Alʉmbɨɨlɨle ɨNongwa ɨNyinza ɨzya Yeesu ʉKilisiti
2
Bhooziwa bhamwetu,
hu habhaazyo ɨho nahɨnzɨle huliimwɨ alʉmbɨɨlɨle ɨnongwa ɨzya Ngʉlʉbhɨ ɨzyo zyahafisiilwe,
saga nahayanjile alolesye aje ɨmɨɨnye ayanje shinza,
awe huje ɨndi nʼtengamazu.
2 Nahabhombile ɨsho,
pɨpo nahamuuye huje saga ɨyanga ahantu ahanjɨ,
lyoli ayanje ɨnongwa ɨzya Yeesu ʉKilisiti,
haani afwe hwakwe pa shikhobheehanyo.
3 Hu habhaazyo ɨho nahali huliimwɨ,
nahali dedebhazu,
nahali nʉ wooga,
nantele nahayingaga tee.
4 Hu habhaazyo ɨho nahali ɨmanyizya na‑alʉmbɨɨlɨle,
saga nahayanjile amazwi hu tengamazu waanɨ,
huje ɨmbakʉndɨɨlɨzye abhantu hu nongwa yɨ tengamazu,
lyoli ikhone lya Mʼpepo ʉMʼfinjile lyahali lilolesya ɨlyoli.
5 Nahali ɨbhomba ɨsho,
huje ʉlwɨtɨho lwenyu lugandi asʉʉbhɨle ʉtengamazu wa bhantu,
lyoli lusʉʉbhɨle ikhone lya Ngʉlʉbhɨ.
Ʉmanyiihanyi afume hwa Mʼpepo ʉMʼfinjile
6 Ɨshi,
atɨ tiyanga ɨnongwa ɨzyɨ tengamazu hwa bhantu ɨbho bhajinile mu lwɨtɨho,
leelo ʉtengamazu ʉwo saga wa mu nsi ɨnɨ,
nantele saga wa bhalongozi abha mu nsi ɨnɨ ɨbho bhali nʉ malishilo wɨ longozi.
7 Leelo ʉtengamazu ʉwo tiyiga,
wa Ngʉlʉbhɨ,
ʉwo wahali wufisiilwe.
Hu habhaazyo ɨho ɨnsi ɨsɨɨle apelwe,
ʉNgʉlʉbhɨ ahasɨbhɨlɨɨye huwubhonesye ʉtengamazu ʉwo,
ɨpo atibhombele aminza.
8 Nʉʉmo nka weeka mu bhalongozi abhɨ habhaazyo ɨha ʉyo alimɨɨnye ɨlyo.
Nkashele bhamanyaga,
handɨ saga bhanʼkhomeelaga pa shikhobheehanyo ʉMwɨnɨ ʉMʼmwamu.
9 Leelo nanshi sha yahasimbwilwe mu Nsimbo ɨMfinjile huje,
“Ɨgo ʉNgʉlʉbhɨ ahabhabhɨshɨɨye ɨbho abhagɨɨne,
nʉʉmo ʉmuntu ʉyo alɨnjɨle hugalole hwope hugʉmvwe,
nʉʉmo ʉmuntu ʉyo alɨnjɨle hugasɨbhɨɨlɨle mu mwoyo gwakwe nka heeka.”a
10 Leelo atɨ ʉNgʉlʉbhɨ atilolesiizye ɨgo ashilile hwa Mʼpepo ʉMʼfinjile.
Enya,
ʉMʼpepo ʉMʼfinjile alola gonti,
hwope ɨgo gali hu mfiso ya Ngʉlʉbhɨ.
11 Nʉʉmo ʉmuntu ʉyo abhajiiye amanye ɨgo ʉmuntu ʉwɨnjɨ asɨɨbha,
lyoli gamanyiha hwa mwene yʉʉyo lwene.
Sha shɨɨsho,
gope ɨgo ʉNgʉlʉbhɨ asɨɨbha nʉʉmo ʉyo agamɨɨnye,
lyoli gamanyiha nʉ Mʼpepo wa Ngʉlʉbhɨ yʉʉyo lwene.
12 Ɨshi,
atɨ saga tahambɨlɨɨye ɨnsɨɨbho ɨzya mu nsi ɨnɨ,
lyoli tambɨlɨɨye ʉMʼpepo wa Ngʉlʉbhɨ,
huje timanye ɨgo tipewiilwe hu mpyana ya Ngʉlʉbhɨ.
13 Nantele,
saga tiyanga amazwi ɨgo timanyiziiwe nʉ tengamazu wa bhantu,
lyoli amazwi ɨgo timanyiziiwe nʉ Mʼpepo wa Ngʉlʉbhɨ.
Tihwilula ɨnongwa zya Mʼpepo ʉyo hwɨ‑ɨbho bha bhali nʉ Mʼpepo yʉnʉʉyo.
14 Leelo ʉmuntu ʉyo saga ali nʉ Mʼpepo wa Ngʉlʉbhɨ,
saga ahwambɨɨlɨla ɨgo gafuma hwa Mʼpepo wa Ngʉlʉbhɨ,
hu nongwa ya‑aje hwa mwene ɨgo gɨ lema.
Nantele,
saga abhajiiye hugaaganye,
pɨpo ʉmuntu ahugaaganya ɨgo hwi‑ikhone lya Mʼpepo ʉyo.
15 Lyoli ʉmuntu ʉyo alongozewa nʉ Mʼpepo wa Ngʉlʉbhɨ,
ʉyo ahugaaganya ɨgo gonti,
leelo abhantu ɨbho saga bhali nʉ Mʼpepo wa Ngʉlʉbhɨ saga bhabhajiiye humʼmwaganye ʉmwene.
16 Nanshi ɨsho ɨNsimbo ɨMfinjile ziyanga huje,
“Nʉʉmo ʉmuntu ʉyo agamɨɨnye ɨgo ʉMwɨnɨ ʉNgʉlʉbhɨ asɨɨbha,
nantele nʉʉmo ʉmuntu ʉyo abhajiiye humʼmwavwe ʉNgʉlʉbhɨ ɨnsɨɨbho.”
b
Leelo atɨ tibhooziwa tili nɨ nsɨɨbho zya zifuma hwa Kilisiti.