Mataayo 26

Ɨnsɨɨbho ɨzya hunʼgoje ʉYeesu

(Maalʉko 14:1-2; Luuka 22:1-2; Yoohani 11:45-53)

ɄYeesu lwa waamala ayanje amazwi ɨgo gonti, ahabhabhʉʉzya abhasundwe bhaakwe ahaga, 2 “Nanshi sha mumɨɨnye, zisyalile ɨnsiku zibhɨɨlɨ lwene huje shibhe shikulukulu shɨ Paasaka. Anɨ nɨMwana wa Muntu ɨnza‑asambushilwe na‑abhɨɨhwe mu nyoobhe zya bhalʉgʉ huje ɨngogwe pa shikhobheehanyo.”

3 Hu habhaazyo ɨho, abhalongozi bha bhasayi bha Ngʉlʉbhɨ na bhagoosi bha Bhayahuudi bhahabhʉngɨɨne mu nyumba ɨngoosi ɨya nʼsayi ʉnʼgoosi wa Ngʉlʉbhɨ ʉyo itaawa lyakwe ahali yʉ Kayaafa. 4 Bhahajeehana hunʼkhate ʉYeesu hu mfiso huje bhanʼgoje. 5 Ɨshi, bhahajeehana bhahaga, “Tisahabhombe ɨga pi‑isiku ɨlyɨ shikulukulu ɨshɨ Paasaka huje abhantu bhasahaleete ʉlwese.”

Ʉnʼshɨ ʉmo ahumʼpotozya ʉYeesu ɨnyemba

(Maalʉko 14:3-9; Yoohani 12:1-8)

6 Pamandɨ ʉYeesu ahabhala hu shipanga ɨshɨ Besaniya, mu nyumba ɨya Siimoni, ʉyo hu wandilo ahali nɨ mpʉngo ɨyɨ makete. 7 Ɨpo ʉYeesu lwa‑ali alye pa meeza, ahɨnza ʉnʼshɨ ʉmo hwa mwene nɨ nyemba zya zinunshila shinza. Ɨnyemba ɨzyo zyahali zyɨ mpɨɨya ɨngoosi tee. Ahamʼpotozya ʉYeesu pi‑itwe abhonesye ɨtogo. Ɨnyemba ɨzyo zyahali mu hasupa ha hagombwilwe hwi‑iwe ɨlyo lyahali nɨ nshɨnshɨ. 8 Abhasundwe bhaakwe lwa bhagalola ɨgo, bhahaviitwa tee mu mooyo gaabho bhahaga, “Yeenu ʉnʼshɨ ʉnʉ anangaanya ɨnyemba ɨzi? 9 Ɨnyemba ɨzi zyahakhondɨɨye akaziwe ɨmpɨɨya ɨnyinji tee na hubhapeele abhapɨɨna!” 10 ɄYeesu ahamanya ɨgo bhasɨɨbha, ahabhabhʉʉzya ahaga, “Yeenu muhunʼtaamya ʉnʼshɨ ʉnʉ? Ʉmwene ambombɨɨye ga gali minza tee. 11 Ɨnsiku zyonti muli nabho abhapɨɨna, leelo anɨ saga nahayibha peeka naamwɨ hu habhaazyo honti. 12 Ʉnʼshɨ ʉnʉ ampotoziizye ɨnyemba ɨzi mu mʼbɨlɨ gwanɨ huje andɨngaanye pi‑isiku ɨlya‑asyɨlwe hwanɨ. 13 Lyoli ɨhubhabhʉʉzya huje mu nsi zyonti, poponti abhantu pa bhahayilʉmbɨlɨlaga ɨNongwa ɨNyinza ɨzya huliinɨ, bhahayiyangaga ɨli lya‑abhombile ʉnʼshɨ ʉnʉ, ahumʼmwizushe.”

ɄYuuda Sikalyoti ahwɨtɨha hunʼsambushile ʉYeesu

(Maalʉko 14:10-11; Luuka 22:3-6)

14 Ɨshi ʉYuuda Sikalyoti, ʉmo mwa bhasundwe bha Yeesu ishʉmi na bhabhɨɨlɨ, ahabhalile hwa bhalongozi bha bhasayi bha Ngʉlʉbhɨ, 15 ahabhabhʉʉzya ahaga, “Munza humpeele yeenu, nkashele nabhalolesya ʉYeesu?” Ɨpo bhahamʼpeela ɨmpɨɨya amashʉmi gataatu. 16 Ahwande ahabhaazyo ɨho lwa bhamʼpeela ʉYuuda, nka‑ahanda ahwanze idala ɨlinza ɨlya hunʼsambushile ʉYeesu.

ɄYeesu alya ɨshalye ɨshɨ Paasaka na bhasundwe bhaakwe

(Maalʉko 14:12-21; Luuka 22:7-14, 21-23; Yoohani 13:21-30)

17 Isiku ɨlya hwande ɨlyɨ shikulukulu ɨshɨ ntogito zya saga nsafu, abhasundwe bha Yeesu bhahɨnza hwa mwene, bhahamʼmʉzɨɨlɨzya bhahaga, “Ɨshi, ʉhwanza aje tibhale tiʼlɨnganyizizye pooshi apa‑alɨɨle ɨshalye ɨshɨ shikulukulu ɨshɨ Paasaka?” 18 ɄYeesu ahabhaamula ahaga, “Bhalaji mwi‑ibooma ɨlyɨ Yelusaleemu hwa muntu ʉmo, mumʼmʉʉzye huje, ‘ɄMʼmanyizyi ayiga, “Ahabhaazyo haanɨ hapalamiiye. Anɨ na bhasundwe bhaanɨ tɨnza‑alye ɨshalye ɨshɨ Paasaka mu nyumba yaaho.” ’ ” 19 Abhasundwe bhaala bhahabhomba gonti nanshi ɨsho ʉYeesu sha‑ahabhalajiziizye, bhahalɨngaanya ɨshalye ɨshɨ Paasaka.

20 Lwa hwabha lyabheela, ʉYeesu na bhasundwe bhaakwe ishʉmi na bhabhɨɨlɨ bhakhɨɨye alye ɨshalye. 21 Lwa bhali alye, ʉYeesu ahabhabhʉʉzya ahaga, “Lyoli ɨhubhabhʉʉzya huje ʉmo mwaliimwɨ ahayihunsambushila hu bhalʉgʉ.” 22 Abhasundwe bhaakwe bhahanda azugumile. Ahanda weeka weeka humʼmʉzɨɨlɨzye ʉYeesu huje, “Wee Mwɨnɨ, wɨlɨ nɨɨnɨ ɨmbala husambushile?” 23 ɄYeesu ahabhabhʉʉzya ahaga, “Ʉla wa‑atobheezya peeka naanɨ mu masʉnyu, ʉyo wa‑anza hunsambushile. 24 Anɨ nɨMwana wa Muntu ɨmbala‑afwe, shiila ɨNsimbo ɨMfinjile sha ziyanga. Leelo lwakwe ʉmuntu ʉyo wa‑abhala hunsambushile anɨ nɨMwana wa Muntu! Yahali hwashi huje ʉmuntu ʉyo nkashele saga wapapwaga lwonti.” 25 ɄYuuda wa‑ahali ahwanza hunʼsambushile, wope ahamʼmʉʉzya ahaga, “Wee Mʼmanyizyi, wɨlɨ nɨɨnɨ?” ɄYeesu ahamʼmwamula ahaga, “Weewe wayanga.”

ƗShalye ɨShifinjile

(Maalʉko 14:22-26; Luuka 22:14-20; 1 aBhakolinto 11:23-25)

26 Lwa bhali alye, ʉYeesu aheega ɨntogito, ahanʼsalifya ʉNgʉlʉbhɨ, ahayimensulanya, ahabhapeela abhasundwe bhaakwe, ahaga, “Eji, mulye, ʉgu gwʉ mʼbɨlɨ gwanɨ.” 27 Nantele, aheega ʉlupɨndɨ ʉlwɨ divaayi, ahasalifya hwa Ngʉlʉbhɨ, ahabhapeela abhasundwe bhaakwe, ahaga, “Eji, mumwele mwenti. 28 Ɨli lidanda lyanɨ lya lihwitiha hu nongwa ya bhantu abhinji, ɨlyo lisimishizya ilagano lya Ngʉlʉbhɨ na bhantu bhaakwe, huje ʉNgʉlʉbhɨ abhakhobhoshele ɨmbiibhi zyabho. 29 Ɨhubhabhʉʉzya huje, afume sanyʉʉnʉ saga ɨmbala‑amwele lwonti ɨdivaayi, afishe pi‑isiku liila lya nahayimwela ɨdivaayi ɨmpya peeka naamwɨ mu wumwɨnɨ ʉwa Yise waanɨ.”

30 Ɨpo bhahateela. Lwa bhaamala ateele, bhahasogola, bhahabhala hwi‑igamba ɨlyɨ Mizeyituuni.

ɄYeesu akuwa huje, ʉPeeteli abhala hunʼkhaane hataatu

(Maalʉko 14:27-31; Luuka 22:31-34; Yoohani 13:36-38)

31 Ɨpo ʉYeesu ahabhabhʉʉzya abhasundwe bhaakwe ahaga, “Ʉsiku ʉwɨ sanyʉʉnʉ, amwɨ mwenti munza hunshɨmbɨle na hundeshe hu nongwa ya huje ɨsimbwilwe mu Nsimbo ɨMfinjile huje, ‘Nahayihunʼgoga ʉnʼdiimi, yope ɨmpʉga yɨ ngoole yahayinyampaana.’ 32 Leelo, lwa nazyʉha, nahayihubhatagaalila abhale hu mukowa ʉgwɨ Galilaaya.” 33 Ɨpo ʉPeeteli ahamʼmʉʉzya ʉYeesu ahaga, “Hwope nkashele abhamwetu bhonti bhaʼshɨmbɨle, anɨ saga ɨnza huleshe nalumo!” 34 ɄYeesu ahamʼmʉʉzya ahaga, “Lyoli ɨhubhʉʉzya ɨnjiga, ʉsiku ʉwa sanyʉʉnʉ, ɨhanda shɨ‑ɨsɨɨle agʉgʉlɨɨje, ʉnza‑abhe wahaana anɨ hataatu huje saga ʉmɨɨnye anɨ.” 35 ɄPeeteli ahamʼmwamula ahaga, “Hwope nkashele ɨhwanziwa huje ɨmfwe peeka naawe, saga ɨmbala hukhaane dumu!” Bhope abhasundwe bhonti abhamwabho bhahayanga shɨɨsho.

ɄYeesu apuuta mu Getisemaani

(Maalʉko 14:32-42; Luuka 22:39-46)

36 Ɨpo ʉYeesu ahabhala peeka na bhasundwe bhaakwe hwi‑itotoobhe lya bhahagaga Getisemaani, ahabhabhʉʉzya ahaga, “Mukhale pɨɨpa nasʉʉti, anɨ ɨmbala pitagaalila paala humʼpuute ʉNgʉlʉbhɨ.” 37 Ahamʼmwega ʉPeeteli peeka na bhaana bhabhɨɨlɨ abha Zebedaayo, ahanda azugumile na hweleele tee mu mwoyo gwakwe. 38 Ɨpo ahabhabhʉʉzya huje, “Ʉmwoyo gwanɨ guzugumiiye apululile afwe. Amwɨ mukhale pɨɨpa, mubhe maaso peeka naanɨ.”

39 Ahazʉmbɨɨla pitagaalila hashe, ahagwa kupama huje apuute, ahaga, “Wee Daada waanɨ, nkashele ʉgɨɨne, ɨhulaabha ʉnefwezye ʉlupɨndɨ ʉlwu ʉlwɨ malabha amagoosi! Leelo zigandi abhombeshe ziila anɨ zyɨ‑ɨhwanza lwonti, lyoli zibhombeshe ziila aawe zyʉ‑ʉhwanza.” 40 Ɨpo ahaweela hwa bhasundwe bhaakwe bhataatu bhaala, ahabhaaga bhagonile ʉtulo. Ahamʼmʉʉzya ʉPeeteli huje, “Mwapootwa abhe maaso peeka naanɨ nkamba lisaala lyeka lwene?” 41 Ɨpo ahabhabhʉʉzya huje, “Mubhanje maaso na‑apuute huje mugandi amenwe nɨ njelo. Amooyo geenyu gasʉngwa abhombe shinza, leelo saga muli na maha.”

42 ɄYeesu ahabhala nantele ʉlwa bhɨɨlɨ apuute ahaga, “Wee Daada waanɨ, nkashele ɨpotehɨɨne amayɨmba ɨga ahwefwe huliinɨ, zyʉ‑ʉgɨɨne zibhombeshe.” 43 Lwa‑aweela ʉlwa bhɨɨlɨ, ahabhaaga abhasundwe bhaakwe bhagonile ʉtulo nantele, pɨpo bhahakhɨɨtwe nʉ tulo tee. 44 ɄYeesu ahabhaleha nantele, ahabhala apuute ʉlwa taatu, ahayanga amazwi gagaala. 45 Nantele ahaweela hwa bhasundwe bhaakwe, ahabhabhʉʉzya ahaga, “Wɨlɨ, muli sha mugonile ʉtulo na‑atʉʉye? Enyaaji! Ahabhaazyo hafishile ɨho anɨ nɨMwana wa Muntu ɨnza‑akhatwe na‑abhɨɨhwe mu makhono ga bhabhomba mbiibhi. 46 Ɨshi bhʉʉshi, saali! Enya, ʉmuntu ʉyo anza humbɨɨshe mu makhono ga bhalʉgʉ ali mu pɨɨpɨ, ahwɨnza.”

ɄYeesu akhatwa

(Maalʉko 14:43-50; Luuka 22:47-53; Yoohani 18:3-11)

47 ɄYeesu lwa‑ali sha‑ayanga, ʉYuuda, ʉmo mwa bhasundwe bhaakwe ishʉmi na bhabhɨɨlɨ, ahafiha nɨ mpʉga ɨngoosi ɨya bhantu bha bhakhɨɨte amamaajɨ agɨ lʉgʉ nɨ nduugu mu nyoobhe. Abhantu ɨbho bhahafumile hwa bhalongozi bha bhasayi bha Ngʉlʉbhɨ, abhamanyizyi abhɨ ndajizyo zya Moose na bhagoosi. 48 ɄYuuda wa‑ahunʼsambushila, ahabhapeelile nzɨɨla ɨshimanyishizyo huje, “Ʉla wa nahayihunʼnyaayila, manyaji huje ya yʉʉyo, mwahɨnzaje hunʼkhate.” 49 Ɨpo ʉYuuda ahabhala hwa Yeesu, ahamʼmʉʉzya ahaga, “Wee Mʼmanyizyi, mwalɨnda!” Ɨpo ahanʼnyaayila. 50 ɄYeesu ahamʼmʉʉzya ahaga, “Wee mʼmanyani, ʉbhombe lyʉ‑ʉyɨnzɨɨye abhombe.” Ɨpo abhantu bhaala bhahanʼkhata ʉYeesu na humʼpinye. 51 Ɨshi ʉmo mwa bhaala bha bhahali peeka nʉ Yeesu, ahakʉʉla nalinaali imaajɨ ɨlyɨ lʉgʉ, ahanʼkhoma na hunʼdumule ikutu ʉnʼkalwe wa nʼsayi ʉnʼgoosi ʉwa Ngʉlʉbhɨ. 52 Ɨpo ʉYeesu ahamʼmʉʉzya ahaga, “Weezya imaajɨ lyaho mu nyambɨ yaakwe, pɨpo abhantu bhonti ɨbho bhakhata amamaajɨ huje bhabhabude abhanjɨ bhope bhahayibudwa na mamaajɨ! 53 Wɨlɨ, saga mumɨɨnye huje ɨmbajiiye alaabhe hwa Daada waanɨ huje anaavwe? Wope abhajiiye hundeetele abhantumi bhaakwe ashile ɨvipʉga ishʉmi na vibhɨɨlɨ. 54 Wɨlɨ, nkashele nabhomba ɨsho, ɨshi gabhajiiye abhombeshe ɨgo gasimbwilwe mu Nsimbo ɨMfinjile huje, sha shɨɨsho gahwanziwa afumile?”

55 Ɨpo ʉYeesu ahabhabhʉʉzya abhantu bhaala ahaga, “Yeenu mwɨnzɨle na mamaajɨ nɨ nduugu, nanshi abhantu bha bhabhala hunʼkhate ʉmuntu wa‑ali nʼkoonya? Wiila tahabhanga peeka mu lubhaga lwɨ nyumba ɨmfinjile ɨya Ngʉlʉbhɨ, leelo saga mwahahataga! 56 Leelo, ɨzi zyonti zyabhombeha nanshi sha zisimbwilwe na bhakuwi mu Nsimbo ɨMfinjile huje zibhombeshe.” Ɨpo abhasundwe bhaakwe bhonti bhahanʼneha, bhahashɨmbɨla.

Abhalongozi bha Bhayahuudi bhahunʼtaaka ʉYeesu

(Maalʉko 14:53-65; Luuka 22:54-55, 63-71; Yoohani 18:13-14, 19-24)

57 Ɨpo abhantu bhaala bha bhahanʼkhɨɨte, bhahanʼtwala ʉYeesu hwa Kayaafa, ʉnʼsayi ʉnʼgoosi ʉwa Ngʉlʉbhɨ. Ʉhwo bhahabhʉngaana abhamanyizyi abhɨ ndajizyo zya Moose na bhagoosi bha Bhayahuudi. 58 ɄPeeteli ahabha ahumʼmɨnjɨɨlɨzya ʉYeesu sha hutali afishe pa lubhʉngʉlʉ lwɨ nyumba ɨya nʼsayi ʉnʼgoosi. Ahatʉʉha muuhati, ahakhala peeka na bhakolokolooni huje alole ɨsho ɨnongwa ya Yeesu shɨ‑ɨmalishila.

59 Abhalongozi bha bhasayi bha Ngʉlʉbhɨ ni‑ikoloti lyonti bhahanda ahwanze ʉsimishizi ʉwi‑ilenga, huje bhalyaje idala ɨlya hunʼgoje ʉYeesu. 60 Leelo saga bhahawaagaga ʉsimishizi wowonti, poshe bhahɨnzɨle abhasimishizi abhinji abhi‑ilenga. Hu malishilo bhahɨnza abhasimishizi bhabhɨɨlɨ, 61 bhahayanga bhahaga, “Ʉmuntu ʉnʉ ahajile, ‘Ɨmbajiiye huyibhugule ɨnyumba ɨmfinjile ɨya Ngʉlʉbhɨ na huyizenje nantele hu nsiku zitaatu.’ ”

62 Ɨpo ʉnʼsayi ʉnʼgoosi ahɨmɨɨlɨla pitagaalila pi‑ikoloti. Ahamʼmʉzɨɨlɨzya ʉYeesu ahaga, “Wɨlɨ, saga ʉhwamula nka limo? Wɨlɨ, saga ʉlola huje abhantu bhonti ɨbha bhafumya ʉsimishizi ʉwa hutaake aawe?” 63 Leelo ʉYeesu ahapʉʉma myɨ! Ɨpo ʉnʼsayi ʉnʼgoosi ahonjela ahamʼmʉʉzya ahaga, “Ɨhubhʉʉzya, lapa hwi‑itaawa lya Ngʉlʉbhɨ wa‑ali mwʉmi, tibhʉʉzye nkashele aawe we Mʼfyʉli, ʉMwana wa Ngʉlʉbhɨ.” 64 ɄYeesu ahamʼmʉʉzya ahaga, “Aawe wayanga. Leelo ɨhubhabhʉʉzya bhonti huje, ahwande sanyʉʉnʉ mwahayihundola anɨ nɨMwana wa Muntu ɨhɨɨye peeka nʉ Ngʉlʉbhɨ ʉwi‑ikhone lyonti. Nantele mwahayihundola lwɨ‑ɨhwɨnza mu mabhɨngo afume hu mwanya.” 65 Ɨpo ʉnʼsayi ʉnʼgoosi lwa wʉmvwa ɨnongwa ɨzyo ahazembula igolole lyakwe alolesye huje avitiilwe, ahaga, “Tihubhanza bhaashi abhasimishizi nantele? Mwʉmvwɨzye mwɨmwɨ sha‑ahunʼshenta ʉNgʉlʉbhɨ! 66 Ɨshi amwɨ muyiga wɨlɨ?” Bhahamʼmwamula bhahaga, “Akhondɨɨye afwe!”

67 Ɨpo bhahanda hunʼswɨle amatɨ ʉYeesu hu maaso, bhahanʼkhoma nɨ mbuli. Bhamo bhahanʼkhoma na makofi, 68 na humʼmʉʉzye huje, “Wee Mʼfyʉli, kuwa, weenu wa waʼkhoma?”

ɄPeeteli ahunʼkhaana ʉYeesu

(Maalʉko 14:66-72; Luuka 22:56-62; Yoohani 18:15-18, 25-27)

69 Mu habhaazyo ɨho honti, ʉPeeteli ahali pa lubhʉngʉlʉ paala. Ɨpo ahɨnza ʉnʼkalwe ʉmo ʉnʼnɨndu ʉwa nʼsayi ʉnʼgoosi ʉwa Ngʉlʉbhɨ, ahamʼmʉʉzya ahaga, “Nawe wahali peeka nʉ Yeesu ʉwa hu Galilaaya.” 70 ɄPeeteli ahakhaana pitagaalila lya bhaala bhonti ahaga, “Saga ɨmɨɨnye zyʉ‑ʉyanga!”

71 Ɨpo aheepa paala, ahabhala hwʉnzɨ yɨ lubhʉngʉlʉ. Ʉnʼkalwe ʉwɨnjɨ ʉnʼnɨndu ahanʼnola, ahabhabhʉʉzya abhantu bha bhahali paala ahaga, “Ʉmuntu ʉnʉ ahali peeka nʉ Yeesu ʉwa hu Nazaleeti.” 72 ɄPeeteli ahakhaana nantele hu ndapo ahaga, “Saga ɨmʼmɨɨnye ʉmuntu ʉyo!”

73 Lwa haashila ahabhaazyo hashe, abhantu bha bhahali paala bhahamʼmalila ʉPeeteli, bhahamʼmʉʉzya bhahaga, “Lyoli aawe ʉli peeka nabho, pɨpo ayanje hwaho hulolesya huje nawe ʉfuma hu mukowa ʉgwɨ Galilaaya!” 74 Leelo ʉmwene ʉPeeteli ahahwiguna na‑alape huje, “Saga ɨmʼmɨɨnye ʉmuntu ʉyo!” Pɨnɨɨpo ɨhanda yahagʉgʉlɨɨga.

75 Ɨpo ʉPeeteli ahiizuha izwi lya Yeesu lya‑ahamʼmʉzɨɨzye huje, “Ahabhaazyo ɨhanda shɨ‑ɨsɨɨle agʉgʉlɨɨje, ʉnza‑abhe wahaana hataatu.” Ɨpo ʉPeeteli ahafuma hwʉnzɨ, ahalila tee hu zugumizu.