11
Ɨshi mubhanje mulondolezya ɨshifwani shaanɨ,
nanshi ɨsho nanɨ ɨlondolezya ɨshifwani ɨsha Kilisiti.
Ʉzingatizu ʉwa‑apuute
2 Ɨhubhasʉmba,
pɨpo muniizuha hu gonti,
na‑akhate ɨmanyizyo ɨzyo nahabhamanyiziizye.
3 Leelo ɨshi ɨhwanza mumanye huje itwea lya nʼnume wowonti ʉmwoziwa yʉ Kilisiti,
itwe lya nʼshɨ yʉ nʼnume waakwe,
lyope itwe lya Kilisiti yʉ Ngʉlʉbhɨ.
4 Ɨshi,
ʉnʼnume wowonti ʉmwoziwa ʉyo ahwikwinshila itwe hu habhaazyo ɨho apuuta,
awe hu habhaazyo ɨho akuwa ɨnongwa afume hwa Ngʉlʉbhɨ,
ʉyo ahumʼpeela nsoni ʉKilisiti ʉyo litwe lyakwe.
5 Wope ʉnʼshɨ ʉmwoziwa ʉyo saga ahwikwinshila itwe hu habhaazyo ɨho apuuta,
awe hu habhaazyo ɨho akuwa,
ʉyo ahumʼpeela nsoni ʉnʼnume ʉyo wa‑ali litwe lyakwe.
Ɨbha ɨsho,
pɨpo abha nanshi ʉnʼshɨ ʉyo asyenguuye ʉlupʉyʉ.b
6 Nkashele ʉnʼshɨ saga ahwikwinshila itwe,
ɨhwanziwa asyengule isisi lyakwe.
Leelo nsoni hwa nʼshɨ asyengule isisi,
ɨshi,
hwashi ahwikwinshile itwe lyakwe.
7 Saga ɨhwanziwa ʉnʼnume ahwikwinshile itwe,
pɨpo ʉmwene shifwani sha Ngʉlʉbhɨ,
nantele alolesya ʉmwamu wa Ngʉlʉbhɨ.
Leelo ʉnʼshɨ alolesya ʉmwamu wa nʼnume.
8 Ɨyanga ɨsho,
pɨpo ʉNgʉlʉbhɨ saga ahamʼpelile ʉnʼnume afume hwa nʼshɨ,
lyoli ahamʼpelile ʉnʼshɨ afume hwa nʼnume.
9 Nantele,
ʉNgʉlʉbhɨ saga ahamʼpelile ʉnʼnume hu nongwa ya nʼshɨ,
lyoli ahamʼpelile ʉnʼshɨ hu nongwa ya nʼnume.
10 Hu nongwa yɨ‑ɨlyo,
nantele hu nongwa ya bhantumi,
ʉnʼshɨ akhondɨɨye ahwikwinshile itwe abhonesye huje ahunʼtiniha ʉnʼnume waakwe.
11 Leelo pitagaalila lya Mwɨnɨ ʉYeesu,
ʉnʼshɨ ahunʼsʉʉbhɨla ʉnʼnume,
wope ʉnʼnume ahunʼsʉʉbhɨla ʉnʼshɨ.
12 Ɨnjanjile ɨsho,
pɨpo nanshi ɨsho ʉnʼshɨ ahapeliilwe afume hwa nʼnume,
wope ʉnʼnume apaapwa nʉ nʼshɨ,
leelo bhonti bhafuma hwa Ngʉlʉbhɨ ʉyo ahapelile ɨvintu vyonti.
13 Ɨshi,
amuli mwɨmwɨ,
wɨlɨ,
ɨkhondɨɨye ʉnʼshɨ apuute hwa Ngʉlʉbhɨ sinta ahwikwinshile itwe?
14 Enya,
hwope amiiho geenyu galolesya huje ʉnʼnume abhe ni‑isisi itali nsoni hwa mwene!
15 Leelo ʉnʼshɨ abhe ni‑isisi itali nshɨnshɨ hwa mwene,
c hu nongwa ya‑aje apewiilwe isisi itali huje libhe nkati menda aga‑akwinshile itwe.
16 Leelo nkashele ʉmuntu wowonti ahwanza adalishe hu nongwa ɨzyo,
amanye huje atɨ saga tili na miiho aganjɨ ashile ɨgo,
vyope ɨvibhanza ɨvya Ngʉlʉbhɨ saga vili na miiho aganjɨ.
Ɨnsundo hu nongwa yɨ zingatizu ʉwɨ Shalye ɨShifinjile
17 Ɨshi,
ɨndi nago aganjɨ aga‑alajizye.
Mwɨ‑ɨga saga ɨhubhasʉmba,
pɨpo lwa mubhʉngaana saga mubhomba ga gali nɨ zya pa mwanya,
lyoli mubhomba ga saga gali nɨ zya pa mwanya.
18 Ɨnʉmvwɨzye huje hu habhaazyo ɨho mubhʉngaana nanshi ɨmpʉga ɨya bhooziwa saga muhwʉmvwana.
Mwɨ‑ɨgo ɨnʉmvwɨzye gamo ɨhwɨtɨha.
19 Alegane ʉhwo huhwanziwa afumile muuhati yeenyu,
huje ɨbho bhɨtɨshɨlɨɨlwe pitagaalila lya Ngʉlʉbhɨ bhamanyiishe.
20 Enya,
hu habhaazyo ha mubhʉngaana,
mulya ɨShalye ɨShifinjile ɨsho saga ɨhwanziwa,
21 pɨpo shila muntu alya ɨshalye shaakwe sinta hubhagʉʉle abhanjɨ.
Ɨlyo lihubhabhɨɨha abhanjɨ huje bhabhe nɨ nzala,
bhamo bhakholwe.
22 Wɨlɨ,
nazimo ɨnyumba ʉhwo mubhajiiye akhale huje mulye na‑amwele?
Yeenu muhushisyonshela ɨshibhanza ɨsha Ngʉlʉbhɨ na hubhakenyensye bha saga bhali na hantu?
Ɨmbabhʉʉzye yeenu?
Ɨmbasʉmbe?
Ndaadi!
Mwɨ‑ɨli saga ɨhubhasʉmba.
23 Ɨnjanjile ɨsho,
pɨpo anɨ nahambɨlɨɨye hwa Mwɨnɨ ʉYeesu ɨmanyizyo ɨzyo nahabhaleshɨɨye amwɨ,
huje ʉMwɨnɨ ʉYeesu ʉsiku wuula ʉwo bhahanʼsambushiiye,
aheega ɨntogito,
24 ahanʼsalifya ʉNgʉlʉbhɨ,
ahayimensulanya,
ahabhapeela abhasundwe bhaakwe,
ahaga,
“Ʉgu gwʉ mʼbɨlɨ gwanɨ gwa gufumiziwa hu nongwa yeenyu.
Mubhombaje ɨshi shila lwa mulya,
huniizushe anɨ.”
25 ɄYeesu lwa waalya,
ahabhomba shishiila nantele,
aheega ʉlupɨndɨ ʉlwɨ divaayi,
d ahaga,
“Ʉlupɨndɨ ʉlwu lilaganoe lipya,
ɨlyo ʉNgʉlʉbhɨ abhala‑abhombe hwi‑idala ɨli‑idanda lyanɨ.
Mubhombaje ɨsho shila lwa mumwela na huniizushe.”
26 Ɨshi,
hu habhaazyo ha mulya ɨntogito ɨyo na‑amwelele ʉlupɨndɨ ʉlwo,
mulʉmbɨɨlɨla afwe hwa Mwɨnɨ ʉYeesu afishe lwa wɨnza nantele.
27 Ʉmuntu wowonti ʉyo alya ɨntogito ɨyo awe amwelele ʉlupɨndɨ ʉlwo ɨsho saga ɨhwanziwa,
anza‑abhe abhombile mbiibhi,
pɨpo asʉfwɨnye ʉmʼbɨlɨ ni‑idanda lya Mwɨnɨ ʉYeesu.
28 Ɨshi,
shila muntu ahwibhʉzɨɨlɨzye yʉʉyo nka‑ayande alye ɨntogito na‑amwelele ʉlupɨndɨ.
29 Ɨnjanjile ɨsho,
pɨpo nkashele ʉmuntu alya ɨntogito na‑amwelele ʉlupɨndɨ sinta amanye ʉlwʉmvwano lwakwe nʉ mʼbɨlɨ gwa Mwɨnɨ ʉYeesu,
ʉyo ahwibhɨɨha yʉʉyo mu longwe ʉlwa Ngʉlʉbhɨ.
30 Sha shɨɨsho bhalɨɨho abhinji paahati yeenyu ɨbho bhoonywa,
bhamo bhabhinu,
nantele bhamo bhafwiye.
31 Leelo nkashele tihwibhʉzɨlɨzɨɨzye tɨɨtɨ lwa tisɨɨle alye,
ʉNgʉlʉbhɨ handɨ atilonjile.
32 Leelo lwa tilongwa nʉ Mwɨnɨ,
ɨpo tisundwa huje tigandi alongwe nanshi ɨsho bhahayilongwa abhantu ɨbho saga bhamʼmɨɨnye ʉNgʉlʉbhɨ.
33 Ɨshi,
amwɨ mubhooziwa mubhamwetu,
hu habhaazyo lwa mubhʉngaana alye,
mugʉlanaje.
34 Nkashele ʉmuntu ali nɨ nzala,
abhanje aliiye hu khaaya yaakwe huje abhʉngaane hwenyu hugandi hubhabhɨɨshe aje mulongwe.
Leelo ɨnongwa ɨzyamwabho ɨzyo zisyalile,
lwa nɨnza,
nahayihuzibhɨɨha shinza.