Ɨkalaata ɨya nʼsontwa ʉPaulo hwa
Bhaluumi
Ʉtagaalizyo
Ɨkalaata ɨnɨ yahasimbwilwe nʉ nʼsontwa ʉPaulo hwa bhooziwa abha mwi‑ibooma ɨlyɨ Luumi, pɨpo ahanzaga hubhabhʉʉzye ɨnongwa ɨzyo ahalʉmbɨlɨɨye mu nsi ɨzyɨnjɨ. Ahubhabhʉʉzya huje, ɨNongwa ɨNyinza ɨzya Yeesu zilolesya ɨsho ʉNgʉlʉbhɨ ahubhabhaazizya ʉgolosu abhantu abha mu nsi zyonti hu lwɨtɨho. Hwa Bhayahuudi abhooziwa, ahubhabhʉʉzya huje ɨnongwa ɨzi zilɨɨho hwope mwi‑Ilagano ɨlyɨ Mandɨ. Hwɨ‑ɨbho saga Bhayahuudi, ahubhalanga huje ɨnongwa ɨzyo zihubhakʉndanya nʉ Ngʉlʉbhɨ na huje bhantu bhaakwe. Ayanga huje, hu lwɨtɨho ʉNgʉlʉbhɨ ahutibhaazizya ʉgolosu pitagaalila lyakwe. Ɨshi ʉNgʉlʉbhɨ saga ahutibhaazizya ʉgolosu hwi‑idala ɨlya‑alondolezye ɨndajizyo zyakwe. Lyoli nkashele tihunʼneshela ʉMʼpepo ʉMʼfinjile hutilongozye mu lemvu weetu, ɨpo tahayibha tilemba nanshi ɨsho ʉNgʉlʉbhɨ ahwanza.
Hu malishilo wɨ shitaabu ɨshi, ʉPaulo ayanga ɨnjendo ɨzyo abhooziwa bhahwanziwa abhe nazyo mu lemvu waabho. Amanyizya ɨsha hubhagane abhantu abhanjɨ. Amalɨɨzya hubhalamushe abhamanyani bhaakwe abha mu Luumi, ahunʼnamuha weeka weeka hwi‑itaawa lyakwe.
Ɨmbaatiho ɨzyɨ shitaabu ɨshi
1:1-15 Ɨnongwa ɨzya nʼsimbi nɨ‑ɨbho ahubhasimbila ɨshitaabu ɨshi
1:16-4:25 ɄNgʉlʉbhɨ ahubhabhaazizya abhantu ʉgolosu hwi‑idala ɨlyɨ lwɨtɨho lwene
5:1-8:39 Ɨmanyizyo ɨzyɨ wʉʉmi ʉpya ʉwa bhooziwa
9:1-11:36 ɄNgʉlʉbhɨ ahali abhasaluuye aBhayahuudi, ahayihubhafyʉla
12:1-15:33 Ɨnjendo ɨzya bhooziwa nɨ mbombo zya Paulo
16:1-27 Ɨndamuho zya Paulo hwa bhooziwa abha hu Luumi