Luuka 19

ɄYeesu akhomaana nʉ Zakaayo ʉnʼsomvya sonko

ɄYeesu ahatʉʉha mwi‑ibooma ɨlyɨ Yeeliko, ahashila paahati yi‑ibooma liila. 2 Mwi‑ibooma liila, hwahali nʉ muntu ʉmo ʉyo itaawa lyakwe bhahagaga Zakaayo. ɄZakaayo ahali nʼgoosi wa bhasomvya sonko, nantele ahali nʼtabhazi. 3 Ʉmuntu ʉyo ahanzaga hunʼnole ʉYeesu huje, ali wɨlɨ. Leelo ahapotiilwe hunʼnole hu nongwa ya‑aje, ʉmwene ahali nʼduuli, nantele abhantu bhahali bhinji tee. 4 Ɨpo ahashɨmbɨla hwitagaalila yɨ mpʉga, ahatanta mwi‑ikʉ nka‑anʼnole ʉYeesu, pɨpo ahashilaga idala lyɨnɨɨlyo. 5 ɄYeesu lwa waafiha paala, aheenya hu mwanya mwi‑ikwi, ahanʼnola ʉZakaayo, ahaga, “Wee Zakaayo, iha lubhilo! Ɨleelo ɨli, anɨ ɨndi nʼjenu waaho.” 6 ɄZakaayo ahiiha nalinaali, ahamʼmwambɨɨlɨla ʉYeesu hu khaaya yaakwe hu luseshelo.

7 Abhantu bhonti bha bhahanʼnolile ʉYeesu lwa‑atʉʉha mu nyumba ya Zakaayo, bhahanda ahwibhune, bhahagaga, “Yeenu abhalile akhale hwa mʼmomba mbiibhi?” 8 Leelo ʉZakaayo ahɨmɨɨlɨla, ahamʼmʉʉzya ʉMwɨnɨ ʉYeesu ahaga, “Wee Mwɨnɨ! Ɨshi, ɨvintu vyanɨ ɨmbala huvigabhanye paahati, vimo ɨmbala hubhapeele abhapɨɨna. Nantele, nkashele ɨmʼfyʉlɨle ʉmuntu ahantu haakwe hohonti, ɨmbala humʼmwezezye hanɨ.” 9 Ɨpo ʉYeesu ahamʼmʉʉzya ahaga, “Asanyʉʉnʉ, ʉfyʉli wɨnza hwa bhantu abhɨ nyumba ɨnɨ, pɨpo ʉmuntu ʉnʉ wope wabha wɨ shikholo ɨsha Abulahaamu. 10 Ɨshi, anɨ nɨMwana wa Muntu ɨnɨnzɨle ahwanze na hubhafyʉle abhantu bha bhateejile.”

Ɨshifwani ɨsha bhakalwe bha bhapewiilwe ɨmpɨɨya

(Mataayo 25:14-30)

11 Abhantu bha bhahanʼtejelezyaga ʉYeesu, bhahasɨɨbhaga huje, ʉwumwɨnɨ ʉwa Ngʉlʉbhɨ wupalamiiye hu nongwa ya‑aje, bhahali pɨɨpɨ afishe hwi‑ibooma ɨlyɨ Yelusaleemu. Ɨpo ʉYeesu ahabhabhʉʉzya hu shifwani ahaga, 12 “Hwahali nʉ muntu ʉmo ʉwɨ shikholo ɨshɨ wumwɨnɨ wa‑ahashʉʉlɨle abhale hu nsi ɨya hutali. Ahabhalile hu nsi ɨyo huje, bhamʼpeele ikhone ɨlya‑abhe mwɨnɨ, nka‑aweele alongozye ɨnsi yaakwe.

13 Lwa‑asɨɨle ashʉʉle, ɨpo ahabhakwizya abhantu ishʉmi mu bhaala abhakalwe bhaakwe, ahabhapeela ɨmpɨɨya ɨnyinji, ɨshilʉndɨlo sheeka hwa shila muntu, ahabhabhʉʉzya ahaga, ‘Muchuluzizyaje ɨmpɨɨya ɨzi huje, zyonjeelele afishe hu habhaazyo ha nahayiweela.’ 14 Leelo abhantu abhɨ nsi yaakwe bhahamʼvitiliilwe. Ɨpo bhahabhasonteelezya abhantu abhanjɨ hu nsi ɨla ɨya hutali ayanje huje, ‘Saga tihwanza huje, ʉmuntu ʉnʉ abhe mwɨnɨ weetu!’ 15 Peeka na‑ayanje ɨsho, ahapewiilwe ikhone ɨlyɨ shimwɨnɨ. Lwa waweela, ahabhakwizya abhakalwe ɨbho ahabhapiiye ɨmpɨɨya huje, amanye shila muntu azyajile zilɨnga ɨzya pa mwanya.

16 Ʉnʼkalwe ʉwa hwande ahafiha, ahamʼmʉʉzya ahaga, ‘Wee mwɨnɨ, ɨmpɨɨya zya wahampiiye, zyonjelɨɨye, nazyaga ɨzya pa mwanya ɨvilʉndɨlo ishʉmi.’ 17 Ʉmwɨnɨ ʉyo ahamʼmʉʉzya ahaga, ‘Ʉbhombile shinza, aawe ʉli nʼkalwe mwinza. Ɨshi, ɨmbala hupeele ikhone ɨlya‑alongozye amabooma ishʉmi hu nongwa ya‑aje, wahali nʼnʉnjɨsu hu vintu ɨvidoodo tee.’ 18 Wope ʉnʼkalwe ʉwa bhɨɨlɨ ahɨnza, ahamʼmʉʉzya ahaga, ‘Wee mwɨnɨ, ɨmpɨɨya zya wahampiiye, zyonjelɨɨye, nazyaga ɨzya pa mwanya ɨvilʉndɨlo visaanu.’ 19 Ʉmwɨnɨ ahamʼmʉʉzya ʉnʼkalwe ʉnʉ wope ahaga, ‘Nawe, ɨmbala hupeele ikhone ɨlya‑alongozye amabooma gasaanu.’

20 Ʉnʼkalwe ʉwamwabho ahafiha, ahaga, ‘Wee mwɨnɨ, ɨmpɨɨya zyaho zya wahampiiye ɨzi ɨpa. Nahazibhɨɨshɨle shinza mwa henda huje, zigandi ateeje. 21 Nahabhombile ɨsho hu nongwa ya‑aje, nahahwogopaga aawe, pɨpo ʉli muntu nʼkhali. Ʉhwega vya saga wahavibhɨɨshɨle, nantele ʉvuna vya saga wahatotile.’

22 Ʉmwɨnɨ ahamʼmʉʉzya ahaga, ‘Aawe ʉli nʼkalwe mʼmiibhi! Ɨshi, ɨhulonga hu mazwi gaaho ga wayanga. Wahamɨɨnye huje, anɨ ɨndi muntu nʼkhali tee. Ɨhwega vya saga nahabhɨɨshɨle, nantele ɨvuna vya saga nahatotile. 23 Ɨshi, yeenu saga wahabhɨɨshɨle ɨmpɨɨya zyanɨ hwa bhachuluuzi huje, hu habhaazyo hɨ‑ɨweela naheegaje peeka nɨ zya pa mwanya?’

24 Ɨpo ahabhabhʉʉzya abhantu bha bhahɨmɨlɨɨye paala ahaga, ‘Mʼfyʉli ɨshilʉndɨlo shaakwe ʉnʉ, mʼpeeli wa‑ayonjezɨɨzye ɨzya pa mwanya ishʉmi.’ 25 Abheene bhahamʼmʉʉzya bhahaga, ‘Wee mwɨnɨ, leelo mbona ʉla ali nazyo lishʉmi!’

26 Ʉmwɨnɨ ahaga, ‘Ɨhubhabhʉʉzya huje, ʉmuntu wowonti wa‑abhombela shinza sha‑ali nasho, ahayonjelwa ɨvyamwabho. Leelo wa saga ahushibhombela shinza shiila sha‑ali nasho, hwope shiila sha‑ali nasho shahayifyʉlwa. 27 Peeka nɨ‑ɨgo, bhaleeti abhalʉgʉ bhaanɨ, bhaala bha saga bhahanzaga huje, anɨ ɨmbe mwɨnɨ waabho. Mubhabude pitagaalila lyanɨ!’ ”

Bhahumʼmwambɨɨlɨla ʉYeesu hu luseshelo hwi‑ibooma ɨlyɨ Yelusaleemu

(Mataayo 21:1-11; Maalʉko 11:1-11; Yoohani 12:12-19)

28 ɄYeesu lwa wayanga amazwi ɨgo, ahatagalilaga hwitagaalila yɨ mpʉga ɨla abhale hwi‑ibooma ɨlyɨ Yelusaleemu. 29 Lwa wapalamila afishe hu vipanga ɨvyɨ Besifaage nɨ Besaniya hwi‑igamba ɨlyɨ Mizeyituuni, ʉYeesu ahabhasonteelezya bhabhɨɨlɨ mu bhaala abhasundwe bhaakwe. 30 Ahabhabhʉʉzya ahaga, “Bhalaji mu shipanga shiila sha shili pilongolela lyenyu. Lwa mutʉʉha lwene, munza huyaaje ɨnyaana ndogobhi yɨ‑ɨkʉngwɨlwe, ɨyo ʉmuntu saga alɨnjɨle nka lumo azʉbhe pa mwanya yaakwe. Muyaawule na huyileete huliinɨ. 31 Nkashele ʉmuntu ʉmo ahubhabhʉzɨɨlɨzya huje, ‘Yeenu muhuyaawula ɨnyaana ndogobhi?’, mugaje, ‘ɄMwɨnɨ ahuyanza.’ ”

32 Ɨpo abhasundwe bhabhɨɨlɨ bhaala bhahabhala, bhahazyaga zyonti zili shishiila nanshi ʉYeesu sha‑ahabhabhʉzɨɨzye. 33 Ɨshi, lwa bhayaawula ɨnyaana ndogobhi ɨla, abhanɨɨsho bhahabhabhʉzɨɨlɨzya bhahaga, “Muhuyawulila yaashi ɨnyaana ndogobhi ɨyo?” 34 Bhahabhaamula bhahaga, “ɄMwɨnɨ ahuyanza.” 35 Ɨpo bhahanʼtwalila ʉYeesu ɨndogobhi ɨla, bhahaala amenda gaabho pa mwanya pa nyaana ndogobhi, bhahanʼzʉvya ʉYeesu pa mwanya.

36 ɄYeesu lwa‑ahashilaga, abhantu bhahaalaga amenda gaabho mwi‑idala. 37 Lwa wapalamila ahwishe hwi‑igamba ɨlyɨ Mizeyituuni, ɨmpʉga yonti ɨya bhasundwe bhaakwe bhahanda humʼmwamishe ʉNgʉlʉbhɨ. Bhahamʼmwamihaga tee hwi‑izwi igoosi nantele hu luseshelo hu nongwa yɨ mayele gonti ga bhahagalolile ʉYeesu abhomba, 38 bhahagaga,

“Asayiiwe wa‑ahwɨnza hwi‑ikhone lya Mwɨnɨ, ʉNgʉlʉbhɨ weetu!

Ʉtengaanu nʉ mwamu hwa Ngʉlʉbhɨ ʉwa hu mwanya.”

39 Mu mpʉga ɨla mwahali na Bhafalisaayo bhamo, bhahamʼmʉʉzya ʉYeesu bhahaga, “Mʼmanyizyi, bhadaamile abhasundwe bhaaho, bhaleshe ayanje ɨzyo!” 40 ɄYeesu ahaga, “Ɨhubhabhʉʉzya, ɨbha nkashele bhapʉʉma myɨ, amawe ɨgo ganza‑abwaje ibwago tee!”

ɄYeesu akuwa abhugulwe hwi‑ibooma ɨlyɨ Yelusaleemu

41 ɄYeesu lwa‑ali pa pɨɨpɨ, ahalilola ibooma ɨlyɨ Yelusaleemu, ahanda alile hu nongwa yɨ malabha ga gahwɨnza hwi‑ibooma ɨlyo. 42 Ahaga, “Yahali shinza ɨleelo ɨli, nkashele wamanyaga zyʉ‑ʉhwanziwa abhombe huje, ʉbhe nʉ tengaanu! Leelo ɨshi zifisiilwe pa maaso gaaho. 43 Mu nsiku zya zihwɨnza, abhalʉgʉ bhaaho bhahayizenga ʉlubhaga ʉlukhome azyʉngʉʉle ibooma lyaho lyonti, ɨpo pa bhahayanda hugube afume ɨmbali zyonti. 44 Bhahayihugwisya pa nsi, aawe Yelusaleemu, peeka na hubhayazye abhantu bhaaho bhonti muuhati yɨ mbʉmba zyaho. Saga lyahayisyala iwe nka lyeka pa mwanya pi‑iwe ɨlyamwabho hu nongwa ya‑aje, saga wahamɨɨnye ahabhaazyo haala ʉNgʉlʉbhɨ ha‑ahaʼletelaga ʉfyʉli!”

ɄYeesu ahubhashɨmbɨzya abhachuluuzi mu nyumba ɨmfinjile ɨya Ngʉlʉbhɨ

(Mataayo 21:12-17; Maalʉko 11:15-19; Yoohani 2:13-22)

45 Ɨpo ʉYeesu ahatʉʉha mu lubhaga lwɨ nyumba ɨmfinjile ɨya Ngʉlʉbhɨ. Ahanda hubhashɨmbɨzye hwʉnzɨ abhantu bha bhahakazyaga ɨvintu ʉmwo. 46 Ahabhabhʉʉzya ahaga, “Ɨsimbwilwe mu Nsimbo ɨMfinjile huje, ‘Ɨnyumba yaanɨ yahayibha nyumba yɨ mpuuto.’ Leelo amwɨ muyigalulɨɨnye abhe nanshi igwenya lya bhiibha.”

47 Ɨpo ʉYeesu ahabhamanyizyaga abhantu shila lisiku mu lubhaga lwɨ nyumba ɨmfinjile ɨya Ngʉlʉbhɨ. Ɨpo abhalongozi bha bhasayi bha Ngʉlʉbhɨ, abhamanyizyi abhɨ ndajizyo zya Moose na bhagoosi bha Bhayahuudi bhahanzaga idala ɨlya hunʼgoje. 48 Leelo bhahapotwaga, pɨpo abhantu bhonti bhahamʼmɨnjɨlɨzyaga ʉYeesu, nantele bhahasʉngwaga tee atejeelezye amazwi gaakwe.