Ɨmbombo ya bhasontwa bha Ngʉlʉbhɨ
4
Abhantu bhatimanye huje,
atɨ tili bhabhomvi bha Kilisiti nantele tipewiilwe ɨmbombo ɨya‑alʉmbɨɨlɨle ɨnongwa zya Ngʉlʉbhɨ zya zyahafisiilwe.
2 Ɨshi,
ha hahwanziwa hwa muntu wowonti ʉmwɨmɨɨlɨli hubhe mʼmomvi nʼnʉnjɨsu.
3 Leelo anɨ huliinɨ,
saga ɨndi nʉ wooga hwope ɨndongwe naamwɨ,
hwope alongwe na bhalongozi abhi‑ikoloti.
Nantele hwope anɨ saga ɨhwilonga,
4 pɨpo saga ɨlongwa hu lyolyonti mu mwoyo gwanɨ.
Leelo ɨlyo saga lihumbɨɨha abhe nʼgolosu,
ʉMwɨnɨ ya yʉʉyo ʉyo ahundonga.
5 Ɨshi,
muleshe alonje abhantu lwa hasɨɨle afishe ahabhaazyo haakwe,
lyoli mugʉʉlɨle afishe isiku ɨlyo ʉMwɨnɨ ahayɨnza.
Ʉmwene ya yʉʉyo ahayikhozya ɨvintu vyonti ɨvyo vifisiilwe mu hiisi na‑alolesye ɨgo gali mu mooyo ga bhantu.
Ɨpo ʉNgʉlʉbhɨ ahayihubhamwamiha bhonti ɨbho bhakhondɨɨye amwamihwe.
6 Bhooziwa bhamwetu,
ɨnjanjile amazwi gonti ɨgo hu nongwa yaanɨ nʉ Apoolo,
huje tibhe shifwani huliimwɨ.
Afumilane nɨ shifwani ɨsho,
mumanye ɨgo gayangwa mu njango ɨnɨ huje,
“Mubhanje mulondolezya gagaala ɨgo gasimbwilwe mu Nsimbo ɨMfinjile.”
Nkashele mulondolezya ɨzyo,
saga mubha bhantu ɨbho bhahwibaada hu nongwa ya mʼmanyizyi weeka na hunʼsyonshele ʉwɨnjɨ.
7 Yʉ naanu,
ʉyo abhɨɨshɨle huje ʉkhondele tee ashile abhanjɨ?
Hantu heenu ɨho ʉli naho ɨho saga ʉpewiilwe nʉ Ngʉlʉbhɨ?
Leelo nkashele ʉpewiilwe,
yeenu ʉhwibaada nanshi aje saga ʉpewiilwe?
8 Ɨshi,
muhwilola mukwɨlɨɨne!
Muhwilola muli bhatabhazi!
Muhwilola muli bhamwɨnɨ,
poshe atɨ saga tili bhamwɨnɨ!
Hwashi nkashele mwabhanga bhamwɨnɨ lyoli,
huje atɨ tilongozye peeka naamwɨ!
9 Leelo huliitɨ atɨ tibhasontwa,
ɨlola ʉNgʉlʉbhɨ atibhɨɨshɨle huje bhantu ɨbho bhasyonshelwa ashile bhonti.
Tili nanshi abhantu ɨbho bhalongwilwe agogwe pitagaalila lya bhantu abhinji.
Tibhɨhwɨlwe nanshi abhɨ shaana mu nsi zyonti,
hu bhantumia na hu bhantu.
10 Abhantu bhahutilola atɨ tili bhalema,
pɨpo tihumʼmombela ʉKilisiti,
leelo amwɨ muhwilola muli bhɨ tengamazu,
pɨpo mupatihɨɨnywe nʉ Kilisiti.
Atɨ tiloleha tili sinta likhone,
leelo amwɨ muhwilola muli ni‑ikhone.
Amwɨ muhwilola muli bhɨ nshɨnshɨ,
leelo atɨ tisyonshelwa.
11 Hwope ɨshi,
tili nɨ nzala nɨ nyoota,
nantele saga tili na menda aga‑akwɨlane.
Tijendeelela akhomwe,
nantele saga tili na pantu apa‑akhale.
12 Tihwikankamula abhombe ɨmbombo zyetu hu nyoobhe zyetu tɨɨtɨ.
Ʉlwo abhantu bhahutiliga,
atɨ tihubhasaya,
lwa bhahutiyɨmvya,
tijimbiilila,
13 lwa bhahutiyanga ilenga,
tihubhaamula shinza.
Hwope ɨshi,
abhantu bhajendeelela hutilole atɨ aje tili nanshi ʉkhandamanu ʉwa mu nsi,
nantele huje saga tikhondɨɨye hu hantu hohonti.
14 Saga ɨhubhasimbila amazwi ɨgo huje ɨmbakenyensye,
lyoli ɨhwanza hubhasunde amwɨ nanshi abhaana bhaanɨ abhakʉndwe.
15 Poshe muli na bhantu abhinji ɨbho bhahubhasʉnga mwa Kilisiti,
lyoli ʉyise weenyu ali weeka.
Anɨ nɨ yise weenyu mwa Yeesu ʉKilisiti,
hu nongwa ya‑aje anɨ nɨɨnɨ nahali wa hwande alʉmbɨɨlɨle ɨNongwa ɨNyinza ɨzya Yeesu huliimwɨ.
16 Ɨshi,
ɨhubhalaabha mubhanje mubhomba nanshi ɨbhomba anɨ.
17 Ɨlyo lya lyɨlyo limbombile hunʼsonteelezye ʉTiimoti,
ʉmwana waanɨ ʉnʼkʉndwe,
ʉyo ɨhunʼsʉʉbhɨla mu mbombo ya Mwɨnɨ.
Ɨnʼsonteleziizye huje abhe ahubhiizusya gaala gonti ɨgo anɨ ɨhugalondolezya nanshi ʉnʼsundwe wa Yeesu ʉKilisiti,
ɨgo ɨhubhamanyizya abhantu mu vibhanza vyonti ɨvya bhooziwa.
18 Ɨshi,
bhamo mwaliimwɨ bhahwibaada,
pɨpo bhasɨɨbha huje saga nahayɨnza nantele huliimwɨ.
19 Leelo nkashele ʉMwɨnɨ asʉngwa,
nahayɨnza huliimwɨ nalinaali.
Ɨpo pa pɨɨpo nahayimanya amazwi ɨgo bhayanga ɨbho bhahwibaada,
leelo saga amanye amazwi gaabho lwene,
lyoli amanye ni‑ikhone lyabho ɨlyɨ lwɨtɨho.
20 Ɨyanga ɨsho,
pɨpo ʉwumwɨnɨ ʉwa Ngʉlʉbhɨb saga mazwi lwene,
lyoli likhone lya Ngʉlʉbhɨ.
21 Ɨshi,
muhwanza ɨmbombe yeenu?
Wɨlɨ,
ɨmbɨnzɨle nɨ ndɨɨsa?
Awe ɨmbɨnzɨle hu kʉndwa nʉ mwoyo ʉmwoloolo?