1 ABhakolinto 1

Ɨkalaata ɨya hwande ɨya nʼsontwa ʉPaulo hwa

Bhakolinto

ɄPaulo ahubhalamuha aBhakolinto

Ɨkalaata ɨnɨ ɨfumile huliinɨ anɨ nɨPaulo, nɨnʼsontwa wa Yeesu ʉKilisiti wɨ‑ɨnkwiziiwe nanshi ʉNgʉlʉbhɨ sha‑ahwanza. Anɨ peeka nʉ holo weetu mu lwɨtɨho ʉSositeene, 2 tihubhalamuha amwɨ mubhooziwa bha mwi‑ibooma ɨlyɨ Kolinto, amwɨ mwa musaluliilwe nʉ Ngʉlʉbhɨ huje mupatiihanywe nʉ Yeesu ʉKilisiti. Mukwiziiwe abhe bhafinjile peeka na bhantu bhonti abhɨ mbali zyonti ɨbho bhahunʼnaabha ʉYeesu ʉKilisiti, ʉyo yʉ Mwɨnɨ waabho nantele naatɨ Mwɨnɨ weetu.

3 Ɨmpyana nʉ tengaanu afume hwa Ngʉlʉbhɨ, ʉDaada weetu, na hwa Mwɨnɨ weetu ʉYeesu ʉKilisiti, vibhanje peeka naamwɨ.

Ɨnsalifyo zya Paulo hwa Ngʉlʉbhɨ

4 Ɨhunʼsalifya ʉNgʉlʉbhɨ waanɨ ɨnsiku zyonti hu nongwa yeenyu, hu mpyana ɨyo abhapiiye hwi‑idala ɨlya Yeesu ʉKilisiti. 5 Hwi‑idala ɨlya‑apatiihanywe nʉ Kilisiti muli nʉ tabhazi ʉwɨ vikʉnjɨlwa ɨvinji ɨvyo vili ʉwaaji nʉ waaji, tee mu njango zyenyu na mu njeele zyenyu. 6 Ɨgo gasimishizya huje ɨnongwa ɨzya Yeesu ʉKilisiti ɨzyo tahalʉmbɨlɨɨye huliimwɨ zyɨ lyoli. 7 Ɨshi saga mwahabhuliliilwe nka shikʉnjɨlwa sheeka ɨsha Mʼpepo ʉMʼfinjile, lwa mugʉʉla hu nsyʉkwo aweele hwa Mwɨnɨ weetu ʉYeesu ʉKilisiti. 8 Ahubhakhamantanya afishe hu malishilo, huje mubhe sinta mbuno isiku liila ɨlyo ʉMwɨnɨ weetu ʉYeesu ʉKilisiti ahayɨnza alonje abhantu. 9 ɄNgʉlʉbhɨ ahayibhomba ɨsho, pɨpo ʉmwene wɨ lyoli, abhomba gonti ɨgo ahayanjile huje ahayibhomba. Ʉyo ya yʉʉyo ʉyo ahabhakwiziizye amwɨ huje, mubhe nʉ lwʉmvwano nʉ Mwana waakwe ʉYeesu ʉKilisiti, ʉMwɨnɨ weetu.

Ʉlwʉmvwano mu shibhanza

10 Bhooziwa bhamwetu, ɨshi ɨhubhalaabha mwi‑ikhone lya Mwɨnɨ weetu ʉYeesu ʉKilisiti huje mubhe bhantu bha bhahwʉmvwana. Mugandi abhe ni‑ibho mwaliimwɨ, lyoli mubhe hantu heeka mwɨ‑ɨgo musɨbhɨlɨɨye. 11 Bhooziwa bhamwetu, abhantu bhamo abha mu nyumba ya Kilowe bhambʉzɨɨzye huje mwaliimwɨ huli ni‑idali. 12 Ɨshi, ɨgo ɨhwanza ayanje ga gɨɨga, shila muntu mwaliimwɨ ayanga agaakwe. Ʉmo ayiga, “Anɨ ɨndi wa Paulo.” Ʉwɨnjɨ ayiga, “Anɨ ɨndi wa Apoolo.” Ʉwɨnjɨ ayiga, “Anɨ ɨndi wa Keefa.” Ʉwɨnjɨ ayiga, “Anɨ ɨndi wa Kilisiti.” 13 Wɨlɨ, mubhomba shinza abagulanye ɨmpʉga ya Kilisiti ɨshi? Wɨlɨ, anɨ nɨPaulo nɨɨnɨ nahafwiye pa shikhobheehanyo hu nongwa yeenyu? Wɨlɨ, mwahoziiwe hwi‑itaawa lyanɨ?

14 Ɨhunʼsalifya ʉNgʉlʉbhɨ, hu nongwa ya‑aje saga nahamʼmwoziizye ʉmuntu nkʉ‑ʉmo huliimwɨ, lyoli yʉ Kilisipo nʉ Gaayo. 15 Ɨpo nʉʉmo ʉyo abhajiiye ayanje huje ayoziiwe mwi‑itaawa lyanɨ. 16 Nantele nahabhoziizye abhantu abha mu nyumba ya Siteefana. Ɨbho bha bhɨɨbho nahabhoziizye, saga ɨmɨɨnye huje nahamʼmwoziizye ʉmuntu ʉwɨnjɨ. 17 ɄKilisiti saga ahansonteleziizye anɨ hubhoozye abhantu, lyoli ahansonteleziizye alʉmbɨɨlɨle ɨNongwa ɨNyinza. Lwɨ‑ɨlʉmbɨɨlɨla ɨngandi asʉʉbhɨle ʉtengamazu waanɨ ʉwa‑ayanje shinza, huje ʉfwe ʉwa Kilisiti pa shikhobheehanyo wusahateezye ikhone lyakwe.

Ʉmanyiihanyi wa Ngʉlʉbhɨ

18 Ɨnongwa ɨzya‑afwe ʉKilisiti pa shikhobheehanyo, ɨbho bhateejile bhalola zyɨ lema, lyoli huliitɨ atɨ ɨbho tifyʉlɨɨlwe, ɨnongwa ɨzyo likhone lya Ngʉlʉbhɨ. 19 Nanshi ɨsho ɨsimbwilwe mu Nsimbo ɨMfinjile huje,

“Abhantu abhɨ tengamazu, nahayiwunangaanya ʉtengamazu waabho,

abhamanyiihanyi, nahayiteezya ʉmanyiihanyi waabho.”

20 Ɨshi bhali hwoshi ɨbho tiyiga bhali nʉ tengamazu? Bhali hwoshi ɨbho tiyiga abhamanyizyi abhɨ ndajizyo zya Moose, hwope abhantu ɨbho bhamɨɨnye ayanje shinza ɨnsiku ɨzi? ɄNgʉlʉbhɨ alolesiizye pa pazelu huje ʉtengamazu ʉwa mu nsi ɨnɨ lema. 21 ɄNgʉlʉbhɨ ahamuuye hu tengamazu waakwe huje, abhantu saga bhabhajiiye humʼmanye ʉNgʉlʉbhɨ hu tengamazu waabho. Leelo ʉNgʉlʉbhɨ asʉngwa hubhafyʉle ɨbho bhahumʼmwɨtɨha hwi‑idala ɨlyɨ nongwa ɨzyo tilʉmbɨɨlɨla. Abhantu ɨbho saga bhamʼmɨɨnye ʉNgʉlʉbhɨ bhayanga ɨzyɨ lema. 22 ABhayahuudi bhahwanza ɨvimanyishizyo huje bhɨɨtɨshe, aBhayunaani bhahwanza ɨnjeele. 23 Leelo atɨ, tinyampaanya ɨnongwa ɨzya Kilisiti ʉyo ahafwiye pa shikhobheehanyo. Ɨnongwa ɨzyo aBhayahuudi zihubhaviisya, nantele hwɨ‑ɨbho saga Bhayahuudi nongwa zyɨ lema. 24 Leelo hwɨ‑ɨbho ʉNgʉlʉbhɨ ahabhakwiziizye abhe bhaakwe, bhabhe Bhayahuudi awe bhabhe bha saga Bhayahuudi, ʉKilisiti yʉʉyo likhone lya Ngʉlʉbhɨ, nantele tengamazu wa Ngʉlʉbhɨ. 25 Enya, ɨnongwa ɨzyo abhantu bhalola huje lema wa Ngʉlʉbhɨ, zishilile ʉtengamazu wa bhantu. Nantele, ɨzyo bhalola dedebhazu wa Ngʉlʉbhɨ, zili ni‑ikhone ashile ikhone lya bhantu.

26 Ɨshi bhooziwa bhamwetu, mwizuhaje sha mwahali hu habhaazyo ha mwahakwiziwaaga nʉ Ngʉlʉbhɨ. Abhinji muuhati yeenyu bhahali bhaloleha aje saga bhali nʉ tengamazu pitagaalila lya bhantu. Nantele abhantu abhinji mwaliimwɨ saga bhahamanyiishe awe apaapwe mu nyumba ɨzya bhɨ nshɨnshɨ. 27 Leelo ʉNgʉlʉbhɨ ahabhasaluuye abhantu ɨbho mu nsi bhaloleha bhafwasu, huje abhakenyensye abhɨ tengamazu. Nantele, ʉNgʉlʉbhɨ ahabhasaluuye abhantu ɨbho bhaloleha mu nsi huje bhadedebhazu, huje abhakenyensye bha bhali ni‑ikhone. 28 ɄNgʉlʉbhɨ ahabhasaluuye abhantu abhapɨɨna mu nsi nɨ‑ɨbho bhasyonsheliilwe, hwa huje ɨbho bhaloleha aje saga bhantu, huje abhabhombe abhantu bha bhahwilola aje bhɨ nshɨnshɨ, bhabhe saga hantu. 29 Ahabhombile ɨsho huje ʉmuntu wowonti agandi hwibaade pitagaalila lya Ngʉlʉbhɨ. 30 ɄNgʉlʉbhɨ ya yʉʉyo abhabhɨɨshɨle amwɨ huje bhantu bha Yeesu ʉKilisiti. Ʉmwene amʼmɨɨshɨle ʉKilisiti huje tengamazu weetu. Hwa huje hwi‑idala ɨlya Yeesu tili bhagolosu pitagaalila lya Ngʉlʉbhɨ, tili bhafinjile, nantele tigomboliilwe. 31 Ɨnɨ ɨli nanshi ɨsho ɨsimbwilwe mu Nsimbo ɨMfinjile huje,

“Ʉmuntu wowonti ʉyo ahwibaada,

ahwibaade hu nongwa ya Mwɨnɨ ʉNgʉlʉbhɨ.”