Ɨvikʉnjɨlwa ɨvya Mʼpepo ʉMʼfinjile
12
Ɨshi bhooziwa bhamwetu,
ɨyanga hu nongwa yɨ vikʉnjɨlwa afume hwa Mʼpepo ʉMʼfinjile,
pɨpo ɨsʉngwa huje muvyaganye shinza.
2 Mumɨɨnye huje lwa saga mumʼmwɨtɨɨshe ʉNgʉlʉbhɨ,
mwahagobeliilwe na‑alongozewe apuute abhangʉlʉbhɨ poshe saga bhayanga.
3 Ɨshi,
ɨhubhabhʉʉzya huje,
ʉmuntu wowonti ʉyo alongozewa nʉ Mʼpepo wa Ngʉlʉbhɨ saga abhajiiye ayanje huje,
“ɄYeesu agunwe.”
Nantele,
ʉmuntu wowonti ʉyo saga alongozewa nʉ Mʼpepo ʉMʼfinjile saga abhajiiye ayanje huje,
“ɄYeesu yʉ Mwɨnɨ.”
4 Vilɨɨho ɨvikʉnjɨlwa ɨvyɨ waaji wuwinji wuwinji,
leelo ʉMʼpepo ʉMʼfinjile ali weeka ʉyo ahuvigabha ɨvikʉnjɨlwa ɨvyo.
5 Nantele humʼmombele ʉMwɨnɨ huli nʉ waaji wuwinji wuwinji,
leelo ʉMwɨnɨ ali weeka ʉyo tihumʼmombela.
6 Nantele abhombe ɨmbombo huli nʉ waaji wuwinji wuwinji,
leelo ʉNgʉlʉbhɨ ali weeka ʉyo abhomba ɨmbombo zyonti mu bhantu bhonti.
7 Shila mwoziwa apewiilwe ɨshikʉnjɨlwa huje abhonesyaje pa pazelu ɨmbombo ɨzya Mʼpepo ʉMʼfinjile,
huje bhonti bhabhanje bhahwavwana.
8 ɄMʼpepo ʉMʼfinjile ʉyo ahumʼpeela ʉmuntu ʉmo ɨshikʉnjɨlwa ɨsha‑ayanje amazwi agɨ njeele,
ʉwɨnjɨ ʉMʼpepo yʉʉyo ahumʼpeela ɨshikʉnjɨlwa ɨshɨ mazwi agɨ manyiihanyi.
9 ɄMʼpepo yʉʉyo weeka ahumʼpeela ʉwɨnjɨ ɨshikʉnjɨlwa ɨsha‑abhe nʉ lwɨtɨho,
ʉwɨnjɨ ahumʼpeela ɨshikʉnjɨlwa ɨsha‑aponie,
10 ʉwɨnjɨ ɨshikʉnjɨlwa ɨsha‑abhombe amayele,
ʉwɨnjɨ ɨshikʉnjɨlwa ɨsha‑afumye ʉkuwi,
ʉwɨnjɨ ɨshikʉnjɨlwa ɨsha hugamanye amapepo nʉ Mʼpepo ʉMʼfinjile,
ʉwɨnjɨ ɨshikʉnjɨlwa ɨsha‑ayanje hu njango ɨnjenu,
ʉwɨnjɨ ɨshikʉnjɨlwa ɨsha hwilule ɨnjango ɨzyo.
11 ɄMʼpepo yʉʉyo weeka abhomba ɨmbombo ɨzyo zyonti.
Ʉmwene ahumʼpeela shila muntu ɨshikʉnjɨlwa shaakwe,
nanshi ɨsho asʉngwa yʉʉyo ʉMʼpepo.
Ʉmʼbɨlɨ gweka, ɨvipelwa vinji
12 Ɨshi,
ʉmʼbɨlɨ guli nɨ vipelwa vinji,
vyonti ɨvyo vili mʼbɨlɨ gweka.
Nanshi ʉmʼbɨlɨ sha guli,
ɨsho sha shɨɨsho zili na hwa Kilisiti.
13 Atɨ tenti,
tibhe Bhayahuudi awe tibhe bha saga Bhayahuudi,
tibhe bhakalwe awe tibhe bhasatulwe,
tahoziiwe hu Mʼpepo ʉMʼfinjile weeka na humʼmwambɨɨlɨle ʉMʼpepo yʉʉyo weeka,
huje tibhe mʼbɨlɨ gweka.
14 Ʉmʼbɨlɨ saga guli nɨ shipelwa sheeka,
lyoli ɨvipelwa vinji.
15 Nkashele ɨshinama shayangaga huje,
“Anɨ saga ɨndi nʼkhono,
ɨshi saga ɨndi wɨ mʼbɨlɨ,”
wɨlɨ,
saga shipelwa shɨ mʼbɨlɨ hu nongwa ɨyo?
16 Lyope ikutu nkashele lije,
“Anɨ saga ɨndi liiso,
ɨshi saga ɨndi wɨ mʼbɨlɨ,”
wɨlɨ,
saga libha lyɨ mʼbɨlɨ hu nongwa ɨyo?
17 Nkashele ʉmʼbɨlɨ gwonti gwabhanga liiso,
ʉmuntu wɨnzaga hwʉmvwe wɨlɨ?
Awe nkashele ʉmʼbɨlɨ gwonti gwabhanga likutu,
ʉmuntu wɨnzaga‑anunsye wɨlɨ?
18 Leelo ʉNgʉlʉbhɨ avibhɨɨshɨle ɨvipelwa vyonti ɨvyɨ mʼbɨlɨ nanshi ahasʉngwɨlwe ʉmwene.
19 Nkashele ʉmʼbɨlɨ gwabhanga shipelwa sheeka lwene,
wɨlɨ,
gwabhanga mʼbɨlɨ wɨlɨ?
20 Leelo ɨvipelwa vinji,
lyoli ʉmʼbɨlɨ guli gweka.
21 Iliiso saga libhajiiye hugubhʉʉzye ʉnʼkhono huje,
“Aawe saga ɨhuhwanza.”
Hwope itwe saga libhajiiye hugabhʉʉzye amanama huje,
“Amwɨ saga ɨhubhanza.”
22 Leelo ɨvipelwa ɨvyo viloleha videdebhazu mu mʼbɨlɨ,
ɨvyo vya vihwanziwa tee.
23 Nantele,
ɨvipelwa ɨvyo viloleha huje vya‑asyonshelwe,
vya vyɨvyo ɨvyo tihuvimwamiha tee.
Vyope ɨvipelwa ɨvyo viloleha hutileetele ɨnsoni,
ɨvyo vya vyɨvyo tihuvifisa tee.
24 Nantele,
ɨvipelwa ɨvyo viloleha abhe vinza,
saga vihwanziwa afiswe nanshi ɨvyɨnjɨ.
Lyoli ʉNgʉlʉbhɨ avipatihɨɨnye peeka ɨvipelwa ɨvyɨ mʼbɨlɨ,
nantele ɨvyo visyonshelwa ahuvimwamiha.
25 Ʉmwene ahabhombile ɨsho huje ɨvipelwa ɨvyɨ mʼbɨlɨ vigandi alegane,
lyoli vyonti vyavwanaje.
26 Nkashele ɨshipelwa sheeka shivwalɨɨye,
vyonti vivwalala peeka nɨ sheene.
Nantele ɨshipelwa sheeka nkashele shimwamihwa,
vyonti vibha nʉ luseshelo peeka nɨ sheene.
27 Ɨshi,
amwɨ muli mʼbɨlɨ gwa Kilisiti,
shila mwoziwa ali shipelwa mu mʼbɨlɨ ʉgwo.
28 Mu shibhanza,
ʉNgʉlʉbhɨ abhabhɨɨshɨle abha hwande bhasontwa,
abha bhɨɨlɨ bhakuwi,
abha taatu bhamanyizyi.
Nantele,
ahabhabhɨɨha ɨbho bhabhomba amayele,
ɨbho bhali nɨ shikʉnjɨlwa ɨsha‑aponie abhabhinu,
ɨbho bhali nɨ shikʉnjɨlwa ɨsha hubhaavwe abhanjɨ,
ɨbho bhali nɨ shikʉnjɨlwa ɨsha‑alongozye,
nɨ‑ɨbho bhali nɨ shikʉnjɨlwa ɨsha‑ayanje hu njango ɨnjenu.
29 Wɨlɨ,
abhantu bhonti bhasontwa?
Wɨlɨ,
abhantu bhonti bhakuwi?
Wɨlɨ,
abhantu bhonti bhamanyizyi?
Wɨlɨ,
abhantu bhonti bhabhomba amayele?
30 Wɨlɨ,
abhantu bhonti bhali nɨ shikʉnjɨlwa ɨsha‑aponie abhabhinu?
Wɨlɨ,
abhantu bhonti bhayanga hu njango ɨnjenu?
Wɨlɨ,
abhantu bhonti bhapewiilwe ahwilule ɨnjango ɨzyo?
31 Ɨshi,
munyonywaje ahwanze ɨvikʉnjɨlwa ɨvigoosi.
Leelo nasʉʉti ɨhwanza hubhabhʉʉzye idala ɨlyo linza tee.