Ɨkalaata ɨya hwande ɨya nʼsontwa ʉPaulo hwa
Bhakolinto
Ʉtagaalizyo
Ɨkalaata ɨnɨ yahasimbwilwe nʉ nʼsontwa ʉPaulo hwa bhooziwa abha hu Kolinto, ɨlyo lyahali libooma ligoosi mu mukowa ʉgwɨ Akaaya mu nsi ɨyɨ Yunaani. ɄPaulo ahalʉmbɨlɨɨye mwi‑ibooma ɨlyo ʉmwaha gweka na‑ashile (bhaazya ɨMbombo ɨzya Bhasontwa 18:1-18), abhantu abhinji bhahamʼmwɨtɨɨshe ʉYeesu. Leelo ʉPaulo lwa wasogola mu Kolinto, abhooziwa bhahanda alegane mu lwɨtɨho. Ahasimbile ɨkalaata ɨnɨ hubhaavwe abhooziwa bhaala, huje bhɨmɨɨlɨle shinza mu lwɨtɨho.
Mu kalaata ɨnɨ, ayanga ʉbhiibhi ʉwa‑alegane hwa bhooziwa nʉ wa‑adaliihane hu nongwa yɨ lwɨtɨho mu shibhanza. Ayanga ɨsho ʉMʼpepo ʉMʼfinjile sha‑ahutipeela ɨvikʉnjɨlwa ɨvinji, tee ʉkʉndwa ʉwo wuhutaavwa humʼpuute ʉNgʉlʉbhɨ na‑abhe nɨ njendo ɨnyinza mu lwɨtɨho. Nantele ahubhiizusya huje hwope atɨ timɨɨnye huje ʉYeesu ʉKilisiti ahayihutizyʉsya natɨ abhe bhʉʉmi nantele, pɨpo ʉmwene ahazyʉshɨle afume mwa bhafwe.
Ɨmbaatiho ɨzyɨ shitaabu ɨshi
1:1-9 ɄPaulo ahubhalamuha aBhakolinto na‑afumye ɨnsalifyo hwa Ngʉlʉbhɨ hu nongwa yaabho
1:10-4:21 Ayanga ɨgo ayʉmvwɨzye aga‑alegane mu shibhanza ɨsha hu Kolinto
5:1-6:20 Ahubhasunda abhooziwa ɨbho bhali nɨ njendo ɨzyɨ weegu nɨ zyɨ bhiibhi ʉwɨ waaji nʉ waaji
7:1-40 Ɨnsundo hu nongwa yɨ weeji
8:1-11:1 Ɨmanyizyo ɨzyɨ njendo ɨzyo zihwanziwa abhe nazyo mu bhantu ɨbho saga bhooziwa
11:2-14:40 Ɨmanyizyo hu nongwa yɨ‑ɨsho abhooziwa bhahwanziwa akʉndane mu shibhanza hu kʉndwa na hu tengaanu
15:1-58 Ɨmanyizyo ɨzya‑azyʉshe afume mwa bhafwe
16:1-24 Ʉzingatizu wa Paulo ʉwa‑abhale hu Kolinto