Ʉlwʉmvwano mu mbombo ya Ngʉlʉbhɨ
3
Bhooziwa bhamwetu,
hu habhaazyo nahali huliimwɨ,
saga nahali ɨyanga naamwɨ nanshi abhantu ɨbho bhalongozewa nʉ Mʼpepo wa Ngʉlʉbhɨ,
lyoli nahali ɨyanga naamwɨ nanshi abhantu ɨbho bhalongozewa nɨ nsʉngwo ɨzyɨ mʼbɨlɨ,
nantele nanshi abhaana abheela mu lemvu wa Kilisiti.
2 Abhaana abheela bhamwela isʉnsʉ,
saga bhahubhapeela ɨshalye ɨsha bhantu abhagoosi.
Ɨshi,
nanɨ nahabhapiiye ɨmanyizyo ɨmpʉpʉʉsu,
pɨpo mwahali musɨɨle ajine.
Hwope ɨshi musɨɨle ajine,
3 pɨpo musɨɨle muli nɨ njendo ɨzya mu nsi.
Paahati yeenyu pali nɨ jɨɨla ni‑ibho.
Wɨlɨ,
ɨgo saga galolesya huje musɨɨle mulongozewa nɨ nsʉngwo ɨzyɨ mʼbɨlɨ na‑abhe nɨ njendo ɨzya mu nsi?
4 Ɨyanga ɨlyo hu nongwa ya‑aje shila muntu ayanga ɨlyakwe,
ʉmo ayiga,
“Anɨ ɨndi wa Paulo,”
ʉwɨnjɨ ayiga,
“Anɨ ɨndi wa Apoolo.”
Ɨshi ɨgo galolesya huje,
musɨɨle mubhomba nanshi abhantu ɨbho saga bhamʼmwɨtɨɨshe ʉYeesu.
5 Ɨshi,
ʉApoolo yʉ naanu?
Anɨ nɨPaulo nɨ naanu?
Atɨ tili bhabhomvi ɨbho ʉNgʉlʉbhɨ ahatisonteleziizye hubhaavwe amwɨ humʼmwɨtɨshe.
Shila ʉmo abhombile nanshi sha‑ahapewiilwe nʉ Mwɨnɨ.
6 Anɨ nahavyalile ɨmbeyu,
ʉApoolo ahitiilila,
ʉNgʉlʉbhɨ yʉʉyo wa‑ahamezya na‑akuzye.
7 Ɨshi,
ʉNgʉlʉbhɨ wa‑akuzya yʉ wa hunʼsʉʉbhɨle,
saga wa‑avyala awe wa‑ahwitiilila.
8 Ʉyo avyala nʉ‑ʉyo ahwitiilila bhonti bhalɨngɨɨne,
ʉNgʉlʉbhɨ ahayihumʼpeela shila weeka ɨmpeesya yaakwe,
nanshi sha‑ahabhombile ɨmbombo yaakwe.
9 Enya,
ɨmbombo ɨyo tibhomba anɨ nʉ Apoolo,
ya Ngʉlʉbhɨ.
Namwɨ muli nʼgʉnda gwakwe nantele nyumba yaakwe.
10 ɄNgʉlʉbhɨ hu mpyana yaakwe anavwizye azenje ʉlwalo nanshi ʉnʼzenji ʉmwinza,
wa‑ali nʉ tengamazu,
ɨshi ʉmuntu ʉwɨnjɨ azenga pa mwanya yɨ lwalo ʉlwo.
Leelo ʉmuntu wowonti ayenyaaje shinza sha‑azenga pa mwanya yɨ lwalo ʉlwo.
11 Nʉʉmo ʉmuntu ʉyo abhajiiye azenje ʉlwalo ʉlwɨnjɨ.
Ɨnjanjile ɨsho hu nongwa ya‑aje ʉlwalo ʉlwo luzengwilwe yʉ Yeesu ʉKilisiti yʉʉyo.
12 Leelo pa mwanya yɨ lwalo ʉlwo,
ʉmuntu abhajiiye azenjele ɨzahaabu,
awe amajela,
awe amawe agɨ mpɨɨya ɨnyinji,
nantele abhajiiye azenjele amakwi,
awe amatʉndʉ,
awe amasole.
13 Ɨmbombo ya bhantu bhonti yahayiloleha shɨ‑ɨli.
Isiku liila ɨlya‑alongwe,
ɨmbombo zyonti zyahayibha pa pazelu,
pɨpo ɨmbombo ya muntu wowonti yahayijelwa hu mwoto ʉgwɨ longwe.
14 Nkashele ɨmbombo ya muntu yasyala,
ʉmuntu ʉyo ahayambɨɨlɨla ɨmpeesya.
15 Leelo nkashele ɨmbombo ya muntu yaapya,
ɨpo ahayiteezya vyonti,
leelo ʉmwene yʉʉyo ahayifyʉlwa,
lyoli ahayibha nanshi ʉmuntu ʉyo aponile mu mwoto.
16 Wɨlɨ,
saga mumɨɨnye huje amwɨ muli nyumba mfinjile ya Ngʉlʉbhɨ,
nantele ʉMʼpepo wa Ngʉlʉbhɨ akhala muuhati yeenyu?
17 Ɨshi ʉmuntu nkashele anangɨɨnye ɨnyumba ɨmfinjile ɨya Ngʉlʉbhɨ,
ʉNgʉlʉbhɨ anza hunʼnangaanye ʉmuntu ʉyo,
pɨpo ɨnyumba ɨya Ngʉlʉbhɨ nsangalusu,
ɨnyumba ɨyo mwɨmwɨ.
18 Ʉmuntu wowonti muuhati yeenyu agandi hwigobele huje ali nʉ tengamazu.
Ʉmuntu nkashele ahwilola huje ali nʉ tengamazu mu nsi ɨnɨ,
abhe ahwibhɨɨha nʼnema huje ayambɨɨlɨle ʉtengamazu ʉwɨ lyoli.
19 Abhombe ɨsho,
pɨpo ʉtengamazu ʉwa mu nsi ʉmu,
lemazu pitagaalila lya Ngʉlʉbhɨ.
Ɨshi nanshi sha yahasimbwilwe mu Nsimbo ɨMfinjile huje,
“ɄNgʉlʉbhɨ ahubhakhata abhɨ tengamazu mu shevu waabho.”a
20 Nantele ɨsimbwilwe mu Nsimbo ɨMfinjile huje,
“ɄMwɨnɨ azimɨɨnye ɨnsɨɨbho zya bhɨ tengamazu huje zyɨ shaana lwene.”b
21 Ɨshi ʉmuntu wowonti agandi hwibaade hu nongwa ya huje ʉmwene nʼsundwe wa mʼmanyizyi ʉmo.
Enya,
atɨ tenti ʉNgʉlʉbhɨ atibhɨɨshɨle hubhaavwe amwɨ,
22 ɨmbe nɨPaulo,
awe yʉ Apoolo,
awe yʉ Keefa hwa huje ʉPeeteli.
Nantele,
ʉNgʉlʉbhɨ abhapiiye ɨvintu vyonti hubhaavwe,
vibhe vya mu nsi,
awe vyɨ wʉʉmi,
awe vyɨ fwe,
awe ɨvyo vilɨɨho ɨshi,
awe ɨvyo vyahayibha,
ɨvyo vyonti vyenyu.
23 Nantele namwɨ muli bha Kilisiti,
wope ʉKilisiti wa Ngʉlʉbhɨ.