyaga na bha bhahakalaga ɨvintu ʉmwo. Ahazipetulanya ɨmeeza ɨzya bhantu bha bhahavunzaga ɨmpɨɨya peeka na matengo ga bhantu bha bhahakazyaga ɨnkʉnda. 13 ɄYeesu ahabhabhʉʉzya ahaga, “Ɨsimbwilwe mu Nsimbo ɨMfinjile huje, ʉNgʉlʉbhɨ ahayanjile huje, ‘Ɨnyumba yaanɨ yahayibha nyumba yɨ mpuuto.’ Leelo amwɨ muyigalulɨɨnye abhe nanshi igwenya lya bhiibha.”

14 ɄYeesu lwa‑ali mu lubhaga lwɨ nyumba ɨmfinjile ɨya Ngʉlʉbhɨ, abhantonko na bhalemazu bhahamʼmwɨnzɨla, wope ahabhaponia. 15 Leelo abhalongozi bha bhasayi bha Ngʉlʉbhɨ na bhamanyizyi abhɨ ndajizyo zya Moose bhahaviitwa tee, lwa bhagalola amayele aga‑aswijizye ɨgo ʉYeesu ahabhombile, nantele lwa bhʉmvwa abhaana lwa bhaseshela mu lubhaga lwɨ nyumba ɨmfinjile ɨya Ngʉlʉbhɨ bhayiga, “Amwamihwaje ʉNgʉlʉbhɨ hu nongwa yɨ shikholo ɨsha mwɨnɨ ʉDaudi.” 16 Bhahamʼmʉzɨɨlɨzya ʉYeesu bhahaga, “Wɨlɨ, ʉhwʉmvwa abhaana ɨbho sha bhayanga?” ɄYeesu ahabhaamula ahaga, “Ɨhwʉmvwa! Wɨlɨ, saga mubhaziizye amazwi ga gasimbwilwe mu Nsimbo ɨMfinjile? Gasimbwilwe huje,

‘Mu mazwi ga bhaana abhadoodo na mu bhacheeche,

ʉmwo mwa mwʉmwo ʉbhɨɨshɨle ɨnsalifyo.’ ”

17 ɄYeesu ahabhaleha abhantu bhaala, ahabhala agone hu shipanga ɨshɨ Besaniya.

ɄYeesu ahuliguna ikwi ɨlyɨ makʉ

(Maalʉko 11:12-14, 20-24)

18 Shampwi yaakwe hu habhaazyo ɨho ʉYeesu lwa‑aweela hu Yelusaleemu, ɨnzala yahanʼnumile. 19 Ɨpo ahalilola ikʉ lyeka panshɨnjɨ pi‑idala, ahasejeela pa pɨɨpɨ, ahalyaga saga lili na makʉ gogonti, lyoli lijejile ga matʉndʉ geene. Ɨpo ahalibhʉʉzya ikwi liila ahaga, “Afume sanyʉʉnʉ na wiila saga ʉnza hwezyaje amantongooni dumu!” Pɨnɨɨpo, ikwi liila lyahʉʉma lyonti. 20 Abhasundwe bha Yeesu lwa bhagalola ɨgo, bhahaswiga tee, bhahamʼmʉzɨɨlɨzya bhahaga, “Wee Mwɨnɨ, yeenu ikwi ɨlyo lyʉmɨle nalinaali?” 21 ɄYeesu ahabhaamula ahaga, “Lyoli ɨhubhabhʉʉzya, nkashele muli nʉ lwɨtɨho sinta nsyoho, namwɨ mubhajiiye abhombe nanshi ɨgo ga gabhombeha hwi‑ikʉ. Nantele saga munza‑abhombe ɨga geene, lyoli nkashele muhulibhʉʉzya igamba ɨli huje, ‘Kumpuha, ʉyeepe ɨpa pʉ‑ʉhwɨli, ʉhwitaaje mu nsʉmbi,’ gope ganza‑abhombeshe. 22 Nkashele muli nʉ lwɨtɨho, hohonti ɨho mulaabha hwa Ngʉlʉbhɨ mu mpuuto, munza hwambɨɨlɨle.”

Ikhone lya Yeesu libhʉzɨlɨzɨwa

(Maalʉko 11:27-33; Luuka 20:1-8)

23 ɄYeesu ahatʉʉshɨle nantele mu lubhaga lwɨ nyumba ɨmfinjile ɨya Ngʉlʉbhɨ. Ɨpo hu habhaazyo lwa‑amanyizya, abhalongozi bha bhasayi bha Ngʉlʉbhɨ na bhagoosi bha Bhayahuudi bhahamʼmalila, bhahamʼmʉzɨɨlɨzya bhahaga, “Gaala gʉ‑ʉbhomba, ʉbhomba hwi‑ikhone lya naanu? Yʉ naanu ya‑aʼpiiye ikhone ɨlyo?” 24 ɄYeesu ahabhaamula ahaga, “Nanɨ ɨnza hubhabhʉzɨɨlɨzye izwi limo. Ɨshi nkashele mwanaamula, nanɨ ɨnza hubhabhʉʉzye huje ɨgo ɨbhomba, ɨbhomba hwi‑ikhone lya naanu. 25 Wɨlɨ, ʉYoohani ahalyajile hwi, ikhone ɨlya hwozye abhantu? Lyahafumile hwa Ngʉlʉbhɨ awe lyahafumile hwa bhantu?” Ɨpo bhahajeehana bheene huje, “Nkashele tiyiga, ‘Lyahafumile hwa Ngʉlʉbhɨ,’ anza hutibhʉzɨɨlɨzye atɨ huje, ‘Yeenu mwahasintile humʼmwɨtɨshe?’ 26 Leelo nkashele tiyiga, ‘Lyahafumile hwa bhantu,’ tihwogopa ɨmpʉga ɨya bhantu ɨnɨ, pɨpo bhonti bhali nʉ simishizi huje ʉYoohani ahali nʼkuwi.” 27 Ɨpo bhahamʼmwamula bhahaga, “Saga timɨɨnye.” Wope ʉYeesu ahabhabhʉʉzya ahaga, “Nanɨ saga ɨmbala hubhabhʉʉzye lwonti huje ɨgo ɨbhomba hwi‑ikhone lya naanu.”

Ɨshifwani ɨsha mwana wa‑ahwɨtɨha nʉ wa‑akhaana

28 ɄYeesu ahabhabhʉʉzya nantele ahaga, “Amwɨ mulola wɨlɨ ɨshifwani ɨshi? Ahalɨɨho ʉmuntu ʉmo wa‑ahali na bhaana abhasahaala bhabhɨɨlɨ. Ahabhalile hwa mwana ʉwa hwande, ahamʼmʉʉzya ahaga, ‘Wee mwana waanɨ, bhala ʉbhombe ɨmbombo mu nʼgʉnda ʉgwɨ zabiibu sanyʉʉnʉ.’ 29 Ʉmwana ʉla ahamʼmwamula ahaga, ‘Saga ɨmbala.’ Leelo pamandɨ ahasɨɨbha, ahabhala abhombe. 30 Ɨpo ʉyise waakwe ahabhala hwa mwana waakwe ʉwa bhɨɨlɨ na humʼmʉʉzye nanshi ʉwamwabho ʉla. Wope ahamʼmwamula ahaga, ‘Ɨnza‑abhale daada.’ Leelo saga ahabhala. 31 Wɨlɨ, mu bhaala bhabhɨɨlɨ, weenu wa‑ahabhombile sha‑ahanzaga ʉyise waabho?” Abhalongozi bha bhasayi bha Ngʉlʉbhɨ na bhagoosi bha Bhayahuudi bhaala bhahamʼmwamula bhahaga, “Ya yʉʉla ʉwa hwande.” Ɨpo ʉYeesu ahabhabhʉʉzya ahaga, “Lyoli ɨhubhabhʉʉzya, abhasomvya sonko na bheegu bhahayihubhatagaalila atʉʉshe hu wumwɨnɨ ʉwa Ngʉlʉbhɨ. 32 ɄYoohani ahɨnzɨle huliimwɨ huje abhalanje idala ɨlyɨ lyoli, namwɨ saga mwahamʼmwɨtɨɨshe. Leelo abhasomvya sonko na bheegu bhahamʼmwɨtɨɨshe. Hwope ɨsho amwɨ lwa mwagalola gonti ɨgo, saga mwahalambile hu mbiibhi zyenyu na humʼmwɨtɨshe.”

Ɨshifwani ɨsha bhalimi abhabhiibhi

(Maalʉko 12:1-12; Luuka 20:9-19)

33 ɄYeesu ahajendeelela ayanje ahaga, “Tejeelezyi ɨshifwani ɨshamwabho. Hwahali nʉ muntu ʉmo wa‑ahalimile ʉnʼgʉnda gwakwe na‑avyale ɨzabiibu. Ahazyʉngʉʉzya ʉlubhaga munshɨnjɨ, ahabana ilɨndɨ ɨlya‑asʉʉyɨle ɨzabiibu ziila. Ahazenga ɨshidunku ɨshitali ɨsha hwenyeelezye mu nʼgʉnda. Ahapasya hwa bhalimi huje bhalɨndɨlɨlaje na hwenyeelezye ɨzabiibu ziila aje nkashele zyela, bhahagabhanaje. Ʉmwene ahashʉʉla, ahabhala hu nsi ɨyɨnjɨ ɨya hutali.

34 Ahabhaazyo lwa haafiha aha‑atʉngʉle ɨzabiibu, ahabhasonteelezya abhabhomvi bhaakwe hwa bhalimi bhaala huje bhabhale, bhamʼpeele ɨzabiibu ɨzya mwene afume mu nʼgʉnda gwakwe. 35 Leelo abhalimi bhaala bhahabhakhata abhabhomvi bhaala, weeka bhahanʼkhoma, ʉwamwabho bhahanʼgoga nʉ wamwabho bhahanʼkhoma na mawe. 36 Ʉmwanɨɨsho nʼgʉnda ahabhasonteelezya nantele abhabhomvi abhanjɨ ɨbho bhahali bhinji ashile bhaala ɨbho ahabhasonteleziizye hu wandilo. Abhalimi bhaala bhahabhabhombɨɨye shibhiibhi abhabhomvi bhaala nanshi ɨsho bhahabhabhombɨɨye abha hwande. 37 Hu malishilo, ahanʼsonteelezya ʉmwana waakwe, ahaga, ‘Ʉnʉ mwana waanɨ, ʉmwene bhanza‑abhe nɨ nshɨnshɨ.’ 38 Leelo abhabhomvi bhaala lwa bhanʼnola ʉmwana ʉla, bhahajeehana bheene bhahaga, ‘Ʉnʉ yʉ nʼgaali wɨ nʼgʉnda ʉgu. Ɨshi, ɨnzaji tinʼgoje huje ɨngaali zyakwe ɨzyɨ nʼgʉnda ʉgu nka zibhe zyetu.’ 39 Ɨpo bhahanʼkhata, bhahamʼfumya hwʉnzɨ yɨ nʼgʉnda, bhahanʼgoga. 40 Ɨshi ʉmwanɨɨsho nʼgʉnda ʉyo lwa waweela afume hwa‑ahashʉʉlɨle, ahayihubhabhomba yeenu abhalimi bhaala?” 41 Abheene bhahamʼmwamula bhahaga, “Ahayihubhagoga shibhiibhi abhabhiibhi bhaala, gwope ʉnʼgʉnda gwakwe ahayihubhapasya abhalimi abhanjɨ ɨbho bhahayihunʼsomba amantongooni gaakwe hu habhaazyo ha hahwanziwa.”

42 Ɨpo ʉYeesu ahabhabhʉzɨɨlɨzya nantele ahaga, “Wɨlɨ, saga mubhaziizye ɨgo gasimbwilwe mu Nsimbo ɨMfinjile? Gasimbwilwe huje,

‘Iwe lya bhahalikhɨɨne abhazenji abhɨ nyumba,

lyɨlyo lya lyabha liwe linza ɨlya pa mpɨnga

lya linyʉmʉʉye ɨnyumba yonti.

ɄMwɨnɨ ʉNgʉlʉbhɨ ya yʉʉyo agabhombile ɨga,

gope gaswijizya huliitɨ.’

43 Ɨshi, hu nongwa ɨyo anɨ ɨhubhabhʉʉzya huje ʉNgʉlʉbhɨ ahayeefwa ʉwumwɨnɨ waakwe huliimwɨ na hubhapeele abhantu abha mu nsi ɨzyɨnjɨ, ɨbho bhabhajiiye abhombe shinza mu nʼgʉnda gwakwe huje bheezye amantongooni. 44 Ʉmuntu wowonti nkashele wagwɨla pi‑iwe ɨlyo, anza‑abuduuhane tee na‑abhe tinyatinya. Nantele ʉmuntu wowonti nkashele iwe ɨlyo lyanʼgwɨla, lɨnza hunʼtinzanye tee.”

45 ABhafalisaayo na bhalongozi bha bhasayi bha Ngʉlʉbhɨ lwa bhʉmvwa ɨvifwani vya Yeesu, bhahamanya huje vihubhayanga bhɨɨbho. 46 Ɨpo bhahanda ahwanze idala ɨlya hunʼkhate, leelo bhahoogopa ɨmpʉga ya bhantu, pɨpo abhantu ɨbho bhahamɨɨnye huje ʉYeesu nʼkuwi.