Ɨshifwani ɨsha bhalɨndu ishʉmi
25
Ɨpo ʉYeesu ahabhabhʉʉzya abhasundwe bhaakwe ɨshifwani ɨshamwabho ahaga,
“Hu habhaazyo ɨho,
ʉwumwɨnɨ ʉwa hu mwanya wahayilɨngaana nanshi abhalɨndu ishʉmi,
bha bhaheejile ɨkolobooyi zyabho na‑abhale humʼmwambɨɨlɨle ʉmweji.
2 Abhalɨndu bhasaanu mwɨ‑ɨbho ishʉmi bhahali nʉ lutinu,
leelo abhamwabho bhasaanu bhahali bhafwasu.
3 Abhafwasu bhasaanu bhaala bhaheejile ɨkolobooyi zyabho sinta abhe nɨ nyemba ɨzyɨnjɨ ɨzya hwonjeezye.
4 Leelo abhɨ lutinu bhaala bhaheejile ɨkolobooyi zyabho peeka nɨ nyemba ɨzya hwonjeezye mu vyɨlɨɨlo vyabho.
5 Ɨshi,
ʉmweji lwa wakhaabha ahwɨnze,
abhalɨndu bhaala bhonti bhahanda asʉpɨɨle,
pamandɨ bhonti bhahagona ʉtulo.
6 Leelo lwa hwabha siku paahati,
ibwago lyʉmvwɨha lyahaga,
‘Enya,
ʉmweji ahwɨnza!
Fumaji hwʉnzɨ humʼmwambɨɨlɨle.’
7 Ɨpo abhalɨndu bhaala bhonti bhahadaamuha na huzilɨngaanye ɨkolobooyi zyabho.
8 Abhalɨndu abhafwasu bhaala bhahabhabhʉʉzya abhɨ lutinu bhahaga,
‘Tilaabha mutaavwe ɨnyemba nyishe,
pɨpo ɨkolobooyi zyetu zihwanda azime.’
9 Leelo abhɨ lutinu bhaala bhahabhaamula bhahaga,
‘Ndaadi!
Saga tibhajiiye hubhaavwe,
pɨpo ɨnyemba zya tili nazyo,
saga zigatikwɨla atɨ peeka naamwɨ.
Shinza aje mubhale hwa bhachuluuzi huje muhwikalile mwɨmwɨ.’
10 Ɨpo abhafwasu bhaala lwa bhasogola abhale akale ɨnyemba,
ʉmweji ahafiha.
Ɨshi abhɨ lutinu bhaala,
hu nongwa ya‑aje bhahali bhahwilɨngɨɨnye,
bhahatʉʉha mu nyumba ya mweji peeka nawo.
Ɨpo ʉlyango gwahagalilwa.
11 Pamandɨ abhafwasu bhaala bhahaweela,
bhahagwaga ʉlyango gugaliilwe.
Ɨpo bhahanda ahwiguzye na hunʼnambe huje,
‘Wee mwɨnɨ,
wee mwɨnɨ!
Tilaabha ʉtigulile!’
12 Leelo ʉmwene ahabhaamula ahaga,
‘Lyoli ɨhubhabhʉʉzya,
saga ɨmbamɨɨnye amwɨ!’ ”
13 Ɨpo ʉYeesu ahabhabhʉʉzya abhasundwe bhaakwe ahaga,
“Mubhanje maaso pɨpo saga mumɨɨnye isiku awe ɨsaala ɨyo anɨ nɨMwana wa Muntu nahayiweela.”
Ɨshifwani ɨsha bhakalwe bha bhapewiilwe ɨmpɨɨya
14 ɄYeesu ahajendeelela ayanje ahaga,
“Nantele,
ʉwumwɨnɨ ʉwa hu mwanya wahayilɨngaana nanshi ʉmuntu ʉyo ahashʉʉlɨle.
Ɨshi lwa‑asɨɨle ashʉʉle,
ahabhakwizya abhakalwe bhaakwe,
ahabhapeela ɨshʉʉma shaakwe aje shila muntu ashibhombele ɨmbombo.
15 Ahamʼpiiye shila nʼkalwe alɨngaane ni‑ikhone lyakwe.
Ahamʼpeela ʉnʼkalwe ʉwa hwande ɨtalanta zisaanu,
ʉwa bhɨɨlɨ ɨtalanta zibhɨɨlɨ nʉ wa taatu ɨtalanta yeeka.
a Ɨpo ʉmwene ahashʉʉla.
16 Lwʉnʉʉlwo,
ʉnʼkalwe ʉla wa‑ahambɨlɨɨye ɨtalanta zisaanu,
ahabhala achuluuzizye ɨtalanta ziila na huzyaje ɨzya pa mwanya zisaanu.
17 Shɨɨsho,
ʉnʼkalwe ʉla ʉyo ahambɨlɨɨye ɨtalanta zibhɨɨlɨ,
ahabhala nazyo achuluuzizye na huzyaje ɨzya pa mwanya zibhɨɨlɨ.
18 Leelo ʉnʼkalwe ʉla wa‑ahambɨlɨɨye ɨtalanta yeeka,
ahabhala,
ahabana iliina na‑azyɨshe ɨtalanta ɨyo.
19 Lwa haashila ahabhaazyo ahatali,
ʉmwɨnɨ waabho ahaweela ʉhwo ahashʉʉlɨle.
Ɨpo ahabhakwizya abhakalwe bhaakwe bhaala huje shila muntu amʼmʉʉzye sha‑ahabhombɨɨye ɨtalanta zyakwe.
20 Ʉnʼkalwe ʉla wa‑ahambɨlɨɨye ɨtalanta zisaanu,
ahɨnza nɨ talanta ɨzyɨnjɨ ɨzya pa mwanya zisaanu na humʼmʉʉzye ʉnʼgoosi waakwe huje,
‘Wee mwɨnɨ,
wahampiiye ɨtalanta zisaanu huje ɨnchuluuzizye.
Enya ɨnchuluziizye,
nazyaga ɨzyamwabho ɨzya pa mwanya zisaanu.’
21 Ʉmwɨnɨ waakwe ahamʼmʉʉzya ahaga,
‘Ʉbhombile shinza tee.
Aawe ʉli nʼkalwe mwinza,
nantele nʼnʉnjɨsu!
Wahali nʼnʉnjɨsu hu vintu ɨvidoodo vya nahaʼpiiye,
ɨshi ɨnza hubhɨɨshe ʉbhe mwɨmɨɨlɨli wɨ shʉʉma ɨshinji.
Ɨnzaga tiseshele peeka.’
22 Ʉnʼkalwe ʉla wa‑ahambɨlɨɨye ɨtalanta zibhɨɨlɨ,
wope ahɨnza nɨ talanta ɨzya pa mwanya zibhɨɨlɨ.
Ahamʼmʉʉzya ʉnʼgoosi waakwe ahaga,
‘Wee mwɨnɨ,
wahampiiye ɨtalanta zibhɨɨlɨ huje ɨnchuluuzizye.
Enya ɨnchuluziizye,
nazyaga ɨzyamwabho ɨzya pa mwanya zibhɨɨlɨ.’
23 Ʉmwɨnɨ waakwe ahamʼmʉʉzya ahaga,
‘Ʉbhombile shinza tee.
Aawe ʉli nʼkalwe mwinza,
nantele nʼnʉnjɨsu!
Wahali nʼnʉnjɨsu hu vintu ɨvidoodo vya nahaʼpiiye,
ɨshi ɨnza hubhɨɨshe ʉbhe mwɨmɨɨlɨli wɨ shʉʉma ɨshinji.
Ɨnzaga tiseshele peeka.’
24 Ɨpo ʉnʼkalwe ʉla ya‑ahambɨlɨɨye ɨtalanta yeeka,
ahɨnza na humʼmʉʉzye ʉnʼgoosi waakwe ahaga,
‘Wee mwɨnɨ,
nahamɨɨnye huje aawe ʉli nʼkhali tee.
Ʉvuna vya saga wahatotile,
nantele ʉhwega vya saga wahavibhɨɨshɨle.
25 Nahogʉʉpe huyiteezye ɨtalanta yaaho,
ɨshi nahabhalile huyizyɨshɨle mu longo.
Ɨshi,
ega ɨtalanta yaaho ɨnɨ.’
26 Ʉmwɨnɨ waakwe ahamʼmʉʉzya ahaga,
‘Aawe ʉli nʼkalwe mʼmiibhi,
nantele ʉli mwolo!
Nkashele wahamɨɨnye huje anɨ ɨvuna vya saga nahatotile,
nantele ɨhwega vya saga nahavibhɨɨshɨle,
27 ɨshi yeenu saga wahabhɨɨshɨle ɨtalanta yaanɨ hwa bhachuluuzi huje hu habhaazyo hɨ‑ɨweela naheegaje ɨtalanta yaanɨ peeka nɨ zya pa mwanya?’b
28 Ɨpo ʉnʼgoosi waakwe ahalajizya ahaga,
‘Mʼfyʉli ɨtalanta ɨyo,
mʼpeeli ʉnʼkalwe ʉyo ali nɨ talanta ishʉmi.’
29 Ʉmwɨnɨ ʉyo ahajendeelela ayanje ahaga,
‘Ɨhubhabhʉʉzya huje ʉmuntu wowonti wa‑ahushibhombela shinza sha‑ali nasho,
ahayonjelwa ɨvyamwabho.
Leelo wa saga ahushibhombela shinza shiila sha‑ali nasho,
hwope shiila sha‑ali nasho shahayifyʉlwa.
30 Ʉnʼkalwe ʉnʉ saga nʼgolosu,
munʼtaaje hwʉnzɨ hu hiisi,
ʉhwo ahayililaga na‑azyeguzye amiino hu nongwa yɨ mavune amakhali.’ ”
Ʉlongwe ʉlwa hu malishilo
31 ɄYeesu ahajendeelela hubhabhʉʉzye abhasundwe bhaakwe ahaga,
“Hu habhaazyo anɨ nɨMwana wa Muntu lwa nahayɨnza mu mwamu waanɨ peeka na bhantumi bhonti,
ɨpo nahayikhala pi‑itengo lyanɨ ɨlyɨ mwamu.
32 Abhantu abhɨ nsi zyonti bhahayibhʉngaana pitagaalila lyanɨ,
nanɨ nahayibagulanya abhantu nanshi shiila ʉnʼdiimi sha‑abaagula ɨngoole nɨ mbuzi.
33 Ɨngoole nahayihuzibhɨɨha hu nʼkhono gwanɨ ʉgwa hu lɨɨlo nɨ mbuzi hu nʼkhono gwanɨ ʉgwa hu mongo.
34 Ɨpo anɨ nɨMwɨnɨ nahayihubhabhʉʉzya bhaala bha bhali hu nʼkhono gwanɨ ʉgwa hu lɨɨlo huje,
‘Ɨnzaji amwɨ mwa musayiiwe nʉ Yise waanɨ.
Tʉʉshi mu wumwɨnɨ ʉwo ʉNgʉlʉbhɨ awulɨngɨɨnye hu nongwa yeenyu afume lwa yahapelwaga ɨnsi.
35 Ɨnjanjile ɨsho,
pɨpo lwa nahali nɨ nzala mwahampiiye ɨshalye.
Lwa nahali nɨ nyoota mwahampiiye amɨnzɨ,
nantele lwa nahali nʼjenu mwahanambɨlɨɨye mu nyumba zyenyu.
36 Lwa nahali weleele,
mwahankwatizya amenda.
Lwa nahali mʼminu awe lwa nahakʉngwɨlwe mu hoobhe,
mwahɨnza huneenye.’
37 Ɨpo abhantu bhaala abhagolosu bhahaamula bhahaga,
‘Wee Mwɨnɨ,
habhaazyo wɨlɨ ɨho tahaʼlolile ʉli nɨ nzala natɨ tahaʼpiiye ɨshalye,
awe habhaazyo wɨlɨ ɨho wahali nɨ nyoota natɨ tahaʼpiiye amɨnzɨ?
38 Nantele,
habhaazyo wɨlɨ ɨho wahali nʼjenu,
natɨ tahahwambɨlɨɨye mu nyumba zyetu?
Awe habhaazyo wɨlɨ tahaʼlolile ʉli weleele,
natɨ tahaʼkwatizya amenda?
39 Habhaazyo wɨlɨ tahaʼlolile ʉli mʼminu awe ʉkʉngwɨlwe mu hoobhe natɨ tahɨnza huhwenye?’
40 Ɨpo anɨ nɨMwɨnɨ nahayihubhabhʉʉzya aje,
‘Lyoli,
lyolyonti ɨlyo mwahamʼmombɨɨye wa saga akhondɨɨye ʉmo mu bhantu bhaanɨ ɨbha,
ɨpo mwahambombɨɨye nɨɨnɨ.’
41 Ɨpo nahayihubhabhʉʉzya ɨbho bhali ɨmbali yaanɨ ɨyɨ nʼkhono ʉmʼmongo huje,
‘Epi ɨpa,
amwɨ mwa musaliilwe nʉ Ngʉlʉbhɨ!
Mubhale hu mwoto ʉgwa wiila ʉgwo ʉNgʉlʉbhɨ amʼmɨshɨɨye nzɨɨla ʉSeetano na bhantumi bhaakwe.
42 Ɨnjanjile ɨsho,
pɨpo lwa nahali nɨ nzala,
saga mwahampiiye ɨshalye.
Lwa nahali nɨ nyoota,
saga mwahampiiye amɨnzɨ aga‑amwele.
43 Lwa nahali nʼjenu,
saga mwahanambɨlɨɨye mu khaaya zyenyu.
Lwa nahali weleele,
saga mwahankwatiziizye amenda.
Nantele lwa nahali mʼminu awe lwa nahakʉngwɨlwe mu hoobhe,
saga mwahɨnzɨle huneenye.’
44 Bhope bha bhali ɨmbali yɨ nʼkhono gwanɨ ʉmʼmongo bhahaamula bhahaga,
‘Wee Mwɨnɨ,
habhaazyo wɨlɨ lwa wahali nɨ nzala,
awe ɨnyoota yɨ mɨnzɨ,
awe wahali nʼjenu,
awe wahali weleele,
awe wahali mʼminu,
awe wahali mu hoobhe,
saga tahahwavwa?’
45 Nanɨ nahayihubhaamula huje,
‘Lyoli ɨhubhabhʉʉzya,
shila lwa mwahakhɨɨne humʼmwavwe wa saga akhondɨɨye ʉmo mu bhantu bhaanɨ ɨbha,
saga mwahanavwizye nɨɨnɨ.’
46 Ɨpo abhabhomba mbiibhi bhaala bhahayisogola na‑abhale mu malabha aga wiila,
leelo abhagolosu bhahayitʉʉha hu wʉʉmi ʉwa wiila.”